1. Mitootaho xiinxalla qarra ikkitannonsahu mayira ikkara dandaanno?

XAA yannara batinyu manni heeshshote hasiisannonsare afiˈrate uffi qocci yaanno. Lowo roduuwinkeno maatensara hasiisannore wonshate seeda saate loossanno. Wolootaho kayinni loosu base haˈratenna higate lowo yanna hasiissannonsa. Hasiisannonsare afiˈrate wolqate looso loossannorino woˈmitino. Kuri jawaatte loossanni hossanno roduuwanke, hawarro daafursannonsati egennantinote! Konni garinni daafurte hossinorira xiinxalla gooddo ikkitansara dandiitanno.

2. Xiinxallote injiitannohe yanna hiittenneeti?

² Ikkollana ninke baalunku Maganu Qaalenna Qullaawu Maxaafi aana xintantino borro seekke xiinxallate yanna gaaˈma hasiissannonke. Yihowa ledo danchu jaaloomi heeˈrannonkehunna hegere heeshsho afiˈneemmohu hatto assinummoro callaati! (1 Xim. 4:15) Mitootu soodo gutte kaˈe qaxaqaˈa yee heeˈreenna hattono daafuru fulinonsa yannara xiinxallitanno. Wolootu kayinni hawarro shiima daqiiqa gaaˈmite, hedonsa billaallitanno gede assannori nookkiwa ayyaanaamittete sagale sagaˈlitanno, hattono hiincitanno.

3-4. Attammanninna elekitiroonikisetenni qixxeessinanni borro lainohunni maa biddi assinoonni? Mayira?

³ Xiinxallate yanna gaaˈma hasiissannota afootto. Ikkollana, Maa xiinxalla hasiissannonke? ‘Nabbambanniri baete. Kayi baalankare nabbawe guda didandoommo’ yite hedattoha ikkara dandaanno. Mitootu shiqqannonketa ayyaanaamittete sagale baala sagaˈla dandiitinoha ikkirono, batinyu roduuwinkera kayinni togo assitanno yanna afiˈra qarra ikkitinonsa. Aliidi Bisino tenne afino. Konni daafira, muli diri kawa attammannitano ikko elekitiroonikisetenni qixxeessinanni borro ajinshoonni.

⁴ Lawishshaho, jw.org^® aana hattono JW Biroodikaastera batinye jawaachishshanno woˈnaalshuwa fultanno daafira, Yihowa Farciˈraasineha Diru Maxaafa qixxeessa agurroonni. Qoleno mannaho  ellanniti Agarooshshu Shaenna Baqqi Yiiyye! yinanni metseete xa dirunni sase higge calla fultanno. Hatto assinoonnihu, magansiˈranke ledo xaadooshshe afiˈrinokki coye assineemmota roore yanna afiˈnammora hende diˈˈikkino. Hatteentenni ‘roore hasiisanno coye’ illachinsheemmo gedeeti. (Fil. 1:10) Konninni aanchine roore hasiissanno coyibba illachishanna Qullaawu Maxaafi xiinxallonni kaaˈlo afiˈra dandiineemmo gara ronseemmo.

5-6. Seekkine xiinxalla hasiissannonke borro hiittenneeti?

⁵ Balaxisiisa hasiissannonkeri maati? Maganu Qaale barru baala xiinxallate yanna gaaˈma hasiissannonketi egennantinote. Lamalannite Qullaawu Maxaafi niwaawera nabbambanni fooliishshuwa ajinshoonnihu nabbamboommore hiincatenna seekke xiinxallate yanna afiˈneemmo gedeeti. Mixonke nabbambammora kulloonninke gafa nabbawe guda calla ikkitukkinni Qullaawu Maxaafi sokka wodananke kakkayissannonna Yihowawa roore shinqeemmo gede kaaˈlitannonke gedeeti.—Far. 19:14.

⁶ Seekkine xiinxalla hasiissannonketi wole borro hiittenneeti? Agarooshshu Shaenna Songonnite Qullaawu Maxaafi Xiinxallora, hattono Kiristaanu Heeshshonna Soqqansho Gambooshshiwa shiqqanno kifilla seekke qixxaawa hasiissannonketi egennantinote. Qoleno yannate kiiro fultannota Agarooshshu Shaenna Baqqi Yiiyye! yinanni metseetta faana ganne nabbawa hasiissannonke.

