‘Baatto Ragiˈrate’ Qixxaawootto?
BAALUNKU Yesuusi kulino hexxo quqquxamme agadhineemmo; isi “Jooguullu baˈraadhinoreeti; baattono ragidhannona” yiino. (Mat. 5:5) Buurantinori iima Yesuusi ledo mootoolla ikkite gashshite uulla ragidhanno. (Aju. 5:10; 20:6) Xaa yannara noohu rooru addu Kiristaani baatto ragiˈranno; hattono guuta ikke, keere afiˈrenna hagiidhanni hegerera heeˈranno. Konnira insa loosa hasiissannonsahu batinyu loosi no. Hanni konni loosi giddo sase laˈno: Uulla biifisa, reyotenni kaˈinore towaatanna insa rosiisa. Qoleno konne looso loosa halchattota leellishate xaa yannara nafa maa assa dandaattoro laˈneemmo.
UULLA BIIFISATE QIXXAAWOOTTO?
Yihowa manna ‘ille ilamme baatto woˈme; baattono kiˈne gashshitinannita ikkito’ yii woyite, isi gedensoonni uulla woˈma gannate ikkitannota coyiˈranni no. (Kal. 1:28) Uulla ragidhannori tenne umi hajajo wonshitanno. Edeni Gannate baˈino daafira insa ragiˈra hanaffannohu Gannate ikkitino uulla diˈˈikkino. Armagedooni oli gedensaanni uulla haaroonsate loonsannihu lowo loosi no. Kuni dishaaˈˈa loosooti!
Tini, Israeele Baabiloonete qafadonni higgu yannara loossino looso qaangeemmo gede assitannonke. Insa higginohu 70 diro woˈma mannu heeˈrinokki baattowaati. Ikkirono Isayaasi insa Yihowa kaaˈlonni baatto galagalte biifisa dandiitannota masaalino. Isi togo yee masaalino: “Halallimmase Edenete gedeeta, moolleseno Gannatete gedeeta asseemmo.” (Isa. 51:3) Yihowa kaaˈlonni Israeele baatto biifisa dandiitino. Hatteente gede uulla ragidhannori Yihowa kaaˈlonni uulla biifisa dandiitanno. Ati konni loosira kaaˈlama halchattota xa nafa leellisha dandaatto.
Tenne assa dandaattoti mitte doogo quwa saittokkinni minekkinna qooxeessakki biifisseeti. Qachikki manni hatto assannokkiha ikkiro nafa ati biifisiˈra dandaatto. Qoleno Gambooshshunna Jajjabbu Gambooshshi Addaraashuwa gatamara kaaˈla dandaatto. Dandaattoha ikkiro dano kalaqantanno woyite kaaˈlamate loosirano forme wonsha dandaatto. Konni garinni kaaˈlo hasiissannonsare kaaˈlate qixxaawoottota leellisha dandaatto. Ateneeto togo yite xaˈmi: ‘Yihowa haaro alame eˈˈeemmo gede fajjiero hakko horoonsiˈreemmoti rosa dandeemmoti wole dandoo no?’
REYOTENNI KAˈANNORE TOWAATATE QIXXAAWOOTTO?
Yesuusi Iyyairoosi qaaqqo reyotenni kayisanni heeˈrenni ittannore uyinannise gede hajajino. (Maq. 5:42, 43) Tonaa lamu diri qaaqqora sagale aa lowo looso diˈˈikkitino. Kayinni hanni Yesuusi ‘waammate giddo noori huurosi macciishshite’ fultannota kulino hexxo woˈmitanno woyite mageeshshi loosi heeˈrannoro hedi. (Yoh. 5:28, 29) Qullaawu Maxaafi mitto mittonka coye tittire kulannokkiha ikkirono, reyotenni kaˈannori sagale, uddanonna mine afidhanno gede kaaˈla hasiissannonketa heda dandiineemmo. Insa kaaˈlate qixxaawoottota xa nafa leellisha dandaatto. Hanni xa assa dandaattoha mito coye laˈno.
