1. Abirihaami Yihowa uyinosi hexxo addaxxasi garankolla yineemmohu mayiraati?

 YIHOWA jaalisi Abirihaamira baattote aana noo manni baalunku sirchisi widoonni maassamannota kule qaale einosi. (Kal. 15:5; 22:18) Abirihaamira kaajjado ammana noosi daafira Maganu eino qaale wonshannota ammanino. Isira 100 diro minaamasira kayinni 90 diro ikkinoseha ikkirono, kuri ammanamino minaanninna minaama ooso diꞌꞌilino. (Kal. 21:1-7) Ikkirono Qullaawu Maxaafi, Abirihaami “‘Sirchikki . . . batiꞌranno’ yinoonninte gede lowo gosa anna” ikkannota ammaninota kulanno. (Rom. 4:18) Abirihaami hexxo woꞌmitinota anfoommo. Isi lowo diro agadhe keeshshino beetti Yisihaaqira anna ikkino. Abirihaami Yihowa eino qaale wonshannota addaxxanno gede assinosiri maati?

2. Abirihaami Yihowa eino qaale wonshannota addaxxinohu mayiraati?

² Abirihaamira Yihowa ledo muli jaaloomi noosi daafira, “Maganu uyino hexxo wonshannoha ikkinota seekke buuxino.” (Rom. 4:21) Abirihaami Yihowa hagiirsiisino; hattono ammana noosi daafira Yihowa iso keeraanchoho yiinosi. (Yai. 2:23) Roomu Sokka 4:18 kultanno garinni Abirihaamira ammananna hexxo noosi. Hanni xa Roomu Sokka fooliishsho 5te soqqamaasinchu Phaawuloosi hexxote daafira mayinoro laꞌno.

3. Phaawuloosi hexxote daafira mayino?

³ Phaawuloosi ‘hexxonke irraawissannonkekkita’ addaxxa dandiineemmohu mayiraatiro xawise kulino. (Rom. 5:5) Qoleno  hexxonke kaajjishiꞌra dandiineemmohu hiittoonniitiro huwanteemmo gede kaaꞌlinonke. Roomu Sokka 5:1-5 noo hedo xiinxallineemmo woyite, hexxokki yannate kiiro kaajjishiꞌra dandaatto gara hedi. Kuni birxichi hexxokki albinni roore kaajjishiꞌra dandaattohu hiittoonniitiro huwatatto gede kaaꞌlannohe. Hanni balanxe Phaawuloosi “diꞌꞌirraawissannonke” yee coyiꞌrinote dhagge ikkitanno hexxonke daafira laꞌno.

4. Roomu Sokka 5:1, 2te mayi daafira kulloonni?

⁴ Roomu Sokka 5:1, 2 nabbawi. Phaawuloosi tenne hedo borreessinohu Roomaho heedhanno songoraati. Hakko heedhanno roduuwi Yihowanna Yesuusi daafira rossino, ammana noonsata leellishshino hattono Kiristaana ikkitino. Ammana noonsa daafira Maganu insa keeraanote gede asse lainonsa hattono qullaawu ayyaaninni buurinonsa. Addanko insa huluullissannokkita dhagge ikkitanno hexxo afidhino.

5. Buuramino Kiristaanira noonsa hexxo hiittenneeti?

⁵ Phaawuloosi gedensoonni Efesooni heeꞌrannohu buuramino Kiristaanira Maganu uyinonsa hexxo daafira borreessino. Tenne hexxo giddo mitte ‘qullaawu manni ragiꞌranno iqqaati.’ (Efe. 1:18) Qoleno Phaawuloosi Qolasiyaasi heeꞌranno Kiristaanira hexxonsa woꞌmitannota ikkitinota xawisino. Isi tenne hexxo, “gordoho qixxaabbe [nooꞌnete]” yiino. (Qol. 1:4, 5) Buuramino Kiristaanira noonsa hexxo reyotenni kae iima hegerera heeꞌrate; insa hakko Kiristoosi ledo gashshitanno.—1 Tes. 4:13-17; Aju. 20:6.

