1. Mite yite Qullaawu Maxaafi halaale wolootaho kulitto woyite dhagge ikkinoheri maa ikkara dandaanno?

MITE yite halaale macciishshitto yanna qaagatto? Qullaawu Maxaafinni rosoottori baaluri xawe leellinoheha ikkara dandaanno! Atente gede ‘Baalunku manni konne halaale ammane adhanno’ yite hedoottoha ikkara dandaanno. Qullaawu Maxaafi rosi, insa xaa yannara hagiirraame heeshsho, albillitteno dhagge ikkitanno hexxo heedhannonsa gede assannota ammanootto. (Far. 119:105) Hakko daafira rosootto halaale jaallakkiranna fiixikkira baalaho quqquxante kulootto. Kayi insa giddo rooru konne halaale macciishsha gibbuta dhagge assiˈroottoha ikkara dandaanno.

2-3. Yesuusi waro batinyu manni iso ma assino?

² Kulleemmo sokka mannu macciishsha giwiro dhagge assiˈra dihasiissannonke. Yesuusi Maganu soyinosita leellishshaata addi addi maalale loosinoha ikkirono, rooru manni giwinosi. Lawishshaho Yesuusi Aliaazaari reyotenni kayisino; isi tenne maalale loosinota giwannosi manni nafa kaada didandaanno. Ikkirono Yihudu sooreeyye isi Mesihicha ikkinota diammantino. Isinni Yesuusano Aliaazaarino shaa hasidhino.—Yoh. 11:47, 48, 53; 12:9-11.

³ Yesuusi rooru manni isi Mesihicha ikkinota ammana giwannota afino. (Yoh. 5:39-44) Isi Cuuaanchu Yohaannisi rosaanora “Anenni kainohunni gufiˈrannokkihu hagiirraamoho” yiino. (Mat. 11:2, 3, 6, NW) Batinyu manni Yesuusa ammana giwinohu mayiraati?

4. Konni birxichira maa ronseemmo?

⁴ Konni birxichiranna aane noohura, umi xibbi diro batinyu manni Yesuusa ammana giwinohu mayiraatiro ronseemmo.  Qoleno xaa yannara batinyu manni kulleemmo sokka macciishsha giwannohu mayiraatiro laˈneemmo. Roorenkanni, gufiˈneemmokki gede Yesuusira noonke ammana kaajjishiˈra hasiissannonkehu mayiraatiro ronseemmo.

5. Mitu manni Yesuusi daanno yinoonni Mesihicha diˈˈikkino yee hedinohu mayira ikkara dandaanno?

⁵ Batinyu manni Yesuusi lophino gara lae gufiˈrino. Insa Yesuusi worba rosiisaancho ikkinotanna addi addi maalale loosinota ammantino. Kayi insara Yesuusi mittu buxichu hanaaxichi beetto calla lawinonsa. Yesuusi lophinohu Naaziretete katamiraati; kuni mannu mishanno katama ikkara dandaanno. Gedensoonni Yesuusi rosaancho ikkinohu Naatinaeeli nafa umi qara “Naaziretetenni danchu coyi fulannoni?” yiino. (Yoh. 1:46) Naatinaeeli Yesuusi heeˈrinoha Naaziretete katama naadannokkiha ikkara dandaanno. Woy isi Mesihichu Naaziretete ikkikkinni Beetelihemete ilamannota kultannota Mikiyaasi 5:2te noo masaalo hedinoha ikkara dandaanno.

