1. Yihowa soqqamaanosi ma assitanno gede koyisinonsa? (Misileno lai.)

 SHESHONNA biddishshu hasiisannonke woyite alba ayewa higa dandiineemmo? Tenne xaꞌmo dawaro diteeꞌlitinote. Huuccattotenni Magano Yihowa hasaawisa dandiineemmo. Yihowa hatto assinammora koyisinonke. Isi woꞌmanka woyite ‘agurrummokkinni huucciꞌnammora’ hasiꞌranno. (1 Tes. 5:17) Huxuxxi yinummokkinni Yihowa huucciꞌranna baalunku coyira isi biddishsha hasiꞌra dandiineemmo. (Law. 3:5, 6) Yihowa shaqqado Magano ikkino daafira hasiꞌnummo yanna geeshsha huucciꞌnammora kulinonke.

2. Konni birxichira maa ronseemmo?

² Huuccattote qoossonke lowo geeshsha naandeemmo. Ikkirono, loosu batiꞌrannonke daafira huuccatto assiꞌrate yanna afiꞌra qarra ikkitankera dandiitanno. Qoleno huuccattonke woyyeessiꞌra hasiissannonke yine hendeemmoha ikkara dandaanno. Qullaawa Borro giddonni jawaantenna biddishsha afiꞌra dandiineemmo. Konni birxichira, Yesuusi lawishsha harunsine huuccatto assiꞌrate yanna gaaꞌma dandiineemmo gara ronseemmo. Qoleno huucciꞌneemmo woyite onte coye assine huuccattonke woyyeessiꞌra dandiineemmohu hiittoonniitiro ronseemmo.

3. Yesuusi huuccattote daafira maa huwatino?

³ Yesuusi Yihowa huuccatto lowo geeshsha naadannota huwatino. Isi uullara daara lowo diri albaanni, Annisi ammanamino meentinna labballi huucciꞌrino huuccattora dawaro qolanna laino. Lawishshaho Haanna, Daawitinna Eeliyaasi  hattono wole ammanantino soqqamaano giddonsata kulte huuccidhino huuccattora Annisi dawaro qoli woyite Yesuusi Annisi ledo no. (1 Sam. 1:10, 11, 20; 1 Mot. 19:4-6; Far. 32:5) Yesuusi rosaanosi Yihowa huuccattonsara dawaro qolannota addaxxite duucha higge huuccidhanno gede rosiisinonsahu iseraati.—Mat. 7:7-11.

4. Yesuusi huucciꞌrino huuccattonni maa ronseemmo?

⁴ Yesuusi umisi huuccatto assiꞌre rosaanosira dancha lawishsha ikkino. Isi uullate aana soqqami yannara ganye huucciꞌrino. Isira duucha woyite loosu batiꞌrannosihuranna batinyu manni isiwa daanno daafira, huuccatto assiꞌrate yanna gaaꞌma hasiissinosi. (Maq. 6:31, 45, 46) Isi callisi huuccatto assiꞌranno yanna afiꞌrate soodo gute kaꞌꞌanno. (Maq. 1:35) Mitte yannara isi mitto lowo geeshsha hasiisanno coye assara albaanni hashsha woꞌma huucciꞌranni galino. (Luq. 6:12, 13) Qoleno Yesuusi reyara albaanni noo hashsha uullate aana loosara uyinoonnisiha shaaꞌꞌa ikkinokki looso umo fushshanno gede kaaꞌlasira Yihowa duucha hige huucciꞌrino.—Mat. 26:39, 42, 44.

5. Huuccatto assiꞌneemmo woyite Yesuusi lawishsha harunsa dandiineemmohu hiittoonniiti?

⁵ Yesuusi lawishshinni, loosu batiꞌrannonkeha ikkirono huuccatto assiꞌrate yanna gaaꞌma hasiissannonketa ronseemmo. Ninkeno Yesuusi gede soodo guto woy hashsha huuccatto assiꞌrate yanna gaaꞌma dandiineemmo. Hatto assineemmoha ikkiro, Yihowa tenne muxxe elto uyinonke daafira galatu noonketa leellinshanni heeꞌnoommo. Liini yinanniti mitte rodoo umo huuccattote qoosso daafira rossu woyite mageeshshi geeshsha hagiidhitinoro qaagganno. Ise togo yitino: “Yihowa hasiꞌrumma yannara huucciꞌra dandeemmata rosoomma; tini iso muli Jaaliꞌya gede asse laeemma gedenna huuccattoꞌya woyyeessiꞌreemma gede kaaꞌlitinoe.” Ninke giddo batinyehono hatto macciishshamannonketi dihuluullissannote. Hakko daafira hanni huuccatto assiꞌneemmo woyite assa dandiineemmoha onte qara coye laꞌno.

