1. Mitootu hegerera heeꞌrate daafira mayite heddannoha ikkara dandaanno?

 BATINYU manni fayyimmansa agadhate itanno sagale qorophanno hattono ganye ispoorte loosanno. Ikkirono insa hegerera heeꞌneemmo yite diheddanno. Geedhimma abbitanno qarri yaachishanno daafira, hegerera heeꞌneemmo yine hexxa ikkannokkire labbara dandiitanno. Ikkirono Yesuusi Yohaannisi 3:16 nna 5:24 “hegere heeshsho” afiꞌra dandiinannita kulino.

2. Yohaannisi fooliishsho 6 hegere heeshsho daafira mayitanno? (Yohaannisi 6:39, 40)

² Mitto barra Yesuusi maalaletenni lowo kume ikkanno mannira daabbonna qulxuꞌme itisino. a Tini dhaggete; ikkirono Yesuusi aane noo barra, roore dhagge ikkannore coyiꞌrino. Lowo manni iso hordofanni Galiilu baari mule nooha Qifirinaahoomi dayino; hakkiicho isi, mannu reyotenni kaꞌꞌanna hegere heeshsho afiꞌra dandaannota kulinonsa. (Yohaannisi 6:39, 40 nabbawi.) Hanni shiiꞌrootto jaallakkinna maatekki miilla hedi.Yesuusi coyiꞌrinori, batinyu manni reyotenni kaꞌꞌannotanna atino shiiꞌrootto mannino hegere heeshsho afiꞌra dandiitinannita leellishanno. Ikkollana Yesuusi Yohaannisi  fooliishsho 6 coyiꞌrinota wole hedo batinyu manni dihuwatino. Hanni isi mayinoro laꞌno.

3.Yohaannisi 6:51 kultanno garinni Yesuusi isiniiti daafira mayino?

³ Qifirinaahoomi noohu batinyu manni Yesuusi maalaletenni itisinsa woyite, hundi yannara Yihowa annuwansara menna uyinonsata qaaginoha ikkara dandaanno. Isinni Qullaawa Borro menna ‘iimi sagale’ yitanno. (Far. 105:40; Yoh. 6:31) Yesuusi menna aane rosiisanno rosira kaima asse horoonsiꞌrino. Mennu Maganu maalaletenni qixxeessino sagale ikkirono, tenne sagale itino manni gale hose reyino. (Yoh. 6:49) Yesuusi kayinni, isi “iiminni dirritinota halaalaancho sagale,” ‘Maganu aanno sagalenna’ “heeshsho uyitanno sagale” ikkinota coyiꞌrino. (Yoh. 6:32, 33, 35) Yesuusi mennunna isi mereero nooha qara badooshshe qummi assino. Isi togo yiino: “Gordunni dirritinoti heeshshote sagale aneeti. Tenne sagale itannohu baalu hegerera heeꞌranno.” (Yohaannisi 6:51 nabbawi.) Ayihudootu isi hatto yiita gurchaabbino. Yesuusi isonooto Maganu maalaletenni annuwansara uyino menna roortannote “iiminni dirritino” sagaleeti hiitto yaa dandaanno? Hakkiinni isi tini sagale “maalaꞌyaati” yiino. Isi hatto yiinohu mayyaateeti? Tenne xaꞌmora qollanni dawaro ninkeno banxeemmo mannino hegere heeshsho afiꞌneemmo gara leellishshanno daafira, dawaro afa hasiissannonke. Hanni Yesuusi hatto yiinohu mayyaateetiro laꞌno.

HEESHSHOTE SAGALENNA MAALASI

4. Mitoota Yesuusi coyiꞌrinori shorodhi assinonsahu mayiraati?

⁴ Yesuusi coyiꞌrinore macciishshanni noo manni giddo mitoota, isi “Tini sagale mannu ooso heeshshora yee eemmo maalaꞌyaati” yiita biso shorodhi assinonsa. Insara Yesuusi addu maalasi ittanno gede kulinonsaha lawinonsakka? (Yoh. 6:52) Yesuusi aane biso shorodhi assannoha wole coye kulanni togo yiino: “Manchi Beetti maala ita hoogginironna mundeesi aga hoogginiro heeshsho dinoꞌne.”—Yoh. 6:53.