7. Webisayitenkera woy JW Biroodikaastera fulannore baala faana ganne nabbawa woy laˈˈa dandaa hoongummoro hexxo mudha hasiissannonkekkihu mayiraati?

⁷ Ikkollana ‘JW Biroodikaasteranna jw.org aana fulano rosino lowoho’ yite hedattoha ikkara dandaanno. Hanni mitto lawishsha laˈno: Hoteelete addi addi sagale heedhanno. Ikkollana mannu noo sagale baala hajaccannokkiti egennantinote. Hatteentenni gama sagale calla doorre hajaccinanni. Hatteente gede, atino elekitiroonikisetenni qixxaawinore baala horoonsiˈra dandaa hoogittoro, hexxo mudhitooti. Dandiitto geeshsha nabbawatenna laˈˈate woˈnaali. Xa hanni xiinxallote yaa mayyaateronna xiinxallonkenni horo afiˈra dandiineemmohu hiittoonniitiro laˈno.

8. Agarooshshu Shae xiinxallora qixxaawatto woyite maa maa assa dandaatto? Hatto assa kaaˈlitannohehu hiittoonniiti?

⁸ Xiinxallote yaa, roso afiˈrate yine nabbambannire seekke illachishate. Qoleno xiinxallineemmo borro iimi adda calla nabbawanna xaˈmote dawaro ikkitanno hedo xuruura calla diguddanno. Lawishshaho, Agarooshshu Shae qixxaawatto woyite balaxxe birxichu hanafora nooha rosu guulcho nabbawi. Hakkiinni birxichu cuˈmo, cinaancho birxichuwanna xaphishshu xaˈmuwa taxxi yite hedi. Aanchite woˈma birxicho sununni wodanchitanni nabbawi. Gufonnita qara hedo amaddinota coyi fooliishsho illachishi; duucha woyite tini coyi fooliishsho heedhannohu gufota hanaforaati. Qara hedo amaddinoti coyi fooliishsho, hatti gufo mayi daafira xawissanni nooro afate kaaˈlitannohe. Woˈma birxicho nabbawatto woyite, mitte mittenti gufo cinaanchu birxichi ledo, hattono rosu cuˈmo ledo mayi xaadooshshe afidhinoro hedi. Gari geeshsha egennoottokki qaalla hattono ledde xiinxalla hasiˈratto hedo borreessite amaxxi.

9. (a) Agarooshshu Shae xiinxallineemmo woyite qummeeshshuwa illachisha hasiissannonkehu mayiraati? Hatto assa dandiineemmohu hiittoonniiti? (b) Iyyaasu 1:8 yitanno garinni, qummeeshshuwa nabbawano agurranna maa assa hasiissannonke?

⁹ Agarooshshu Shae metseete Qullaawa Maxaafa xiinxallate kaaˈlitannonke. Hakko daafira, baalanta qummeeshshuwa roorenkanni “nabbawi” yitannota illachishi. Qummeeshshuwate  giddo nooti qara qara qaalla woy handaarra, gufote giddo noo hedo ledo mayi xaadooshshe afidhinoro wodanchate woˈnaali. Qoleno qummeeshshuwa hiincatenna heeshshokki giddo kuri qummeeshshuwa harunsa dandaatto gara hedate yanna gaaˈmi.—Iyyaasu 1:8 nabbawi.

10. Ibiraawoota 5:14 yitanno garinni annuwunna amuuwu maatete magansiˈra yannara qaaqquullinsa xiinxallitanno gara rosiisa hasiissannonsahu mayiraati?

