XIINXALLOTE BIRXICHO 21
FAARSO 107 Maganunnita Baxillu Doogo
Dancha Galte Afiꞌra Dandiinanni Gara
“Maanaame galte ayi afiꞌrannose? Ise ilkunni roore muxxete.” —LAW. 31:10.
GUULCHO HEDO
Qullaawu Maxaafihu xintu seeri mittu manchi maltino galte afiꞌranno gede kaaꞌlanno garanna songote giddo noori adhama hasidhannore kaaꞌla dandiitannohu hiittoonniitiro ronseemmo.
1-2. (a) Adhaminokki Kiristaanchi mitte beetto ledo baxillu jaalooma amadara albaanni maa heda hasiissannosi? (b) “Baxillu jaalooma amadate” yaa mayyaate? (“Harancho Xawishsha” lai.)
ADHAMA hasiꞌratto? Hagiirraamma ikkate adhama hasiissannoha ikka hoogirono, batinyu adhaminokki Kiristaani wedelluno jajjabbuno adhama hasiꞌranno. Hige baxillu jaalooma amadattora albaanni maalaamittetenni qixxaawa, ayyaanaamittetenni gikki yaanna anja egemma hasiissannohe. a (1 Qor. 7:36) Kuri coyibba assattoha ikkiro adhamakki roore hagiirru noota ikkitanno.
2 Ikkirono dancha galte afiꞌra woꞌmanka woyite shota ikkitanno yaa diꞌꞌikkino. (Law. 31:10) Mitte beetto laoottoha ikkiro nafa ise ledo baxillu jaalooma amada hanafa shota ikka hooggahera dandiitanno. b Konni birxichira adhaminokki Kiristaani dancha galte afiꞌranno gedenna baxillu jaalooma amada hanafanno gede kaaꞌlannonsari maatiro ronseemmo. Qoleno songote giddo noori adhama hasidhannore kaaꞌla dandiitannohu hiittoonniitiro laꞌneemmo.
MALTINO GALTE AFIꞌRATTO GEDE KAAꞌLANNOHERI MAATI?
3. Mittu Kiristaanchi galte hasiꞌranno woyite maa heda hasiissannosi?
3 Adhama hasiꞌrattoha ikkiro, baxillu jaalooma amadattora albaanni galtekki ikkitara hasiꞌratto beettora hiitto akatta heedhasera hasiꞌrattoro balaxxe heda hasiissannohe. c Hatto ikka hoogiro atera maltino galte lashshi assite agurattora woy atera maltinokki beetto ledo baxillu jaalooma amadattora dandaatto. Hige maltino galte ikkitanno beetto cuuantino Kiristaancho ikka hasiissannose. (1 Qor. 7:39) Kayinni cuuantino rodoo baala dancha galte ikkitanno yaa diꞌꞌikkino. Hakko daafira ateneeto togo yite xaꞌmi: ‘Albillitte hiittoo heeshsho heeꞌra hasiꞌreemmo? Minaamaꞌya ikkitanno beettora heedhasera hasiꞌreemmo akatta hiittenneeti? Hedoommo coyi quwa sainoho? Quwa saeemmokkiha ikka dandeemmo?’