6. Mannu Yesuusi Mesihicha ikkinota huwatate maa assannohu gatino?

⁶ Qullaawa Borro mayitanno? Masaalaanchu Isayaasi Yesuusi diinna “[Mesihichu] ilama” woy heeshsho daafira haja assitannokkita masaalino. (Isa. 53:8) Yesuusi heeshsho daafira lowore masaalloonni. Insa Yesuusi daafira kultanno masaalo xiinxallitinoha ikkoommero, Yesuusi Beetelihemete ilamannotanna Moote Daawiti sircho ikkinota huwata dandiitanno. (Luq. 2:4-7) Yesuusi ilaminohu Mikiyaasi 5:2te masaalloonni katamiraati. Ikkina mannu soˈro maati? Muddante togo togooti yite coyiˈransaati. Insa woˈmanka coye seekkite dibuuxxino. Gufidhinohuno iseraati.

7. Xaa yannara batinyu manni Yihowa Farciˈraasine giwannohu mayiraati?

⁷ Yannankerano hattoori kalaqamara dandaanno? Ee. Xaphoomunni laˈniro, Yihowa manni alba heeˈrino heeshsho mannu jajanno gedeeta diˈˈikkitino; mannu insa ‘roso rossinokkirinna mullu manni’ gede asse hedanno. (Soq. 4:13) Mitu manni Yihowa Farciˈraasine egennaminohu Qullaawu Maxaafi rosi mine eˈe rossinokki daafira Maganu Qaale rosiisa didandiitanno yee hedanno. Wolootu qolte ‘Yihowa Farciˈraasine “Ameeriku ammaˈnooti”’ yite heddanno; noore coyiˈniro kayinni alamete doyichora noohu Yihowa Farciˈraasine ikkino manni giddo Ameerikaho heeˈrannohu xibbunni mite 14 anga calla ikkannoho. Mitootu qolte ‘Yihowa Farciˈraasine Yesuusa diammantanno’ yinanna macciishshitino. Lowo diro Yihowa Farciˈraasine “Soˈrisiisaanote,” “Faranjete ammaˈnooti” hattono “Maate diiggannoreeti” yinanni keeshshinoonni. Togoore coyiˈnanna macciishshino manni, Yihowa manni daafira gara ikkinore buuxinokkihura gufiˈrino woy Yihowa Farciˈraasine ikka dihasiˈranno.

8. Soqqamaasinete Looso 17:11 kultanno garinni, mannu yannankera nooti Maganu soqqamaano ayeootiro afate maa assa hasiissannonsa?

⁸ Gufiˈneemmokki gede maa assa hasiissannonke? Ronsoommore seekkine buuxiˈra hasiissannonke. Wongeellu borreessaanchi Luqaasino hatto assate sharramino. Isi ‘uminni kayise baalanke coye xiinxalle laino.’ Luqaasi Wongeellasi nabbawanno manni Yesuusi daafira macciishshinori ‘halaalaancho ikkinota seekke afara’ hasiˈrino. (Luq. 1:1-4) Hunda Beeriyaho heeˈrinohu Yihudu mannino Luqaasi gede seekke xiinxallino. Insa umo Yesuusi daafira kulannoha dancha duduwo macciishshitu woyite, rossinori halaale ikkinota buuxate Ibiraawootu Afiita Qullaawa Borro seekkite laˈino. (Soqqamaasinete Looso 17:11 nabbawi.) Ninkeno ronsoommore seekkine buuxa hasiissannonke. Maganu manniwiinni ronsoommore, Qullaawa Borro yitannori ledo taashshine  laˈˈa hasiissannonke. Qoleno yannankera noohu Yihowa manni daafira kultanno xagge xiinxalla hasiissannonke. Coye kaimunni seekkine xiinxallineemmoha ikkiro, mitto coye mulla kaˈne digimbeemmo woy mannu yiinotera hoode dihaˈneemmo.