6. Mittu buuramino rodii hexxosi daafira mayino?

⁶ Buuramino Kiristaani tenne hexxo lowori gede asse laꞌꞌanno. Insa giddo mittu Roduu Firederiki Firaanzi tenne hexxo daafira togo yiino: “Hexxonke huluullammannire diafidhino; qoleno 144,000 wido ikkinoommori baalunku Maganu uyinonke hexxo ragiꞌneemmo. Afiꞌneemmo baꞌraaꞌri xa noonke coye lowo geeshsha roorannoho.” Lowo diro Maganoho ammaname soqqamihu gedensaanni  Roduu Firaanzi 1991nni togo yiino: “Xaano hexxonke lowo geeshsha naandeemmo. . . . Hexxonke woꞌmitanno yanna agadhine keeshshinummo kiiro tenne hexxo albinni roore naandeemmo. Hexxonke woꞌmita geeshsha lowo miliyoone diro agadha hasiissannonkeha ikkiro nafa hatto assanke gaabbissannota diꞌꞌikkitino. Hexxonke albinni roore naadeemmo.”

7-8. Roore Yihowa soqqamaanora noonsa hexxo hiittenneeti? (Roomu Sokka 8:20, 21)

⁷ Xaa yannara noohu Yihowa magansiꞌrannohu rooru mannira wole hexxo noonsa. Tini Abirihaamira noosite Maganu Gashshooti yannara uullate aana hegerera heeꞌrate hexxooti. (Ibi. 11:8-10, 13) Phaawuloosi tini hexxo noonsa manni afiꞌrannohu dhagge ikkanno atooti daafira borreessino. (Roomu Sokka 8:20, 21 nabbawi.) Umo Qullaawu Maxaafi kulannote albillittete hexxo daafira rositto woyite roore baxissinoheti hiittenneeti? Barrunni mitto barra cubbu nookkiha guuta ikkite heeꞌrattota kultanno hexxootinso shiiꞌrootto manni reyotenni kae gannate ikkitanno uullara heeꞌrannota kultanno hexxooti? Hexxo uyinohu Magano ikkino daafira quqquxante agadhattohu dhagge ikkannohu batinyu coyi no.

⁸ Hegere heeshsho afiꞌneemmohu iima woy uullate aanano ikkiro, hagiidhineemmo gede assitannonketi dhagge ikkitanno hexxo noonke. Qoleno hexxonke albinni roore kaajjishiꞌra dandiineemmo. Phaawuloosi aane borreessinori hexxonke kaajjishiꞌra dandiineemmo gara huwanteemmo gede kaaꞌlannonke. Hanni isi hexxonke daafira mayyee borreessinoro laꞌno. Hatto assanke hexxonke albinni roore kaajjado ikkitannotanna irraawissannonkekkita addaxxineemmo gede assitannonke.

9-10. Phaawuloosi kulinonte gede Kiristaanaho mayi iillansara dandaanno? (Roomu Sokka 5:3) (Misillano lai.)

⁹ Roomu Sokka 5:3 nabbawi. Phaawuloosi qarru amadannonke woyite hexxonke roore xabbe leeltannota coyiꞌrino. Tini dhagge  ikkitankera dandiitanno. Isinni baalante Kiristoosi harunsaanora qarru iillannonsata anfoommo. Hanni Phaawuloosi lawishsha laꞌno. Isi Teselonqe heeꞌranno Kiristaanira togo yiino: “Kiꞌne ledo heeꞌnoommo woyiteno qarru iillannonketa balanxe kulloommoꞌne. Yinoommo coyino ikkino.” (1 Tes. 3:4) Qoleno isi Qorontoosi heeꞌranno Kiristaanira togo yee borreessino: “Roduuwaꞌya . . . amadinonke qarri hiittoohoro affinara hasiꞌneemmo. . . . Lubbotenni heeꞌrate hexxo nafa baꞌinonke.”—2 Qor. 1:8; 11:23-27.

¹⁰ Xaa yannara heeꞌranno Kiristaanirano mitu qarri iillannonsa. (2 Xim. 3:12) Aterano Yesuusa ammanoottohuranna iso harunsa hanafootto daafira qarru iillinohe? Jaallakkinna fiixikki qacifatinoheha ikkara dandaanno. Insa beebba assidhinoheha nafa ikkara dandaanno. Baalunku coyira ammanamate murciꞌrootto daafira loosu bayicho qarru iillinohe? (Ibi. 13:18) Hexxokki wolootaho kulootto daafira gashshaano gibbinohe? Iillannonke qarri ikkihano ikkiro Phaawuloosi hagiidha hasiissannonketa kulino. Mayira?

