Kuni qummeeshshi tenne daafira kulannoha diˈˈikkino. Hatteentenni kuni qummeeshshi mittu manchira lowo qarrinna yaaddo marro marro higge iillitusirono, cince saˈˈa dandaannota kulanno.

Hanni qummeeshshu qooxeessira noo hedo laˈno. “Bushu manchi gede keeraanchu mine duggooti; galannowanno diiggooti. Keeraanchu lamala hige uwiro nafa kaˈˈanno; bushu kayinni baote aana uwanno. Baarigaarikki qarrameenna hagiidhitooti; gufiˈranno woyiteno tashshi yoonkehe.”—Law. 24:15-17.

Mitootu kiiro 16 mittu manchi cubbo loosirono maaro eˈˈe Maganu ledo wirro danchu jaaloomi heeˈrannosi gede assiˈrannota kultannote yite heddanno. Biritaaniyunniri lamu ammaˈnote massagaano, “Biree warono ikko xaa yannara sabbakkannori konne qummeeshsha konni garinni xawissanno” yite borreessitino. Insa ledde togoo lao, “mittu danchu manchi . . . shota ikkinokki cubbo loosirono, Maganoho noosi baxilli horo dibaˈˈanno; hattono uwinowiinni aye woyiteno maaro eˈˈe kaˈˈanno” yaate yite borreessitino. Togoo hedo cubbo loosa qorophannokki mancho baxissara dandiitanno. Togoo manchi cubbo wirro wirro hige loosiro nafa, Maganu woˈmanka woyite gatona yaannosihu gede asse hedara dandaanno.

Ikkirono kiiro 16 tenne kultannoha diˈˈikkino.

Kiiro 16nna 17 nooha ‘uwa’ yaannoha Ibiraawootu afiinni tirroonni qaale addi addi garinni horoonsiˈnoonni. Konne qaale addanka uwinoricho kulateno horoonsiˈnoonni; lawishshaho saa doogote ubbannota, mittu manchi minu aaninni uwannota woy, kinchu uwannota kulateno konne qaale horoonsiˈnoonni. (Mar. 22:4, 8; Amo. 9:9) Konne qaale lawishshu yaattonnino horoonsiˈnoonni. Hanni aane noo qummeeshsha laˈno; qummeeshshu togo yaanno: “Kaaliiqi mannu qaafo suwisanno; harinshonsannino hagiidhanno. Kaaliiqi irkisannonsa daafira, gufidhuro nafa diubbanno.”—Far. 37:23, 24; Law. 11:5; 13:17; 17:20.

Hanni Pirofeeserichu Ediwaardi Hayise Pilemtire coyiˈrinore laˈno. Isi togo yiino: “[‘Uwa’] yaannoha Ibiraawootu qaale mittu manchi cubbo loosinota kulate dihoroonsiˈnoonni.” Wolu fullahaanchi kiiro 16 togo yee xaphi assino: “Maganu mannira aye woyiteno qinaannonsa daafira, insa miica mulla daafurooti; bushuulleho kayinni diqinaannonsa.”

Lawishsha 24:16 noohu ‘uwa’ yaanno qaali cubbo loonse uwate daafira kulannoha ikkikkinni marro marro hige waadanno qarrinni umbannita kulannoho. Tenne busha alamera mitto keeraancho mancho fayyimmate qarri woy wolu qarri amadasira dandaanno. Ammanasinni kainohunni gashshootu nafa xiiwasira dandaanno. Ikkirono isi konne qarra dandee saˈˈanno gedenna qinaannosi gede Maganu kaaˈlannositanna irkisannosita addaxxa dandaanno. Hanni Maganu soqqamaanora duucha woyite coyi qinaannansa laootto yanna hedi. Insara qinaannonsahu mayiraati? Yihowa “qarru giddo noore kaaˈlannonsa; ubbinoreno kayisannonsa” daafiraati.—Far. 41:1-3; 145:14-19.

“Keeraanchu” manchi wolootaho qarru iillannonsa woyite hagiidhannokkiti egennantinote. Hatteentenni isi ‘halaalunni Magano waajjitannorira woyyannonsata’ afino daafira jawaatanno.—Ros. 8:11-13; Iyo. 31:3-6; Far. 27:5, 6.