1-2. Baxillu jaalooma amadate daafira mitootu mayitino?

 BAXILLU jaalooma hagiirsiisannoha assiꞌra dandiinanni. Xaa yannara baxillu jaalooma amadde noottoha ikkiro tini yanna hagiirsiissannota ikkitahera hasiꞌrattoti dihuluullissannote. Baxillu jaalooma amaddinori batinyu roduuwi tenne yanna hagiirsiissannota assiꞌra dandiitino. Itophiyaho heedhannoti Tsiyooni a yinanni rodoo togo yitino: “Lowo geeshsha hagiidhoomma yanna giddo mitte minaanniꞌya ledo baxillu jaalooma amande sayinsoommo yannaati. Lowo geeshsha hasiissanno hajo kayinse hasaambeemmo hattono osoꞌlineemmo. Baxeemmahanna isino baxannoe rodoo afiꞌroommata afummati lowo geeshsha hagiidhoomma.”

² Neezerilaandete heeꞌrannohu Aliishiyo yinanni rodii kayinni togo yiino: “Minaamaꞌya ledo baxillu jaalooma amande heeꞌnoommo yannara hagiirsiissanno yanna sayinsoommo; kayinni fonqolo ikkannorino tuncu yiinonke.” Konni birxichira baxillu jaalooma amaddinorira tuncu yaansara dandaannoha mito fonqolonna jaaloomansa qiniinoha assidhanno gede kaaꞌlannonsaha mito Qullaawu Maxaafiha xintu seera laꞌneemmo. Qoleno songote giddo noori baxillu jaalooma amaddinore kaaꞌla dandiitannohu hiittoonniitiro laꞌneemmo.

BAXILLU JAALOOMA AMANDANNI KORKAATA

3. Baxillu jaalooma amandannihu mayiraati? (Lawishsha 20:25)

³ Baxillu jaalooma amada hagiirsiissannota ikkiturono, togoo jaalooma amadino beettinna beetto adhamara dandaanno daafira tenne hajo hawa gede asse laꞌꞌa dihasiissannonsa. Insa sargensa barra, lubbotenni noo geeshsha mimmito baxatenna ayirrisate Yihowa albaanni qaale eanno. Aye qaaleno eꞌnammora albaanni seekkine heda hasiissannonke. (Lawishsha 20:25 nabbawi.) Adhamate qaale eꞌnammora albaannino tenne hajo seekkine heda hasiissannonke.  Mittu beettinna beetto baxillu jaalooma amade sayisanno yanna mimmito egennanno gedenna dancha doorsha doodhanno gede kaaꞌlitannonsa. Insa adhantara woy baxillu jaaloomansa agurtara dandiitanno. Mittu beettinna beetto baxillu jaalooma agurino yaa jaaloominsa diqiniinonsa yaa diꞌꞌikkitino. Hatteentenni baxillu jaaloominsa woyyannore doodhanno gede kaaꞌlinonsa.

4. Baxillu jaalooma amadate daafira gara ikkitino lao heedhannonke gede assiꞌra hasiissannonkehu mayiraati?

⁴ Baxillu jaalooma amadate daafira gara ikkitino lao heedhannonke gede assiꞌra hasiissannonkehu mayiraati? Adhantinokkirira baxillu jaalooma amadate daafira gara ikkitino lao heedhunsaro adhamate heddinokki manchi ledo togoo jaalooma diamaddanno. Ikkollana gara ikkitino lao heedhannonsa gede assiꞌra hasiissannonsari adhantinokkire calla diꞌꞌikkitino. Ninke baalunku gara ikkitino lao heedhannonke gede assiꞌra hasiissannonke. Lawishshaho mitu manni, mittu beettinna beetto baxillu jaalooma amadiro adhama hasiissannonsa yee hedanno. Tini adhaminokki Kiristaana gawajjitannohu hiittoonniiti? Yunayitidi Isteetisete heedhannoti mine assidhinokkiti Meliisa yinanni rodoo togo yitino: “Mittu rodiinna rodoo baxillu jaalooma amadiro batinyu roduuwi insa adhama hasiissannonsahu gede assite heddanno. Hakko daafira baxillu jaalooma amaddinori jaaloomansa agurtanno gede assannori noota affinoha ikkirono jaaloomansa diagurtanno. Mitootu qolte horonta baxillu jaalooma amada gibbanno. Korkaatuno tini lowo duha ikkitannonsa.”