9. Yesuusi gordunni malaate leellisha giwita mannu ma assino?

⁹ Yesuusi dhagge ikkanno roso rosiisinoha ikkirono, mitootu tennenni kassi diyitino. Insa hakkiinni sainore hasidhino. Isi ‘Gordunni malaate leellishe’ Mesihicha ikkinota leellishansara hasidhino. (Mat. 16:1) Insa Yesuusi malaate leellishansara hasidhinohu Daanieeli 7:13, 14 noo hedo garimale huwattino daafira ikkara dandaanno. Ikkollana tini masaalo woˈmitanno gede Yihowa murino yanna hattee diˈˈikkitino. Yesuusi rosiisinonsari woleteemmero isi Mesihicha ikkinota ammantanno gede assannonsareeti. Kayinni insa leellishinke yitino malaate leellisha giwita gufidhino woy iso gibbino.—Mat. 16:4.

10. Yesuusi, Isayaasi Mesihichu daafira masaalino masaalo woˈmitanno gede assinohu hiittoonniiti?

¹⁰ Qullaawa Borro mayitanno? Masaalaanchu Isayaasi Mesihichu daafira togo yee borreessino: “Cance dicoyiˈranno; dooggateno qoonqosi naggi diassanno.” (Isa. 42:1, 2) Yesuusi soqqami woyite diluulino woy leellamate diwoˈnaalino. Yesuusi hoola yinoonniha qullaawa mine dimiˈnino, ammaˈnote murrooti gede badde leellishshanno uddano diuddiˈrino, hattono baxxino suˈminni woshshinasira dihasiˈrino. Yesuusi yoo yinasira Moote Heeroodisi albira shiqe heeˈre nafa iso maalaˈlisate yee maalale diloosino. (Luq. 23:8-11) Yesuusi mite maalale loosinoha ikkirono, qaru loosisi dancha duduwo duduwate. Isi rosaanosira “Ani Dancha Duduwo lallawate dayommo” yiino.—Maq. 1:38.

11. Mitu mannira hiitti gara ikkitinokki lao noonsa?

¹¹ Yannankerano hattoori kalaqamara dandaanno? Ee. Xaa yannara batinyu manni hoola yinoonni misilla afidhinota jajjabba beetekiristaanna, seedu maaragete suˈmi noonsa qeesoota, hattono addi addi ayyaanna jajanno;  tini ayyaanna rooru manni kaimasenna mayimmase deinote. Togoo ammaˈno gambooshshe haˈranno manni, Maganunna isi hedinori daafira hakkeya rosannori dino. Kiristaanu gambooshshenke daanno manni kayinni, Yihowa maa assinammora hasiˈrannoronna isi fajjo ledo sumuu yaanno garinni heeˈra dandaanno gara rosanno. Gambooshshu Addaraashuwanke ishintinokkitenna loworira kaaˈlitannote; kayinni bikkunnite. Songote albisa ikkite soqqantannori baxxitino uddano diuddidhanno; maaragete suˈminni woshshinansarano dihasidhanno. Rosiinseemmorinna ammanneemmori Maganu Qaali aana xintaminoreeti. Ikkirono batinyu manni ‘Insa magansidhanno gari dibaˈraasinoho’ yee hedanno daafiranna rosiinseemmo rosi insa macciishsha hasiˈrannoha ikkinokki daafira gufiˈranno woy kulleemmonsare dimacciishshanno.

12. Ibiraawoota 11:1, 6 kultanno garinni, ammananke mayi aana xintantinota ikka hasiissannose?

¹² Gufiˈneemmokki gede maa assa hasiissannonke? Soqqamaasinchu Phaawuloosi Roomaho heeˈranno Kiristaana togo yino: “Ammaˈna macciishshatenni dagganno; macciishshinannihuno Kiristoosi qaaleeti.” (Rom. 10:17) Ammananke kaajjishiˈneemmohu Qullaawa Borro seekkine xiinxallineeti ikkinnina, Maganu Qaali ledo sumuu yaannokkiha ammaˈnote bude agadhine diˈˈikkino; togoo budi baxisannoha lawara dandaanno. ‘Ammana nookkiha Magano hagiirsiisa’ dandiinannikki daafira, halaalaancho egenno aana xintantinota kaajjado ammana afiˈrate sharrama hasiissannonke. (Ibiraawoota 11:1, 6 nabbawi.) Cuˈmiˈnoommohu halaale ikkinota buuxate, iiminni dhagge ikkanno malaate laˈˈa hasiissannonke yaa diˈˈikkino. Seekke ammanatenna huluullo hooˈlate, ammana kaajjishannoha Qullaawu Maxaafi roso seekke xiinxalla calla ikkitanno.