6. Yohaannisi Ajuuja 4:10, 11 kultanno garinni Yihowara mayi hasiisannosi?

⁶ Yihowa guwisa. Soqqamaasinchu Yohaannisi 24 geerri iima Yihowa magansidhanna leellishshannota dhagge ikkitanno ajuuja laino. Insa “Ayirrinyu, guweenyunna  wolqa ikkitohe!” yitanni Magano guwissino. (Yohaannisi Ajuuja 4:10, 11 nabbawi.) Ammanantino sokkaasineno Yihowa guwissannonna ayirrissanno gede assannonsahu duuchu korkaati noonsa. Insa iima ledosi heedhanno daafira Yihowa seekkite affino. Insa isi kalaqinore laꞌe akattasi huwata dandiitanno. Qoleno Yihowa assinore laꞌꞌansa iso guwissanno gede assitannonsa.—Iyo. 38:4-7.

7. Yihowa mayi daafira guwisa dandiineemmo?

⁷ Ninkeno huuccatto assiꞌneemmo woyite, Yihowa banxeemmohunna ayirrinseemmohu mayiraatiro kulle iso guwisa dandiineemmo. Qullaawa Maxaafa nabbabbinanninna xiinxallitinanni woyite, kiꞌne roore baxissannoꞌneta Yihowa akatta hedate woꞌnaalle. (Iyo. 37:23; Rom. 11:33) Hakkiinni tenne akatta daafira mayi macciishshamannoꞌnero Yihowara kulle. Qoleno Yihowa ninkeranna ammanate roduuwinkera assinore kulle iso guwisa dandiineemmo. Isi ninke woꞌmanka woyite towaatannonke hattono agarannonke.—1 Sam. 1:27; 2:1, 2.

8. Yihowa galanteemmo gede assannonkehu mitu korkaati maati? (1 Teselonqe 5:18)

⁸ Yihowa galata. Huuccattotenni Yihowa galanteemmo gede assannonkehu batinyu korkaati no. (1 Teselonqe 5:18 nabbawi.) Uyinonkehu danchu coyi baalaho iso galata dandiineemmo; korkaatuno dancha elto baalate buicho isooti. (Yai. 1:17) Lawishshaho biifado baattonna dhagge ikkanno kalaqami baalaho iso galata dandiineemmo. Qoleno heeshsho uyinonke daafira, maatenke daafira, jaallanke daafira hattono hexxonke daafira iso galata dandiineemmo. Hattono isi ledo muxxe jaalooma kalaqiꞌneemmo gede assinonke daafira Yihowa galata dandiineemmo.

9. Yihowa woꞌmanka woyite galata hasiissannonkehu mayiraati?

⁹ Ninke mittu mittunku Yihowa galanteemmo gede assannonke korkaata hedate sharrama hasiissannonkeha ikkara dandaanno. Korkaatuno heeꞌnoommohu galata afiꞌrinokki manni batiꞌrino alameraati. Mannu duucha woyite noonsarira galatantenni afiꞌra hasiꞌranno coye calla illachishanno. Ninkerano togoo akati heeꞌrinkero Yihowa mito coye aankera calla huucciꞌnammora dandiineemmo. Togoori kalaqamannokki gede Yihowa assinonke coyi baalaho woꞌmanka woyite galanteemmota leellisha hasiissannonke.—Luq. 6:45.

10. Mitte rodoo galattannota ikkase iillinose qarra dandiite saꞌanno gede kaaꞌlitinosehu hiittoonniiti? (Misileno lai.)

¹⁰ Galanteemmore ikka iillannonke qarra dandiine saꞌneemmo gede kaaꞌlitannonke. Hanni Arfaasa 1 2015 Agarooshshu Shaera fulinoha Kiyongisuuki yinanni rodoo woꞌnaalsha laꞌno. Ise shombu kaansere amaddinoseta kulloonnise. Ise, “Kuni dhibbi lowo geeshsha masisinoe. Nooere baalankare hoogoommahu gede ikke macciishshaminoe, hattono lowo geeshsha waajjoomma” yitino. Ikkina ise konne qarra dandiite saꞌanno gede kaaꞌlinoseri maati? Ise, “Hashshu baala goxammara albaanni, mininkera iimaanni fule hakko  barra afiꞌroommaha onte coye kule qoonqoꞌya gotti asse Yihowa galateemma” yitino. Tini yaaddosenni beedho afidhanno gedenna Yihowara noose baxille kultanno gede kakkayissinose. Ise Yihowa ammanantino soqqamaanosira buutote qarri iillinsa woyite kaaꞌlinonsa gara huwattino; hattono iillannonke qarra afiꞌneemmo atooti roorannota wodanchitino. Ninkerano qarru iillinkero nafa Kiyongisuuki gede Yihowa galanteemmo gede assannonkehu batinyu korkaati noonke. Huuccattotenni Yihowa galanteemmota leellishanke, iillannonke qarra dandiine saꞌneemmo gedenna wodanaaꞌmineemmo gede kaaꞌlitannonke.