5. Yesuusi mannu addu mundeesi aganno gede kulanni nooha diꞌꞌikkino yineemmohu mayiraati?

⁵ Nohi waro Maganu mannu mundee itannokki gede hajajino. (Kal. 9:3, 4) Gedensoonni Yihowa Israeelete uyino Seerirano insa mundee ittannokki gede hajajino. Mundee itannoha aye manchono shinanni. (Lew. 7:27) Yesuusino konne Seera ayirrisanno. (Mat. 5:17-19) Hakko daafira Yihudu manni addu maalasi itanno gede woy mundeesi aganno gede kulanni no yee heda ikkannokki coyeeti. Ikkirono Yesuusi konne rosaminokki coye coyiꞌrinohu mannu “hegere heeshsho” afiꞌranno gara rosiisateeti.—Yoh. 6:54.

6. Yesuusi maalasi itatenna mundeesi agate daafira coyiꞌrinore ma garinni huwata hasiissannonke?

⁶ Yesuusi rosiisara hasiꞌrinori maati? Yesuusi coyiꞌrinori lawishshu tiro afiꞌrinore ikkinoti egennantinote; isi hakkuyira albaanni Samaariyu mancho hasaawisi woyiteno lawishshu yaatto horoonsiꞌrino. Isi togo yiino: “Ani eemmo waa agannohu baalu kayinni horonta digooꞌranno; hatteentenni ani eemmosi wayi giddosinni burqitannota hegere heeshsho uyitanno buicho ikkanno.” (Yoh. 4:7, 14) b Yesuusi Samaariyu mancho buichote giddonni fulanno waa aggino daafira calla hegere heeshsho afidhannota kulanni nooha diꞌꞌikkino. Hatteente gede isi Qifirinaahoomi  gamba yiino mannira, insa addu maalasi itturonna mundeesi agguro hegere heeshsho afidhannota kulanni nooha diꞌꞌikkino.

YESUUSI LAMENTE YANNARA COYIꞌRINORI MEREERO NOO BADOOSHSHE

7. Mitu manni Yohaannisi 6:53te Yesuusi coyiꞌrino hedo daafira mayyaanno?

⁷ Ammaꞌno noonke yaannohu mitu manni Yesuusi Yohaannisi 6:53te maalasi itatenna mundeesi agate daafira coyiꞌrino hedo, Mootichu Hurbaati yannara assa hasiissanno coye leellishshanno yaanno. Insa hatto yitannohu Yesuusi Mootichu Hurbaati yannarano hattoo hedo coyiꞌrinohuraati. (Mat. 26:26-28) Insa, Mootichu Hurbaate ayirrisara gamba yaanno manni baalu timanna woyine qamasa hasiissannonsa yite heddanno. Hatto yee heda garaho? Diru kiiro alamete doyichora noohu lowo miliyoone ikkanno manni ledonke Mootichu Hurbaate ayirrisate gamba yaanno daafira, tenne xaꞌmo dawaro afa hasiissannote. Yohaannisi 6:53te noo hedonna Yesuusi Mootichu Hurbaati yannara coyiꞌrino hedo mereero noo badooshshe huwata hasiissannonke.

