1-2. Batinye Yihowa Farciˈraasinera mayi qarri iillannonsa?

SOQQAMAASINCHU PHAAWULOOSI Ximootewoosinna Kiristaana baalanka soqqanshonsa guutate dandiiture baala assitanno gede jawaachishinonsa. (2 Xim. 4:5) Ninke baalunku Phaawuloosi amaale seekkine harunsa hasiissannonke. Ikkirono tenne amaale harunsa mito woyite shota diˈˈikkitannonke. Lowo roduuwinke sabbakate looso loosa waajjitanno. (2 Xim. 4:2) Lawishshaho, hanni loosonke hoolloonni woy agamboonni gobbara heedhanno roduuwanke hendo. Insa usurransara dandiinannita affinoha ikkirono sabbakate looso loossanno.

² Yihowa mannira hexxo mudhanno gede assannonsahu addi addi qarri iillannonsa. Lawishshaho, batinyu roduuwi maatensara hasiisannore shiqishate lowo saate loossanno. Insa albinni roore soqqama hasidhanno; kayinni lamalate jeefora tenne assate wolqa hoogganno. Wolootaho kayinni bayicho assiˈrino dhibbinni woy geedhimmatenni kainohunni assa hasidhannore assa qarra ikkitinonsa; insara mininni fula nafa qarra ikkitansara dandiitanno. Mitootu kayinni ‘Yihowara soqqamate diˈˈikkinoommoreeti’ yite heddanno. Mereerimu Soojjaatira heedhannoti Meeri * yinanni rodoo togo yitino: “Hexxo mudheemma gede assitannoe hedo gargadhate lowo geeshsha sharrama hasiissannoe. Tini qolte soqqameemma yannanna wolqa guddannoe daafira aneneeto bushiisheemma.”

3. Konni birxichira maa ronseemmo?

³ Heeˈnoommo gari ikkihano ikkiro, Yihowa mitti mittinke iillannonke qarra dandiine saˈneemmo gedenna wolqanke assitu geeshsha isira soqqammeemmo gede jawaante ikkannonke. Yihowa ninke kaaˈlannonkehu hiittoonniitiro laˈnammora albaanni, hanni isi Phaawuloosinna Ximootewoosi qarru iillinsarono soqqanshonsa umo fushsha dandiitanno gede kaaˈlinonsahu hiittoonniitiro ronso.

4. Phaawuloosira mayi qarri iillinosi?

⁴ Phaawuloosira lowo qarri iillinosi. Roorenkanni iso gannisi woyite, hattono kinnatenni awwaallisinna usurrisi woyite jawaante hasiissinosi. (2 Qor. 11:23-25) Phaawuloosi gara ikkitinokki hedo waaddinosi woyiti noota maaxikkinni coyiˈrino. (Rom. 7:18, 19, 24) Qoleno ‘utu gede qasanno qarra’ cince saˈˈa hasiissinosi; isi konne qarra Maganu hoolasira halchino.—2 Qor. 12:7, 8.

5. Phaawuloosira qarru iillinosiha ikkirono maa assa dandiino?

⁵ Yihowa, Phaawuloosira lowo qarri iillisirono soqqanshosi umo fushshanno gede wolqa uyinosi. Hanni Phaawuloosi loosinore laˈno. Lawishshaho isi Roomaho usurame noo yannara Yihudu ammaˈno murrooti albaanni danchu duduwira laalaate gaaramino; isi gashshaasinete albaannino gaaraminoha ikkara dandaanno. (Soq. 28:17; Fil. 4:21, 22) Qoleno isi batinye mootete mini agaraasineranna laˈˈasira daanno mannira baalaho farciˈrino. (Soq. 28:30, 31; Fil. 1:13) Isi hatte yannankura xaa geeshsha Kiristaana kaaˈlitanni noota addi addi sokka qullaawu ayyaaninni borreessino. Hakkiinnino sae Phaawuloosi lawishshi Roomaho heedhanno songo jawaachishino; isi lawishshi ammanate roduuwisi, “Maganu qaale kultara waajja nookkiha albinni roore” jawaattanno gede kaaˈlinonsa. (Fil. 1:14) Phaawuloosi assa hasiˈranno geeshshire assinokki woyiti nooha ikkirono, wolqasi assitu geeshsha kayinni sharramino; tini ‘danchu duduwi halaˈlanno’ gede assitino.—Fil. 1:12.