4. Mitu roduuwi Yihowa mayite huuccidhino?
4 Adhama hasiꞌrattoha ikkiro tenne daafira huuccatto assiꞌroottoti dihuluullissannote. (Fil. 4:6) Hige Yihowa galte aannota kule ayerano qaale dieanno. Ikkirono isi mayi hasiisannoheronna giddokkita afanno; hattono galte hasiꞌratto woyite kaaꞌlannohe. Hakko daafira woꞌmanka woyite halchokkinna giddokkita fushshite isira hasaaphi. (Far. 62:8) Cincanna hayyo aannohe gede huucciꞌri. (Yai. 1:5) Yunayitidi Isteetisete heeꞌrannohu Jooni d yinannihu seenne adhinokki rodii huuccatto assiꞌranno woyite mayi mayi daafira huucciꞌrannoro kulanni togo yiino: “Galteꞌyara heedhara hasiꞌreemmo akatta daafira Yihowara kuleemmo. Dancha galte ikkitanno beettonni xaadeemmo faro afiꞌrate huuccatto assiꞌreemmo. Qoleno dancha minaanna ikkeemmo gede assitannoe akatta lossiꞌreemmo gede kaaꞌlaera Yihowa huucciꞌreemmo.” Sirilaankaho heedhannoti Taaniya yinanni rodoo togo yitino: “Maltino galte afiꞌramma geeshsha ammaname heeꞌreemma gede, dancha danchare hedeemma gedenna hagiirraame ikkeemma gede kaaꞌlaera Yihowa huucciꞌreemma.” Maltino galte bayichonko afiꞌroottokkiha ikkiro nafa, Yihowa woꞌmanka woyite baxannohetanna hasiisannohere assannoheta kule qaale eino.—Far. 55:22.
5. Adhantinokki roduuwira Yihowa baxanno manni ledo xaaddannoti hiitti faro noonsa? (1 Qorontoosi 15:58) (Misileno lai.)
5 Qullaawu Maxaafi, ‘Mootichu looso woꞌmanka woyite loonseemmo’ gede jawaachishannonke. (1 Qorontoosi 15:58 nabbawi.) Woꞌmanka woyite diinaggaabbe Yihowara soqqamattohanna addi addi roduuwi ledo yanna sayisattoha ikkiro, dancha jaalooma kalaqiꞌrattoha calla ikkikkinni atente gede Yihowara soqqamate illachishshannori adhantinokkiri roduuwi ledo egennamate faro afiꞌratto. Qoleno Yihowa hagiirsiisate dandiittore baala assittoro addu hagiirre afiꞌratto.
Yihowara diinaggaabbe soqqamattohanna addi addiri ammanate roduuwikki ledo yanna sayisattoha ikkiro adhama hasidhanno roduuwi ledo xaadattora dandaatto (Gufo 5 lai)
6. Adhantinokki roduuwi galte hasidhanno woyite maa qaaga hasiissannonsa?
6 Ikkirono galte hasiꞌra heeshshokki giddo qara coyi ikkitannokki gede qorophi. (Fil. 1:10) Addu hagiirre afiꞌratto gede assannohehu Yihowa ledo noohe jaaloomaati ikkinnina adhama woy adhama hooga diꞌꞌikkitino. (Mat. 5:3) Qoleno seenne adhittokki heeꞌratto yannara roore soqqamatto faro afiꞌratto. (1 Qor. 7:32, 33) Tenne yanna danchu garinni horoonsiꞌri. Sajjoo diro saeennase assidhinoti Yunayitidi Isteetisete heedhannoti Jesiika yinanni rodoo togo yitino: “Mine assiꞌra hasiꞌreemmaha ikkirono Yihowara diinaggaawe soqqamaꞌya harshammi yee heeꞌreemma gede kaaꞌlitinoe.”
GALTEKKI IKKITANNO BEETTO SEEKKITE EGENNATE YANNA GAAꞌMI
7. Dancha galte ikkitannonke yine hendoommo beettora banxoommoseta kullammora albaanni ise seekke afa hayyote yineemmohu mayiraati? (Lawishsha 13:16)
7 Mitte beetto laꞌe dancha galte ikkitaera dandiitanno yite hedoottohalla ikki? Bayichonkonni isera baxoottoseta kula hasiissannohe? Qullaawu Maxaafi hayyichu manchi mitto looso loosara albaanni seekke hedannota kulanno. (Lawishsha 13:16 nabbawi.) Hakko daafira mitte beettora baxoottoseta kulattora albaanni yanna gaaꞌmite ise seekkite egenna hayyote. Neezerilaandete heeꞌrannohu Ashiwiini togo yiino: “Mitto mancho ranke banxammora qoleno mulenni bangammora dandiineemmo. Hakko daafira mitte beetto seekkite egennate yanna gaaꞌma muddante ise ledo baxillu jaalooma amadattokki gede kaaꞌlitannohe.” Qoleno ise seekkite afittoro maltino galte ikkitannohekkita wodanchattora dandaatto.
