1. Baalunku manni hiikkoye lowo geeshsha hasiisanno doorsha doodha hasiissannonsa?

 XAA YANNARA mannu mitto lowo geeshsha hasiisanno doorsha doodha hasiissannonsa. Insa kalqe alame gashshate silxaane noosihu Maganu Yihowa widonso Yihowa diina ikkinohu urungichu Sheexaanu Daawuloosi wido ikka doodhita ikka? Kawano kaˈano ikkikki gatano manchi dino. Mannu doodhanno doorshi hegere heeshsho afiˈranno gede woy afiˈrannokki gede assansara dandaanno. (Mat. 25:31-33, 46) ‘Lowo qarri’ woy bayiru qarri yannara insara gatote woy baote malaate malaatinsanninsa.—Aju. 7:14; 14:9-11; Hiz. 9:4, 6.

2. (a) Ibiraawoota 10:35-39 maa assineemmo gede jawaachinshoonninke? (b) Ajuujate maxaafi kaaˈlannonkehu hiittoonniiti?

² Ibiraawoota 10:35-39 nabbawi. Yihowa gashshootira halama doodhoottoha ikkiro dancha doorsha doodhootto. Wolootuno dancha doorsha doodhitanno gede kaaˈlate quqquxamootto. Insa kaaˈlate Ajuujate maxaafi giddo noo hedo horoonsiˈra dandaatto. Kuni dhagge ikkanno maxaafi Yihowa gibbannori ma ikkitannoronna isi gashshootira ammanante halantannori afidhanno atoote kulanno. Konne lowo geeshsha hasiisanno halaale seekkine xiinxalla hasiissannonke. Hatto assanke Yihowara soqqamate albinni roore murciˈneemmo gede kaaˈlitannonke. Qoleno konni maxaafinni ronsoommore horoonsiˈne wolootu Yihowara soqqama doodhitanno gedenna isira soqqama agurtannokki gede kaaˈla dandiineemmo.

3. Konni birxichira hiikkuri xaˈmuwa hasaambeemmo?

³ Konni birxichira aante noo xaˈmuwa hasaambeemmo: Maganu gashshootira halantannori afidhanno atooti maati?  Ajuujate maxaafi giddo kulloonnihu duumu moyichi wido ikka doodhitannori ma ikkitannoyya?

4. Soqqamaasinchu Yohaannisi iima Yesuusi ledo lainoti hiittee gaamooti?

⁴ Soqqamaasinchu Yohaannisi ajuujatenni Yihowa gashshootira halantannorenna hegere heeshsho atoote afidhannore lame gaamo laino. Umi gaamo kiiro 144,000. (Aju. 7:4) Insa iima Yesuusi ledo gashshaasine ikkitanno gede uullanni doorroonnireeti. Insa isi ledo uulla gashshitanno. (Aju. 5:9, 10; 14:3, 4) Yohaannisi ajuujatenni insa Yesuusi ledo iima Tsiyooni Ilaalira uurrite noore laino.—Aju. 14:1.

5. Uullate aana gattinori 144,000 wido ikkitinori muli yanna giddo ma ikkitanno?

⁵ Yesuusi soqqamaasine yannanni kayise Yihowa 144,000 wido ikkannoha lowo kume ikkanno manna dooranni keeshshino. (Luq. 12:32; Rom. 8:17) Ikkirono Yohaannisi ajuujatenni goofimarchu barra uullate gattannori buurantinori kiiro shiima ikkitannota laino. Kuri ‘gattinorira’ Yihowa hagiirsiissinota leellishannoha jeefote sumuda sumundanninsahu bayiru qarri hanafara albaanniiti. (Aju. 7:2, 3; 12:17) Insa bayiru qarri hanafihunni shiima yanna gedensaanni iimira hadhanno; hakkiicho ammanante heedhe reyitinori 144,000 wido ikkitinori ledo xaaddanno. Insa hakkiicho Yesuusi ledo Maganu Mangiste gashshaasine ikkitanno.—Mat. 24:31; Aju. 5:9, 10.

