Yesuusi gordoho noo yannara, wolootu ledo loosanno woyitira kaaˈlannosiha dancha akata rosino. Hakkiinni uullara dayiti, ledosi loossannorira dancha loosu jaala ikke kaajja lawishsha ikkino. Yesuusi lawishshi kaaˈlannonkehu hiittoonniiti? Isi lawishsha seekkine xiinxalline, wolootaho dancha loosu jaalla ikkate kaaˈlannonkeha sase xintu seera rosa dandiineemmo. Tini xintu seerubba roduuwinke ledo noonke mittimma kaajjitanno gede kaaˈlitannonke.

Danchu loosu jaali umosi heeshshi assannoho. Togoo manchi ledosi loossannore ayirrisanno, hattono isonooto dibokkeessanno. Yesuusi konni garinni umo heeshshi assa Annisiwiinni rosino. Kalaqaanchoho yinannihu Yihowa calla ikkirono, isi Beettisi loosino loosono wolootu affara hasiˈrino. Maganu coyiˈrinorinni tenne huwata dandiinanni; isi togo yiino: “Manna daninkenninna suudinkenni kalanqo.” (Kal. 1:26) Yihowa tenne coyiˈri woyite, Yesuusi Annisi lowo geeshsha umosi heeshshi assannoha ikkinota huwatino.—Far. 18:35.

Yesuusino uullate aana noo waro konni garinni umosi heeshshi assannoha ikkinota leellishino. Isi loosino loosira mannu galatisi woyite, galata Maganoho  uyinanni gede assino. (Maq. 10:17, 18; Yoh. 7:15, 16) Yesuusi rosaanosi ledo dancha aante heedhannosi gede sharramino; hattono insa borojju gede asse ikkikkinni jaallasi gede asse hedino. (Yoh. 15:15) Insara umo heeshshi assa rosiisara yee lekkansa nafa hayishshino. (Yoh. 13:5, 12-14) Ninkeno uminke hasatto balaxisiisantenni, ledonke loossanno roduuwanke ayirrisa hasiissannonke. ‘Mimmito ayirrinseemmohanna’ ayirrinye afiˈrate yaandeemmokkiha ikkiro, lowore loosa dandiineemmo.—Rom. 12:10.

Qoleno, umosi heeshshi assanno manchi ‘malu seyiro halchinoonniri woˈmannota’ huwatanno. (Law. 15:22) Noonke woˈnaalshinna dandoonke ikkitu geeshshitano ikkituro, baalankare afino manchi nookkita qaaga hasiissannonke. Yesuusi nafa afinokki coyi noota xawise coyiˈrino. (Mat. 24:36) Qoleno, isi guuta ikkitinokki rosaanosi maa heddannoro afa hasiˈranno. (Mat. 16:13-16) Ledosi loossannori isi ledo noo woyite huxuxxi yitannokkihu iseraati! Hatteente gede, ninkeno umonke heeshshi assineemmoha, baalankare gunde anfoommokkita qaangeemmohanna wolootu yitannore macciishshineemmoha ikkiro, mereeronke keeru heeˈranno; hattono ‘halchinoonniri woˈmanno.’

Hakko iso songote cimeeyye mitteenni loossanno woyite Yesuusi gede umonsa heeshshi assitannore ikka hasiissannonsa. Gambooshshinsa yannara, qullaawu ayyaani aye cimeessano kaaˈlannore coyiˈranno gede kakkayisasira dandaannota qaaga hasiissannonsa. Cimeeyye mereeronsa noohu baalunku huxuxxi yiikki hedosi coyiˈranno gede injo kalaqquro, songo woˈmate kaaˈlannore mura dandiitanno.

Danchu loosu jaali wolootu ledo loosanno woyite yiinota calla cuˈmiˈre digiwanno woy quwa disaˈˈanno. Hasiisanno woyite hedosi aguranno hattono maahoyye yaanno. Yesuusi Annisi quwa saˈˈannokkiha ikkinota laˈˈannota duucha faro afiˈrino. Lawishshaho, Yihowa iso reyo hasiissannore mannu ooso gatisara uullara soyinosi.—Yoh. 3:16.

Yesuusi, hasiisanno woyite hedinore agure maahoyye yaanno. Lawishshaho, isi soqqame dayinohu Israeelete mannira ikkirono, Kanaˈˈaanitte mancho kaaˈlino. (Mat. 15:22-28) Qoleno rosaanosiwiinni quwa sainore diagadhino. Muli jaalisi Pheexiroosi mannu albaanni kaadisihu gedensaanni, Yesuusi isira gatona yiinosi. Gedensoonni isi Pheexiroosira ayirrado looso uyinosi. (Luq. 22:32; Yoh. 21:17; Soq. 2:14; 8:14-17; 10:44, 45)  Yesuusi lawishshi, ninkeno maahoyye yineemmore ikkine ‘arshoota woy quwa saˈneemmokkire’ ikka hasiissannonketa leellishanno.—Tit. 3:2.