8. Mittu manchi maltino galte layiꞌra dandaannohu hiittoonniiti? (Misileno lai.)
8 Mitte beetto hayyotenni layiꞌra dandaattohu hiittoonniiti? Songote gambooshshiwa woy roduuwu gamba yite yanna sayissannowa tenne beetto amanyoote, ayyaanaamittesenna akattase afattora dandaatto. Jaallase ayeooti? Hasaawa baxxannohu mayi daafiraati? (Luq. 6:45) Mixose atete ledo mittete? Ise seekkite affinore songote cimeeyye woy ayyaanaamittetenni gikki yiinoha wole Kiristaancho amaaꞌla dandaatto. (Law. 20:18) Isera hiittoo suꞌmi noosero hattono akattase daafira xaꞌma dandaatto. (Rut. 2:11) Mitte beetto egennate woꞌnaalatto woyite ise saalfattanno gede assannore assattokki gede qorophi. Ise higguwa baala illaallissooti; hattono ise daafira mitto mittonka coye afate woꞌnaaltooti.
Mitte beettora baxoottoseta kulattora albaanni mito geeshsha ise hayyotenni seekkite lai (Gufo 7-8 lai)
9. Dancha galte ikkitannoe yite hedootto beetto shiqqe hasaawisattora albaanni maa heda hasiissannohe?
9 Mitte beetto baxoottoseta kulattora albaanni mageeshshi yanna keeshsha hasiissannohe? Bayichonkonni kulittoro ise muddamoottohu gede assite heddara dandiitanno. (Law. 29:20) Kayinni baxoottoseta kulittokkinni lowo yanna keeshshattoha ikkiro, hakko iso ise baxoottoseta affinoha ikkiro doodhate hobbi ruxxi yitanni noottohu gede assite heddara dandiitanno. (Ros. 11:4) Mitte beetto shiqqe hasaawisattora albaanni ise ledo adhameemmo yite ateneeto ammansiisa hasiissannohekkita qaagi. Kayinni ise ledo adhamate qixxaawoottoronna ise maltino galte ikkitannohero buuxa hasiissannohe.
10. Mitte beetto baxxannoheta afittoro, kayinni ati hasiꞌrattokkiha ikkiro maa assa hasiissannohe?
10 Mitte beetto baxxannoheta afittoro maa assa hasiissannohe? Ati hasiꞌrattokkiha ikkiro tenne assootikkinni xawisse leellishi. Hasiꞌrattokkiha ikkiro isera beebbate hexxo aa dancha diꞌꞌikkitino.—1 Qor. 10:24; Efe. 4:25.
11. Baxillu jaalooma amandanni woy adhammanni gede wolu manni assanno gobbara heedhinanniha ikkiro maa heda hasiissannoꞌne?
11 Mite gobbuwara, mine kalaqidhinokkirira galte doortannori annansanna amansaati woy anja egemminoho wole mannaati. Wole gobbara kayinni, mittu manchira minisi manni woy jaallasi galte ikkannoha hassannosi; hakkiinni beettunna beetto xaade baxillu jaalooma amada hasiꞌrannoronna teꞌee hasaawanno gede assitanno. Mittu beettinna beetto baxillu jaalooma amadanno gede woy adhamanno gede qineessattora kullihero insa lamunku hasiꞌrannorenna hasiisannonsare seekkite hedi. Galte ikkitanno beetto afittoro ise ayimma, akattasenna ayyaanaamittese seekkite buuxi. Mittu manchira Yihowa ledo noosihu muli jaaloomi woxunni, rosunni woy maccaha ikkatenni lowo geeshsha rooranno. Ikkirono jeefote adhamannoronna teꞌee doodhannori insa ikkinota qaagi.—Gal. 6:5.
