1. Hexxo mudha gawajjitankera dandiitannohu hiittoonniiti?

 BARRU baala qarru iillannonke daafira iillannonke qarra dandee saꞌꞌate sharrammeemmo. Ikkollana hexxo mudhineemmoha ikkiro iillannonke qarra cince saꞌꞌa qarra diꞌꞌikkitannonke? Hexxo mudha worbuulle ikkineemmokki gede, waajjineemmo gedenna hagiirrinke baꞌꞌanno gede assitannonke. Lawishsha 24:10 togo yitanno: “Qarru barra wolqiweelittoro, jawaatte diafatto.” Hexxo mudha iillannonke qarra dandiine saꞌneemmokki gede wolqa huntannonke.

2. Hexxo mudhineemmo gede assannonkeri maati? Konni birxichira maa ronseemmo?

² Hexxo mudhineemmo gede assankera dandaannohu duuchu coyi no; mitu giddoyidiho mitu kayinni gobbayidiho. Kuri giddo gamu guuntete xeꞌne, laanfenkenna dhibbaho. Hattono Yihowa soqqansho giddo afiꞌrate halchineemmo qoosso hoongummoro woy soqqammeemmohu mannu halaale macciishsha baxannokki qoqqowira ikkiro hexxo mudhinammora dandiineemmo. Konni birxichira hexxo mudhineemmo gede assannonkere gargadhate assa dandiineemmoha mito coye laꞌneemmo.

3. Guuntete xeꞌnenkera gara ikkitino lao heedhannonke gede kaaꞌlannonkeri maati?

³ Duucha woyite guuntete xeꞌnenkeranna laanfenkera gara ikkitinokki lao heedhannonke. Soꞌro loonseemmo daafira, Yihowa haaro alamera heeꞌnammora dihasiꞌranno yine hendammora dandiineemmo. Togoo hedo gawajjitannote. Ikkina guuntete xeꞌnenke ma garinni laꞌꞌa hasiissannonke? Qullaawu Maxaafi Yesuusi Kiristoosa agurranna baalunku manni ‘cubbo loosinota’  kulanno. (Rom. 3:23) Ikkirono Qullaawu Maxaafi Anni soꞌronke diꞌꞌillachishanno woy guuta ikka hasiissannonsa diyaannonke. Hatteentenni isi ninke kaaꞌla hasiꞌrannoho baxillaancho Annankeeti. Qoleno isi cincaho. Hattono laanfenkenna gara ikkitinokki lao hooꞌlate sharrammeemmo gara laꞌꞌanno; qoleno isi kaaꞌlankera qixxaawaho.—Rom. 7:18, 19.

4-5. Umi Yohaannisi 3:19, 20te noo hedo lame rodoo hexxo mudhannokki gede kaaꞌlitinonsahu hiittoonniiti?

⁴ Hanni Dibooranna Maariya lawishsha laꞌno. b Diboora huta ikkitanno gede assine lossinoonnise. Ise galante diegenninoonnise. Tini iseneetira gara ikkitinokki lao heedhannose gede assitinose. Diboora shiima soꞌro loossuro gara ikkinore horo assa didandeemma yite heddanno. Maariyano hakko garinni lossinoonnise. Ise fiixise huta ikkitanno gede assinose. Konnira ise waagu dinooete yite heddanno. Diboora cuuantu gedensaanni nafa Yihowa Farciꞌraasincho ikkate diꞌꞌikkoommate yite heddanno.

⁵ Ikkirono tini lamenti rodoo Yihowara soqqama diagurino. Mayira? Insa huuccattotenni duhansa Yihowa aana tuqqino. (Far. 55:22) Baxillaanchu iimi Anninke alba iillinonkeri gara ikkitinokki lao heedhannonke gede assannota afino; insano tenne huwattino. Qoleno Yihowa ninke noonke yine hende nafa egenninoommokkihu danchu akati noonketa laꞌꞌanno.—1 Yohaannisi 3:19, 20 nabbawi.

