1. Maganu Qaali kaaˈlannonkehu hiittoonniiti?

YIHOWA Bayira Rosiisaanchonke ikkino daafira, iillannonke fonqolo baala qeelle saˈˈa dandiineemmo. (Isa. 30:20, 21) Qaalisi, ‘guuta woy ikkadda ikkineemmo gedenna dancha coye assate qixxaamboommore ikkineemmo gede’ kaaˈlannonke. (2 Xim. 3:17) Qullaawu Maxaafi rosi garinni heeˈneemmoha ikkiro, tenne alame hayyo harunsanno manninni roore hayyoota ikkineemmo.—1 Qor. 3:19; Far. 119:97-100.

2. Konni birxichira maa ronseemmo?

² Konninni aanchine laˈneemmonte gede, tenne alame hayyo maalu hasattonke wonshiˈneemmo gede jawaachishshanno. Konni daafira, alamete wido ikkino manni hedonna assooti hunannonkekki gede qoropha shota ikka hooggankera dandiitanno. Qullaawu Maxaafi, “Mannu hayyonninna awaawurshunni ayino woshshaadannoˈnekki gede agadhe” yee amaalannonkehu mulla diˈˈikkino. (Qol. 2:8) Konni birxichira, Sheexaanu rosiisannohu lamu kaphi halaˈlanni dayino gara ronseemmo. Qoleno tenne alame hayyo gowwimmate yineemmohu mayiraatironna Maganu Qaali giddo noo hayyo alamete hayyo koˈo hunte roortanno yineemmo gede assannonkeri maatiro laˈneemmo.

3-4. Lemiikki sani hanafonni kayise, mannu amanyooti soorraminohu hiittoonniiti?

³ Lemiikki sani hanafonni kayise, mannu amanyooti lowo geeshsha soorramino. Biˈreera batinyu manni, siimu xaadooshshe assa hasiissannonsari adhamino manna callaho yee ammananno; qoleno alba tini haja mannu albaanni hasaambannita diˈˈikkitino. Galte hossanni kayinni, tini gatteenna mannu amanyootu maaeelle lashshi asse agura hanafi.

 ⁴ Umihu Alamete Oli uurri gedensaanni noo dirra giddo, mannu maafudi lowo geeshsha soorramino. Mitte xiinxallaancho xawissino garinni, hatte yannara “filme, tiyaatire, sirbu, qalote borronna egensiishshu siimu xaadooshshi assoote leellishannoha ikkino.” Hakkawaro, mannu albinni roore siimu xaadooshshi hasatto kakkayisanno garinni sirbanna teeda dibbannokki uddano uddiˈra hanafino. Qullaawu Maxaafi goofimarchu yanna daafira masaalino masaalo garinni, mannu “qiniitesi [“maalaamittete hagiirre,” NW] baxannoha” ikkino.—2 Xim. 3:4.

5. Mannu amanyooti 1960 ballinni kayise soorraminohu hiittoonniiti?

⁵ Adhammikki mitteenni heeˈra, labbaahu labbaahu ledo woy meyati meyate ledo adhama, hattono gari korkaati nookkiha galte diiga 1960 ballinni kayise roore rosaminore ikkino. Batinyu boohaarshira siimu xaadooshshe faajjetenni leellisha hananfoonni. Saˈute lowo dirra giddo, kuni maaeelu amanyooti abbino qarri xawe leellino. Mitte fullahaancho mannu amanyootu seera harunsa aguransa lowore daaffinota coyidhino; lawishshaho batinye maate diigantino, annu woy ama calla lossidhanno ooso batidhino, godowa xissiisiˈrino manninna teeda baˈino misilla laˈˈa araado ikkitino manni batiˈrino. Qoleno Eedisinna siimu xaadooshshinni saˈˈannohu wolu dhibbi halaˈlino. Kuri baalunkuri tenne alame hayyo gowwimma ikkitinota leellishanno.—2 Phe. 2:19.

6. Alamete siimu xaadooshshira noose lao Sheexaanu hasiˈranno gedeete yineemmohu mayiraati?

⁶ Alamete siimu xaadooshshira noose lao Sheexaanu hasiˈranno gedeete. Maganu mannu oosora uyinota siimu xaadooshshinna adhamate elto afimalsinanna laˈˈanno woyite Sheexaaneho tashshi yaannositi egennantinote. (Efe. 2:2) Fooranno manni, Maganu mannu ile ilamanno gede uyino elto mishannota leellishanno; qoleno fooranno manni hegerera heeˈrate hexxonsa huˈnanni no.—1 Qor. 6:9, 10.

7-8. Qullaawu Maxaafi siimu xaadooshshi daafira hiikkonne kawajjaamo roso rosiisanno?

