Kuni qummeeshshi tenne daafira kulannoha diꞌꞌikkino. Hatteentenni kuni qummeeshshi mittu manchira lowo qarrinna yaaddo marro marro higge iillitusirono, cince saꞌꞌa dandaannota kulanno.

Hanni qummeeshshu qooxeessira noo hedo laꞌno. “Bushu manchi gede keeraanchu mine duggooti; galannowanno diiggooti. Keeraanchu lamala hige uwiro nafa kaꞌꞌanno; bushu kayinni baote aana uwanno. Baarigaarikki qarrameenna hagiidhitooti; gufiꞌranno woyiteno tashshi yoonkehe.”—Law. 24:15-17.

Mitootu kiiro 16 mittu manchi cubbo loosirono maaro eꞌꞌe Maganu ledo wirro danchu jaaloomi heeꞌrannosi gede assiꞌrannota kultannote yite heddanno. Biritaaniyunniri lamu ammaꞌnote massagaano, “Biree warono ikko xaa yannara sabbakkannori konne qummeeshsha konni garinni xawissanno” yite borreessitino. Insa ledde togoo lao, “mittu danchu manchi . . . shota ikkinokki cubbo loosirono, Maganoho noosi baxilli horo dibaꞌꞌanno; hattono uwinowiinni aye woyiteno maaro eꞌꞌe kaꞌꞌanno” yaate yite borreessitino. Togoo hedo cubbo loosa qorophannokki mancho baxissara dandiitanno. Togoo manchi cubbo wirro wirro hige loosiro nafa, Maganu woꞌmanka woyite gatona yaannosihu gede asse hedara dandaanno.

Ikkirono kiiro 16 tenne kultannoha diꞌꞌikkino.

Kiiro 16nna 17 nooha ‘uwa’ yaannoha Ibiraawootu afiinni tirroonni qaale addi addi garinni horoonsiꞌnoonni. Konne qaale addanka uwinoricho kulateno horoonsiꞌnoonni; lawishshaho saa doogote ubbannota, mittu manchi minu aaninni uwannota woy, kinchu uwannota kulateno konne qaale horoonsiꞌnoonni. (Mar. 22:4, 8; Amo. 9:9) Konne qaale lawishshu yaattonnino horoonsiꞌnoonni. Hanni aane noo qummeeshsha laꞌno; qummeeshshu togo yaanno: “Kaaliiqi mannu qaafo suwisanno; harinshonsannino hagiidhanno. Kaaliiqi irkisannonsa daafira, gufidhuro nafa diubbanno.”—Far. 37:23, 24; Law. 11:5; 13:17; 17:20.

Hanni Pirofeeserichu Ediwaardi Hayise Pilemtire coyiꞌrinore laꞌno. Isi togo yiino: “[‘Uwa’] yaannoha Ibiraawootu qaale mittu manchi cubbo loosinota kulate dihoroonsiꞌnoonni.” Wolu fullahaanchi kiiro 16 togo yee xaphi assino: “Maganu mannira aye woyiteno qinaannonsa daafira, insa miica mulla daafurooti; bushuulleho kayinni diqinaannonsa.”

Lawishsha 24:16 noohu ‘uwa’ yaanno qaali cubbo loonse uwate daafira kulannoha ikkikkinni marro marro hige waadanno qarrinni umbannita kulannoho. Tenne busha alamera mitto keeraancho mancho fayyimmate qarri woy wolu qarri amadasira dandaanno. Ammanasinni kainohunni gashshootu nafa xiiwasira dandaanno. Ikkirono isi konne qarra dandee saꞌꞌanno gedenna qinaannosi gede Maganu kaaꞌlannositanna irkisannosita addaxxa dandaanno. Hanni Maganu soqqamaanora duucha woyite coyi qinaannansa laootto yanna hedi. Insara qinaannonsahu mayiraati? Yihowa “qarru giddo noore kaaꞌlannonsa; ubbinoreno kayisannonsa” daafiraati.—Far. 41:1-3; 145:14-19.

“Keeraanchu” manchi wolootaho qarru iillannonsa woyite hagiidhannokkiti egennantinote. Hatteentenni isi ‘halaalunni Magano waajjitannorira woyyannonsata’ afino daafira jawaatanno.—Ros. 8:11-13; Iyo. 31:3-6; Far. 27:5, 6.