1. Ninke giddo duuchaho qarra ikkannonkeri maati?

 AYYAANAAMITTETE mixo fushshidheenna tenne mixo wonshiꞌra qarra ikkite egentinohe? b Hatto ikkiro tini qarra ikkitinohehu ate calla diꞌꞌikkootto. Lawishshaho Filippi yinanni rodii huuccattosi woyyeessiꞌranna albinni roore ganye huucciꞌra hasiꞌrino; kayinni isira huuccatto assiꞌranno yanna afiꞌra qarra ikkitinosi. Eriika yinanni rodoo qanchu soqqansho gambooshshe yannatenni iillate mixo fushshidhino; ikkirono ise woꞌmanka woyite gambooshshe barrisidhe iillitanno. Toomaasi yinanni rodii Qullaawa Maxaafa nabbawe gudate duucha hige woꞌnaalino. Isi togo yiino: “Qullaawa Maxaafa nabbawa dibaxisannoe. Qullaawa Maxaafa nabbawe gudate sase hige woꞌnaaloommo; kayinni sasente yannara Leewaawootu maxaafa iillummoti aguroommo.”

2. Mitte ayyaanaamittete mixo fushshiꞌne wonshiꞌnoommokkiha ikkiro hexxo mudha hasiissannonkekkihu mayiraati?

² Wonshiꞌroottokki mixo nooheha ikkiro hexxo mudhitooti. Shiima mixo wonshiꞌrate nafa yannanna sharro hasiissanno. Isinni mixokki wonshiꞌrate sharramakki Yihowa ledo noohe jaalooma naadattotanna isira soqqamate dandiittore baala assa hasiꞌrattota leellishshanno. Yihowano assattore naadanno. Hige isi assa dandaattokkire assattora dihasiꞌranno. (Far. 103:14; Mik. 6:8) Hakko daafira mixo fushshiꞌratto woyite wonshiꞌra dandaatto mixo fushshiꞌri. Mixo fushshiꞌroottoha ikkiro wonshiꞌrate maa assa dandaatto?  Hanni tennera kaaꞌlitannoheta mite hedo laꞌno.

3. Hasatto lowo geeshsha hasiissannota ikkitinohu mayiraati?

³ Ayyaanaamittete mixo wonshiꞌrate qaru coyi hasatto heedhannonke gede assiꞌrate. Hasatto noosi manchi mixosi wonshiꞌrate diinaggaawe loosanno. Mixonke wonshiꞌrate noonke hasatto yowolo hendoonniwa iillitanno gede xiibbanno bubbe gedeeti. Bubbe bubbisa agura hoogguro laaqaanchu hedinowa iillasi digattanno. Isinni bubbe lowota ikkituro hedinowa rahe iillara dandaanno. Hatteente gede ninkerano lowo hasatto heedhunkero mixonke mulenni wonshiꞌnammora dandiineemmo. Eli Salvadoori heeꞌrannohu Deevidi yinanni rodii togo yiino: “Hasatto heedhuꞌnero mixoꞌne wonshiꞌrate diinaggaabbinanni. Aye coyino mixoꞌne wonshidhinannita hoolaꞌnera diwodhitinanni.” Ikkina hasattonke lexxitanno gede maa assa dandiineemmo?

4. Mayi daafira huucciꞌra dandiineemmo? (Filiphisiyusi Sokka 2:13) (Misileno lai.)

⁴ Hasattokki lexxitanno gede kaaꞌlahera Yihowa huucciꞌri. Yihowa ayyaanisi widoonni mixokki wonshiꞌrate hasatto heedhannohe gede assannohe. (Filiphisiyusi Sokka 2:13 (NW) nabbawi. c) Mito woyite mixo fushshiꞌneemmohu fushshiꞌra hasiissannonketa anfoommo daafiraati; tini qolte danchate. Ikkirono mixonke wonshiꞌrate hasatto hooggankera dandiitanno. Ugaandaho heedhannote Noorina yinanni rodoo woꞌnaalshi tenne leellishanno. Ise Qullaawa Maxaafa xiinxallisate mixo fushshidhino; ikkollana rosiisate ikkado diꞌꞌikkoomma yite heddanno daafira tenne mixo wonshiꞌrate hasatto dinose. Noorina kaaꞌlinoseri maati? Ise togo yitino: “Qullaawa Maxaafa xiinxallisate hasatto heedhannoe gede kaaꞌlaera barru baala Yihowa huucciꞌroomma. Rosiisate dandooꞌya woyyeessiꞌrate sharrame huuccattoꞌya ledo sumuu yaannore assoomma. Boodu agani gedensaanni hasattoꞌya lexxitinota huwatoomma. Hakko dironni lame manna Qullaawa Maxaafa xiinxallisa hanafoomma.”