11. Yesuusi iimira haꞌrihu gedensaanni rosaanosi worbuulle ikka hasiissinonsahu mayiraati?

¹¹ Sabbankeemmo woyite worbuulle ikkate Yihowa huucciꞌra. Yesuusi iimira haꞌrara albaanni rosaanosira “Yerusaalamete, Yihuda baalaho, Samaariyahonna gobbate qacce geeshsha” isi daafira farciꞌrate loosi noonsata qaagiissinonsa. (Soq. 1:8; Luq. 24:46-48) Shiima yanna gedensaanni Yihudunniti ammaꞌnote massagaano soqqamaasincho Yohaannisinna Pheexiroosi amadde usurtino. Hattono Sanihediriini shongowa massitino; insa kuri ammanantino labballo sabbaka agurtanno gede hajajjino, wole agurina waajjishiishshinonsa. (Soq. 4:18, 21) Pheexiroosinna Yohaannisi ma assituyya?

12. Soqqamaasinete Looso 4:29, 31 kultanno garinni Yesuusi rosaano maa assitino?

¹² Pheexiroosinna Yohaannisi Yihudunniti ammaꞌnote massagaano waajjishiishshunsata togo yitino: “Maganoho hajajama agurre kiꞌnera hajajama Maganu albaanni dancha coyetini? Hanni Kiꞌnenni yiiyye. Ninke anfoommorenna macciishshinoommore kula diagurreemmo.” (Soq. 4:19, 20) Pheexiroosinna Yohaannisi usuru mininni tirrihu gedensaanni, Yesuusi rosaano huuronsa naggi assite Yihowa fajjosi wonshitanno gede kaaꞌlansara huuccidhino. Insa “Soqqamaanokki qaalekki waajjitukkinni jawaatte kultanno gede assi” yite huuccidhino. Yihowano insa giddonsata kulte huuccidhino huuccattora dawaro qolino.—Soqqamaasinete Looso 4:29, 31 nabbawi.

13. Jiinihiyuki lawishshinni maa rosa dandiineemmo?

¹³ Ninkeno gashshaano sabbaka agurreemmo gede hajajjunkero nafa agurrummokki sabbanke Yesuusi rosaano lawishsha harunsa dandiineemmo. Hanni Jiinihiyuki yinanni rodii woꞌnaalsha laꞌno; isi olaho haꞌra giwino daafira usurroonnisi. Isi hakko calluwinsa usuramino manna towaatanno gede kulloonnisi; ikkollana isi insa ledo, insara hasiisanno coyi daafira calla hasaawanno gede fajjinoonnisi; insa ledo Qullaawu Maxaafi daafira hasaawara difajjinoonnisi. Isi worba ikkanno gedenna afiꞌri faro baala horoonsiꞌre hayyotenni sabbakanno gede kaaꞌlasira Yihowa huucciꞌrino. (Soq. 5:29) Isi togo yiino: “Yihowa waalchinsara heeꞌrenni, batinyu usuranyira ontu daqiiqi giddo Qullaawu Maxaafi xiinxallo hanafisiiseemmo gede worbimmanna hayyo oye huuccattoꞌyara dawaro qolinoe. Hakkiinni hashsha borrote sokka borreesse soodo usuranyaho oyemmonsa.” Ninkeno Yihowa soqqanshonke umo fushshineemmo gede kaaꞌlannonketa addaxxa dandiineemmo. Jiinihiyuki gede ninkeno worbimmanna hayyo aankera Yihowa huucciꞌra dandiineemmo.

14. Qarru amadannonke woyite mayi kaaꞌlankera dandaanno? (Faarso 37:3, 5)

¹⁴ Iillannohe qarra dandiite saꞌꞌatto gede kaaꞌlahera Yihowa huucciꞌri. Ninke giddo batinye dhiwanni waadannonke, xissiisiꞌneemmo gede assannori tuncu yaannonke, banxeemmo manna shiiꞌneemmo, maatenkera qarru iillanno hattono dartu woy wolu qarri  iillannonke. Olunna fayya qolte, iillannonke qarra dandee saꞌꞌa roore qarra ikkitannonke gede assitanno. Togoo woyite giddokkita fushshite Yihowara hasaaphi. Muli jaalikkira hasaaphattonte gede qarrakki Yihowara kuꞌli. Yihowa ‘towaatannoheta’ huluullantooti.—Faarso 37:3, 5 nabbawi.