6. Mittu manchi wirro wirro soꞌro loosannoha ikkiro ma ikkara dandaanno?

⁶ Mittu busha rosicho agurate sharramanni noo manchi wirro hakkonne coye assaranna hexxo mudhara dandaanno. Cubbo loonsummoro dadilla nooreentilla. (2 Qor. 7:10) Ikkirono loonsoommo soꞌrora quwa saꞌne yaande, ‘Waagu dinoe. Yihowano horonta gatona diyaannoe’ yine heda dihasiissannonke. Togo yee heda gara diꞌꞌikkitino; qoleno Yihowara soqqammeemmokki gede assitankera dandiitanno. Lawishsha 24:10 yitannonte gede hexxo mudhineemmoha ikkiro jawaante afiꞌneemmokkita qaaga hasiissannonke. Hatteentenni Yihowa huucciꞌranna maarosi afiꞌrate sharrama hasiissannonke. (Isa. 1:18) Isi loossinoonni soꞌrora addinta gaabbitine maaro eꞌiniro gatona yaannoꞌne. Songote cimeeyyerano hasaapha dandiitinanni. Insa ayyaanaamittetenni wirro jawaattinanni gede shaqqillunni kaaꞌlitannoꞌne.—Yai. 5:14, 15.

7. Gara ikkinore assa qarra ikkitannonke woyite hexxo mudha hasiissannonkekkihu mayiraati?

⁷ Faransayete gobbara heeꞌranohu Zhaani Luuki yinannihu songote cimeessi laanfe qeeꞌlate sharrantannorira togo yiino: “Yihowa albaanni keeraanchoho yinanni manchi  horonta soꞌro loosannokki mancho diꞌꞌikkino; hatteentenni loosino soꞌrora woꞌmanka woyite gaabbe maaro eanno manchooti.” (Rom. 7:21-25) Konnira laanfenke qeeꞌlate sharrammanni heeꞌnoommoha ikkiro waagu dinonke yine heda dihasiissannonke. Ninke baalunku soꞌneemmore ikkinoommo daafira Yihowa wodote kakkalo widoonni aanno elto hasiissannonke.—Efe. 1:7; 1 Yoh. 4:10.

8. Hexxo mudhineemmo woyite kaaꞌlitannonke gede ayeoo xaꞌmira dandiineemmo?

⁸ Ammanate roduuwinke jawaachishshannonke gede kaaꞌlo xaꞌmira dandiineemmo. Insa hasaaphineemmo woyite macciishshitankeranna dancha qaale coyidhe jawaachishshankera dandiitanno. (Law. 12:25; 1 Tes. 5:14) Joyi yinanniti Nayijeeriyaho heedhannoti hexxo mudhitannokki gede sharrantanni noo rodoo togo yitino: “Roduuwu maamari hoogoommero maliꞌya bae hoogino. Roduuwu jawaachishshinoe gari Yihowa huuccattoꞌyara dawaro qolinoeta afeemma gede assinoe. Insawiinni hexxo mudhitinore woloota jawaachisha dandeemma gara nafa rosoomma.” Roduuwinke jawaante hasiissannonketa mito woyite afa hooggara dandiitannota dea dihasiissannonke. Konnira ayyaanaamittetenni gikki yitinore ammanate roduuwanke kaaꞌlo xaꞌmira hasiissannonkeha ikkara dandaanno.

9. Faarso 41:3 nna 94:19 jawaachishshannonkehu hiittoonniiti?

⁹ Yihowa kaaꞌlo afiꞌrate huuccidhe. Seya giwannonke woyite woy bayicho assiꞌrino dhibbi waadannonke woyite gara ikkinore heda qarra ikkitankera dandiitanno. Xaa yannara Yihowa maalaletenni hursannonkekkiha ikkirono, sheshifachishannonke hattono cincine saꞌneemmo gede jawaante aannonke. (Faarso 41:3; 94:19 nabbawi.) Lawishshaho, ammanate roduuwinke mini looso loosse woy dikko hadhe mitore hirte abbite kaaꞌlitannonke gede assara dandaanno. Roduuwinke ninke ledo huuccatto assidhanno gede assara dandaanno. Woy Qaalisi giddo noota sheshifachishshanno hedo, lawishshaho, albillitte daggannote haaro alamera dhibbunna qarru nookkiha heeꞌnanni heeshsho daafira kultanno hexxo qaangeemmo gede assankera dandaanno.—Rom. 15:4.