5. Mixonke wonshiꞌrate hasattonke lexxitanno gede maa hiinca dandiineemmo?

⁵ Yihowa assinohere hiinci. (Far. 143:5) Soqqamaasinchu Phaawuloosi Yihowa uyinosi elto hiincino; tini qolte isi Yihowara diinaggaawe soqqamanno gede assitinosi. (1 Qor. 15:9, 10; 1 Xim. 1:12-14) Hatteente gede atino Yihowa assinohere hiincitto kiiro mixokki wonshiꞌrate noohe hasatto lexxitanno. (Far. 116:12) Hanni Honduraasi heedhannoti mitte rodoo woꞌma yanna suwisaancho ikkate mixose wonshidhanno gede kaaꞌlinoseri maatiro laꞌno. Ise togo yitino: “Yihowa mageeshshi geeshsha baxannoero hiincoomma. Isi mannisiwa abbinoe. Towaatannoe hattono agarannoe. Konni garinni hiincaꞌya Yihowara nooe baxillinna mixoꞌya wonshiꞌrate nooe hasatto lexxitanno gede assitino.”

6. Hasattonke lexxitanno gede kaaꞌlannonkeri woluri maati?

 ⁶ Mixokki wonshiꞌrittoro afiꞌratto atoote illachishi. Hanni aleenni kulliti Eriika qanchu soqqansho gambooshshe yannatenni haꞌrate fushshidhino mixo wonshidhanno gede kaaꞌlinosere laꞌno. Ise togo yitino: “Soqqansho barrisire haꞌraꞌyanni lowori gate baꞌꞌannoeta wodanchoomma. Kayinni yannatenni haꞌrummaro roduuwa keere haaꞌranna insa ledo hasaawa dandeemma. Qoleno soqqansho baxissannoe gede assitannoetanna dandooꞌya woyyeessiꞌreemma gede kaaꞌlitannoe hedo macciishsha dandeemma.” Eriika qanchu soqqansho gambooshshe yannatenni hadhuro afidhanno atoote illachishshino; hattono ise mixose wonshidhino. Atina hiikkonne atoote illachisha dandaatto? Mixo fushshiꞌroottohu Qullaawa Maxaafa nabbawate woy huuccatto assiꞌrate ikkiro, hatto assakki Yihowa ledo noohe jaalooma kaajjishshanno gara hedi. (Far. 145:18, 19) Woy mixo fushshiꞌroottohu mitto Maganu baxanno akata woyyeessiꞌrate ikkiro, kuni akati wolootu ledo noohe aante seekkanno gara hedi. (Qol. 3:14) Mixokki wonshiꞌra hasiꞌrattohu mayiraatiro borreessite amaxxi; borreessiꞌrootto coye ganyite lai. Aleenni kullihu Toomaasi togo yiino: “Mixoꞌya wonshiꞌreemmo gede assannohu duuchu korkaati heeꞌriro tenne mixoꞌya wonshiꞌrate roore diinaggaaweemmo.”

7. Huuliyonna minaamasi mixonsa wonshiꞌranno gede kaaꞌlinonsari maati?

⁷ Mixokki wonshiꞌratto gede kaaꞌlitannohe jaallawa aani. (Law. 13:20) Hanni Huuliyonna minaamasi soqqanshonsa halashshiꞌrate fushshidhino mixo wonshidhanno gede kaaꞌlinonsari maatiro laꞌno. Huuliyo togo yiino: “Mixonke wonshiꞌneemmo gede kaaꞌlitannonke jaalla doodhinoommo; hattono insa ledo mixonke daafira hasaambeemmo. Insa giddo batinyu ninkete gedee mixo fushshidhe wonshidhinoreeti; hakko daafira kaaꞌlannonkere kultankera dandiitanno. Qoleno jaallanke mixonke wonshiꞌrate ma garinni qixxaambanni heeꞌnoommoro xaꞌmitannonke; hattono hasiisanno woyite kaaꞌlannore kulte jawaachishshannonke.”