BAXILLU JAALOOMA AMADA
12. Mitte beetto ledo baxillu jaalooma amada hasiꞌrittoro isera tenne daafira kula dandaattohu hiittoonniiti?
12 Mitte beetto ledo baxillu jaalooma amada hasiꞌrittoro ise baxoottota kula dandaattohu ma garinniiti? e Ise ledo mannu noowa woy silketenni hasaawatto faro injeesiꞌra dandaatto. Ise baxoottosetanna ise daafira ledde afa hasiꞌrattota xawisse kulise. (1 Qor. 14:9) Hasiisannoha ikkiro, hatte hajo daafira heddanno gede yanna uyise. (Law. 15:28) Kayinni ise ate ledo baxillu jaalooma amada hasidhannokkiha ikkiro doodhitinore ayirrisi.
13. Mitte beetto ate ledo baxillu jaalooma amada hasidhinota kultuhero maa assa dandaatto? (Qolasiyaasi Sokka 4:6)
13 Mitte beetto ate ledo baxillu jaalooma amada hasidhinotalla kultuhe? Isera ate hasaawisate worbimma hasiissinoseha ikkara dandaanno; hakko daafira shaqqillunninna ayirrinyunni hasaawisise. (Qolasiyaasi Sokka 4:6 nabbawi.) Ise ledo baxillu jaalooma amadattoronna teꞌee hedate yanna hasiissannoheha ikkiro hatto yite kulise. Ikkirono dawaro mulenni qolate woꞌnaali. (Law. 13:12) Kayinni ise ledo baxillu jaalooma amada hasiꞌrattokkiha ikkiro shaqqillunni xawisse kulise. Ostiriyaho heeꞌrannohu Hansi yinanni rodii mitte rodoo baxxinosita kultusita magarinni qolinoro huwati; togo yiino: “Doodhoommore hayyotenni kayinni xawise kuloommose. Bayichonkonni kuloommose; korkaatuno isera beebbate hexxo aa dihasiꞌroommo. Hakkuyi gedensaannino ise ledo nooe aante lainohunni qoropha hanafoommo.” Kayinni ise ledo baxillu jaalooma amada hasiꞌrattoha ikkiro, giddokkita gudisse kulise; hattono baxillu jaalooma amaddine sayissinanni yannara maa maa assitinanniro hasaabbe. Budiꞌnenni woy wolu korkaati kainohunni ati hedattorinna ise heddannori babbaxxara dandaanno.
WOLOOTU ADHAMINOKKI KIRISTAANA KAAꞌLA DANDIITANNOHU HIITTOONNIITI?
14. Coyiꞌneemmorinni adhaminokki Kiristaana kaaꞌla dandiineemmohu hiittoonniiti?
14 Ninke baalunku adhama hasiꞌranno Kiristaana kaaꞌla dandiineemmohu hiittoonniiti? Tenne assa dandiineemmoti mitte doogo coyiꞌneemmore qorophine coyiꞌrate. (Efe. 4:29) Ninkeneeto togo yine xaꞌma dandiineemmo: ‘Adhama hasidhannori ledo busha haariimo haariimeemmo? Mittu rodiinna rodoo hasaawanna laeemmo woyite insa baxaminohu gede asse hedeemmo?’ (1 Xim. 5:13) Qoleno adhaminokki Kiristaani adhaminokki daafira gate bainonsari noohu gede asse hedanno gede assa dihasiissannonke. Aleenni kullihu Hansi togo yiino: “Mitu roduuwi, ‘Ati seenne mayira diadhatto? Xaate ati qaaqqo diꞌꞌikkoottowe’ yitannoe. Togoo hedo adhantinokki roduuwi naandanninsakkihu gedenna adhama hasiissannonke yite heddanno gede assitannota agurranna kaaꞌlitannori dino.” Adhaminokki Kiristaana galanteemmo faro hasiꞌra lowo geeshsha danchate!—1 Tes. 5:11.
15. (a) Roomu Sokka 15:2 noohu xintu seeri garinni, mittu manchi galte afiꞌranno gede kaaꞌlinammora albaanni maa heda hasiissannonke? (Misileno lai.) (b) Viidiyotenni maa rosootto?