10. Iisaani dano iillitusihu gedensaanni jawaante afiꞌranno gede kaaꞌlinosiri maati?

¹⁰ Iisaani yinannihu Nayijeeriyaho heeꞌranno rodiira dano iilliteennasi laanshaawa ikkino. Akimichu isi layinkita lekkate haꞌre afannokkita kulinosi. Iisaani, “Hexxo mudhoommo hattono baasa dadilloommo” yiino. Isi hexxo mudhinonte gedeenni heeꞌrinoyya? Deeꞌni. Iisaani kaaꞌlinosiri maati? Isi togo yiino: “Minaamaꞌyanna ani Yihowa huucciꞌranna Qaalesi nabbawa diagurroommo. Qoleno afiꞌnoommo atootenna Maganu abbannote haaro alamera heeꞌrate hexxonke hiincate murciꞌnoommo.”

11. Sindi dhibbu waadanni noose yannara hagiirraame ikka dandiitinohu hiittoonniiti?

¹¹ Sindi yinannita Meksikote gobbara heedhanno rodoo shaara dandaannohu buutote dhibbi amadinoseta kulloonnise. Ise konne qarra cincite saꞌinohu hiittoonniiti? Ise akkaꞌmitanno woyite barru baala faaciꞌrate mixo fushshidhino. Sindi togo yite borreessitino: “Togo assaꞌya darre akkammie woyite xissoꞌya agure woloota kaaꞌlate illachisheemma gede assitinoe. Hasaawa hanafeemmahu konni garinniiti: Akimootu ledo hasaaweemma woyite, maatensa daafira xaꞌmeemma. Hakkiinni insa konne shota ikkinokki looso doodhitinohu mayiraatiro xaꞌmeemmansa. Hakkunni gedensaanni mayi daafira hasaawa baxxannoro huwata diqarrissannoe. Akimootu giddo rooru, ‘Akkaꞌmitannori keerenke xaꞌmite diegentinonke’ yite kultinoe. Insa giddo duuchu tenne assoomma daafira galattinoe. Mitootu isinni  teessonsa woy silkensa kiiro nafa kultinoe. Yihowa tenne qarru yanna giddo hedoommahunni aleenni giddooyidi hagiirre afiꞌreemma gede assinoe.”—Law. 15:15.

12-13. Dhibbu waadannonsari woy dhuka ajjinori mitu roduuwi soqqama dandiitinohu hiittoonniiti? Tini mayi guma abbitino?

¹² Dhibbu waadannonsari woy dhuku ajinonsari albi geeshsha soqqama hooggino daafira hexxo mudhitannoha ikkara dandaanno. Ikkirono, batinyu togoo roduuwi danchu garinni farciꞌra dandiitino. Lawureli yinanniti Ameerikaho heedhanno rodoo 37 diro maashinetenni fooltanni heedhino. Ise kaansere dhibbannose, duucha hinge darre akkammoonnise hattono gogu dhibbi waadannose. Ise buuto qarrantinoha ikkirono sabbaka diagurtino. Lawureli akimootahonna isewa daannohu wolu mannira farcidhanno. Tini mayi guma abbitino? Ise ajayi ajeenna 17 manni Maganu Qaali giddo noota gara ikkitino egenno afiꞌranno gede kaaꞌlitino. c

¹³ Richardi yinannihu Faransayete gobbara heeꞌrannohu songote cimeessi mininni fulte affannokkirira woy akimete mine goxxe noorira togo yee kaaꞌlitanno hedo coyiꞌrino: “Boode borro mannu laꞌꞌannowa wodhituro danchaho yee hedeemmo. Mannu tenne borro laꞌꞌanno woyite xaꞌmo xaꞌmara dandaanno. Tini minunni mine hadhe sabbaka dandiitannokkire kuri muxxe roduuwanke jawaachishshansara dandiitanno.” Mininni fulte affannokkiri sokka borreessitenna silke bilbilteno farciꞌra dandiitanno.