8. Mixonke wonshiꞌrate sharrammeemmohu hasatto heedhannonke woyite calla ikkiro mayi kalaqamara dandaanno? (Misileno lai.)

⁸ Noore coyiꞌniro ninke baalunkura mixonke wonshiꞌrate hasatto heedhannonkekki woyiti no. Hatto yaa kayinni mixonke wonshiꞌrate sharrama didandiineemmo yaateni? Deeꞌni. Lawishshaho lowo bubbe yowolo hendoonniwa iillitanno gede xiibbara dandiitanno. Ikkirono, mito woyite bubbete wolqa ajjara mito woyite kayinni horontanni hooggara dandiitanno. Hatto yaa kayinni yowolo laaqannohu noowiinni milli yaa didandaanno yaateni? Hatto yaa diꞌꞌikkino. Lawishshaho mite yowolora motore no; mitete qole laaqiꞌraanchu no. Yowolo laaqanno manchi hedinowa iillate kuri coyibba horoonsiꞌrara dandaanno. Hasattonkeno tenne bubbe gedeeti yaa dandiinanni; mito woyite lexxitara mito woyite kayinni ajjara dandiitanno.  Mito woyite qole mixonke wonshiꞌrate hasatto horonta hooggankera dandiitanno. Hakko daafira mixonke wonshiꞌrate sharrammeemmohu hasatto heedhannonke woyite calla ikkiro, tenne mixo horonta wonshiꞌra hoongammora dandiineemmo. Yowolo laaqanno manchi hedinowa iillate wole faro horoonsiꞌrannonte gede, ninkeno hasatto hooggunkero nafa mixonke wonshiꞌrate sharrama dandiineemmo. Hige tenne assa shota diꞌꞌikkitino; kayinni mixokki wonshiꞌratto woyite hagiidhatto. Hanni hasatto hooggunkero ma assa dandiineemmoro laꞌnammora albaanni aante noo xaꞌmora dawaro afiꞌrate woꞌnaallo.

9. Hasatto noonkekkiha ikkiro nafa mixonke wonshiꞌrate sharrama soꞌroteni? Xawisi.

⁹ Yihowa isira hagiirrunninna uminke fajjonni soqqammammosira hasiꞌranno. (Far. 100:2; 2 Qor. 9:7) Ikkina mixonke wonshiꞌrate hasatto hooggunkero sharrama hasiissannonke? Hanni soqqamaasinchu Phaawuloosi lawishsha laꞌno. Isi, “Manninateꞌya gadadisanni miirannoe gede asseemmo” yiino. (1 Qor. 9:25-27) Phaawuloosi hasatto hooggusiro nafa gara ikkinore assate isonooto giddeessino woyiti no. Yihowa Phaawuloosi assinorinni hagiidhino? Ee hagiidhino! Phaawuloosi assinorira Yihowa maassiꞌrinosi.—2 Xim. 4:7, 8.

10. Hasatto hooggunkero nafa mixonke wonshiꞌrate sharramanke maaho kaaꞌlitannonke?

¹⁰ Hatteente gede ninkeno hasatto noonkekkiha ikkiro nafa mixonke wonshiꞌrate sharrammanna laꞌꞌanno woyite Yihowa hagiidhanno. Yihowa mitto coye assineemmohu woꞌmanka woyite hakko coye banxeemmo daafira ikkikkinni iso banxeemmohura ikkinota afino daafira hagiidhanno. Yihowa Phaawuloosi maassiꞌrinte gede ninkeno assineemmorira maassiꞌrannonke. (Far. 126:5) Yihowa atoote afiꞌranke, hasatto heedhannonke gede nafa assitara dandiitanno. Poolaandete heedhannoti Luusiina yinanni rodoo togo yitino: “Mito woyite, roorenkanni daafursannoe woyite soqqansho fula dibaxisannoe. Ikkirono soqqansho fule higeemma woyite lowo geeshsha hagiidheemma.” Hanni hasatto hooggannonke woyite maa assa dandiineemmoro laꞌno.