MIMMITO SEEKKITINE EGENNE

5-6. Baxillu jaalooma amaddinori mimmitu daafira maa afate sharrama hasiissannonsa? (1 Pheexiroosi 3:4)

⁵ Baxillu jaalooma amaddinoonniha ikkiro adhama woy agura doodhitinanni gede kaaꞌlannoꞌneri maati? Mimmito seekkitine egenne. Baxillu jaalooma amaddinara albaanni mimmitu daafira mitore affinoonniha ikkara dandaanno. Xa kayinni, ‘wodanu giddo nooha giddoyidi manninate [“ayimma” NW]’ affinanni faro afidhinanni. (1 Pheexiroosi 3:4 nabbawi.) Hatto yaa mimmitu ayyaanaamitte, akattanna hedo albinni roore affinanni yaate. Galtine hossine aante noo xaꞌmuwara dawaro afiꞌraꞌne digattanno: ‘Kuni manchi dancha galte ikkannoe?’ (Law. 31:26, 27, 30; Efe. 5:33; 1 Xim. 5:8) ‘Mimmito baxanna towaata dandiineemmo? Mimmitu soꞌro agurre saꞌꞌa dandiineemmo?’ b (Rom. 3:23) Mimmito roore egentinanni hadhinanni woyite aante noo hedo qaagge: Afoo xaada dancha ikkiturono, sumuu yaa hoongeemmo woyite leellinsheemmo akatta roore hasiissannote.

 ⁶ Baxillu jaalooma amaddine sayissinanni yannara mimmitu daafira wolere maa afa hasiissannoꞌne? Mimmito lubbora baxxinara albaanni lowo geeshsha hasiissanno hajo daafira lawishshaho, mixoꞌne daafira hasaawa hasidhinanniha ikkara dandaanno. Fayyimmate, woxu woy alba iillinoꞌne qarri daafira hasaawa hasiissannoꞌneyya? Baxillu jaalooma amaddinanni heedhinenni baalanta hajo hasaawa hasiissannoꞌne yaa diꞌꞌikkino. (Yohaannisi 16:12 ledo heewisiisi.) Mite hajo bayichonkonni kula hasiissannoe yitine heddinanniha ikkiro, mimmitoho kulle. Kayinni galtine hossinanni woyite, dancha doorsha doodhitinanni gede togoo hajo daafira afaꞌne digattanno. Hakko daafira yanna gaaꞌmitine togoo hajo daafira fantine hasaabbe.

7. Baxillu jaalooma amaddinori mimmito egenna dandiitannohu hiittoonniiti? (“ Xeertowa Noohu Ledo Baxillu Jaalooma Amada” yitanno saaxineno lai.) (Misillano lai.)

⁷ Mittu manchita giddoyidi ayimma afa dandaattohu hiittoonniiti? Tennera kaaꞌlitannote kaajja doogga giddo mitte giddonketa fanne hasaawate, xaꞌmo xaꞌmatenna seekkine macciishshate. (Law. 20:5; Yai. 1:19) Tenne assate lawishshaho mitteenni sagaꞌla, mannu noo qooxeessira mitteenni lekkatenni milli yaanna mitteenni sabbaka kaaꞌlitaꞌnera dandiitanno. Jaallaꞌnenna maateꞌne ledo mitteenni yanna sayissinanni woyiteno mimmito egentinanni faro afidhinanni. Qoleno adhamate heddinoonni manchi addi addi yannara addi addi manni ledo heeꞌranno woyite hiittoo akata leellishannoro afate kaaꞌlitannoꞌne faro hasidhe. Hanni Neezerilaandete heeꞌrannohu Ashiwiini yinanni rodii maa assate woꞌnaalinoro wodanche. Isi Aliisha ledo baxillu jaalooma amadino yanna daafira coyiꞌranni togo yiino: “Mimmito egennate kaaꞌlitannonke faro hasiꞌneemmo. Duucha woyite shiimmaaddare assineemmo; lawishshaho sagale mitteenni qinsheemmo woy wole mini looso loonseemmo. Togoo looso loonseemmo yannara mimmitu jawaantenna laanfe afa dandiinoommo.”