6-7. (a) Yohaannisi aanche hiittee gaamo laino? Insa daafira anfoommori maati? (b) Uullate aana gattino buuramaasinenna ‘lowo manni’ Ajuuja fooliishsho 7te kulloonniri woˈmanno yanna quqquxame agadha hasiissannonsahu mayiraati?

⁶ Yohaannisi iimira hadhanno gaamo laihu gedensaanni wole “lowo manna” laino. Tenne gaamo wido ikkino manni kiirre ditunqanniho. (Aju. 7:9, 10) Insa daafira anfoommori maati? Yohaannisira togo yine kulloonnisi: “Kuri lowo qarra qeelte fulte dagginoreeti; uddanonsano Geˈrechu mundeenni hayishshidhe waajjo assidhino.” (Aju. 7:14) Kuni ‘lowo manni’ bayira qarra gate saihu gedensaanni, uullate aana heeˈranno; hattono dhagge ikkanno atoote afiˈranno.—Far. 37:9-11, 27-29; Law. 2:21, 22; Aju. 7:16, 17.

⁷ Hexxonke iimira haˈra woy uullate aana heeˈrano ikkituro, Ajuuja fooliishsho 7te kulloonniri woˈmanna laˈneemmota ammanneemmo? Ammana hasiissannonke. Hatti yanna Maganoho soqqantannote lamente gaamora hagiirsiissannota ikkitanno! Maganu gashshootira halama doodhinoommo daafira hatte yannara lowo geeshsha hagiidhineemmo. Ajuujate maxaafi bayiru qarri daafira wolere maa kulannonke?—Mat. 24:21.

8. Bayiru qarri hanafannohu hiittoonniiti? Rooru manni hatte yannara ma assanno?

⁸ Sai birxichira ronsummonte gede, muli yannara alamete mangistubba Bayira Baabiloone yaano alamennita kaphu ammaˈno hunate kaˈanno. (Aju. 17:16, 17) Tini bayiru qarri hanafinota leellishshannote. Tini lowo manni Yihowa magansiˈrate bobbahanno gede assitannoni? Diassitanno. Hatteentenni Ajuuja fooliishsho 6 kultannonte gede, hattee qarru yannara Yihowa magansiˈrannokki manni agarooshshe afiˈrate ilaallate ledo lawinsoonnihu poletiku gashshootiwanna daddalu dirijjittawa haˈranno. Kuni manni Yihowa Gashshootira halamannokki daafira, Yihowa insa iso gibbannori gede asse laˈˈanno.—Luq. 11:23; Aju. 6:15-17.

9. Bayiru qarri yannara Yihowa manni baxxe leellannohu hiittoonniiti? Tini mayi ikkanno gede assitanno?

 ⁹ Hattenne bayiru qarri yannara ammanantinoti Yihowa soqqamaasine baxxite leeltanno. Hattee yannara uullate aana Yihowara soqqantannorinna ‘moyichoho’ kaaˈlama gibbannori insa callaati. (Aju. 13:14-17) Insa Yihowara ammanante heedhanno daafira Yihowa gibbannori insara hanqitanno. Hakko daafira buusantino daga alamete doyichora nooha Maganu manna siˈanno. Qullaawu Maxaafi konne sia Maagoogi Googi sia yaanno.—Hiz. 38:14-16.

10. Yohaannisi Ajuuja 19:19-21 kultanno garinni, Yihowa mannasi siˈnanni woyite ma assanno?

¹⁰ Yihowa mannasi siˈnanni woyite ma assanno? Isi, “Hanqunni kaeemmo” yiino. (Hiz. 38:18, 21-23) Ajuuja fooliishsho 19 hakkiinni aane mayi ikkannoro kultanno. Yihowa mannasi gatisanno gedenna qase diinnansa qeelanno gede Beettosi soyanno. Yesuusi “gordu olanto” yaano ammanantino sokkaasinenna 144,000 ledo konne ola olamanno. (Aju. 17:14; 19:11-15) Kuni oli mayi ikkanno gede assanno? Yihowa giwanno manninna dirijjitta baala woˈmunni woˈma baˈanno!—Yohaannisi Ajuuja 19:19-21 nabbawi.