11. Yihowa ninkeneeto qeeꞌlate akata lossiꞌneemmo gede kaaꞌlannonkehu hiittoonniiti?

¹¹ Ateneeto qeeꞌlate huuccatto assiꞌri. Meessanaa qeeꞌla hedonkenna assootenke eemadhate dandooti. Duucha woyite tini yaatto busha coye assineemmokki gede qoropha yitanno tiro afidhino. Ikkirono dancha looso loosateno roorenkanni loonseemmo loosi shota ikkannonkekki woyite woy hasatto hooggannonke woyiteno ninkeneeto qeeꞌla hasiissannonke. Meessanaa qeeꞌla qullaawu ayyaani laalo wido ikkitinota qaagi; hakko daafira Yihowa konne hasiisanno akata lossiꞌratto gede kaaꞌlannoha qullaawa ayyaanasi aannohe gede huucciꞌri. (Luq. 11:13; Gal. 5:22, 23) Aleenni kullihu Deevidi huuccatto kaaꞌlitinosi gara xawisino. Isi hojju xiinxallosi albinni roore ganye assiꞌra hasiꞌrino. Isi togo yiino: “Yihowa aneneeto qeeꞌlate akata lossiꞌreemmo gede kaaꞌlaera huucciꞌroommo. Yihowa kaaꞌleennae hojju xiinxallo pirogiraame fushshiꞌre ganye xiinxalla dandoommo.”

12. Rosiisaancho 11:4 noohu xintu seeri ayyaanaamittete mixonke wonshiꞌneemmo gede kaaꞌlannonkehu hiittoonniiti?

¹² Baalunku coyi injaaꞌne geeshsha agartinoonte. Tenne alamera baalunku coyi injaa hoogara dandaanno. Baalunku coyi injaanke geeshsha agadhineemmoha ikkiro mixonke horo wonshiꞌra hoongammora dandiineemmo. (Rosiisaancho 11:4 nabbawi.) Daayineeli yinanni rodii, “Baalunku coyi injaanno yanna dino. Mitto coye hananfeemmo woyite coyi injaannonke gede assinanni heeꞌnoommo” yiino. Ugaandaho heeꞌrannohu Pooli yinanni rodii qole, techo gaꞌa yaa hasiissannonkekkihu mayiraatiro wole korkaata kulanni togo yiino: “Qarra ikkanno coyi  heeꞌreennanni mitto coye hananfummoro Yihowa maassiꞌrannonke.”—Mil. 3:10.

13. Mixonke wonshiꞌrate shiimare assine hanafa dancha ikkitinohu mayiraati?

¹³ Shiimare assite hanafi. Mixonke wonshiꞌra dandiineemmokkita labbunkero hasatto hooggankera dandiitanno. Aterano hatto lawannoheha ikkiro, mixokki wonshiꞌrate shiimare assite hanafa dandaatto? Mixo fushshiꞌroottohu mitto akata lossiꞌrate ikkiro konne akata leellishate shiimare assite hanafi. Mixokki Qullaawa Maxaafa nabbawe guda ikkituro shiima shiima nabbawate pirogiraame fushshiꞌra dandaatto? Hanafote kullihu Toomaasi diru giddo Qullaawa Maxaafa nabbawe gudate fushshiꞌrino mixo wonshiꞌra qarra ikkitinosi. Isi togo yiino: “Konni garinni rahe rahe nabbawa dandeemmokkita huwatummo. Hakko daafira wolu garinni nabbawate woꞌnaalummo; barru baala shiima shiima gafa nabbawe hiincate yanna gaaꞌmummo. Konni garinni nabbawaꞌya nabbawa baxeemmo gede assitinoe.” Toomaasi nabbawa baxino daafira albinni roore seeda yanna nabbawa hanafino. Jeefote isi Qullaawa Maxaafa nabbawe gudino. d

14. Mixonke wonshiꞌra qarra ikkitannonke gede assannori mayi tuncu yaankera dandaanno?

¹⁴ Lowo hasatto heedhunkerono woy ninkeneeto eemadhinummorono guficho ikkannori tuncu yaankera dandaanno. Lawishshaho ‘hedeweelchu coyi’ mixonke wonshiꞌrate sharrammeemmo yanna hoongeemmo gede assankera dandaanno. (Ros. 9:12) Hexxo mudhineemmonna wolqa baꞌneemmo gede assanno qarri iillankera dandaanno. (Law. 24:10) Guuntete xeꞌne noonkere ikkinoommo daafira mixonke wonshiꞌra qarra ikkitannonke gede assitanno soꞌro loonsammora dandiineemmo. (Rom. 7:23) Woy daafurrammora dandiineemmo. (Mat. 26:43) Guficho woy ataawe ikkannonkere qeelleemmo gede kaaꞌlannonkeri maati?

