1-2. Yihowa soqqamaanora hiitti dhagge ikkitanno hexxo noonsa?

 HEXXO lowo geeshsha hasiisanno coyeeti. Mitu manni dancha galte heedhansara, ooso danchu garinni lossiꞌrate woy waadannonsa dhibbinni woyyimma afiꞌrate hexxanno. Ninke Kiristaanuno kuri coye hexxineemmoha ikkara dandaanno. Ikkirono kawiichinni sainohu baalunku coyinni roore hexxineemmori no; kunino albillitte ninkeno ikko shiiꞌnoommori reyotenni kaꞌeenna hegerera heeꞌrate hexxooti.

² Soqqamaasinchu Phaawuloosi, “Maganu cubbaataammanna keeraano reyotenni kayisanno hexxo afiꞌroommo” yiino. (Soq. 24:15) Umo kaote hexxo daafira coyiꞌrinohu Phaawuloosi calla diꞌꞌikkino. Iyyoobino coyiꞌrino. Isi Maganu qaagannositanna wirro heeshsho aannosita addaxxino.—Iyo. 14:7-10, 12-15.

3. Umi Qorontoosi 15 kaaꞌlitannonke yineemmohu mayiraati?

³ “Reyotenni kaꞌꞌa” Kiristaanu rosi baalaho ‘xintu’ woy ‘umi rosi’ widooti. (Ibi. 6:1, 2) Phaawuloosi 1 Qorontoosi 15 te kaote daafira borreessino. Isi borreessinori umi xibbi diri Kiristaana jawaachishinoti dihuluullissannote. Tini fooliishsho ninkeno jawaachishshannonke; hattono hexxonke kaajjishshanno.

4. Shiiꞌnoommori kaꞌannota huluullammeemmokkihu mayiraati?

⁴ Yesuusi Kiristoosi kao, shiiꞌnoommori reyotenni kaꞌannota addaxxineemmo gede assitannonke. Kiristoosi kao Phaawuloosi Qorontoosi mannira kulinohu ‘danchu duduwi’ widooti. (1 Qor. 15:1, 2) Isi Kiristaanu kao noota ammanannokkiha ikkiro, ammanansa waagu nookkita ikkitinota  coyiꞌrino. (1 Qor. 15:17) Yesuusi kainota ammananke wolootuno kaꞌannota ammanneemmo gede assitannonke.

5-6. Umi Qorontoosi 15:3, 4te noo hedo kaaꞌlitannonkehu hiittoonniiti?

⁵ Phaawuloosi kaote daafira borreessi woyite sase halaale qummi assino; insano (1) “Kiristoosi ninke cubbi daafira [reyasi],” (2) ‘waamamasi,’ (3) “qullaawa borro giddo yinoonninte gede sayikki barra reyotenni” kaꞌꞌasiiti.—1 Qorontoosi 15:3, 4 nabbawi.

⁶ Yesuusi reyasi, waamamasi hattono reyotenni kaꞌꞌasi ninke kaaꞌlitannohu hiittoonniiti? Masaalaanchu Isayaasi Mesihicha ‘shinannisitanna madaarrannisita’ masaalino. Hattono Mesihichu lowo manni cubbo duqqannota masaalino. Yesuusi hatto assinohu heeshshosi wodote kakkalo asseeti. (Isa. 53:8, 9, 12; Mat. 20:28; Rom. 5:8) Konnira Yesuusi reyo, waamamasinna kaꞌꞌasi cubbunna reyotenni keere fulatenna shiiꞌnoommori ledo wirro heeꞌrate hexxo heedhannonke gede assitinonke.

7-8. Kiristaanu Yesuusi reyotenni kainota ammananno gede kaaꞌlannonsari maati?

⁷ Kaote hexxonke Yesuusi kao ledo xaado afidhino daafira, Yesuusi kainota ammana hasiissannonke. Yihowa Yesuusa reyotenni kayisinosita huluullammeemmokkihu mayiraati?

