Muli yannara fultinota Agarooshshu Shae metseetta seekkite nabbawootto? Hanni aante noo xaꞌmuwara dawaro qolate woꞌnaali:

‘Wodaninke haarooꞌmanno’ gede assiꞌrate maa maa assa hasiissannonke? (Rom. 12:2)

Wodananke haaroonsiꞌrate dancha looso loosa calla diꞌꞌikkitino. Giddoyidi ayimmanke seekkine layiꞌranna dandiinummo deerrinni Yihowa biddishsha harunsate biddi assiꞌra hasiissannonkere baala biddi assiꞌra hasiissannonke.—w23.01, qoola 8-9.

Alamete ikkito laꞌneemmo woyite quwa saꞌneemmokkire ikkinoommota leellisha dandiineemmohu hiittoonniiti?

Yannankera ikkanni noori masaalo woꞌmitanno gede assanni noota afanke hagiirsiissannote. Muddamme kuni konneeti yaa mittimmanke baꞌanno gede assitanno; hakko daafira hasaawinke Yihowa dirijjite qixxeessitino borro aana xintaminoha ikka hasiissannosi. (1 Qor. 1:10)—w23.02, qoola 16.

Yesuusi cuuamanna rosaanosi cuuama mereero noo badooshshi maati?

Yesuusi Maganoho doorantino daga wido ikke ilamino daafira, ninke gede heeshshosi Yihowara sayise aa dihasiissannosi. Yesuusi guutahonna cubbu noosikkiho. Isi cubbu maaro ea dihasiissannosi.—w23.03, qoola 5.

Wolootu gambooshshunniwa dawaro qoltanno gede kaaꞌla dandiineemmohu hiittoonniiti?

Qolleemmo dawaro haranchu ikkituro, wolootuno dawaro qoltanno afidhanno. Qoleno duucha hedo coyiꞌneemmokki gede qorophineemmo. Hatto assinummoro wolootu dawaro qoltanno faro afidhanno.—w23.04, qoola 23.

Isayaasi 35:8 kulloonniti ‘Qullaawa Doogo’ maati?

Tini lawishshunniti jawa doogo Yihudootu Baabiloonetenni qaensa higginota leellishshannote. Xaa yannarana? Doogo qixxeessate looso loosa hananfoonnihu 1919 albaanni noohu lowo diri giddooti; lawishshaho batinye Qullaawa Maxaafa tirroonni hattono attammoonni. Maganu manni ayyaanaamittete gannate iillate ‘Qullaawa doogora’ haꞌranni keeshshino; tini Maganu Gashshooti abbanno atoote afiꞌnanni gede assitanno.—w23.05, gufo 15-19.

Lawishsha fooliishsho 9te lawishshunniti hiitti lame mancho amaaltino amaale kulloonni?

Lawishshi maxaafira, ‘hawanya mancho’ koyishshi jeennaate massannota, ‘addu hayyonni’ lawinsoonni mancho koyishshi kayinni ‘wodanchate doogowanna’ heeshshonniwa massannota kulloonni. (Law. 9:1, 6, 13, 18)—w23.06, qoola 22-24.

Maganu Looxira assinori, Isi umosi heeshshi assannohanna quwa saꞌꞌannokkiha ikkinota leellishannohu hiittoonniiti?

Yihowa Looxi Soddoomunni fule xooqe ilaalaamo qooxeessa haꞌranno gede hajajinosi. Looxi kayinni Zooaari heeꞌranno gede fajjasira eeggifate huucciꞌrita Maganu huucciꞌrinore fajjinosi.—w23.07, qoola 21.

Mitte minaama, minaannise teeda baꞌino misilla lairo maa assa dandiitanno?

Busha ise ikkitinokkita qaaga hasiissannose. Ise Maganu ledo noose jaalooma illachishanna qarru iillinsa woyite Maganuwiinni shesho afiꞌrino meentire kultannota Qullaawu Maxaafi xagge hiinca hasiissannose. Qoleno minaannise fonqolo ikkannosi coye qorophanno gede kaaꞌla dandiitanno.—w23.08, gufo 14-17.

Ammananke daafira xaꞌminanninke woyite wodancha awu afiinni qolleemmo gede kaaꞌlitannonkehu hiittoonniiti?

Xaꞌminanninke xaꞌmo wolootu mayite heddannoro afate kaaꞌlitannonke faro gede assine laꞌꞌa dandiineemmo. Tini awu afiinni qolate roore qixxaambeemmo gede assitannonke.—w23.09, qoola 17.

Jawaante afiꞌrate daafira Maariyaamiwiinni maa rosa dandiineemmo?

Buuraminoha iltannota kulliseta Maariyaami wolootu jawaachishshinose. Sokkaasinchu Gabirieelinna Elsaabeexi Qullaawa Borronni jawaachishshinose. Ninkeno ammanate roduuwinke jawaachishshannonke.—w23.10, qoola 15.

Yihowa huuccattonkera dawaro qolannohu hiittoonni ikkara dandaanno?

Isi huuccattonke macciishshannotanna huuccattonke isi hedinori ledo mayi xaadooshshe afidhinoro hedannota kule eino. (Erm. 29:12) Isi mittu gari huuccattora dawaro addi addi garinni qolara dandaanno; ikkirono isi woꞌmanka woyite kaaꞌlannonke.—w23.11, gufo 21-22.

Roomu Sokka 5:2 ‘hexxote’ daafira kulloonni; ikkina kiiro 4no hexxote daafira galagalle kulloonnihu mayiraati?

Mittu manchi halaale macciishshanno woyite, gannate ikkitanno uullara hegerera heeꞌrannota kultanno hexxo rosannoha ikkara dandaanno. Kayinni isira qarru iillannosi woyite, qarra cince saꞌꞌanno woyite hattono Magano hagiirsiisanno woyite hexxosi albinni roore kaajjitanno hattono xabbe leeltanno.—w23.12, gufo 12-13.