13. Batinyu manni Yesuusa giwinohu mayiraati?

¹³ Yesuusi waro Cuuaanchu Yohaannisi rosaano, Yesuusi rosaano xoontannokki daafira gurchaabbino. Yesuusi, isi ledonsa noo  geeshsha xooma hasiissannonsakkita xawisino. (Mat. 9:14-17) Farisootunna Yesuusa gibbannori kayinni isi budensanna wodhonsa harunsinokki daafira effidhe gibbinosi. Isi Sambatu barra dhiwantinore hursita lowo geeshsha hanqitino. (Maq. 3:1-6; Yoh. 9:16) Insa kaˈaanni Sambata ayirrinseemmo yitanni kaˈaanni kayi qullaawu mini giddo daddaˈlitanno. Yesuusi tennera rufinsata hanqite giira kaxxitino. (Mat. 21:12, 13, 15) Yesuusi Naaziretete noohu xaadu mine sabbakanni heeˈre, umonsa calla baxxannorenna ammana noonsakkire ikkitinota leellishate, insa hasatto ledo sumuu yaannokki lawishsha horoonsiˈrita hanqite fooggaltino. (Luq. 4:16, 25-30) Batinyu manni Yesuusi insa heddino gede ikka hoogino daafira gufiˈrino woy iso macciishsha giwino.—Mat. 11:16-19.

14. Yesuusi Qullaawa Borro ledo sumuu yitannokkita mannu woga giwinohu mayiraati?

¹⁴ Qullaawa Borro mayitanno? Yihowa masaalaanchisi Isayaasi widoonni togo yiino: “Tini gosa afuunni ayirrissannoe; wodanunni kayinni anewiinni faffe no. Magansidhannoehuno mannu woga wonshateeti.” (Isa. 29:13) Yesuusi Qullaawa Borro ledo sumuu yitannokkita mannu woga giwasi garankolla. Mannu woganna bude Qullaawa Borronni roorsite laˈannori, Yihowanna isi soyino Mesihicha gibbino.

15. Xaa yannara batinyu manni Yihowa Farciˈraasine baxannokkihu mayiraati?

¹⁵ Yannankerano hattoori kalaqamara dandaanno? Ee. Yihowa Farciˈraasine Qullaawa Borro ledo sumuu yitannokki ayyaanna lawishshaho ilamate barranna Ganna diayirrinseemmo yitanno woyite batinyu manni giiramanno. Wolootu kayinni Yihowa Farciˈraasine addi addiha gobbate ayyaana ayirrissannokki daafira woy Qullaawu Maxaafi ledo sumuu yaannokkiha madaarshu seera harunsitannokki daafira hanqitanno. Konni garinni Yihowa Farciˈraasinera hanqitannori Magano halaalunni magansiˈnanni heeˈnoommo yite ammantannoha ikkara dandaanno. Ikkollana insa teeˈlinokkiha Qullaawu Maxaafi roso agurte alamete wodho roorsidhannoha ikkiro Magano hagiirsiisa didandiitanno.—Maq. 7:7-9.

16. Faarso 119:97, 113, 163-165 kultanno garinni maa assa hasiissannonke? Giwa hasiissannonkeri maati?

¹⁶ Gufiˈneemmokki gede maa assa hasiissannonke? Yihowa seeranna biddishsha albinni roore baxa hasiissannonke. (Faarso 119:97, 113, 163-165 nabbawi.) Yihowa banxeemmoha ikkiro, iso hagiirsiisannokki bude baala gimbeemmo. Aye coyino Yihowa banxeemmota hoolankera diwodhineemmo.

