1-2. Annuwunna amuuwu oosonsa Maganunna Qullaawu Maxaafi daafira xaꞌmo xaꞌmituro ma assa hasiissannonsa?

 BATINYU manni ooso lossiꞌra shaaꞌꞌa looso ikkitinokkita ammananno. Ooso nooꞌneha ikkiro, insara kaajjado ammana heedhannonsa gede assate sharrantinanni daafira galanteemmoꞌne. (Mar. 6:6, 7) Oosoꞌne lophitanni hadhanno woyite ammananke daafiranna Qullaawu Maxaafi kulannohu amanyootu seeri daafira shota ikkitinokki xaꞌmuwa xaꞌmitara dandiitanno.

² Oosoꞌne xaꞌmo xaꞌmitino daafira umi qara yaaddinanniha ikkara dandaanno. Isinni togoo xaꞌmuwa xaꞌmitinohu ammana ajjinonsa daafiraati yitine heddinanniha ikkara dandaanno. Kayinni noore coyiꞌniro ooso lophitanni hadhanno woyite ammanansa kaajjishiꞌrate xaꞌmo xaꞌma hasiissannonsa. (1 Qor. 13:11) Hakko daafira waajjitinanni gede assannoꞌneri dino. Oosoꞌne ammanneemmo coyi daafira xaꞌmo xaꞌmitanno woyite, tenne faro horoonsidhine hedate dandoonsa lossidhanno gede kaaꞌlitinansara dandiitinanni.

3. Konni birxichira maa ronseemmo?

³ Konni birxichira annuwunna amuuwu (1) oosonsa ammanansa kaajjishidhanno gede, (2) Qullaawu Maxaafiha amanyootu seera albinni roore naaddanno gedenna (3) ammanansara gaarantanno gede kaaꞌla dandiitanno gara ronseemmo. Qoleno ooso xaꞌmo xaꞌma dancha ikkitinohu mayiraatironna annuwunna amuuwu oosonsa ledo ammananke daafira hasaawate hiittee hiittee faro horoonsiꞌra dandaannoro ronseemmo.

OOSOꞌNE AMMANANSA KAAJJISHIDHANNO GEDE KAAꞌLENSA

4. Oosoꞌne hiikkuri xaꞌmuwa xaꞌmitara dandiitanno? Mayira?

⁴ Kiristaana ikkitino annuwinna amuuwi Maganoho noonke ammana  raggetenni afiꞌnannita ikkitinokkita affino. Yihowara nooꞌne ammana ilantini woyitenni nooꞌneta diꞌꞌikkitino; oosoꞌnetino hattooti. Galte hosse oosoꞌne aante noo xaꞌmuwa xaꞌmitaꞌnera dandiitanno: ‘Maganu noota mayinni afeemmo? Isi addinta Qullaawu Maxaafi yaannore ammana dandiinanni?’ Isinni Qullaawu Maxaafi ‘woꞌma surrenke’ woy hedate dandoonke horoonsiꞌneemmo gedenna ‘baalanka coye fonqolle laꞌneemmo’ gede amaalannonke. (Rom. 12:1; 1 Tes. 5:21) Ikkina oosoꞌne ammanansa kaajjishidhanno gede kaaꞌla dandiitinannihu hiittoonniiti?

5. Annuwunna amuuwu oosonsa Qullaawu Maxaafira noonsa ammana kaajjishidhanno gede kaaꞌlate maa assa dandiitanno? (Rooma 12:2)

⁵ Oosoꞌne halaale uminsa buuxidhanno gede jawaachishshensa. (Rooma 12:2 nabbawi.) Oosoꞌne xaꞌmo xaꞌmitanno woyite, Yihowa Farciꞌraasineta Xiinxallote Kaaꞌlitanno Borro horoonsidhe xaꞌmuwansara dawaro afiꞌra dandiitanno gara leellishshensa. Tenne borrora “Qullaawa Maxaafa” yaanno gafi hunda “Maganu Ayyaaninni Borreessamino” yaannoha laꞌanno gede kultinansara dandiitinanni. Konni gafira Qullaawu Maxaafi mannu borreessinoha dancha maxaafa calla ikkikkinni “Maganu Qaale” ikkinota leellishshanno taje no. (1 Tes. 2:13) Lawishshaho oosoꞌne hunda heeꞌrinohu Asooru katami Nennewete daafira xiinxalla dandiitanno. Alba, mitu Qullaawu Maxaafi egennaammi Nennewete katama yinanniri horo dinooreeti yitanno. Ikkirono 1850nni kuni katami diigamino kinna baattote giddonni umme anfoonni; tini Qullaawu Maxaafi xagge halaale ikkase leellishshanno. (Sof. 2:13-15) Oosoꞌne Nennewete katami baꞌꞌasi Qullaawu Maxaafi masaalo woꞌmitanno gede assitinohu hiittoonniitiro afate, Bocaasa 2021te Agarooshshu Shaera fulinoha “Ati Tenne Afootto?” yaanno birxicho laꞌꞌa dandiitanno. Oosoꞌne borruwankenni rossinore Insayikilopiidiyu woy wole addaxxinanni borro yitannori ledo heewisiisse Qullaawu Maxaafi yaannore albinni roore addaxxitanno gede assannonsare huwattara dandiitanno.