8. Baxillu jaalooma amaddinore mitteenni xiinxallansa kaaꞌlitannonsahu hiittoonniiti?

⁸ Ayyaanaamitte coye mitteenni xiinxallitineno mimmito egenna dandiitinanni. Adhantiniro maatete magansiꞌrara yanna gaaꞌma hasiissannoꞌne; hatto assaꞌne Maganu ledoꞌne ikkanno gede assitanno. (Ros. 4:12) Hakko daafira baxillu jaalooma amaddine sayissinanni yannara mitteenni xiinxallate pirogiraame fushshiꞌra dandiitinanni. Hige baxillu jaalooma amaddinori xaara maate diꞌꞌikkitino; qoleno isi isera umo diꞌꞌikkino. Ikkirono insa ganyite mitteenni xiinxallite mimmitu ayyaanaamitte daafira afa dandiitanno. Yunayitidi Isteetisete heedhannori Maaksinna Leeysa mitteenni xiinxallansa wole horo afidhanno  gede kaaꞌlitinonsa. Isi togo yiino: “Baxillu jaalooma amada hananfanni heeꞌnenni, baxillu jaalooma amadate daafira, adhamatenna maatete heeshsho daafira kultanno borro mitteenni xiinxalla hananfoommo. Tini borro wonaatiro kayinse hasaambeemmokkita lowo geeshsha hasiissanno hajo kayinse hasaambeemmo gede kaaꞌlitinonke.”

HEDA HASIISSANNOHA WOLE COYE

9. Baxillu jaalooma amaddinori jaalooma amaddinota ayera kultannoro doodhitanno woyite maa heda hasiissannonsa?

⁹ Baxillu jaalooma amaddinoonnita ayera kula hasiissannoꞌne? Tenne lamunku xaadisiꞌra hasiissannoꞌne. Baxillu jaalooma amada hanaffinanni heedhinenni shiimu mannira calla kula hasidhinanniha ikkara dandiitinanni. (Law. 17:27) Hatto assaꞌne mannu kiꞌne hajora mereero eannokki gedenna xaꞌmo xaꞌmanni waadannoꞌnekki gede kaaꞌlitanno. Kayinni mittu manchirano kula hoogginiro wolootu affannonke yitine waajjitine, mannu nookkiwa hadhinara dandiitinanni. Tini gawajjitaꞌnera dandiitanno. Hakko daafira dancha amaale amaaltannoꞌneriranna mitore assite kaaꞌlitannoꞌnerira kula hayyote. (Law. 15:22) Lawishshaho miniꞌne manni giddo mitoho, ayyaanaamittetenni gikki yitino jaallaꞌnera woy songote cimeeyyera kula dandiitinanni.

10. Baxillu jaalooma amaddinori jaaloominsa Yihowa hagiirsiisanno gede maa assa dandiitanno? (Lawishsha 22:3)

¹⁰ Baxillu jaalooma Yihowa hagiirsiisannoha assiꞌra dandiitinannihu hiittoonniiti? Baxilliꞌne lexxanni haꞌranno woyite mimmitunniwa roore shiqqinanni. Togoo woyite amanyootunni xuru nooꞌnekkire ikkitine heedhinanni gede kaaꞌlannoꞌneri maati? (1 Qor. 6:18) Amanyoote bainore hasaabbinannikki gede, mannu nookkiwa callootiꞌne heedhinannikki gedenna ago quwa sayissine agginannikki gede qorophe. (Efe. 5:3) Togoo coyibba siimu xaadooshshi hasatto kakkayissaranna gara ikkinore assa qarra ikkitanno gede assitara dandiitanno. Mimmito ayirrisatenna Yihowa biddishsha agadhate maa assa hasiissannoꞌnero ganyitine hasaawa hayyote. (Lawishsha 22:3 nabbawi.) Hanni Daawitinna Almaazi yinannire Itiyophiyaho heeꞌranno roduuwa mayi kaaꞌlinonsaro laꞌno. Insa togo yiino: “Yanna sayinseemmohu lowo manni woy jaallanke noowaati. Makeenu giddo woy mine calluwinke heeꞌne diegenninoommo. Tini fonqolo ikkankera dandaanno coye qorophineemmo gede kaaꞌlitinonke.”