8. Yesuusi Qifirinaahoominna Mootichu Hurbaati yannara coyiꞌrinori mereero noohu mitu badooshshi maati? (Misileno lai.)

⁸ Hanni Yesuusi tenne lamente yannara coyiꞌrinori mereero noo badooshshe laꞌno. Umihunni, Yesuusi Yohaannisi 6:53-56 noo hedo coyiꞌrinohu mamooteetinna hiikkooti?  Isi tenne hedo coyiꞌrinohu 32 M.D. Galiilaho gamba yiinohu Ayihudete manniraati. Isi tenne coyiꞌrinohu Yerusaalamete Mootichu Hurbaate xintara mittu diri gate heeꞌreennaati. Layinkihunni, isi tenne hedo coyiꞌrinohu ayeooraati? Galiilaho isi coyiꞌrannore macciishshanni noo manni giddo rooru ayyaanaamittete coyinni roore maalaamittete hasattonsa illachishannoho. (Yoh. 6:26) Isinni, Yesuusi huwatate qarrisannore coyiꞌrita bayichonkonni iso ammana agurino. Rosaanosi giddonni mitu nafa iso harunsa agurtino. (Yoh. 6:14, 36, 42, 60, 64, 66) Tenne ikkito Yesuusi mittu diri gedensaanni yaano 33 M.D. Mootichu Hurbaate xinti woyite ikkinori ledo heewisiisi. Hatte yannara 11 ammanantino soqqamaasinesi isi ledo no; hatto yaa kayinni insa Yesuusi coyiꞌrinore woꞌmunni woꞌma huwattino yaa diꞌꞌikkino. Ikkirono Galiilaho noohu rooru manni gede ikkikkinni ammanantino soqqamaasinesi Yesuusi iiminni dayinoha Maganu Beetto ikkinota ammantino. (Mat. 16:16) Yesuusi insa “Kiꞌne qarriꞌya yannara anewiinni dibaxxitinoonni” yee galatinonsa. (Luq. 22:28) Kuni lamunku badooshshi calla, Yesuusi Yohaannisi 6:53te coyiꞌrinori Mootichu Hurbaati yannara assa hasiissannore leellishanno yee heda gara ikkitinokkita huwanteemmo gede kaaꞌlannonke. Tenne leellishannohu wolu badooshshino no.

YESUUSI COYIꞌRINORI ATENO KAAꞌLANNOHE GARA

9. Yesuusi Mootichu Hurbaati yannara coyiꞌrinori ayeoo kaaꞌlanno?

⁹ Yesuusi Mootichu Hurbaati yannara rosaanosira irsho nookki tima oye kuni maalaꞌyaati yaate yiino. Hakkiinni insara woyine oye, tini “qaalu gondoori mundeeꞌyaati yaate” yiinonsa. (Maq. 14:22-25; Luq. 22:20; 1 Qor. 11:24) Tini lowo geya hasiissanno hedooti. Haaro qaalu gondooro eꞌnoonnihu baalunku manni ledo ikkikkinni, ‘Maganu Gashshooti mootoolla ikkitannori ayyaanaamittete Israeele’ ledooti. (Ibi. 8:6, 10; 9:15) Soqqamaasine hakka woyite tenne huwattinokkiha ikkirono, mulenni qullaawu ayyaaninni buurantanno; hattono haaru qaalu gondoori wido ikkite iima Yesuusi ledo mookkanno.—Yoh. 14:2, 3.

10. Yesuusi Galiilaho coyiꞌrinorinna Mootichu Hurbaati yannara coyiꞌrinori baxxannohu ma garinniiti? (Misileno lai.)

¹⁰ Yesuusi Mootichu Hurbaati yannara coyiꞌrinohu ‘shiima hoshshara’ ikkinota wodanchi. Tenne shiima hoshshati umi gaamo, hakkawaro Yesuusi ledo nooreeti ammanantino soqqamaasinesiiti. (Luq. 12:32) Insanna gedensoonni tenne gaamo wido ikkitannori timanna woyine qamassanno. Insa iima Yesuusi ledo gashshitannoreeti. Yesuusi tenne yannara soqqamaasinesira coyiꞌrinori Galiilaho lowo mannira coyiꞌrinorinni baxxanno. Isi hakkiicho coyiꞌranni noohu lowo manniraati.

11. Yesuusi Galiilaho coyiꞌrinohu shiima gaamo daafira ikkinokkita mayinni anfeemmo?

¹¹ Yesuusi 32 M.D. Galiilaho hasaawisinohu rooru manni isi sagale aansara hasiꞌrannoho. Ikkirono isi insa sagaletenni roore kaaꞌlannore illachishshanno gede kulinonsa. Kuni coyi hegere heeshsho afidhanno gede assannonsaho. Qoleno Yesuusi reyitinori goofimarchu barra kaꞌe hegerera heedhannota coyiꞌrino. Isi gedensoonni Mootichu Hurbaati yannara assinte gede dooraminohu boodu manni daafira coyiꞌranni nooha diꞌꞌikkino. Hatteentenni isi coyiꞌranni noohu baalunku manni afiꞌranno atooti daafiraati. Isinni Yesuusi togo  yiino: “Tenne sagale itannohu baalu hegerera heeꞌranno; qoleno tini sagale mannu ooso heeshshora yee eemmo maalaꞌyaati.”—Yoh. 6:51.