6. Annuwunna amuuwu oosonsa hedate dandoonsa lossidhanno gede kaaꞌla dandiitannohu hiittoonniiti? Lawishsha kuli. (Misileno lai.)

⁶ Oosoꞌne hedate dandoonsa lossidhanno gede kaaꞌlensa. Annuwunna amuuwu Qullaawu Maxaafi daafira woy Magano ammanate daafira oosonsa ledo dancha gede hasaabbannoti addi addi faro noonsa. Donu mine daaꞌꞌattinanni woyite, paarke hadhinanni woyite woy Yihowa Farciꞌraasineta sinu biiro daaꞌꞌattinanni woyite tenne assa dandiitinanni. Lawishshaho, donu mine martine woy viidiyote widoonni daaꞌꞌattinanni woyite, oosoꞌne Qullaawu Maxaafi kulannori halaale ikkinota albinni roore ammantanno gede assitannonsata hundi xagge illachishshanno gede kaaꞌlensa. Oosoꞌne Moaabi Kincho yinannihu 3,000 diro ikkannosihu mittu kinchi  aana Yihowa suꞌmi noota affino? Hundihu Moaabi Kinchi Faransayete Paarisi yinanniwa mittu donu mini giddo no. Qoleno Niwu Yorkete Woorwiiki noote Yihowa Farciꞌraasinete qara biirora noohu “Qullaawa Maxaafanna Maganu Suꞌma” yaannohu doru mini giddo hundiha lawinse loonsoonnihu Moaabi Kinchi no. Konni kinchira noo borro Moaabi Moote Meesha Israeelete finqilinota kultanno. Qullaawu Maxaafino tenne daafira kulanno. (2 Mot. 3:4, 5) Oosoꞌne Qullaawu Maxaafi kulannori halaalenna addaxxinannire ikkinota leellishshanno taje uminsanni huwatturo, ammanansa albinni roore kaajjitanno.—2 Duduwo 9:6 ledo heewisiisi.

7-8. (a) Kalaqamu biinfillenna akeeka laꞌne maa rosa dandiineemmo? Lawishsha kuli. (Misileno lai.) (b) Oosoꞌne Kalaqaanchoho noonsa ammana kaajjishidhanno gede kaaꞌlitannonsa xaꞌmuwa hiikkuriiti?

⁷ Oosoꞌne Yihowa kalaqinori daafira heddanno gede jawaachishshensa. Baadiyye hadhinanni woyite woy addi addi muꞌro towaaxxitinanni woyite, oosoꞌne dhagge ikkannoha kalaqamu aana noo akeeka illachishshanno gede kaaꞌlensa. Mayira? Kuni akeeki hayyichu Kalaqaanchi noota leellishannoho. Lawishshaho, batinyu kalaqami aana qunqumadu suudi no; sayinsete fullahaano lowo diro tenne daafira xiinxallitanni keeshshitino. Sayinsete fullahaanchi Nikoola Faameli kalaqamu aana nooha konne suude kiirriro mitu suudi mittu gariha ikkinota huwantannita coyiꞌrino. Tenne kiiro Fibonaachi sikuweensi yinanni. Togoohu qunqumadu suudi duuchu kalaqami aana lawishshaho, mite gaalaakisera, qerqeꞌnete ogorira, muꞌrote daroranna suufete aana no. a