11. Baxillu jaalooma amaddinori mimmitoho baxille leellishshanno woyite maa heda hasiissannonsa?

¹¹ Baxillu jaalooma amaddinori mimmitoho baxille leellisha hasiissannonsa? Baxilliꞌne lexxanni haꞌranno woyite mimmitoho gara ikkitino doogonni baxille leellisha hasidhinanniha ikkara dandaanno. Ikkirono siimu xaadooshshi hasatto waadduꞌnero gara ikkinore assa qarra ikkitaꞌnera dandiitanno. (Farf. 1:2; 2:6) Qoleno mimmitoho baxille leellishshinanni woyite, kiꞌneneeto eemadha qarra ikkitaꞌneranna Yihowa dadillisannore assitinara dandiitinanni. (Law. 6:27) Hakko daafira baxillu jaalooma hanaffinanni heedhinenni Qullaawu Maxaafiha xintu seera horoonsidhine maa assa hasiissannoꞌneronna maa assa hasiissannoꞌnekkiro hasaabbe. c (1 Tes. 4:3-7) Kiꞌneneeto togo yitine xaꞌme: ‘Qooxeessinkera heeꞌranno manni mimmitoho baxille leellinshannita ma garinni laꞌꞌanno? Konni garinni baxille leellisha siimu xaadooshshi hasatto kakkayissannonke?’

12. Baxillu jaalooma amaddinori mereeronsa coyi kawa kaꞌaa higiro maa wodancha hasiissannonsa?

¹² Mereeroꞌne kalaqamino qarra tira dandiitinannihu hiittoonniiti? Yannate kiiro sumuu yaa qarralla ikkituꞌne? Tini baxillu jaaloomiꞌne qarra afiꞌrinota leellishshannoni? Deeꞌni; adhantinori baalunku woꞌmanka woyite afoo mitto ikkitanno yaa diꞌꞌikkino. Minaanninna minaama mereeronsa kalaqamino qarra hasaawe tira dandiiro  adhamansa kaajjado ikkitanno. Hakko daafira mereeroꞌne kalaqamino qarra tirate xa assitinanniri adhamaꞌne seekkannoronna teꞌee leellishanno. Kiꞌneneeto togo yitine xaꞌme: ‘Kalaqamino qarra wodanaaꞌmine hattono mimmito ayirrinseemmota leellishanno garinni hasaambeemmo? Soꞌronke ammanne adhineemmo? Hattono biddi assiꞌra hasiissannonkere biddi assiꞌrate sharrammeemmo? Maahoyye yaate, maaro xaꞌmiꞌratenna gatona yaate qixxaamboommoreeti?’ (Efe. 4:31, 32) Ikkirono woꞌmanka woyite sumuu yitinannikkiha woy heewisantinanniha ikkiro, adhantinihu gedensaannino coyi woyyaawa hoogara dandaanno. Baxillu jaalooma amaddinoonni manchi kiꞌnera malinokkiha ikkinota wodanchitiniro, lamunku jaaloomaꞌne agurtiniro woyyanno. d

13. Baxillu jaalooma amaddinori, jaalooma amadde mageeshshi yanna keeshshitannoro doodhitanno gede kaaꞌlannonsari maati?

¹³ Baxillu jaalooma amaddine mageeshshi yanna keeshsha hasiissannoꞌne? Duucha woyite mitto coye muddamme assa qarra abbitanno. (Law. 21:5) Hakko daafira baxillu jaalooma amaddinanni woyite mimmito seekkitine egennate ikkitanno geeshshi yanna hasiissannoꞌne. Ikkirono baxillu jaalooma amaddine hasiisikkinni seeda yanna keeshsha dihasiissannoꞌne. Qullaawu Maxaafino, “Woꞌmitukkinni keeshshitanno hexxo wodana daafursitanno” yaanno. (Law. 13:12) Qoleno mitteenni yanna sayissinanni keeshshitini kiiro siimu xaadooshshi hasatto gargadha roore qarra ikkitaꞌnera dandiitanno. (1 Qor. 7:9) Baxillu jaalooma amaddine mageeshshi yanna keeshshitinanniro illachishantenni, kiꞌneneeto togo yitine xaꞌme: ‘Gara ikkinore doodha dandiineemmo gede mimmitu daafira wolere maa afa hasiissannonke?’

WOLOOTU BAXILLU JAALOOMA AMADDINORE KAAꞌLA DANDIITANNOHU HIITTOONNIITI?