15 Mittu rodiinna mitte rodoo dancha minaannanna minaama ikkanno yine hendeemmohalla ikki? Qullaawu Maxaafi wolootu hedo daafira qorophineemmo gede kulannonke. (Roomu Sokka 15:2 nabbawi.) Batinyu adhantinokki roduuwi insara galte ikkanno yine hendoonni mancho egensiinsansara dihasidhanno; ninke hasattonsa ayirrisa hasiissannonke. (2 Tes. 3:11) Mitu roduuwi kayinni kaaꞌlinansara hasidhannoha ikkara dandaanno; kayinni xaꞌmininkekkinni mereero ea dihasiissannonke. f (Law. 3:27) Mitu adhantinokki roduuwi, wolu garinni egensiinsansara hasidhanno. Jarmanete heedhannoti mine assidhinokkiti Liidiya yinanni rodoo togo yitino: “Adhama hasidhanno roduuwa wolu haammatu roduuwi ledo koyisa dandiitinanni. Lamunku xaadde hasaabbanno faro injeesse calla ikkitanno; hakkuyi kaꞌire insara agurre.”
Haammatu roduuwi noowa adhantinokki roduuwi mimmitu ledo egennantanno faro afidhanno (Gufo 15 lai)
16. Adhaminokki Kiristaani maa qaaga hasiissannonsa?
16 Ninke baalunku adhammoommorino adhammoommokkirino hagiirrunna harshammo noo heeshsho heeꞌra dandiineemmo! (Far. 128:1) Hakko daafira adhama hasiꞌrattoha kayinni maltino galte afiꞌroottokkiha ikkiro woꞌmanka woyite Yihowara soqqamate illachishi. Makawu yinanniwa heedhannoti Siin Yii yinanni rodoo togo yitino: “Gannatete giddo galtekki ledo heeꞌratto yanna hendiro xa adhamittokki heeꞌratto yanna shiimate. Tenne yanna danchu garinni horoonsiꞌri.” Kayinni dancha beetto afidhe baxillu jaalooma amadoottohalla ikki? Aananno birxichira baxillu jaalooma qiniinoha assiꞌra dandiinanni gara ronseemmo.
FAARSO 137 Ammanamino Meento
a Adhamate qixxaawoottoronna teꞌee afate, jw.org aana fulinoha, “Baxillu Jaalooma Amada—Gafa 1: Baxillu Jaalooma Amadate Qixxaawoommo?” yaanno birxicho lai.
b HARANCHO XAWISHSHA: Konninna aananno birxichira kulloonnihu “baxillu jaalooma amada” yaanno qaali mittu beettinna beetto adhamate malinore ikkinoronna teꞌee afate mitteenni sayisanno yanna kulannoho. Mittu beettinna beetto baxillu jaalooma amada hanafannohu lamunku jaalooma hanafa hasiꞌrannota xawise hasaawirooti; insa adhama woy jaalooma agura doodha geeshsha jaaloomansa amade keeshshanno.
c Konni birxichira borrote injaara yine maltino galte hasiꞌrannohu labbaaha ikkinohu gede assine kulloonniha ikkirono, xintu seeri meya roduuwirano loosanno.
d Mite suꞌmuwa soorrinoonni.
e Mitu budira duucha woyite baxillu jaalooma amadate meya rodoo shiqe xaꞌmannohu labbaaho. Ikkirono hasidhuro meya rodoono shiqqe xaꞌma dandiitanno. (Rut. 3:1-13) Ledde afate Birra 22, 2004 Baqqi Yiiyye! (Amaaru Afoo) yitanno metseetera fulinoha “Wedellu Xaꞌmanno Xaꞌmo . . . Giddoꞌyata Isira Mayyee Kulo? yaanno birxicho lai.
f JW.ORG aana fultinota Ammanansara Jawaatte Sharrantanni Noore—Adhaminokki Kiristaani yitanno viidiyo lai.