¹⁰ Annuwunna amuuwu lamalate giddo assidhannoti Maatete Magansiˈra oosonsa hagiirsiissannota ikkitara hasidhannoti egennantinote. Insa mitte mittente maatete magansiˈra yannara hasaabbanno haja doortannoha ikkirono, lamalate kiiro baxxinoha hagiirsiisanno coye qixxeessa hasiissannonsa yaa diˈˈikkino. Annuwunna amuuwu Maatete Magansiˈrara JW Biroodikaastera aganu kiiro fultanno pirogiraame laˈˈa woy babbaxxino coye assa lawishshaho Nohi markaawe akeeka seekka dandiitanno; ikkollana insa oosonsa ma garinni xiinxallitannorono rosiisa hasiissannonsa. Lawishshaho, oosonsa songote gambooshshira qixxaawa dandiitanno gara woy rosu mine tuncu yiinonsa coyira seekkite qixxaabbanno gara rosiisa hasiissannonsa. (Ibiraawoota 5:14 nabbawi.) Qaaqquullu yanna gaaˈmite mitte Qullaawu Maxaafi hajo lainohunni xiinxalla rossuro, songote, woradunna qoqqowu gambooshshiwa shiqqanno lallawo viidiyo afidhinota ikka hoogguro nafa, seekkite harunsa shota ikkitannonsa. Mitte mittente xiinxallote pirogiraamera yanna gaammeemmo woyite qaaqquullu dironna akata heda hasiissannonketi egennantinote.

11. Qullaawu Maxaafi rosaanonke umonsa dandiite xiinxallitanno gede qajeelsa hasiissannonkehu mayiraati?

¹¹ Qullaawa Maxaafa rosiinseemmo mannino, xiinxallano gara rosa hasiissannonsa. Insa haaruuddu heedhe xiinxallote woy songote gambooshshira qixxaabbanno woyite dawaro xuruurte daggino daafira calla hagiidhineemmo. Ikkollana Qullaawu Maxaafi rosaanonke uminsanni seekkite xiinxallanna kaaˈlanno garinni xiinxalla dandiitanno gara qajeelsa hasiissannonke. Tini, fonqolu iillannonsa woyite bayichonko roduuwa kaaˈlo xaˈmiˈrantenni borronke xiinxallite dancha amaale afidhanno gede kaaˈlitannonsa.

12. Maa mixiˈne xiinxalla dandiineemmo?

¹² Xiinxalla baxisannohekkiha ikkiro, xiinxallokkinni hagiirre afiˈrattoha lawa hoogahera dandaanno. Ikkollana xiinxallokkinni hagiirre afiˈra dandaatto. Umi qara shiima yanna xiinxalli; hakkiinni sunu sununni xiinxallatto yanna leda dandaatto. Xiinxallatto woyite mixo heedhohe. Xiinxallineemmohu qaru korkaati albinni roore Yihowawa shiqateeti. Ikkollana, mittu  manchi xaˈminonke xaˈmora dawaro qolate woy iillinonke qarrira mala afiˈrate yineno xiinxallinammora dandiineemmo.

13. (a) Mittu wedellichi ammanannore wolootaho xawisate maa assa dandaanno? (b) Qolasiyaasi Sokka 4:6te noo amaale harunsa dandaattohu hiittoonniiti?

¹³ Lawishshaho, ati roso rossanni nootto wedellichaati? Ledokki rossanno ooso suutu soorro ammantannoha ikkara dandaanno. Qullaawu Maxaafi rosira halante coyiˈra hasiˈrattoha ikkirono, hatto assate dandoo noohekkiha lawahera dandaanno. Hatto ikkiro, tenne hajo daafira seekkite xiinxalla hasiissannohe! Xiinxallatto woyite mixokki lamete: (1) Maganu baalanka coye kalaqinota albinni roore buuxatenna (2) ammanattore wolootaho ammansiisanno garinni xawisate. (Rom. 1:20; 1 Phe. 3:15) Balaxxe ateneeto, ‘Ledoˈya rossanno ooso suutu soorro ammantanno gede assinonsari maati?’ yite xaˈmi. Hakkiinni borronke horoonsidhe seekkite xiinxalli. Ammanattore wolootaho xawisa ati hedootto geeshsha qarrissannota ikka hooggara dandiitanno. Rooru manni suutu soorro ammanannohu, ayirrisanno manchi kuni rosi halaaleho yee kulinonsa daafira callaati. Mitte woy lame ammansiissanno taje afiˈrittoro, addanka afate hasiˈre xaˈmo xaˈmanno mannira duushshitanno dawaro qola dandaatto.—Qolasiyaasi Sokka 4:6 nabbawi.