12. Yesuusi coyiꞌrinorinni horo afiꞌrate maa assa hasiissanno?

¹² Yesuusi Galiilaho gamba yiinohu Ayihudete mannira konne atoote afiꞌrannohu baalanka manna ikkinota dicoyiꞌrino. Konne atoote afiꞌrannohu ‘gordunni dirritino sagale itannoho’ ammana noonsata leellishanno manna callaho. Ninke Kiristaanaho yaannohu batinyu manni Yesuusa ammannummoronna iso gatisaanchonke assine adhinummoro ganteemmo yee hedanno. (Yoh. 6:29) Ikkollana, Galiilaho gamba yiino manni giddo mitu umi qara Yesuusa ammaninoha ikkirono, gedensoonni iso agure haꞌrino. Mayira?

13. Yesuusita addu rosaano ikkate maa assa hasiissanno?

¹³ Galiilaho Yesuusi itisino manni giddo rooru isi hasidhannore uyinonsa daafira iso harunsino. Insa Yesuusi maalaletenni hursansara, sagale mulla aansara woy insa macciishsha baxannore rosiisansara hasidhino. Ikkirono Yesuusi isire addu rosaanosi ikkate tini calla guddannokkita leellishino. Yesuusi uullara dayinohu qaru korkaati, mannunnita maalaamittete hasatto wonshara diꞌꞌikkino. Insa Yesuusi rosiisinonsa roso baala macciishshite adhitenna hajajante ‘anewa amme’ yee koyisinonsa koyishsha adha hasiissannonsa.—Yoh. 5:40; 6:44.

14. Yesuusi maalinna mundee kaaꞌlitannonke gede ma assa hasiissannonke?

¹⁴ Yesuusi, isi coyiꞌrannore macciishshanni noo mannira ammana noonsata leellisha  hasiissannonsata luphi asse kulino. Insa tenne assa dandiitannohu ma garinniiti? Isi gedensoonni kakkalo asse shiqishanno maalisinna mundeesi afidhino wolqa ammanatenniiti. Togoo ammana Ayihudete mannira hasiissannote; xaa yannara ninkerano hasiissannonke. (Yoh. 6:40) Addanko, Yohaannisi 6:53 kulloonni garinni Yesuusi maalinna mundeesi kaaꞌlitannonke gede, wodo ammanneemmota leellisha hasiissannonke. Konne atoote lowo manni afiꞌra dandaanno.—Efe. 1:7.

15-16.Yohaannisi fooliishsho 6​tenni ronsoommohu kaaꞌlanno rosi hiikkonneeti?

¹⁵ Yohaannisi fooliishsho 6​te noo xagge ninkeno banxeemmo mannano lowo geeshsha kaaꞌlitanno. Tini xagge Yesuusi mannu oosora lowo geya hedannota leellishshanno. Isi Galiilaho heeꞌre dhiwantinore hursino, Maganu Gashshootire rosiisino hattono mannaho hasiissanno sagale uyino. (Luq. 9:11; Yoh. 6:2, 11, 12) Wolu baalunkunni roore “heeshsho uyitanno sagale” iso ikkinota rosiisino.—Yoh. 6:35, 48.

¹⁶ “Wolu geꞌreewi” wido ikkitinori dirunni mitte hinge ayirrinsannihu Mootichu Hurbaati yannara timanna woyine diqamassanno; qamasano dihasiissannonsa. (Yoh. 10:16) Ikkirono insano Yesuusi Kiristoosi maalinna mundeenni horo afidhanno. Insa horo afidhannohu kakkalosi afidhino waaga ammantannota leellishshannoha ikkirooti. (Yoh. 6:53) Timanna woyine qamassannori kayinni, haaru gondoori wido ikkitinotanna Maganu Gashshoote ragiꞌrate dooraantinota leellishshanno. Buurantinori woy wolu geꞌreewi widono ikkinummoro, Yohaannisi fooliishsho 6​te noo xagge ninke baalanka kaaꞌlitannonke. Tini xagge ammana noonketa leellisha hasiissannonketa luphi assite kultanno; hegere heeshsho afiꞌneemmohu hatto assineemmoha ikkirooti.