Uulla ragiˈrate qixxaawoottota leellishate xaa yannara maa assa dandaatto?
Woradu aliidi laˈˈaanchi songoˈne towaatara daannota kullanni woyite iso wosinchimma adha hasiˈrattota kulatto? Beeteelete soqqantannori qanchoho soqqantanno gede assinanni woyite woy woradu aliidi laˈˈaanchi, woradu looso loosa aguranno woyite insa heedhanno mine afidhanno gede kaaˈla dandaatto? Qooxeessikkira qoqqowu woy baxxino gambooshshi heeˈranno woyite gambooshshu hanafara albaanninna gambooshshu gedensaanni umikki fajjonni soqqama woy gambooshsheho daanno wosina anga fante haaˈra dandaatto?
REYOTENNI KAˈANNORE ROSIISATE QIXXAAWI
Soqqamaasinete Looso 24:15 kultanno garinni lowo biliyoone ikkanno manni reyotenni kaˈˈannota heda dandiineemmo. Konni manni giddo rooru reyara albaanni Yihowa daafira rosate faro diafiˈrino. Insa reyotenni kaˈuhu gedensaanni Yihowa daafira rosate faro afidhanno. a Ammanantinorinna woˈnaalshu noonsari Maganu soqqamaano insa rosiisate looso loossanno. (Isa. 11:9) Awuroppaho, Wodiidi Ameerikiranna Afirikaho heeˈranno mannira sabbakkinoti Sharlooti yinanni rodoo tenne quqquxante agadhitannota coyidhino. Ise hagiirrunni togo yitino: “Reyotenni kaˈˈanno manna rosiisate quqquxameemma. Alba heeˈrino manchi daafira nabbaweemma woyite duucha woyite togo yee hedeemma: ‘Kuni manchi Yihowa daafira rosinoha ikkoommero heeshshosi togoota diˈˈikkitanno.’ Reyotenni kaˈˈanno mannira insa affinokkiha lowo coye kulammansara quqquxameemma.”
Wole agurina Yesuusi uullara daara albaanni Yihowara ammanante heedhino soqqamaanosi nafa lowori rossannori no. Hanni Daanieelira, tirose afikkinni borreessino masaalo woˈmitino gara xawise kula mageeshshi qoossootiro hedi! (Dan. 12:8) Woy Ruutiranna Naaoomira, Buuraminohu dayinohu insa maate sirchi widoonni ikkinota kula mageeshsha hagiirsiissannoro hedi. Xa nooti busha alame waaddunkekkinna hedonke bebbeehantanno gede assitukkinni alame woˈmate loonsanniha rosiisate looso loosa lowo geeshsha hagiirsiissanno!
Reyotenni kaˈˈanno manna rosiisate qixxaawoottota leellishate xaa yannara maa assa dandaatto? Tenne assa dandaattoti mitte kaajja doogo rosiisate dandookki woyyeessiˈrate; hattono xaa yannara loonsanni heeˈnoonniha alamete doyichoha sabbakate looso ganyite loosate. (Mat. 24:14) Xaa yannara geedhimma woy wolu coyi hasiˈrootto geeshsha soqqamattokki gede assihero nafa, soqqamate sharramakki reyotenni kaˈannore rosiisate qixxaawoottota leellishshanno.
Addanko aante noo xaˈmuwa heda lowo geeshsha hasiissannote. Addinta uulla ragiˈrate quqquxamatto? Uulla biifisate, reyotenni kaˈannore towaatatenna insa rosiisate quqquxamatto? Xa loonsanni heeˈnoonniha hatte yannara loonsanni gedee looso loosate afiˈritto faro baala horoonsidhe hatte yannara qixxaawoottota leellisha dandaatto!
a Wocawaaro 2022te Agarooshshu Shaera fulinoha “Lowo Manna Rosiise Halaalu Widira Qola” yaanno birxicho lai.