15. Guficho ikkannori tuncu yiinke yaa mixonke wonshiꞌra didandiineemmo yaateni? Xawisi. (Faarso 145:14)

 ¹⁵ Guficho ikkannori tuncu yiihe yaa mixokki wonshiꞌra didandaatto yaa ikkitinokkita qaagi. Qullaawu Maxaafi qarra ikkannonkeri duucha hige tuncu yaankera dandaannota kulanno. Ikkirono, iillannonke qarra Yihowa kaaꞌlonni qeelle saꞌꞌa dandiineemmotano kulanno. (Faarso 145:14 nabbawi.) Aleenni kullihu Filippi togo yiino: “Qaru coyi mixoꞌya wonshiꞌra hoogummo yanna ikkitukkinni mixoꞌya wonshiꞌrate galagale sharramaꞌyaati.” Aleenni kullihu Deevidino togo yiino: “Iillannoe qarra gufichu gede ikkikkinni, Yihowa mageeshshi geeshsha baxeemmoro leellisheemmo faro gede asse laꞌꞌate woꞌnaaleemmo.” Addanko, qarra woy ataawe ikkannori heeꞌreennanni mixonke wonshiꞌrate sharramanke Yihowa hagiirsiisa hasiꞌneemmota leellishshanno. Yihowa mixonke wonshiꞌrate woꞌmanka woyite sharrammanna laꞌꞌanno woyite lowo geeshsha hagiidhanno!

16. Guficho woy ataawe ikkinonke coyinni maa rosa dandiineemmo?

¹⁶ Guficho woy ataawe ikkinohe coyinni rosate woꞌnaali. Guficho ikkanno coyi tuncu yiinohehu mayiraatiro hedi; hattono ateneeto togo yite xaꞌmi: ‘Togoo coyi galagale iillannoekki gede maa assa dandeemmo?’ (Law. 27:12) Mito woyite iillinohe qarri fushshiꞌrootto mixo wonshiꞌra dandaattokkita ikkitinota leellishannoha ikkara dandaanno. Hatto ikkiro, fushshiꞌrootto mixo wonshiꞌra dandaattoteronna teꞌee wirro buuxi. e Yihowa wolqankera aleenni ikkitino mixo wonshiꞌra hoongoommo daafira didadillanno.—2 Qor. 8:12.

17. Konni albaanni wonshiꞌnoommo mixo qaaga hasiissannonkehu mayiraati?

¹⁷ Konni albaanni wonshiꞌrootto mixo qaagi. Qullaawu Maxaafi “Maganu halaalaancho yoo yaannoho; loosoꞌne . . . dihawanno” yaanno. (Ibi. 6:10) Hakko daafira atino konni albaanni assoottore hawa dihasiissannohe. Konni albaanni, Yihowa ledo noohe jaalooma kaajjishiꞌrate, isi daafira wolootaho kulate woy cuuamate fushshiꞌrootto mixo wonshiꞌrate assoottore hiinci. Konni albaanni fushshiꞌroottota ayyaanaamittete mixo wonshiꞌroottonte gede xa noohe mixo wonshiꞌrateno sharrama dandaatto.—Fil. 3:16.

18. Mixonke wonshiꞌrate sharrammeemmo woyite maa qaaga hasiissannonke? (Misileno lai.)

¹⁸ Yowolo laaqanno manchi hedinowa iille hagiidhannonte gede atino Yihowa kaaꞌlonni mixokki wonshiꞌra dandaatto. Kayinni yowolo laaqannohu batinyu manni haꞌranno doogono baxannota qaagi. Hatteente gede atino ayyaanaamittete mixokki wonshiꞌrate sharramatto woyite Yihowa kaaꞌlinohenna maassiꞌrinohe gara deꞌooti. (2 Qor. 4:7) Hexxo mudha hoogittoro lowo atoote afiꞌratto.—Gal. 6:9.