11. Ajuujate maxaafi giddo kulloonnihu albillitte ikkannohu lowo geeshsha hasiisanno coyi maati?

¹¹ Uullate aana heeˈrannohu ammanamino manni Maganu diinna baˈeenna gate saˈˈanno woyite mageeshshi geya hagiidhannoro hanni hedi! Hatti yanna lowo geeshsha hagiirsiissannote! Bayira Baabiloone baˈanno woyite iima lowo hagiirri ikkanno; ikkirono hakkiinni roore hagiidhinanni gede assannohu wolu coyino no. (Aju. 19:1-3) Kuni coyi Ajuujate maxaafi giddo kulloonniho lowo geeshsha hasiissannoho ‘Geˈrechu jilaati’ woy sargeeti.—Aju. 19:6-9.

12. Yohaannisi Ajuuja 21:1, 2 kultanno garinni Geˈrechu sarge sarginsannihu mamooteeti?

¹² Geˈrechu sarge sarginsannihu mamooteeti? Baalunku 144,000 wido ikkitinori Armagedooni hanafara albaanni iimira hadhanno. Ikkirono hatti Geˈrechu sarge sarginsanni yanna diˈˈikkitino. (Yohaannisi Ajuuja 21:1, 2 nabbawi.) Geˈrechu sarge sarginsannihu Armagedooni oli goofihunna Maganu diinna baala baˈuhu gedensaanniiti.—Far. 45:3, 4, 13-17.

13. Geˈrechu sarge yannara mayi ikkanno?

¹³ Geˈrechu sarge yannara mayi ikkanno? Meyatinna labbaahu adhamanno woyite mitto ikkannonte gede, tenne geˈrechu sarge yannarano Moote Yesuusi Kiristoosinna “idayicho” yaano 144,000 mitto ikkitanno. Tenne dhagge ikkitanno yannanni hanaffe Yesuusi Kiristoosinna 144,000 kumi 1,000 diri geeshsha uulla gashsha hanaffanno.—Aju. 20:6.

14-15. Ajuuja fooliishsho 21, 144,000 mayi ledo heewisiissanno? (Aaniidi qoolira noo misile lai.)

¹⁴ Aantete Ajuuja fooliishsho 21 144,000 “Haaro Yerusaalame” yinoonnihu biifadu katami ledo heewisiinsoonni. (Aju. 21:2, 9) Kuni katami 12 ‘Geˈrechu soqqamaasine suˈma borreessinoonniha’ 12 safote kincho afiˈrinoho. Yohaannisi tenne dhagge assiˈrinohu mayiraati? Korkaatuno hatte kinna giddo mittoho isi suˈmino borreessame nooha laino. Tini lowo ayirrinyeeti!—Aju. 21:10-14; Efe. 2:20.

¹⁵ Konni katami gedeehu wolu katami dino. Katamunniti jawa doogo filu culkinni seekkinoonnite, katamaho dilqu kinchinni seekkinoonnihu 12 waalchi no, katamunniti kinchu  huxxi safo addi addi dilqinni seesiinsoonnite; hattono katamu shoolenka raga godowanna hojja taaloho. (Aju. 21:15-21) Ikkirono Yohaannisi xeino coyi noota laino! Isi togo yiino: “Woˈmanka Dandaanno Mootichi Maganunna Geˈrechu, Qullaawa Mine ikkitinohura, katamu giddo wole qullaawa mine diafoommo. Maganu ayirrinyi xawanno daafiranna Geˈrechu caabbicho ikkino daafira, katamaho aganu woy arrishshote xawaabbi dihasiisanno.” (Aju. 21:22, 23) Haaro Yerusaalame wido ikkitinori Yihowa ledo xaaddotenni xaaddanno. (Ibi. 7:27; Aju. 22:3, 4) Hakko daafira konni katamira qullaawu mini Yihowanna Yesuusaati.