⁸ Yesuusi kainota illensanni laꞌinorinna tenne wolootaho kultinori lowo naqaashshe no. (1 Qor. 15:5-7) Phaawuloosi kulinori giddo umi naqaashshe Pheexiroosiiti (Keefa). Soqqamaasine Yesuusi reyotenni kainota Pheexiroosi lainota coyidhino. (Luq. 24:33, 34) Hattono “tonaa lame rosaanosi” Yesuusi reyotenni kainota laꞌino. “Hakkunni gedensaannino onte xibbe roortino rosaanora mitte hige leellino.” Insara leellinohu Maatewoosi 28:16-20te kulloonni garinni Galiilaho gamba yite heedheenna ikkara dandaanno. Hattono Yesuusi “Yaiqoobira leellino.” Isi Yesuusira maaꞌne rodoo ikkikki digatino; hattono umi qara Yesuusi Mesihicha ikkinota diammanino. (Yoh. 7:5) Yaiqoobi Yesuusi reyotenni kainota laihu gedensaanni ammanino. Phaawuloosi 55 M.D. balla tenne sokka borreessi woyite, Yesuusi reyotenni kainota illensanni lainohu lowo manni lubbote no; konnira Yesuusi reyotenni kainota huluullamannohu heeꞌriro, kainota laino manni kulansara dandaanno.

9. Phaawuloosi Soqqamaasinete Looso 9:3-5 coyiꞌrinori, Yesuusi reyotenni kainota huluullammeemmokki gede assannonkehu hiittoonniiti?

⁹ Gedensaanni Yesuusi Phaawuloosirano leellino. (1 Qor. 15:8) Phaawuloosi (Saawuli) Demaasiqo haꞌranni doogo heeꞌre reyotenni kainohuta Yesuusi huuro macciishsino; hattono ajuujatenni Yesuusira iima noosi ayirrinye laino. (Soqqamaasinete Looso 9:3-5 nabbawi.) Tini Yesuusi kao maatto ikkitinokkita ledde buuxissanno tajeeti.—Soq. 26:12-15.

10. Phaawuloosi Yesuusi reyotenni kainota ammanasi ma assano gede assitinosi?

¹⁰ Phaawuloosi alba Kiristaana shorrannoha ikkino daafira, isi farciꞌrannori mitu mannira dhagge ikkinonsa. Isi Yesuusi reyotenni kainota ammanihu gedensaanni, wolootuno konne halaale ammantanno gede diinaggaawe sabbakkino. Phaawuloosi gannonnisiha, usurroonnisiha, hattono markaawete dano iillitinosiha ikkirono, Yesuusi ree reyotenni kainota cince sabbakino. (1 Qor. 15:9-11; 2 Qor. 11:23-27) Phaawuloosi Yesuusi reyotenni kainota ammanino daafira, shinannisita nafa waajjikkinni sabbakino. Tini atino Yesuusi reyotenni kainota ammanatto gede  diassitannohe? Qoleno kaote hexxo albinni roore ammanatto gede diassitannohe?

11. Mitu Qorontoosi heeꞌranno mannira kaote daafira, gara ikkitinokki lao noonsahu mayira ikkara dandaanno?

¹¹ Giriikete katamira Qorontoosi heeꞌrannohu mitu mannira kaote daafira, gara ikkitinokki lao noonsa; mitu isinni “Reyotenni kaꞌꞌa dino” yitanno. Insa hatto yitannohu mayiraati? (1 Qor. 15:12) Wolu Giriikete katamira Ateensi heedhannoti mite fullahaasine, Yesuusi reyotenni dikaino yite qacifattanno. Tini Qorontoosi heeꞌrannohu mitu mannira hattoo lao heedhannonsa gede assitukkinni digattino. (Soq. 17:18, 31, 32) Wolootu kao lawishshu yaattotilla, yaano mittu manchi cubbunni kainohunni “reyino,” Kirisataana ikkanno woyite kayinni “kaꞌꞌanno” yite heddannoha ikkara dandaanno. Kuni manni baxire coyiꞌrirono kao noota ammanannokkiha ikkiro, ammanansa mulla daafurooti. Maganu Yesuusa reyotenni kayisinokkiha ikkiro, cubbinsara wodo baantoonnikki daafira insa cubbu giddo no. Konni daafira, kao ammantannokkirira addu hexxo dinonsa.—1 Qor. 15:13-19; Ibi. 9:12, 14.

12. Umi Pheexiroosi 3:18, 22 kultanno garinni, Yesuusi kao isi reyara albaanni reyotenni kaino manni kaonni baxxitannohu hiittoonniiti?

¹² Phaawuloosi umisi ‘Kiristoosi reyotenni kainota’ afino. Yesuusi kao alba uullate aana reyotenni kae wirro reyino manni kaonni baxxitinote. Phaawuloosi Yesuusi “reyitinorira reyotenni kaꞌꞌate umiha ikke” reyotenni kainota coyiꞌrino. Yesuusi umiha ikkinohu hiitte doogonniiti? Umo reyotenni kae ayyaanunni heeshshonniha ikkinohu Yesuusaati; qoleno mannu ooso giddonni umo iimira haꞌrinohu isooti.—1 Qor. 15:20; Soq. 26:23; 1 Pheexiroosi 3:18, 22 nabbawi.