Quwa saˈneemmokkire ikkanke, duuchunku gari manni ledo sumuu yine loonseemmo gedeno kaaˈlitannonke. Yesuusi xaadanno manna shaqqillunni amadanno daafira, hinaassino diinnasi “qaraxaasinetenna cubbaataammu jaalaati” yitinosi; insa hatto yitu manni kayinni Yesuusi duduwino sokka macciishshannoho. (Mat. 11:19) Ninkeno Yesuusi gede ninkewiinni baxxino manni ledo sumuu yine loosa dandiineemmo? Woradu aliidi laˈˈaancho ikkenna Beeteelete duuchu gari roduuwi ledo soqqaminohu Luwisi yinanni rodii togo yiino: “Anente gede guuta ikkinokki manni ledo loosa, addi addi suude afidhino kinnanni mine minate gedeeti. Kinna addi addi garita ikkase looso leddannoha ikkirono, girgidda gurgurto nookkiha taalashsho assa dandiinanni. Wolootu ledo sumuu yee loosatenna loosono umo fushshate, biddi assiˈra hasiissannoere biddi assiˈrate woˈnaaleemmo.” Tini dancha laooti!

Quwa saˈneemmokkire ikkinoommota songonke giddo leellisha dandiineemmohu hiittoo woyiteeti? Soqqanshote gaamonke ledo soqqammeemmo woyite tenne assa dandiineemmo faro afiˈneemmo. Ninkehunni baxxinohu maatete qeechi noonsari ledo woy darawonke ikkitinokkiri ledo soqqama dandiineemmo. Qoleno insa soqqanshotenni hagiidhite higganno gede, soqqanshonke gara woy soqqammanni sayinseemmo yanna insara injaanno garinni biddi assiˈra dandiineemmo.

Danchu loosu jaali ‘afiˈrinore woleho iillishiˈrate qixxaawinoho.’ (1 Xim. 6:18) Yesuusi Annisi ledo loosi yannara, Yihowa baalare kofe maaxiˈrannoha ikkinokkita huwatikki digatino. Yihowa ‘gordo diriirsi yannara’ Yesuusi “ledosi noo” daafira, lae rosa dandaannori no. (Law. 8:27) Gedensoonni, Yesuusi umisi Annisiwiinni ‘macciishshinore’ rosaanosira hagiirrunni kulinonsa. (Yoh. 15:15) Ninkeno Yihowa lawishsha harunsine, egennonkenna woˈnaalshanke roduuwinkera beeha hasiissannonke. Danchu loosu jaali bayichoˈya woy silxaaneˈya hoogeemmo yee, wolootu afa hasiissannonsare woy kaaˈlannonsare dimaaxiˈranno. Hatteentenni rosinoha dancha coye wolootaho kula hagiirsiissannosi.

Qoleno ledonke loossanno roduuwanke jawaachisha dandiineemmo. Mittu manchi assinoommore wodanche godowinta galatinkero, tashshi diyaannonke? Yesuusi ledosi loossannori assitinoha dancha coye wodanche kulinonsa. (Maatewoosi 25:19-23 nna Luqaasi 10:17-20 ledo heewisiisi.) Isinni isi loosino loosinni “saino looso nafa” loossannota kulinonsa. (Yoh. 14:12) Yesuusi gaˈa gede reyara hashsha ammanantino soqqamaasinesi togo yee galatinonsa: “Kiˈne qarriˈya yannara ane ledo kaajjitine uurritinoonni.” (Luq. 22:28) Yesuusi hatto yaasi insa mageeshshi geeshsha jawaachishshinonsaronna loosoho kakkayissinonsaro heda dandaatto! Ninkeno ledonke loossanno roduuwanke galanteemmoha ikkiro, albinni roore hagiirraamma ikkitanno, hattono roore looso loossara dandiitanno.

Keyodi yinanni rodii togo yiino: “Dancha loosu jaalaati yinannihu guuta manchooti yaa diˈˈikkino; hatteentenni ledosi loossannori hagiirraamma ikkitanno gedenna loosu duha ikkannonsakki gede assannoho.” Ati ledokki loossannorira hattooho? Wolootu ate tennera hiittooho yite heddannoro afate, mito roduuwa mayira dixaˈmatto? Ledokki loossanno roduuwi Yesuusi rosaano isi ledo loosse hagiidhitu gede hagiidhitannoha ikkiro, atino soqqamaasinchu Phaawuloosi yiinore yaa dandaatto; isi togo yiino: ‘[Ninke] hagiidhitinanni gede ledoˈne loonseemmoreeti.’—2 Qor. 1:24.