14. Moote Daawiti dancha lawishsha ikkinonkehu hiittoonniiti?

¹⁴ Dirinkenni, fayyimmate qarrinni woy wolu korkaatinni kainohunni songote woy woradu giddo mito looso woy qoosso afiꞌra hoongammora dandiineemmo. Hatto ikkiro Moote Daawiti lawishshi kaaꞌlankera dandaanno. Daawitira, Maganu mine minate lowo hasatto noosiha ikkirono, isi hatto assa dandaannokkita kulloonnisi; ikkirono isi Maganu konne looso loosara doorinoha woꞌmunni woꞌma kaaꞌlino. Daawiti shaqqillunni mine minate kaaꞌlannoha batinye culkanna camo nafa fushshino. Isi ninkera dancha lawishsha ikkinonke.—2 Sam. 7:12, 13; 1 Dud. 29:1, 3-5.

15. Yuugi jawaatanno gede kaaꞌlinosiri maati?

¹⁵ Faransayete gobbara heeꞌrannohu Yuugi yinanni rodoo dhibbu waadannosi daafira songote cimeessa ikke soqqama agurino; hattono isi mini giddo loonsanniha shiimmaadda looso loosa nafa didandiino. Isi togo yee borreessino: “Umi qarra hexxo mudhoommo  hattono waagu dinoe yee hedoommo. Yannate gedensaanni kayinni, asse afeemmokkiri noota ammane adha hasiissannoeta huwatoommo; asseemmori shiimare ikkirono Yihowara soqqame hagiirre afiꞌroommo. Hexxo mudha hoogate murciꞌroommo. Daafurte heedhenni olama agurtinokkiri Gedewooninna sasu xibbi manni gede anino olama diagureemmo.”—Eje. 8:4.

16. Sokkaasinete lawishshinni maa ronseemmo?

¹⁶ Ammanantino sokkaasine dancha lawishsha ikkitannonke. Moote Akiaabi moohe noo yannara Yihowa sokkaasine konne busha moote gowwisa dandiitanno gara xaꞌmino. Mite sokkaasine hedonsa coyidhino. Maganu kayinni mitto sokkaasincho doorino hattono hakko sokkaanchi yiinori dancha ikkinota coyiꞌrino. (1 Mot. 22:19-22) Ikkina wolootu ammanantino sokkaano hexxo mudhite, ‘Mayi hedonke coyiꞌralla hoongo’ yitinoonni? Insa hatto yitinokkiti egennantinote. Sokkaasine umonsa heeshshi assitannore ikkitino daafira ayirrinye baala Yihowa adhara hasidhanno.—Eje. 13:16-18; Aju. 19:10.

17. Yihowa dirijjite giddo mite soqqanshote qoosso hoonge hexxo mudhinummoro maa assa hasiissannonke?

¹⁷ Yihowa Farciꞌraasine ikkankenna Mangistesi daafira duduwanke ninkera lowo ayirrinye ikkitinota deꞌnoonke. Yihowa dirijjite giddo afiꞌneemmo qoosso yannate geeshshita ikkitara dandiitanno; ikkirono Maganu albaanni muxxe ikkineemmo gede assitannonketi qoosso diꞌꞌikkitino. Quwanke anfoommorenna umonke heeshshi assineemmore ikkinummoro Yihowano ikko roduuwinke baxxannonke. Konnira quwaꞌne affinenna umoꞌne heeshshi assitine heedhinanni gede kaaꞌlaꞌnera Yihowa huuccidhe. Qullaawu Maxaafi giddo umonsa heeshshi asse dancha lawishsha ikkinoha batinye manna kulloonni; konnira insa lawishsha hiinca dandiineemmo. Roduuwiꞌnera dandiitini doogo baalatenni soqqamate maahoyye yiiyye.—Far. 138:6; 1 Phe. 5:5.