⁸ Oosoꞌne rosu mine sayinsete daafira rossanno woyite, kalaqamu seeri daafira rossanno. Lawishshaho, goshoonshete wolqa uulla gaangeessitino ayyare uullate qooxeessira heedhanno gede hattono dambalunna wuqiyaanoose heedhanno gede assitanno. Tini wolqa hooggoommero uullate aana heeshshote noo kalaqami diheeꞌranno. Kayinni baalanka coye gamba asse amadino seera fushshinohu ayeti? Kalaqamu konni garinni qinaawanno gede assinohu ayeti? Oosoꞌne kuri coyibba daafira seekkite heddu kiiro, baalanka coye kalaqinohu Magano ikkinota albinni roore ammana dandiitanno. (Ibi. 3:4) Hakkiinni insa togo yitine xaꞌma dandiitinanni: “Kalaqinonkehu Magano ikkiro, hagiirraamma ikkineemmo gede kaaꞌlannonkeha amanyootu biddishshano aannonke yine heda gara dilabbanno?” Togoohu kaaꞌlannonsa biddishshi Qullaawu Maxaafi giddo noota kultinansara dandiitinanni.

OOSOꞌNE QULLAAWU MAXAAFIHA AMANYOOTU SEERA ALBINNI ROORE NAADDANNO GEDE KAAꞌLENSA

9. Oosoꞌne Qullaawu Maxaafihu amanyooti seeri daafira xaꞌmitanno gede assannori maa ikkara dandaanno?

⁹ Oosoꞌne Qullaawu Maxaafihu amanyooti seeri kaaꞌlanno gara lainohunni xaꞌmo xaꞌmituꞌnero,  tenne xaꞌmo xaꞌmitinohu mayiraatiro wodanchate woꞌnaalle. Insa tenne xaꞌmo xaꞌmitinohu Qullaawu Maxaafihu amanyooti seeri gara ikkasi huluullantino daafiraatinso wolootu ledo hasaabbanno woyite ammanansara gaarantanno gara affinokkihuraati? Korkaatu ikkihano ikkiro, oosoꞌne ledo Hegerera Hagiidhitanni Heeꞌra Dandaatto! yaanno maxaafa xiinxallitine, insa Qullaawu Maxaafiha amanyootu biddishsha albinni roore naaddanno gede kaaꞌla dandiitinanni. b

10. Oosoꞌne Yihowa ledo noonsa jaaloomi daafira heddanno gede kaaꞌla dandiitinannihu hiittoonniiti?

¹⁰ Oosoꞌne Yihowa ledo muli jaalooma kalaqidhanno gede jawaachishshensa. Oosoꞌne ledo Qullaawa Maxaafa xiinxallitinanni woyite, Hegerera Hagiidhitanni Heeꞌra Dandaatto! yaanno maxaafira noo xaꞌmuwanna lawishshuwa horoonsidhine giddonsata fushshite kultanno gede assate woꞌnaalle. (Law. 20:5) Lawishshaho, roso 8 Yihowa kaaꞌlitannonkenna agartannonke amaale aannonke jaali gede assine kulloonni. Umi Yohaannisi 5:3 nabbabbine hasaabbinihu gedensaanni insa togo yitine xaꞌma dandiitinanni: “Yihowa togooha dancha jaalanke ikkina isi kulannonkere ma garinni laꞌꞌa hasiissannonke?” Tini xaꞌmo shota labbara dandiitanno; kayinni oosoꞌne Yihowa seera aannonkehu baxannonke daafira ikkinota huwattanno gede kaaꞌlitansara dandiitanno.—Isa. 48:17, 18.

11. Oosoꞌne Qullaawu Maxaafihu xintu seeri afiꞌrino horo huwattanno gede kaaꞌla dandiitinannihu hiittoonniiti? (Lawishsha 2:10, 11)

¹¹ Qullaawu Maxaafiha xintu seera loosu aana hosiisa kaaꞌlitanno gara hasaabbe. Mitteenni Qullaawa Maxaafa woy barru qummeeshsha nabbabbinanni woyite, Qullaawu Maxaafihu xintu seeri maateꞌne kaaꞌlino gara hasaabbe. Lawishshaho, oosoꞌne diinaggaawe loosanna ammanama kaaꞌlitanno gara huwattino? (Ibi. 13:18) Qoleno Qullaawu Maxaafiha xintu seera loosu aana hosiisa, fayyimmankeranna hagiirraamma ikkineemmo gede kaaꞌlitannonkehu hiittoonniitiro luphi assitine kultinansara dandiitinanni. (Law. 14:29, 30) Oosoꞌne ledo togoohu xintu seeri daafira kayissine hasaawaꞌne insa Qullaawu maxaafi amaale albinni roore naaddanno gede assitansara dandiitanno.—Lawishsha 2:10, 11 nabbawi.