6. Layinki Qorontoosi 12:9, 10 kultanno garinni, Phaawuloosi soqqanshosi umo fushshanno gede kaaˈlinosiri maati?

⁶ Phaawuloosi Yihowara soqqama dandiinohu Maganu uyinosi jawaantenni ikkinnina umisi wolqanni ikkinokkita afino. Isi Maganu wolqa guutte leeltannohu ‘wolqiweellesi aana ikkinota’ coyiˈrino. (2 Qorontoosi 12:9, 10 nabbawi.) Phaawuloosira dartu iillinosiha, usurroonnisiha hattono wolu addi addi qarri iillinosiha ikkirono, Yihowa soqqanshosi umo fushshanno gede qullaawu ayyaanisi widoonni wolqa uyinosi.

7. Ximootewoosi soqqanshosi umo fushshate hiikkonne qarra qeela hasiissinosi?

⁷ Phaawuloosi jaala ikkinohu wedellichu Ximootewosino soqqanshosi umo fushshate Maganu aannosi wolqa addaxxino. Phaawuloosi misiyoone ikke seeda doogo haˈri yannara  Ximootewosino ledosi haˈre soqqamino. Qoleno Phaawuloosi isi songuwa towaatannonna jawaachishanno gede soyinosi. (1 Qor. 4:17) Ximootewoosi, ‘Ani tennera ikkado diˈˈikkoommo’ yee hedinoha ikkara dandaanno. Phaawuloosi “Anjekki ayino mishoonkehe” yee amaalinosihu isera ikkara dandaanno. (1 Xim. 4:12) Qoleno hatte yannara Ximootewoosi umisira utu gede qasanno qarri yaano ‘godowu gajaajjo’ noosi. (1 Xim. 5:23) Ikkollana Ximootewoosi, Yihowahu qullaawu ayyaani dancha duduwo duduwatenna roduuwisira soqqamate jawaante aannosita afino.—2 Xim. 1:7.

8. Xaa yannara Yihowa mannasi jawaachishannohu hiittoonniiti?

⁸ Yihowa xaa yannara mannisi isira ammaname soqqamanni heeˈranno gede “jawa wolqa” aannonsa. (2 Qor. 4:7) Hanni Yihowa ninke jawaachishatenna isira ammanamme soqqammanni heeˈneemmo gede kaaˈlate qixxeessinota shoole qixxaawo laˈno; insano: huuccattote, Qullaawa Maxaafaati, ammanate roduuwankeetinna soqqanshote.

9. Huuccatto kaaˈlitankera dandiitannohu hiittoonniiti?

⁹ Huuccattote widoonni jawaachishannonke. Efesooni Sokka 6:18te Phaawuloosi Magano ‘Woˈmanka woyite huuccidhe’ yee amaalinonke. Maganuno jawaante aannonke. Jaanii yinannihu Boliiviyaho heeˈranno rodii addi addi qarri iillisi yannara Yihowa irkisinosita wodanchino. Minaamasi, hattono annisinna amasi mitteenni buuto dhiwamino. Jaaniira sasenka mittee towaaxxa qarra ikkitinosi. Amasi fooliishshidhino; minaamasinna annisi kayinni dhiwame lowo yanna keeshshino. Jaanii hattee qaage “Buutote qarri iillie yannara hasiisannoere Yihowara bade kuˈlaˈya lowo geya kaaˈlitinoe” yiino. Yihowa Jaaniira iillinosi qarra cince saˈˈate kaaˈlitanno jawaante uyinosi. Boliiviyaho heeˈrannohu Roonaaldi yinanni cimeessira amasi kaanserete dhibbi amadinota kullisi. Ise mittu agani gedensaanni mannu aalo ikkitino. Hatte yannara iso kaaˈlinosiri maati? Roonaaldi togo yiino: “Huuccatto giddoˈyatanna macciishshaminoere gudise Yihowara kuˈleemmo gede kaaˈlitinoe. Wolu baalunkunni roore ane qarri isira leellannosi; isi ane daafira anenni nafa roorse egenninota afoommo.” Mito woyite gurchaambammora woy mayine huucciˈneemmoro afa hoongammora dandiineemmo. Kayinni Yihowa giddonketa isira fushshine kuˈla qarra ikkitunkero nafa, huucciˈneemmo gede koyisinonke.—Rom. 8:26, 27.