15. Huuccatto ‘qarra cincine saꞌneemmo gede’ kaaꞌlitannonkehu hiittoonniiti? Lawishsha kuli.

¹⁵ Jaante huucciꞌra ‘qarru yannara cincineemmo’ gede kaaꞌlitannonke. (Rom. 12:12) Yihowa soqqamaanosira hiittoo qarri iillanni noonsaro afino; ‘raarensano macciishshanno.’ (Far. 145:18, 19) Kiristiina yinanniti 29 diro ikkannoseti suwisaancho rodoo tini halaale ikkase huwattino. Ise hedeweelcho buutote dhibbi amadinose. Hakko daafira ise quwa saꞌino yaaddo amaddinose. Gedensoonni Kiristiina amase shaanno dhibbi amadinoseta affu. Ise togo yitino: “Mittu mittunku barrira hasiissanno jawaante aaera Yihowa seekke huucciꞌroomma. Ganye ayyaanaamittete coye assate lawishshaho gambooshshe haꞌratenna hojju xiinxallo assiꞌrate sharrameemma.” Ise ledde togo yitino: “Huuccatto iillinoe qarra dandee saeemma gede kaaꞌlitinoe. Yihowa woꞌmanka woyite kaaꞌlannoeta afoomma; tenne afaꞌya lowo geeshsha sheshifachishshinoe. Amadinoe dhibbi bayichonkonni hurinoekkiha ikkirono Yihowa giddoyidi keere oye hattono wodanaaꞌmeemma gede asse huuccattoꞌyara dawaro qolinoe.” Yihowa “magansidhannosire jifamatenni gatisannonsata” horo dea dihasiissannonke.—2 Phe. 2:9.

16. Fonqolo qeelate Yihowa kaaꞌlo hasiissannonkehu mayiraati?

¹⁶ Fonqolo qeelatto gede kaaꞌlahera Yihowa huucciꞌri. Guuntete xeꞌne noonkere ikkinoommo daafira gara ikkinokkire assineemmo gede xixxiimbanninketa qeelate woꞌmanka woyite sharrama hasiissannonke. Sheexaanu kayinni hexxo mudhine sharrama agurreemmo gede assate dandiire baala assanno. Isi hedonke daafate horoonsiꞌranno doogga giddo mitte  maaeela boohaarshaati. Togoo boohaarshi surrenkera bushu coyi woꞌmanno gede assanno; tini qolte Yihowa albaanni xuru noonkere ikkineemmo gedenna jawa cubbo loonseemmo gede assitankera dandiitanno.—Maq. 7:21-23; Yai. 1:14, 15.

17. Kaaꞌlannonke gede Yihowa huucciꞌnummohu gedensaanni maa assa hasiissannonke? (Misileno lai.)

¹⁷ Gara ikkinokkire assineemmo gede xixxiimbanninketa qeelate Yihowa kaaꞌlo hasiissannonke. Yesuusi huuccattote daafira rosiisi woyite togo yiino: “Bushu coyiwiinni gatisinke ikkinnina, jifammeemmo gede assitootinke.” (Mat. 6:13) Yihowa ninke kaaꞌla hasiꞌranno; ikkirono kaaꞌlannonke gede isira hasaapha hasiissannonke. Qoleno huuccattonke ledo sumuu yaannore assa hasiissannonke. Sheexaanu alamera batidhinote gara ikkitinokki hedonni daafammeemmokki gede qoropha hasiissannonke. (Far. 97:10) Qullaawa Maxaafa nabbambe hattono xiinxalline surrenkera danchu coyi woꞌmanno gede assiꞌra dandiineemmo. Gambooshshe haꞌranna soqqansho fulano wodananke agadhate kaaꞌlitannonke. Yihowano wolqankera aleenni ikkino fonqoli iillankera wore laꞌꞌannokkita kule qaale einonke.—1 Qor. 10:12, 13.

18. Ninke baalunku huuccatto assiꞌneemmo woyite ma assa hasiissannonke?

¹⁸ Ninke mittu mittunku tenne qarrissannote goofimarchu yanna giddo Yihowara ammanamme heeꞌrate albinni roore huucciꞌra hasiissannonke. Barru baala giddoꞌneta kultine huucciꞌrate yanna gaaꞌme. Yihowa huuccattotenni ‘qarranke baala isira hasaaphinammora’ hasiꞌranno. (Far. 62:8) Assinoꞌne coyi baalaho Yihowa guwisse hattono galatte. Soqqanshote worbuulle ikkitinanni gede kaaꞌlaꞌnera iso huuccidhe. Iillannoꞌne qarranna fonqolo baala qeeltinanni gede kaaꞌlaꞌnera eeggifattine huuccidhe. Aye coyi woy aye manchino ganyitine Yihowa huuccidhinannikki gede assaꞌnera wodhitinoonte. Yihowa huuccattonkera dawaro qolannohu hiittoonniitiyya? Aananno birxichira tenne hasiissanno xaꞌmora dawaro qollanni.