14-16. (a) Gari geeshsha afoottokkite Qullaawu Maxaafi maxaaffa daafira afate mayi kaaˈlahera dandaanno? (b) Tenne gufo giddo kulloonni qummeeshshuwa horoonsidhe Amootsi maxaafi daafira roore afa dandaattohu hiittoonniiti? (“ Qullaawu Maxaafi Giddo Kulloonni Manni Ledo Egennami!” yitanno saaxine lai.)

¹⁴ Lawishshaho, hanni muli yannara gambooshshunniwa shiimmaadda masaalote maxaaffa * giddo mitto xiinxallinammoraati yine hendo; konne maxaafa borreessino masaalaanchi daafira garire afoottokkiha ikkara dandaanno. Hatto ikkiro, balaxxe assa hasiissannohe coyi, kuni masaalaanchi borreessinori daafira afate hasattokki lexxitanno gede assiˈrate. Hatto assa dandaattohu hiittoonniiti?

¹⁵ Umihunni, ateneeto togo yite xaˈmi: ‘Konni maxaafi borreessaanchi daafira maa afoommo? Isi ayeti? Mama heeˈrino? Loosisi maati?’ Borreessaanchu daafira afakki, horoonsiˈrino qaallanna coyiˈrino lawishshuwa seekke huwatate kaaˈlitannohe. Qullaawa Maxaafa nabbawatto woyite, borreessaanchu akata leellishshanno xawishshuwa huwatate woˈnaali.

¹⁶ Hakkiinni maxaafa borreessinoonni yanna afate woˈnaali. Qullaawa Borrote Haaro Alame Tirora qoola 1594-1595 (Amaaru Afoo) nooti “Qullaawu Maxaafi Maxaaffa Sanxarazhe” yitanno saaxine tenne afate kaaˈlitannohe. Qoleno Maganu Qaale Xiinxalli yitanno buukileetera qoola 17-18 nooti masaalaanotenna mootoollate daafira kultanno sanxarazhe kaaˈlitannohe. * Xiinxallitanni noottohu masaalote maxaafa ikkino daafira, konne maxaafa borreessini yannara ikkinore afate woˈnaala hasiissannohe. Togo yite heda dandaatto: ‘Kuni masaalaanchi mannu hiikkonne busha akata woy rosicho biddi assiˈranno gede kaaˈlate woˈnaalino? Isi waro heedhinori ayeooti?’ Tenne seekkite huwatate wole Qullaawu Maxaafi maxaaffa laˈˈa hasiissannoheha ikkara dandaanno. Lawishshaho, masaalaanchu Amootsi waro ikkinore roore huwatate, 2 Mootoollanna 2 Duduwira noota mite qummeeshshuwa laˈˈa kaaˈlitahera dandiitanno; tenne afate Amootsi 1:1te noota fiixxanno hedo kultanno qummeeshshuwa laˈˈa dandaatto. Qoleno Amootsi waro heeˈrinohu Hoosei borreessino maxaafa laˈˈa dandaatto. Tini baalanti taje  Amootsi waro ikkinore roore afate kaaˈlitannohe.—2 Mot. 14:25-28; 2 Dud. 26:1-15; Hos. 1:1-11; Amo. 1:1.

 17-18. Gufote giddo kulloonnita woy wole umikki lawishshuwa horoonsidhe shiimmaadda coye illachisha Qullaawu Maxaafi niwaawe hagiirsiissannota assitanno gara xawisi.