16. Maganu Mangistehu Kumu Diri Gashshooti yannara mannu ooso maa afidhanno?

¹⁶ Buurantinori konni katami daafira heddanno woyite lowo geeshsha hagiidhitanno. Uullate aana heeˈrate hexxo noonsarino konne katama illachishshanno gede assannonsari no. Maganunnihu Kumu Diri Gashshooti yannara Haaro Yerusaalame uullate kiirre tunqannikki atoote abbitanno. Yohaannisi kuni atooti ‘heeshshote wayi xashshi’ gede ikke lolahanna laino. Waaho lamenka widoonni ‘gosa hursitanno’ daro afidhinoti ‘heeshshote haqqe’ no. (Aju. 22:1, 2) Hakko heeˈranno manni baalu tenne qixxaawonni horo afiˈra dandaanno. Hajajantannoti mannu ooso baala sunu sununni guuta ikkitanno. Xissonna wiˈla diheedhanno.—Aju. 21:3-5.

17. Yohaannisi Ajuuja 20:11-13 kultanno garinni Kumu Diri Gashshooti yannara horo afidhannori ayeooti?

¹⁷ Tenne dhagge ikkitanno qixxaawonni horo afidhannori ayeooti? Umihunni, Armagedooni ola gatte saˈannote lowo dagaatinna haaro alamera ilantanno qaaqquulleeti. Ikkirono Ajuuja fooliishsho 20 reyitinorino kaˈannota kultanno. (Yohaannisi Ajuuja 20:11-13 nabbawi.) ‘Keeraanonna cubbaataammu’ reyotenni kaˈe uullate aana heedhanno; cubbaataammaho yiniri Yihowa daafira rosate faro afidhukki reyitinoreeti. (Soq. 24:15; Yoh. 5:28, 29) Hatto yaa Kumu Diri Gashshooti yannara reyitinori baalunku kaˈanno yaateni? Deeˈni. Yihowara soqqamate faro afidhe heedhenni gibbe reyitinori reyotenni dikaˈanno. Insa Yihowa daafira rosate faro afidhe heedhe gibbino daafira, haaro alamera heeˈrate maltinokkire ikkansa leellishshino.—Mat. 25:46; 2 Tes. 1:9; Aju. 17:8; 20:15.

18. Kumu diri gashshooti jeefora uullate aana heeshsho hiittoota ikkitanno?

¹⁸ Kumu diri gashshooti jeefora uullate aana heeˈranno manni baalu guuta ikkanno. Addaamiwinni ragiˈnoommo cubbinni gawajjamanno manni diheeˈranno. (Rom. 5:12) Addaami loosino cubbi abbino rumo woˈmunni woˈma baˈanno. Konni garinni uullate aana heeˈranno manni 1,000 diri jeefora guuta ikkanno daafira ‘reyotenni kainohu’ gedeeti.—Aju. 20:5.

19. Jeefote fonqoli hasiisannohu mayiraati?

¹⁹ Sheexaanu fonqolisirono Yesuusi Maganoho ammaname heeˈrinota anfoommo. Ikkina guuta ikkino manni baalu Sheexaanu fonqolannonsa woyite Yihowara ammaname heeˈranno? Kumu diri jeefora Sheexaane qiletenni tirranni woyite mittu mittunku manchi Yihowara ammanaminoha ikkasinna teˈee leellishanno. (Aju. 20:7) Konni jeefote fonqoli yannara ammanantinore ikkansa leellishshannori hegere heeshshonna addu wolapho afidhanno. (Rom. 8:21) Finqilu manni Daawuloosinna agaanintesi ledo hegerera baˈˈanno.—Aju. 20:8-10.

20. Ajuujate maxaafi giddo noote dhagge ikkitanno masaalo daafira mayi macciishshamannohe?

²⁰ Ajuujate maxaafi giddo kulloonnita mite hedo xiinxallinummohu gedensaanni mayi macciishshaminohe? Tenne dhagge ikkitanno masaalo giddo atino noottota hedakki dihagiirsiissinohe? Tini wolootuno ninke ledo halaalaancho Magano magansidhanno gede koyisatto gede diassitinohe? (Aju. 22:17) Konne albillitte ikkanno coye xiinxalline lowo geeshsha hagiidhinoommo daafira, ninkeno soqqamaasinchu Yohaannisi gede, “Hamiiˈni! Mooticha Yesuusa, amo!” yaa dandiineemmo.—Aju. 22:20.