⁷ Tenne alame hayyo harunsanno manni Qullaawu Maxaafihu amanyootu seeri furro fuuqqo hoˈlannoho yee mishanno. Kuni manni ‘Maganu siimu xaadooshshi hasatto oye kalaqinkena, tenne hasatto wonshiˈneemmota mayira hoolannonke?’ yee hedannoha ikkara dandaanno. Insa togo yite heddannohu ‘Manchu wodanisi halchinore baala assa hasiissannosi’ yitannoti gara ikkitinokki lao noonsa daafiraati.  Qullaawu Maxaafi kayinni hatto diyaanno. Qullaawu Maxaafi, Maganu mannu oosora gara ikkitinokki yorto qeeˈlate dandoo oye ayirrisinonsata kulanno. (Qol. 3:5) Qoleno Yihowa, mannu ooso siimu xaadooshshi hasattonsa amanyootu noo garinni wonshiˈra dandiitanno gede adhanna adhama qixxeessino. (1 Qor. 7:8, 9) Konni daafira, minaanninna minaama foorre abbitanno gaabbonna yaaddo nookkiha siimu xaadooshshinni hagiidha dandaanno.

⁸ Qullaawu Maxaafi tenne alame hayyo gede ikkikkinni, siimu xaadooshshira gara ikkitino lao heedhannonke gede rosiisannonke. Qullaawa Borro siimu xaadooshshi hagiirsiisannore ikkinota xawisse kultanno. (Law. 5:18, 19) Ikkollana togono yitanno: “Mittu mittunku galteˈne ledo hiitto ikkitine qullaawanna ayirrado heeshsho heedhinanniro afa hasiissannoˈne. Magano affinokki daga gede foorrete hamaande heedhoonkeˈne.”—1 Tes. 4:4, 5.

9. (a) Lemiikki sani hanafora Yihowa soqqamaasine Maganu Qaali giddo noota taalle nookki hayyo harunsitanno gede jawaachinshoonninsahu hiittoonniiti? (b) Umi Yohaannisi 2:15, 16​te hiitti kaajja amaale no? (c) Roomu Sokka 1:24-27 kultanno garinni, hiikkunni bushu amanyootiwiinni xeertiˈra hasiissannonke?

⁹ Lemiikki sani hanafora heedhinori Yihowa soqqamaano ‘saala hoogino’ manni tuqisanno kaphinni didogantino. (Efe. 4:19) Insa Yihowaha amanyootu seera cuˈmidhe heeˈrate sharrantino. Onkoleessa 15, 1926nniti Agarooshshu Shae togo yitanno: “Labbaahunna meyati mimmitu ledo noonsa aantenni hedonsannino ikko assootinsanni qullaawoota ikka hasiissannonsa.” Yihowa soqqamaasine qooxeessinsara heeˈranno manni harunsanno amanyooti ikkihano ikkiro, Maganu Qaali giddo noota taalle nookki hayyo harunsitanno. (1 Yohaannisi 2:15, 16 nabbawi.) Maganu Qaalesi uyinonke daafira lowo geeshsha galaxxineemmosi! Qoleno Yihowa ayyaanaamittete sagale hasiissannonke yannara aannonke daafira galaxxineemmosi; togoo rosi alamenniha busha amanyoote harunsineemmokki gede kaaˈlannonke. *—Roomu Sokka 1:24-27 nabbawi.

10-11. Qullaawu Maxaafi goofimarchu yanna daafira mayyee masaalino?

¹⁰ Qullaawu Maxaafi goofimarchu yannara mannu “umosi baxannoha” ikkannota balaxe masaalino. (2 Xim. 3:1, 2) Konni daafira, alame mannu umonsa calla baxanno gede jawaachishase dhagge diˈˈikkitannonke. Mittu maxaafi xawisino garinni, 1970 balla “mannu umisi heeshsho umisinni seekkiˈranno gede amaaltanno maxaaffa” batidhino. Mite maxaaffa “mannu ayimmansa huwatanno gedenna insaneeto baxanno gede, hattono umonsa boonanno gede jawaachishshanno.” Kuri maxaaffa giddo mittu togo yaanno: “Xaa geeshsha alamete aana heeˈrino manni baalunkunni roore xuma ikkinohanna waagu noo mancho baxi; hakku manchi ateeti.” Kuni maxaafi manchu “umosi ammaˈnote gede asse harunsanno gede yaano tiiˈˈisi kulannosi garinni hasiˈrinore baala assanno gede, hattono budisira noo seeri giddonni injaannosiha doodhe harunsanno gede jawaachishanno.”

¹¹ Tini maa qaagatto gede assitannohe? Sheexaanu Heewanino togoo coye assitanno gede amaalino. ‘Maganu gede danchanna busha badde afattata ikkatta’ yiinose. (Kal. 3:5) Xaa yannara batinyu manni ninke ikkinohu dino yee hedanno daafira, aye manchino wole agurina Maganu nafa danchanna busha bade kulansara dihasiˈranno. Lawishshaho, adhanna adhamate daafira noonsa lao tenne leellishshanno.