¹⁷ Qullaawa Maxaafa huwatate, quqquxamme nabbawa kaaˈlitanno. Lawishshaho, Zakkaariyaasi fooliishsho 12te noota Mesihichu reyo daafira kultanno masaalo nabbabbanni nootto yine hendo. (Zak. 12:10) Kiiro 12te aana “Naataani sirchi” Mesihichu reyonni hururame wiˈlannota nabbawitto. Tenne hedo mulla nabbabbe saˈˈantenni taxxi yite aante noo xaˈmuwa heda dandaatto: ‘Naataani sirchinna Mesihichu mereero noo fiixoomi maati? Tenne hajo daafira wole mashalaqqe afiˈreemmo doogo no?’ Hakkiinni seekkite xiinxalla hanafatto. Konni qummeeshshira nooti fiixxanno hedo kultanno qummeeshshuwa 2 Saamueeli 5:13, 14wa massitannohe; hakkiicho Naataani, Moote Daawiti ooso giddo mitto ikkinota nabbawatto. Fiixxanno hedo kultanno qummeeshshuwa hunda noohu layinki qummeeshshi yaano Luqaasi 3:23, 31 Maariyaami sirchi kali widoonni Naataani Yesuusi akaakka giddo mitto ikkinota kultanno. * Tenne afakki roore quqquxamatto gede assitannohe! Yesuusi Daawiti sirchi kali widoonni ilamannota masaalotenni kulloonnita afootto. (Mat. 22:42) Ikkollana Daawitira 20 saˈannoti labballi ooso noosi. Ikkina Zakkaariyaasi Naataani sircho calla bade kule insa Yesuusi reyora hururante wiˈlitannota coyiˈrasi dhagge diˈˈikkitino?

¹⁸ Hanni wole lawishsha laˈno. Luqaasi fooliishsho 1te, sokkaasinchu Gebirieeli Maariyaamiwa mare ise iltanno qaaqqi daafira togo yee kulinose: “Isi jawa ikkanno; Woˈmunkura  Aliidi Magani Beettootino yinannisi. Mootichu Maganu, annisi Daawitiha ayirrinyu barcima aannosi. Yaiqoobi minirano hegerera moohanno.” (Luq. 1:32, 33) Konne qummeeshsha nabbambeemmo woyite, Yesuusa ‘Woˈmunkura Aliidi Magani Beettooti yinannisi’ yitanno hedo calla illachinsheemmoha ikkara dandaanno. Ikkollana Gebirieeli Yesuusi moote ikkannotano coyiˈrino. Tenne hedo nabbambeemmo woyite, Maariyaami tenne macciishshituti hiitto ikkitinoro heda dandiineemmo. Maariyaami Gebirieeli hatto yiiseta, Yesuusi Moote Heeroodisi woy isi gedensaanni Israeelete mookkannote wole gashshaanonni aanche moohanno yite heddino ikka? Yesuusi moote ikkiro, Maariyaami mootete ama ikkate qoosso afidhanno, hattono maatese ledo mootete mine heedhanno. Ikkollana Maariyaami Gebirieelira tenne hedo kayisse kultinota leellishshanno taje dino; qoleno lame Yesuusi rosaano xaˈmidhino garinni, Maariyaami Yesuusi Mangistesira baxxino ayirrinye aannose gede xaˈmidhinota kulannori dino. (Mat. 20:20-23) Tenne shiimmaadda mashalaqqe afanke, Maariyaami umose heeshshi assitannota ikkitinota albinni roore huwanteemmo gede kaaˈlitannonke.

19-20. Yaiqoobi 1:22-25 nna 4:8 garinni xiinxallineemmohu qaru korkaati maati?

¹⁹ Maganu Qaaleno ikko Qullaawu Maxaafi aana xintantino borro xiinxallineemmohu qaru korkaati, albinni roore Yihowawa shiqate ikkinota deˈnoonke. Qoleno Maganu albaanni ninke ‘hiittooreetiro’ layiˈranna iso hagiirsiisate maa biddi assiˈra hasiissannonkero afa hasiˈneemmo. (Yaiqoobi 1:22-25 nna 4:8 nabbawi.) Konni daafira, xiinxalla hananfammora albaanni Yihowa ayyaanasi aannonke gede huuccatto assiˈra hasiissannonke. Yihowa xiinxallineemmori kaaˈlannonke gedenna ninkeneeto isi laˈˈannonke garinni laˈˈa dandiineemmo gede kaaˈlankera huucciˈra hasiissannonke.

²⁰ Faarsaasinchu ammanaminohu Maganu soqqamaasinchi daafira coyiˈranni togo yiino: “Kaaliiqi seerinni hagiidhanno; seerasino hashshanna barra buuxanni qaaganno. . . . Assiˈrannori baalu qinaannosi.” Ninke baalunku konni ammanaminohu Maganu soqqamaanchi gede ikkino!—Far. 1:2, 3.