13. Phaawuloosi Addami assinore Yesuusi assinori ledo heewisiisinohu hiittoonniiti?

¹³ Mittu manchi reyo lowo miliyoone ikkano manni heeshsho afiꞌranno gede assitannohu hiittoonniiti? Phaawuloosi tenne xaꞌmora ammansiissanno dawaro qolino. Isi, Addaami mannu oosora abbinore Kiristoosi mannu oosora assara dandaannori ledo heewisiisino. Phaawuloosi “Reyo dagginohu mittu manchi Addaami widoonni” ikkinota borreessino. Addaami cubbo loose umisiranna sirchisira reyo abbino. Xaa geeshsha buuto qarrammanni heeꞌnoommohu Addaami Maganoho hajajama giwe abbinorinniiti. Ikkollana, Maganu Beettosi reyotenni kayisino daafira, albillitte kaajja hexxo noonke. Phaawuloosi “reyo dagginohu mittu manchi Addaami widoonni” ikkinonte gede, “Reyotenni kaꞌꞌano dagginohu mittu manchi Kiristoosi widoonniiti” yee coyiꞌrino.—1 Qor. 15:21, 22.

14. Addaami reyotenni kaꞌꞌanno? Xawisi.

¹⁴ Phaawuloosi “Addaaminni kainohunni mannu baalunku reyanno” yiinohu mayyaateeti? Phaawuloosi hatto yiinohu Addaamiwiinni cubbonna guuntete xeꞌne ragiꞌrinoha Addaami sircho kulateeti; insa reyansa digattanno. (Rom. 5:12) Addaami “heeshsho” afidhannori wido diꞌꞌikkino. Addaami umo guuta manchooti; isi afanni heeꞌre Maganoho hajajama giwino daafira Kiristoosi wodo Addaami cubbo dihayishshitanno. Manchi Beetti ‘meꞌꞌeho’ yee yoo yaannorino, Addaaminte gede “hegerera” baꞌanno.—Mat. 25:31-33, 46; Ibi. 5:9.

15. Mannu “baalu” heeshsho afiꞌranno yiniri giddo gamu ayeooti?

¹⁵ Phaawuloosi “Kiristoosi widoonni mannu baalu heeshsho afiꞌranno” yiinota qaango. (1 Qor. 15:22) Phaawuloosi tenne sokka borreessinohu, Qorontoosi heeꞌrannohu  buuramino Kiristaaniraati; insa iima heeꞌrate kaꞌanno. Kuni Kiristaani ‘Yesuusi Kiristoosinni qullaawootahonna qullaawoota ikkate woshshantinoreeti.’ Phaawuloosi kuni Kiristaani ‘Kiristoosa ammane heeꞌre reyinota’ xawisino. (1 Qor. 1:2; 15:18; 2 Qor. 5:17) Isi wole qullaawu ayyaaninni borreessino sokkara, “Reyosinni [Yesuusi] ledo mitto” ikkitinori, “kaosinnino isi ledo mitto” ikkitannota coyirino. (Rom. 6:3-5) Yesuusi reyotenni ayyaanu biso ikke kae iimira haꞌrino. Konnira, ‘Kiristoosi ledo mitto ikkitinori’ buurantino Kiristaani baalu reyotenni ayyaanu biso ikkite kaꞌe iimira hadhanno.

16. Phaawuloosi Yesuusi ‘reyotenni kaꞌꞌate umiho’ yaasi mayyaate?

¹⁶ Phaawuloosi “Kiristoosi reyitinorira reyotenni kaꞌꞌate umiha” ikkinota borreessino. Hakkuyira albaanni Alaazaarinna wolootu reyotenni kaꞌinoha ikkirono, ayyaana ikke kae umo hegere heeshsho afiꞌrinohu Yesuusa ikkinota qaango. Phaawuloosi Yesuusi kao Israeele Maganoho shiqqishshannohu umi laalchi ledo heewisiisino. Qoleno Phaawuloosi Yesuusa reyotenni kaꞌꞌate ‘umiho’ yaasi, wolootuno hakkuyi gedensaanni iima heedhara reyotenni kaꞌannori noota leellishshanno. Soqqamaasinenna ‘Kiristoosinni heeꞌrinohu’ wolu manni Yesuusi gedensaanni reyotenni kaꞌꞌanno. Insa yanna iillituro, Yesuusi gede ayyaana ikkite iima heeꞌrate kaꞌanno.