11. Iillannonke qarra baala dandiine saꞌꞌate murciꞌra hasiissannonkehu mayiraati?

¹¹ Cinca dancha guma abbitannota anfoommo daafira qarru iillannonke woyite hagiidha dandiineemmo. Roomu Sokka 5:3 “qarrunni cinca afiꞌneemmo” yitanno. Baalunku Kiristaanira qarru iillannonsa; hakko daafira baalunku Kiristaani cinca hasiissannonsa. Iillannonke qarri ikkihano ikkiro cincate murciꞌra hasiissannonke. Hexxonke woꞌmitanna laꞌꞌa dandiineemmohu cincinummoro callaati. Yesuusi carete aana uwino wixinni lawisino manni gedeere ikka dihasiꞌneemmo. Insa umi qara qaale hagiirrunni macciishshite adhitino; “qarrunna xiiwama” iillitunsata kayinni gufidhino. (Mat. 13:5, 6, 20, 21) Qarru woy dartu hagiirsiisannokkiti egennantinote; kayinni qarra cincine saꞌnummoro kiirre tunqannikki atoote afiꞌneemmo. Ma garinni?

12. Qarra cince saꞌꞌanke kaaꞌlitannonkehu hiittoonniiti?

¹² Soqqamaasinchu Yaiqoobi qarra cince saꞌꞌa kaaꞌlitannonke gara luphi asse kulino. Isi togo yee borreessino: “Cincatenni kaajjaꞌne mitturino xeiꞌnekkinni guutanna woꞌma manna assitannoꞌneta ikkito.” (Yai. 1:2-4) Yaiqoobi cinca kaaꞌlitannori noota coyiꞌrino. Cinca albinni roore kaajjite uurrattoha, ammana noohehanna Magano addaxxattoha ikkatto gede kaaꞌlitannohe. Ikkirono cincinummoro wole atooteno afiꞌneemmo.

13-14. Cinciniro afiꞌnanni gumi maati? Tini hexxote ledo mayi xaadooshshe afidhino? (Roomu Sokka 5:4)

¹³ Roomu Sokka 5:4 (NW) nabbawi. b Phaawuloosi cincinummoro ‘Magano hagiirsiinseemmota’ coyiꞌrino. Hatto yaa kayinni fonqolu woy qarru iillinonke daafira Yihowa hagiidhanno yaa diꞌꞌikkino. Maganu hagiidhannohu ati qarra cincite ammanante saootto daafiraati. Qarra cincine saꞌneemmo woyite Yihowa hagiidhannota afanke lowo geeshsha jawaachishshannote!—Far. 5:12.

¹⁴ Abirihaami qarra dandee sainotanna Yihowa hagiirsiisinota qaagi. Yihowa iso jaalasi assiꞌrinosi; hattono keeraanchoho yiinosi. (Kal. 15:6; Rom. 4:13, 22) Yihowa ninkeno jaallasi assiꞌrankeranna keeraanote gede asse laꞌꞌankera dandaanno. Yihowa hagiidhannohu isira soqqammanni lowo looso loonsoommohura woy lowo qoosso noonke daafira diꞌꞌikkino. Isi hagiidhannohu cincine isira ammanammoommo daafiraati. Dirinke, heeꞌnoommo gari, woy dandoonke ikkitutano ikkituro ninke baalunku cinca  dandiineemmo. Xaa yannara Yihowara ammanante iillannohe qarra dandiite saꞌanni nootto? Hatto ikkiro Yihowa hagiirsiissanni noottota deꞌooti. Magano hagiirsiinsoommota afanke lowo geeshsha kaaꞌlitannonke. Tini hexxonke kaajjishshanno.

15. Phaawuloosi wole hiittenne hedo coyiꞌrino? Tini mito manna gurcheessitara dandiitannohu mayiraati?

¹⁵ Phaawuloosi kulinonte gede qarra cincine saꞌnummoro Yihowa hagiirsiinseemmo. Phaawuloosi aane yiinore wodanchi; isi togo yiino: “Magano hagiirsiinsummoro kayinni hexxo afiꞌneemmo; hexxono diꞌꞌirraawissannonke.” (Rom. 5:4, 5, NW) Tini mito manna gurcheessitara dandiitanno. Mayira? Korkaatuno aleenni Roomu Sokka 5:2 kulloonninte gede, Phaawuloosi Roomaho heeꞌranno Kiristaanira wonanni ‘Maganu ayirrinye gutamate hexxo’ noonsata qummi assino. Hakko daafira mitu manni, ‘Kuri Kiristaanira wonanni hexxo noonsaha ikkina Phaawuloosi hexxo jeefote galagale kulinohu mayiraatiyya?’ yee xaꞌmannoha ikkara dandaanno.