12. Mittu anni qaaqqisi Qullaawu Maxaafiha xintu seera loosu aana hosiisa kaaꞌlitanno gara huwatanno gede assinohu hiittoonniiti?

¹² Faransayete heeꞌrannohu Istiivi yinanni rodiinna minaamasi, Eetaani yinanni qaaqqinsa Yihowa seera aannonkehu baxannonke daafira ikkinota huwatanno gede kaaꞌlitinosi gara coyidhino. Istiivi qaaqqonke togo yine xaꞌmineemmo yiino: “Yihowa konne xintu seera ayirrinsammora hasiꞌrannohu mayiraati? Kuni xintu seeri isi baxannonketa leellishannohu hiittoonniiti? Konne xintu seera loosu aana hosiisa hoogittoro mayi ikkara dandaanno?” Togoo hasaawi Eetaani Yihowa fushshinoha amanyootu seera albinni roore addaxxanno gede kaaꞌlinosi. Istiivi lede togo yiino: “Mixonke Eetaani Qullaawu Maxaafi giddo noo hayyo mannu hayyonni lowo geeshsha roortannota huwatanno gede kaaꞌlate.”

13. Annuwunna amuuwu oosonsa Qullaawu Maxaafiha xintu seera loosu aana hosiissanno gede qajeelsa dandiitannohu hiittoonniiti? Lawishsha kuli.

¹³ Oosoꞌne Qullaawu Maxaafiha xintu seera loosu aana hosiissanno gede qajeelsensa. Oosoꞌne rosu mine mitto maxaafa nabbabbanno gede kullanninsa woyite, tenne assitinanni faro afidhinara dandiitinanni. Konni maxaafira amanyoote bainore assannoha woy hanqo eemadhannokki manna danchu manni gede assine kulloonniha ikkara dandaanno. Oosoꞌne konni manni assoote Qullaawu Maxaafihu xintu seeri ledo heewisiisse laꞌanno gede jawaachishshensa. (Law. 22:24, 25; 1 Qor. 15:33; Fil. 4:8) Tini rosaano rosu mine konni maxaafinni nabbabbinori daafira  hasaabbanno woyite, oosoꞌne rosiisaanonsaranna ledonsa rossannorira farciꞌrate qixxaabbanno gede kaaꞌlitansara dandiitanno.

OOSOꞌNE AMMANANSARA GAARANTANNO GEDE KAAꞌLENSA

14. Wedellu Kiristaani xawisse kula waajjitanno coyi maati? Mayira?

¹⁴ Wedellu Kiristaani mito woyite ammanansara gaarama waajjara dandaanno. Insa rosu mine suutu soorro daafira rossanno woyite waajjitara dandiitanno. Mayira? Rosiisaanonsa suutu soorro halaaleho yite rosiissansara dandiitanno. Annuwanna amuuwa, oosoꞌne ammanansara gaaramate worbuulle ikkitanno gede kaaꞌla dandiitinannihu hiittoonniiti?

15. Mittu wedellichi ammaninori halaale ikkinota addaxxanno gede kaaꞌlannosiri maati?

¹⁵ Oosoꞌne ammantinori halaale ikkinota albinni roore addaxxitanno gede kaaꞌlensa. Oosoꞌne kalaqama lainohunni halaale affino daafira saala dihasiissannonsa. (2 Xim. 1:8) Mayira? Batinyu sayinsete egennaammino heeshsho dagginohu hedeweelcho ikkinokkita ammantanno. Insa kalaqamu lowo geeshsha xurqa ikkinota heddanno woyite, hayyichu kalaqaanchi noota huwattanno. Hakko daafira insa suutu soorro daafira rosiinsanni roso diammantanno. Oosoꞌne ammanate roduuwinsa heeshsho dagginohu kalaqante ikkinota ammantanno gede assinonsare hiincite, ammanansa kaajjishiꞌra dandiitanno. c

16. Annuwunna amuuwu oosonsa Kalaqaanchu noota ammantannohu mayiraatiro wolootaho xawisse kultanno gede kaaꞌla dandiitannohu hiittoonniiti? (1 Pheexiroosi 3:15) (Misileno lai.)