17. ‘Kiristoosinni heedhinori’ iimi baꞌlattonsa adhitannohu mamooteeti?

¹⁷ Phaawuloosi Qorontoosi heeꞌranno Kiristaanira sokka boorreessi yannara ‘Kiristoosinni heedhinori’ iimi heeshsho afiꞌrate kaꞌꞌa dihanaffino. Hatteentenni Phaawuloosi kuni coyi albillitte ikkannota coyiꞌrino; isi togo yiino: “Kuni ikkannohuno bado badosinniiti: Umiha ikke Kiristoosi kaꞌꞌanno; isi daanno [“leellanno,” NW] woyite isire ikkitinori kaꞌanno.” (1 Qor. 15:23; 1 Tes. 4:15, 16) Balanxe masaalloonni garinni xa Yesuusi leelle noo yannara heeꞌnoommo. Soqqamaasinenna ayyaanunni buurante heedhe reyitino Kiristaani reyotenni kaꞌe iimi baꞌlattonsa adhatenna ‘kaosinni isi ledo mitto ikkate’ Yesuusi leellanno geeshsha agadha hasiissinonsa.

18. (a) Iimi kao gedensaanni wole kao no yineemmohu mayiraati? (b) Umi Qorontoosi 15:24-26 Kultanno garinni iima mayi ikkanno?

¹⁸ Iima Kiristoosi ledo heeꞌrate hexxo noonsakkiri ammanamino Kiristaani baalunku  hexxo maati? Insarano kaote hexxo noonsa. Qullaawu Maxaafi Phaawuloosinna wolootu iima heeꞌrate hexxo noonsari ‘reyotenni umo kaꞌannota’ kulanno. (Aju. 20:6) Tini hakkunni gedensaanni wole kao noota leellishshanno. Tini Iyyoobi albillittete heeshshosi daafira coyiꞌrino hedo ledo sumuu yitannote. (Iyo. 14:15) Kiristoosi roorroota, gashshaanonna wolqaataamma baala hunanno yannara “isire ikkitinori” ledosi iima heedhanno. ‘Goofimarchu diina ikktinoti reyo’ nafa baꞌanno. Iima heeꞌrate kaꞌannori galagalte reyitannokkiti egennantinote. Wolootuna?—1 Qorontoosi 15:24-26 nabbawi.

19. Uullate aana heeꞌrate hexxo noonsari maa hexxa dandiitanno?

¹⁹ Uullate aana heeꞌrate hexxo noonsari maa hexxa dandiitanno? Insano Phaawuloosi togo yee coyiꞌrinore hexxa dandiitanno: “Maganu cubbaataammanna keeraano reyotenni kayisanno hexxo afiꞌroommo.” (Soq. 24:15) Cubbaataammu iimira haꞌra dandiitannokkiti egennantinote; konnira Phaawuloosi kowiicho coyiꞌranni noohu uullate aana heeꞌrate kaꞌꞌanno manni daafiraati.

20. Kaote hexxo kaajjite heeꞌratto gede kaaꞌlitinohehu hiittoonniiti?

²⁰ ‘Reyino manni reyotenni kaꞌꞌannoti’ dihuluullissannote! Uullate aana heeꞌrate reyotenni kaꞌannorira kowiicho hegerera heeꞌrate hexxo noonsa. Tini hexxo woꞌmitannota addaxxa dandaatto. Shiirootto manna qaagatto woyite tini hexxo sheshifachishshahera dandiitanno. Kiristoosinna isi ledo gashshitannori wolootu ‘kume diro mookkanno’ yannara insa reyotenni kaꞌara dandiitanno. (Aju. 20:6) Atino Kiristoosihu Kumu Diri Gashshooti hanafara albaanni reyittoro reyotenni kaꞌꞌattota addaxxa dandaatto. Tini “hexxo diꞌꞌirraawissannonke.” (Rom. 5:5) Tini hexxo xaa yannara kaajjite heeꞌratto gedenna Maganoho albinni roore hagiirrunni soqqamatto gede kaaꞌlitannohe. Umi Qorontoosi fooliishsho 15te noo hedonni ronseemmohu wolurino no; aananno birxichira tenne daafira ronseemmo.