14. Wolootu baxillu jaalooma amaddinore kaaꞌla dandiitannohu hiitte doogganniiti? (Misileno lai.)

¹⁴ Baxillu jaalooma amaddinore anfoommoha ikkiro, insa kaaꞌla dandiineemmohu hiittoonniiti? Insa sagalete woy maatete magansiꞌrara koyisa hattono ledonke boohaartanno gede assa dandiineemmo. (Rom. 12:13) Togoo yannara insa albinni roore mimmito egentanno faro afidhara dandiitanno. Mitowa hadhanno woyite ledonsa haꞌne woy makeenunni hadhanno woyite ledonsa haꞌne hattono callootinsa heedhannokki gede mininkera koyinse insa kaaꞌla dandiineemmo. (Gal. 6:10) Aleenni kulliti Aliisha isenna Ashiwiini kaaꞌlinonsari maatiro qaagge togo yitino: “Mitu roduuwi mannu noowa haꞌne yanna sayisa hasiꞌnummoro mininsara daa dandiineemmota kultannonke woyite tashshi yaannonke.” Baxillu jaalooma amaddinori mitowa ledonsa hadhinanni  gede xaꞌmituꞌnero, tenne faro horoonsidhine insa kaaꞌla dandiitinanni. Insa callootansa huntine hadhinoonte; kayinni uminsa hajo hasaawate yannanna bayichu hasiissannonsatano wodanche.—Fil. 2:4.

15. Baxillu jaalooma amaddinore kaaꞌlate wolere maa assa dandiineemmo? (Lawishsha 12:18)

¹⁵ Coyiꞌra hasiissannonkere coyiꞌne woy coyiꞌra hasiissannonkekkire qorophineno baxillu jaalooma amaddinore kaaꞌla dandiineemmo. Mito woyite ninkeneeto eemadha hasiissannonkeha ikkara dandaanno. (Lawishsha 12:18 nabbawi.) Lawishshaho, insa baxillu jaalooma amaddinota wolootaho kulate quqquxammeemmoha ikkara dandaanno; kayinni tenne wolootaho kula insa uminsa hasidhannoha ikkara dandaanno. Baxillu jaalooma amaddinore heꞌma woy uminsa hajo kayinse insa misha dihasiissannonke. (Law. 20:19; Rom. 14:10; 1 Tes. 4:11) Qoleno insa adhantanno gede woy agurtanno gede xixxiiwannore coyiꞌneemmota woy tenne hajo daafira kayinse xaꞌmineemmonsata baxa hooggara dandiitanno. Eliize yinanni rodoonna minaannise albita qaage togo yiino: “Ninke nafa tenne hajo daafira kayinse hasaambummokki wolootu sargenke daafira xaꞌmitunketa saalloommo.”

16. Baxillu jaalooma amaddinori jaaloomansa agurturo assa hasiissannonkekkiri maati?

¹⁶ Baxillu jaalooma amaddinori jaaloomansa aguralla doodhitu? Uminsa hajora ea woy mittu widira halama dihasiissannonke. (1 Phe. 4:15) Liya yinanni rodoo togo yitino: “Aninna mittu rodii baxillu jaalooma agurroommohu mayiraatiro wolootu uminsa hedo coyidhanna macciishshoomma. Tennera lowo geeshsha xissiisiꞌroomma.” Aleenni ronsummonte gede baxillu jaalooma amaddinori jaaloomansa agurtanno woyite insa gara ikkinokkire doodhitinohu gede assine heda dihasiissannonke. Baxillu jaalooma amadansa insa woyyinore doodhitanno gede kaaꞌlitinonsa. Ikkirono doodhitino doorshi xissiisidhanno gedenna callimma macciishshantannonsa gede assara dandaanno. Hakko daafira insa kaaꞌlineemmo faro hasiꞌra dandiineemmo.—Law. 17:17.

17. Baxillu jaalooma amaddinori woꞌmanka woyite maa assa hasiissannonsa?

¹⁷ Aleenni ronsummonte gede, baxillu jaalooma amaddinorira qarra ikkannori tuncu yaansara dandaanno; kayinni insa tenne yanna hagiirsiissannota assiꞌra dandiitanno. Jeesika albita qaagge togo yitino: “Noore coyiꞌniro baxillu jaalooma amada lowo loosooti. Kayinni yannankenna wolqanke horoonsiꞌne mimmito egenninoommo daafira tashshi yiinonke.” Baxillu jaalooma amaddinoonniha ikkiro mimmito seekkitine egennate woꞌmanka woyite sharramme. Hatto assaꞌne lamunku woyyino doorsha doodhitinanni gede kaaꞌlitannoꞌne.