12. Alame adhanna adhamate daafira mayitanno?

¹² Qullaawu Maxaafi minaanninna minaama  mimmito ayirrisanno gedenna adhami woyite eino qaale agadhe heeˈranno gede hajajanno. Qoleno minaanninna minaama babbaxxikkinni mitteenni heeˈra hasiissannonsata kulanni, “Mannu annasinna amasi agure, galtesi ledo mitto ikkanno; lamunku mitto biso ikkitanno” yaanno. (Kal. 2:24) Tenne alame hayyo harunsanno mannira kayinni baxxitino lao noonsa; kuni manni, minaanni woy minaama uminsa hasatto calla illachisha hasiissannonsa yee hedanno. Mittu adhama diigate daafira kulanno maxaafi togo yaanno: “Mite gobbara, mannu bashsho adhamanno woyite qaale eanni ‘Heeshshotenni mitteenni heeˈnoommo geeshsha’ yaannota agure, ‘Baxillinke noo geeshsha’ yaate higino.” Konni garinni adhanna adhama ayirrisa hooga, batinye maate diigantannonna lowo manni xissiisiˈranno gede assitino. Addanko, alame adhanna adhamate daafira rosiissanno rosi gowwimma ikkinoti xabbe leeltino.

13. Yihowa booˈnaleeyye giwanno korkaati giddo mittu maati?

¹³ Qullaawu Maxaafi, ‘Kaaliiqi booˈnaleessa wodana tiyyire giwanno’ yaanno. (Law. 16:5) Yihowa booˈnaleeyye woy naaxxitannore giwannohu mayiraati? Umonsa calla baxannonna insaneeto bokkeessanno manni Sheexaanu akata leellishanno daafiraati. Hanni hedi: Maganu woˈmankare kalaqate horoonsiˈrinoha Yesuusa, Sheexaanu kumbuulte magansiˈrie yaasi isi mageeshshi geeshsha booˈnaaleessa ikkinoro leellishshanno! (Mat. 4:8, 9; Qol. 1:15, 16) Umonsa bokkeessanno manni, tenne alame hayyo Maganu albaanni gowwimma ikkitinota leellishanno.

14. Roomu Sokka 12:3 ninkeneetira quwa saˈneemmokki gede kaaˈlitannonkehu hiittoonniiti?

¹⁴ Qullaawu Maxaafi ninkeneetira quwa saˈinokki lao heedhannonke gede kaaˈlannonke. Quwa saˈnikki meessaneeto baxa soˈro ikkitinokkita kulanno. Yesuusi, “Manna umikki gede assite baxi!” yaasi, hasiisannonkere bikkunni wonshiˈra gara ikkitinota leellishshanno. (Mat. 19:19) Ikkollana, Qullaawu Maxaafi umonke wolu manninni roorsine laˈneemmo gede dirosiisanno.  Hatteentenni, “Umoˈne roorsidhine haafu adhawarshinni mittore nafa assitinoonte. . . . Wolu manni kiˈnenni roorinohu gede assitine hedde” yaanno.—Fil. 2:3; Roomu Sokka 12:3 nabbawi.

15. Qullaawu Maxaafi meessaneeto baxate daafira aanno amaale kaaˈlitannote yaatto gede assinoheri maati?

¹⁵ Xaa yannara hayyootaho yine hendannihu batinyu manni, Qullaawu Maxaafi meessaneeto baxate daafira aanno amaale mishanno. Togoo manni ‘Wolootu ninke roortanno yine hendeemmoha ikkiro, mannu miicannonke’ yaanno. Ikkollana Sheexaanu alame tuqissannoti ‘Umokki calla baxi’ yitanno hedo abbitino qarra heda hasiissanno. Ati maa wodanchootto? Umonsa calla baxanno manni hagiirraammaho? Maatensa hagiirraamete? Addu jaalla noonsa? Maganu ledo muli jaalooma kalaqiˈra dandiitino? Tenne baala hedatto woyite, alamete hayyo harunsanso, Maganu Qaali giddo noo hayyo harunsa roortanno?

16-17. Magano galaxxineemmo gede assannonkeri maati? Mayira?

¹⁶ Alame hayyootu gede assite laˈanno manni aanno amaale harunsa, doogo baˈe noosi mancho doogo xaˈmate gedeeti. Yesuusi isi waro hayyootu gede assine laˈnanni manni daafira coyiˈranni togo yiino: “Insa illiweelte heedhe illiweeloota massaggannoreetina agurre. Illiweelu illiweelo massagiro lamunku balete ubbanno.” (Mat. 15:14) Addanko, tenne alame hayyo Maganu albaanni gowwimmate.

¹⁷ Qullaawu Maxaafi giddo nooti kaajja amaale woˈmanka woyite “halaale rosiisate, sodhinore seejjate, soˈro hoolatenna halaalaancho heeshshora ikkanno biddishsha aate [kaaˈlitannota]” taje leellishshanno. (2 Xim. 3:16) Yihowa tenne alame hayyo doggannonkekki gede, dirijjitesi widoonni agarannonke daafira lowo geeshsha galaxxineemmosi! (Efe. 4:14) Isi aannonketi ayyaanaamittete sagale, Qaalisi giddo noo biddishsha seekkine harunsineemmo gede jawaante ikkitannonke. Qullaawu Maxaafi giddo noota taalle nookki amaale harunsa lowo ayirrinyeeti!