Qullaawu Maxaafino ikko wole xaggete maxaaffa reyino manni daafira yee cuuamino Kiristaani noota dikultanno.

Batinye Qullaawu Maxaafi tirora tenne hedo tirroonni gari, mitu manni Phaawuloosi yannara reyino manni daafira wayinni cuuantinori no yite heddanno gede assitinonsa. Lawishshaho Sidaamu Afiite Qullaawu Maxaafi tirora togo yinoonni: “Reyotenni kaꞌꞌa nookkiha ikkiro, reyino manni daafira yite cuuantannori ma assitannoyya?”

Ikkirono hanni lamu Qullaawu Maxaafi fullahaano coyidhinore laꞌno. Dokiterichu Girigooriyi Lakiwuudi reyino manni daafira yee cuuaminohu noota leellishshannoti Qullaawu Maxaafitino ikko wole xaggete maxaaffa taje nookkita coyiꞌrino. Hattono Pirofeeserichu Gordeni Daaneeldi Fee, togo yee borreessino: “Konni garinni cuuaminohu noota leellishshannoti xaggennitino ikkito Qullaawu Maxaafi taje dino. Haaru Gondoori giddono tenne daafira dikulloonni; wole beetekiristaaneno ikko Yesuusi soqqamaano reyituhu gedensaanni xintantinote ortodokisete ammaꞌnorano togoo rosichi dino.”

Qullaawu Maxaafi Yesuusi harunsaanosi, “gosa baala . . . cuuꞌinanni rosaanoꞌya assensa. Hajajoommoꞌnere baala assitanno gede rosiissensa” yee hajajinota kulanno. (Mat. 28:19, 20) Mittu manchi cuuame rosaancho ikkara albaanni, Yihowanna Beettisi daafira rosa hattono ammananna hajajama hasiissannosi. Reyinohu tenne assa didandaanno; lubbotenni noo Kiristaanchino isira tenne assa didandaanno.—Ros. 9:5, 10; Yoh. 4:1; 1 Qor. 1:14-16.

Ikkina Phaawuloosi mayyaanni nooyya?

Qorontoosira heeꞌrannohu mitu manni reyitinori kaꞌannota diammananno. (1 Qor. 15:12) Phaawuloosi tini hedonsa gara ikkitinokkita leellishinonsa. Hiittoonni? Isi ‘barru baala reyo agarte noosita’ coyiꞌrino. Ikkirono isi hakka woyite lubbote no. Barru baala reyanno gede assannohu gawajjanno coyi iillisirono, reyihu gedensaanni Yesuusi gede wolqaataamo ayyaanu biso uddiꞌre reyotenni kaꞌꞌannota addaxxino.—1 Qor. 15:30-32, 42-44.

Qorontoosi heeꞌranno Kiristaani buuramino Kiristaanira barru baala qarru iillannonsatanna kaꞌara albaanni reyitannota huwata hasiissinonsa. Konnira, ‘Kiristoosi Yesuusi ledo mitto ikkate cuuantinori, reyosino beeqqate cuuantino’ yaate. (Rom. 6:3) Insa konni garinni cuuamansa Yesuusi gede, iimi kao afiꞌrate qarra adhite reyitannota leellishshannote.

Yesuusi wayinni cuuamihunni lame saꞌꞌanno diri gedensaanni, soqqamaasinesi giddonni lameho togo yiino: “Ani cuuameemmo cuuama cuuantine affinanni.” (Maq. 10:38, 39) Yesuusi wayinni calla cuuame diagurino. Isi Maganoho ammaname heeꞌrasi shinannisi gede assitannota coyiꞌranni no. Phaawuloosi buurantinori ‘Kiristoosi qarra beeqqituro, gedensaanni ayirrinyesi beeqqitannotaꞌcoyiꞌrino. (Rom. 8:16, 17; 2 Qor. 4:17) Konnira, insano reyotenni kaꞌe iimi heeshsho afiꞌrate reya hasiissannonsa.

Konnira Phaawuloosi coyiꞌrinore garunni togo yine tira dandiinanni: “Hatto ikka hoogiro, reyate yite cuuama maa kaaꞌlitannonsa? Reyitinori horonta kaꞌꞌannokkiha ikkiro, insa hatto ikkate yite mayira cuuantanno?”