18-19. Soqqamatto qoqqowira mannu halaale hakkeeshshi geeshsha macciishsha giwiro nafa soqqanshokkinni hagiirraamo ikka dandaattohu hiittoonniiti?

¹⁸ Soqqamatto qoqqowira mannu hakkeeshshi geeshsha halaale macciishsha giwinohura woy minensa anfanni manni shiima calla ikkinohura hexxo mudhite egennootto? Hatto ikkiro hagiirrinke baꞌꞌannokki gede woy lexxanno gede assiꞌrate maa assa dandiineemmo? “ Soqqanshokkinni Roore Hagiirre Afiꞌra Dandaatto  Gara” yitanno saaxinera mite kaaꞌlitanno hedo kulloonni. Qoleno soqqanshote gara ikkitino lao heedhannonke gede assiꞌra hasiissannonke. Hatto yaa mayyaate?

¹⁹ Maganu suꞌminna Mangistesi daafira duduwa agurtinoonte. Yesuusi heeshshote doogora haꞌrannohu shiima manna ikkinota xawise kulino. (Mat. 7:13, 14) Soqqammeemmo woyite Yihowa, Yesuusinna sokkaasinete ledo loonseemmo; tini ninkera lowo ayirrinyeeti. (Mat. 28:19, 20; 1 Qor. 3:9; Aju. 14:6, 7) Yihowa isira soqqama hasidhannore minisira abbanno. (Yoh. 6:44) Konnira umo farciꞌnummo woyite macciishsha giwino manchi, wole woyite marre hasaawinseemmo woyite macciishshara dandaanno.

20. Ermiyaasi 20:8, 9 nni hexxo mudhineemmo gede assannore gargadhate daafira maa ronseemmo?

²⁰ Masaalaanchu Ermiyaasi lawishshinni lowore rosa dandiineemmo. Isi lowo geeshsha qarrisanno qooxeessira sabbakino. Mannu iso “woꞌmanka woyite” xoninosi hattono diqatinosi. (Ermiyaasi 20:8, 9 nabbawi.) Konnira isi hexxo mudhe sabbaka agurate hedino woyiti no. Ikkirono isi sabbaka diagurino. Mayira? ‘Maganu Qaali’ giddosi giirate gede itinosi daafira sammi yaa didandiino. Ninkeno Maganu Qaali surrenkeranna wodaninkera woꞌmiro sammi yine dianfeemmo. Hatto assate Qullaawa Maxaafa barru barra nabbabbe hiinca hasiissannonke.—Erm. 15:16.

21. Hexxo mudhineemmo gede assannonkere qeela dandiineemmohu hiittoonniiti?

²¹ Konni birxichira kulliti Diboora “Hexxo mudha Sheexaanu ninke gawajjate horoonsiꞌranno hayyooti” ikkitinota huwattino. Ikkirono Maganu Yihowara Sheexaanunna isi horoonsiꞌranno massaari baalunni lowo geeshsha roortino wolqa noosi. Hexxo mudhatto gede assannori iillihero kaaꞌlahera Yihowa eegami. Isi guuntete xeꞌnenna laanfe waaddannohe woyite cincite saꞌꞌatto gede kaaꞌlannohe. Dhibbu waaddannohe woyiteno irkisannohe. Soqqanshote qoossora gara ikkitino lao heedhannohe gede kaaꞌlannohe. Soqqanshoteno gara ikkitino lao heedhannohe gede kaaꞌlannohe. Baalunku coyinni roore yaachishinohere baala iimi Annikkira hasaaphi. Yihowa kaaꞌlonni hexxo mudhatto gede assannohere qeeꞌla dandaatto.