17. Yesuusi waro batinyu manni Mesihichu maa assanno yee hedino?

¹⁷ Yesuusi waro mitu manni, isi bayichonko gashshoote soorrara hasiˈrino. Insa Mesihichu, gadadisinonsahu Roomu gashshootinni wolassannonke yite heddino. Yesuusa moote assitara woˈnaaltuta isi kayi giwino. (Yoh. 6:14, 15) Kakkalaasinenna Roomu gashshooti silxaane uyinonsari wolootu ammaˈnote murrooti, Yesuusi gashshoote soorreenna silxaanenke hoongeemmo yite yaaddino. Tini batinyu Yihudu manni gufiˈranno gede woy Yesuusa giwanno gede assitino.

18. Batinyu manni Mesihichu daafira kultannota hiittenne masaalo lashshi assino?

¹⁸ Qullaawa Borro mayitanno? Batinye masaalo Mesihichu yannate gedensaanni ola qeelannota kultannoha ikkirono, wole masaalo kayinni isi balaxe ninke cubbi daafira reya hasiissannosita kultanno. (Isa. 53:9, 12) Ikkina Yihudu manni Mesihichuwiinni gara ikkinokkire agadhinohu mayiraati? Yesuusi waro batinyu manni isi qarransa hakkawoyintenni  hoolannokkita leellishshanno masaalo lashshi assino.—Yoh. 6:26, 27.

19. Batinyu manni sokkanke macciishshannokkihu mayyee hedanno daafiraati?

¹⁹ Yannankerano hattoori kalaqamara dandaanno? Ee. Xaa yannara batinyu manni poletikaho anga wodhineemmokki daafira giwannonke. Insa mirca tungammora hasidhanno. Ikkollana mannu gashshoote doodhineemmoha ikkiro, tini Yihowa giwa ikkitinota anfoommo. (1 Sam. 8:4-7) Qoleno mannu ‘Insa rosu minnanna hospitaale dimintannoreeti, hattono dagooma kaaˈlanno looso diloossannoreeti’ yee hedara dandaanno. Insa xaa yannara mannu oosora iillanni noo qarra tirate ikkikkinni dancha duduwo duduwate illachinsheemmo daafira gufidhanno woy sokkanke dimacciishshitanno.

20. Yesuusi Maatewoosi 7:21-23te coyiˈrino garinni, loosa hasiissannonkehu qaru loosi hiikkonneeti?

²⁰ Gufiˈneemmokki gede maa assa hasiissannonke? (Maatewoosi 7:21-23 nabbawi.) Yesuusi loonsammora hajajinonke looso illachisha hasiissannonke. (Mat. 28:19, 20) Tenne alamehu poletikunna dagoomittete coyi hedonke billaallitanno gede assankera wodha dihasiissannonke. Manna banxeemmo, iillannonsa qarrino dadillisannonke; ikkirono insa kaaˈla dandiineemmoti baalanta roore doogo Maganu Mangiste daafira rosiisanna Yihowa ledo jaalooma kalaqidhanno gede kaaˈla ikkitinota anfoommo.

21. Maa assate murciˈra hasiissannonke?

²¹ Konni birxichira, umi xibbi diro mannu Yesuusinni kainohunni gufiˈranno gede woy iso giwanno gede assinoha shoole coye laˈnoommo; kuri coyibba xaa yannarano mitu manni Yesuusi harunsaano macciishsha giwanno gede assitara dandiitanno. Ikkollana hooˈla hasiissannonketi guficho ikkitanno coyibba kuri callaatini? Deeˈni. Aananno birxichira guficho ikkannoha wole shoole coye laˈneemmo. Gufiˈneemmokki gedenna ammananke kaajjitanno gede assiˈrate murciˈno!