10. Ibiraawoota 4:12 kultanno garinni, Qullaawa Maxaafa nabbawanna nabbamboommore hiinca hasiissannonkehu mayiraati?

¹⁰ Qullaawu Maxaafi widoonni jawaachishannonke. Phaawuloosi Qullaawa Borronni jawaantenna shesho afiˈrinte gede ninkeno Maganu Qaalinni jawaantenna shesho afiˈra dandiineemmo. (Rom. 15:4) Maganu Qaale nabbambeemmonna hiincineemmo woyite, Yihowa qullaawu ayyaanasi horoonsiˈre Qaalisi kaaˈlannonke gara leellishankera dandaanno. (Ibiraawoota 4:12 nabbawi.) Aleenni qummi assinihu Roonaaldi togo yiino: “Barru baala hashsha hashsha Qullaawa Maxaafa nabbawaˈya lowo geeshsha kaaˈlitinoe. Maganu akattanna isi soqqamaasinesi towaatanno gara seekke hiinceemmo. Tini wirro jawaateemmo gede kaaˈlitannoe.”

11. Qullaawu Maxaafi mitte buuto xissiisidhino rodoo kaaˈlinosehu hiittoonniiti?

¹¹ Maganu Qaale hiincanke iillinonke qarri daafira gara ikkitino lao heedhannonke gede kaaˈlitannonke. Hanni Qullaawu Maxaafi mitte minaanna shiidhe manchittino rodoo kaaˈlinose gara laˈno. Isera mittu cimeessi Iyyoobi maxaafa nabbawa kaaˈlitannoseta kulinose. Ise konne maxaafa nabbabbuti umi  qara gara ikkitinokki lao noosihura Iyyoobi bushiishshino. Ise hedosenni, “Iyyoobi! Qarrikki daafira calla heddooti!” yitino. Ikkollana alba iserano Iyyoobite gedee lao nooseta wodanchitino. Tini, laose biddi assidhanno gede kaaˈlitinose; hattono minaannase shiidhe xissiisidhino xisso dandiite saˈanno gede jawaante ikkitinose.

12. Yihowa ammanate roduuwinke widoonni jawaachishannonkehu hiittoonniiti?

¹² Ammanate roduuwinke widoonni jawaachishannonke. Yihowa Kiristaana jawaachishannoti wole doogo ammanate roduuwinsa widoonniiti. Phaawuloosi ammanate roduuwisi ledo xaade ‘mimmito jawaachishate’ quqquxaminota borreessino. (Rom. 1:11, 12) Aleenni kulliti Meeri ammanate roduuwise ledo yanna sayisa lowo geya baxxannota coyidhino. Ise togo yitino: “Yihowa qarraˈya nafa afinokki roduuwa horoonsiˈre kaaˈlinoe. Insa jawaachishannore coyidhe woy sokka borreessite jawaachishshinoe; insa assitinoeri hatte yannara hasiise nooereeti. Qoleno anera iillinoe gedee qarri iillinonsa roduuwira hasaaphaˈyanna insa assinore assaˈya kaaˈlitinoe. Songote cimeeyyeno woˈmanka woyite songote giddo waagu nooeta huwateemma gede kaaˈlitinoe.”

13. Songote gambooshshiwa mimmito jawaachisha dandiineemmohu hiittoonniiti?

¹³ Mimmito jawaachinsheemmo bayichi giddo mittu songote gambooshsheeti. Gambooshshe haˈratto woyite, roduuwunniwa shiqqi yite baxattonsata kulattonsaranna assitanni noorira galatattonsara dandaatto. Lawishshaho mittu cimeessi gambooshshu hanafara albaanni minaannise Yihowa Farciˈraasincho ikkinokkite mitte rodoora togo yiino: “Ati gambooshshe daakki mageya jawaachishshawonkero afoottaro! Woˈmanka woyite leenka qaaqquullekki gambooshshe biifisse haadhe daatta; qoleno dawaro qolanno gede qixxeessattansa.” Ise tini lowo geeshsha jawaachishshinose daafira hindiiddo qalxiteennase “Togoo jawaante techo lowo geya hasiisse nooe!” yitino.

14. Soqqansho kaaˈlitannonkehu hiittoonniiti?

¹⁴ Soqqanshote widoonni jawaachishannonke. Qullaawu Maxaafi halaale wolootaho kulleemmo woyite mannu macciishshirono macciishsha giwirono jawaante afiˈneemmo. (Law. 11:25) Isteesiyi yinanni rodoo soqqansho lowo geya jawaachishshara dandiitannota huwattino. Ise mittu maatese miili songotenni bohamita lowo geya dadillitino daafira, ‘Iso kaaˈlate maa asseemmahu gati ikka?’ yite heddino. Isteesiyira tenne agurranna wolere heda qarra ikkitinose. Ikkina ise konne yaachishanno coye dandiite saˈanno gede kaaˈlinoseri maati? Soqqanshote! Ise soqqansho fultanno woyite qoqqowisera heeˈrannoha kaaˈlo hasiissannonsa manna heda hanaffu. Ise togo yitino: “Hatte yannara Yihowa ayyaanaamittetenni rakke lophitannota Qullaawu Maxaafi rosaancho afiˈreemma gede kaaˈlinoe. Tini lowo geya jawaachishshinoe. Baalunkunni roore wodanaaˈmeemma gede kaaˈlitinoeti soqqanshote.”