¹⁶ Oosoꞌne Kalaqaanchu noota ammantannohu mayiraatiro xawisse kultanno gede kaaꞌlensa. (1 Pheexiroosi 3:15 nabbawi.) Oosoꞌne ledo jw.org aana fulinoha “Wedellootu Xaꞌmitanno Xaꞌmo​—Kalaqamanso Suutu Soorro?”(Amaaru afoo) yaannoha aante aantete fulanno birxicho xiinxallaꞌne kaaꞌlitaꞌnera dandiitanno. Hakkiinni oosoꞌne Kalaqaanchu daafira halaale ikkinore wolootaho kulate roore ammansiissannote yite heddanno hajo mitteenni hasaabbe. Oosoꞌnera, ledonsa rossannori ledo heewisama hasiissannonsakkita qaagiissensa. Dancha gede hasaawa hasiꞌranno manchi heeꞌriro huwatate qarrisannokki garinni hasaawissanno gede jawaachishshensa. Lawishshaho, mittu rosaanchi “Ani laoommorella ammaneemmo; Magano qole lae diegennoommo” yaara dandaanno. Mittu wedellichi togo yee qolara dandaanno: “Hanni mannu  heeꞌrannokkiwa dubbu giddo hadhanni heedhe kinchunni seekkinoonnita mitte wayi bue laootto yine hendo. Hakka woyite mayite hedatto? Hatti wayi bale heeꞌrase seekkinohu noota leellishshannoha ikkiro, kalqete alame heeꞌrase kalaqinohu noota leellishshannota diꞌꞌikkitino?”

17. Annuwunna amuuwu oosonsa Qullaawu Maxaafi halaale kultanno faro hasidhanno gede kaaꞌla dandiitannohu hiittoonniiti? Lawishsha kuli.

¹⁷ Oosoꞌne Qullaawu Maxaafi halaale kultanno faro hasidhanno gede jawaachishshensa. (Rom. 10:10) Oosoꞌne ammanansa daafira wolootaho kulate assitannore, shiinqu qaaqqi uurre haꞌrate assannori ledo heewisiisa dandiinanni. Umi qara qaaqqu kaꞌne uurrinanni gara rosanno. Hakkiinni kae uurre haꞌra hanafanno. Hatteente gede mittu wedellichi ammanasi daafira wolootaho kulanno woyite, haranchore coyiꞌre hanafara dandaanno. Lawishshaho, ledosi rosanno rosaancho togo yee xaꞌmara dandaanno: “Maandisootu duucha woyite akeeka fushshitannohu kalaqama laꞌe ikkinota afootto? Hanni mitte dhagge ikkitanno viidiyo leellisheemmohena agari.” Hakkiinni Kalaqinohu No? yitannote aante aantete fultanno viidiyo giddonni mitte leellishihu gedensaanni togo yaara dandaanno: “Mannu ooso kalaqama laꞌe loossino coyira ayirrinye uyinanninsaha ikkiro, insa laꞌu kalaqami daafira ayirrinyu hasiisannosihu ayetiyya?” Togoohu haranchu hasaawi kuni rosaanchi Yihowa daafira roore afa hasiꞌranno gede kakkayisasira dandaanno.

OOSOꞌNE AMMANANSA KAAJJISHIDHANNO GEDE KAAꞌLA AGURTINOONTE

18. Annuwunna amuuwu oosonsa Maganoho noonsa ammana kaajjishidhanno gede, agurtukkinni kaaꞌla dandiitannohu hiittoonniiti?

¹⁸ Heeꞌnoommohu Yihowara ammana noonsakki manni batiꞌrino alameraati. (2 Phe. 3:3) Hakko daafira annuwanna amuuwa, oosoꞌne ledo Qullaawa Maxaafa xiinxallitinanni woyite, insa Maganu Qaalenna amanyootu biddishshasi albinni roore ayirrissanno gede kaaꞌlitannonsa birxichuwa xiinxallitanno gede jawaachishshensa. Oosoꞌne Yihowa kalaqino kalaqami daafira seekkite hedde, ammanansa kaajjishidhanno gede kaaꞌlensa. Qoleno dhagge ikkitannota woꞌmitinota Qullaawu Maxaafi masaalo huwattanno gede kaaꞌlensa. Wolu baalunkunni roore oosoꞌne ledo huuccatto assidhe; hattono insa daafira huucce. Hatto assitiniro, oosoꞌne ammanansa kaajjishidhanno gede kaaꞌlate assitinannire Yihowa maassiꞌrannoꞌneta addaxxa dandiitinanni.—2 Dud. 15:7.