16. Mittu manchi hexxo kaajjitanni hadhannohu hiittoonniiti? (Misillano lai.)

¹⁶ Hexxo lexxanni haꞌranno coye ikkinota hendeemmoha ikkiro, Phaawuloosi hatto yee coyiꞌrinohu mayyaateetiro huwata dandiineemmo. Lawishshaho mite yite Maganu Qaali giddo kulloonnita dhagge ikkitanno hexxo macciishshootto yanna qaagatto? Hatte yannara, uullate aana gannatete hegerera heeꞌra haaqete halchooti yite hedoottoha ikkara dandaanno. Ikkirono Yihowanna Qullaawu Maxaafi kulanno hexxo daafira albinni roore rossanni haꞌrittoti tini hexxo woꞌmitannota ikkitinota albinni roore ammanootto.

17. Heeshshokki Maganoho sayisse uyite cuuamittohu gedensaanni hexxokki kaajjitanni hadhinohu hiittoonniiti?

¹⁷ Heeshshokki Yihowara sayisse uyite cuuamittohu gedensaanni nafa, roore rossanninna ayyaanaamittetenni lophitanni haꞌrittota hexxokki albinni roore kaajjitino. (Ibi.  5:13–6:1) Roomu Sokka 5:2-4 kulloonniri halaale ikkinota umikki heeshshonni laoottoha ikkara dandaanno. Addi addi qarri iillinoheha ikkirono cincite saootto hattono Magano hagiirsiisootto. Magano hagiirsiisoottota afootto daafira isi eino qaale wonshannota albinni roore addaxxa dandaatto. Hexxokki albinni roore kaajjitino. Roore xabbe leeltinohe. Hexxokki heeshshokki baalantera kaaꞌlitinohe. Maatekki ledo dancha aante heedhannohe gede, dancha doorsha doodhatto gede, wole agurina yannakki danchu garinni horoonsiꞌratto gede assitinohe.

18. Yihowa maa buuxisinonke?

¹⁸ Soqqamaasinchu Phaawuloosi Magano hagiirsiinsummoro afiꞌneemmo hexxo daafira wole lowo geeshsha hasiissanno hedo kulino. Isi hexxonke woꞌmitannota buuxisinonke. Tenne huluullammeemmokkihu mayiraati? Phaawuloosi qullaawu ayyaani massageennasi Kiristaanaho tenne buuxisanni togo yiino: “Uyinoonninkehu Qullaawu Ayyaani widoonni Maganu baxilli wodaninkera woꞌminohura, hexxo diꞌꞌirraawissannonke.” (Rom. 5:5) Hexxonke woꞌmitannota addaxxineemmo gede assannonkehu ikkadu korkaati noonke.

19. Hexxokki lainohunni huluullamattokki coyi maati?

¹⁹ Yihowa Abirihaamira eino qaale, Abirihaami Iso hagiirsiisino garanna Yihowano Abirihaami jaalasi assiꞌrino gara hiinci. Abirihaami hexxo woꞌmitino. Qullaawu Maxaafi togo yaanno: “Abirihaamino cince agadhihu gedensaanni, Maganu uyinosi hexxo afiꞌrino.” (Ibi. 6:15; 11:9, 18; Rom. 4:20-22) Isi horo diꞌꞌirraawino. Atino Yihowara ammanante heeꞌrattoha ikkiro, hexxokki woꞌmiteenna baꞌraaꞌra afiꞌrattota addaxxa dandaatto. Hexxokki huluullammannire diafidhino; hagiidhatto gede assitannohe ikkinnina diꞌꞌirraawissannohe! (Rom. 12:12) Phaawuloosi togo yee borreessino: “Hexxoꞌne Qullaawu Ayyaani wolqanni lophitanno gede, hexxo aanno Magani ammaꞌnitinoonnisi daafira hagiirrenna keere wonshoꞌne.”—Rom. 15:13.