15. Meeri coyidhinorinni maa rosootto?

¹⁵ Heeshshonsa giddo iillannonsari, mitootu gari geeshsha soqqama didandiineemmo yite heddanno gede assansara dandaanno. Aterano hattoori macciishshamannoheha ikkiro, isira soqqamate dandiitto geeshshire assittoro Yihowa hagiidhannota deˈooti. Hanni Meeri lawishsha wirro laˈno. Ise wole qaale coyiˈnanni qoqqowo hadhuti, hakkeya kaaˈlitannori nookkihu gede assite heddino. Togo yitino: “Mite yanna geeshsha gambooshshunniwa harancho dawaro qola woy qummeeshsha nabbawa woy soqqanshonniwa tiraakte ela agurranna wolere assa didandoomma.” Ise hakkoye qaale seekke coyiˈranno manna hedde ‘Ani ditidhoommate’ yite heddino. Ikkollana ise hedose biddi assidhino.  Gari dandoo hoogguserono Yihowa horoonsiˈrannoseta wodanchitino. Meeri togo yitino: “Heeshsho gatisanno halaali huwatate qarrisannokkiha ikkirono, mannu heeshsho soorre biddi assannohu konne halaaleeti.”

16. Mininni fula dandiitannokkiri jawaante afidhanno gede mayi kaaˈlansara dandaanno?

¹⁶ Mininni fula dandiineemmokkiha ikkiro nafa, Yihowa isira soqqama halchineemmota laˈˈanno, hattono tenne naadanno. Isi towaattannonkerira woy akimootaho farciˈneemmo gede faro fanankera dandaanno. Xa assinanni heeˈnoommore alba assinoommori ledo heewisiinseemmoha ikkiro, hexxo mudhinammora dandiineemmo. Ikkollana Yihowa xa kaaˈlanni noonke gara huwantummoro, aye geeshshi qarrano hagiirrunni cincine saˈˈate jawaante afiˈneemmo.

17. Rosiisaancho 11:6 kultanno garinni, bayichonkonni dancha guma afiˈra hoongummoro nafa sabbaka agura hasiissannonkekkihu mayiraati?

¹⁷ Winxeemmohu halaalu wixi giddo hiikku rumuxxaranna lophara dandaannoro dianfoommo. (Rosiisaancho 11:6 nabbawi.) Lawishshaho Barbara yinanniti 80 diri balla ikkannose rodoo, silke dowwolte hattono sokka borreessite ganyite soqqantanno. Ise “Maganu Assinoheri Maati?” yaanno birxicho afidhinota Badheessa 1, 2014nnita Agarooshshu Shae, borreessitino sokka giddo mittete ledo sokkino. Ise affukkinni tenne sokka bohamino minaanniranna minaamara sokkino. Kuri minaanninna minaama tenne borro hige hige nabbawino. Minaanni Yihowa xaaddotenni hasaawisanni noosihu gede asse hedino. Insa wirro gambooshshe haˈra hanafino; 27 diro bohame keeshshinore ikkirono gedensaanni wirro Yihowa Farciˈraasine ikkino. Barbara borreessitinote mitte sokkanni, insa halaalu minira higansa ise mageeshshi geeshsha jawaachishshinosero heda dandiineemmo.

18. Maganu aanno jawaante afiˈrate maa assa dandiineemmo?

¹⁸ Yihowa jawaante afiˈneemmota lowo faro faninonke. Isi qixxeessino qixxaawo horoonsiˈneemmoha yaano, huuccatto assiˈneemmoha, Qullaawa Maxaafa xiinxallineemmoha, roduuwinkewa gamba yineemmohanna soqqansho fulleemmoha ikkiro, Yihowa ninke kaaˈlate wolqanna hasatto noosita addaxxineemmota leellinsheemmo. “Isira gudisante aamantinore jawaachisha” baxannoha iimi Annanke woˈmanka woyite addaxxino.—2 Dud. 16:9.