XIINXALLOTE BIRXICHO 48
FAARSO 97 Maganu Qaali Heeshshote Woranno
Yesuusi Maalaletenni Daabbo Batisinota Kultanno Xaggenni Ronseemmore
“Heeshsho uyitanno sagale aneeti. Anewa daannohu baalu horonta dihudiꞌranno.”—YOH. 6:35.
GUULCHO HEDO
Yesuusi daabbonna qulxuꞌme batise lowo mannira ikkitanno gede assinota kultannota Yohaannisi fooliishsho 6te noo xagge xiinxalline ronseemmore laꞌneemmo.
1. Hundi waro heeꞌrino mannira daabbo mageeshshi geeshsha hasiissannote?
HUNDI waro daabbo batinyu mannira qara sagaleeti. (Kal. 14:18; Luq. 4:4) Isinni daabbo rosantino sagale ikkitino daafira, mito woyite Qullaawu Maxaafi giddo baalanta sagale kulate “daabbo” yaanno qaale horoonsiꞌnoonni. (Mat. 6:11; Soq. 20:7)Qoleno Yesuusi lowo manni afinota lame maalale loosi woyite daabbo horoonsiꞌrino. (Mat. 16:9, 10) Tenne xagge giddo mitte Yohaannisi fooliishsho 6te kulloonni. Tenne xagge xiinxalline xaa yannara loosu aana hosiisa dandiineemmo roso huwanteemmo.
2. Lowo kume ikkanno mannira sagale hasiissinohu mamooteeti?
2 Yesuusi soqqamaasine sabbakkannowiinni higguta, Yesuusi insa ledo fooliishshiꞌrara yowolo gidde Galiilu Baara tayise saino. (Maq. 6:7, 30-32; Luq. 9:10) Insa Beetesaayidaho nooha mannu nookki qooxeessa hadhino. Ikkirono mulenni lowo kume ikkanno manni gamba yee insawa dayi. Yesuusi insara fiile dihoꞌlinonsa. Isi insara Maganu Gashshooti daafira rosiisinonsa hattono dhiwantinore hursino. Yanna hawarrituta Yesuusi rosaano kuni baalu manni afooho wodhannore mamiinni afiꞌranno yite yaaddu. Konni manni giddo mitoho boode sagale noonsaha ikkara dandaanno; insa giddo rooru kayinni qacha hadhe sagale hidha hasiissannonsa. (Mat. 14:15; Yoh. 6:4, 5) Ikkina Yesuusi ma assa ikka?
YESUUSI MAALALETENNI DAABBO BATISINO
3. Yesuusi soqqamaasinesi ma assitanno gede kulinonsa? (Misileno lai.)
3 Yesuusi soqqamaasinesira, “Haꞌra dihasiissannonsa; ittannore kiꞌne uyiyyensa” yiino. (Mat. 14:16) Hakkiicho 5,000 saꞌꞌanno labballi noo daafira tenne assa dandiinannire diꞌꞌikkino. Meentonna qaaqquulle mitteenni kiirreenna sagale hasiissanno manni 15,000 ikkara dandaanno. (Mat. 14:21) Hatte yannara Indiriyaasi togo yiino: “Onte hayixu timmanna lame shiimmaadda qulxuꞌme haaꞌrinohu mittu shiimu qaaqqi kowiicho no. Ikkollana kuni kageeshshi mannira hiitto ikke tuqanno?” (Yoh. 6:9) Hakkawaro hayixu timma buxanenna wolu manni itannote rosantino sagaleeti; hattono shiimmaadda qulxuꞌme maxinetenni mooshshinoonnita ikkitara dandiitanno. Ikkirono shiinqu qaaqqi haaꞌrino sagale konni mannira baalaho diꞌꞌikkitanno.
Yesuusi mannaho ayyaanaamitteteno maalaamitteteno hasiisannore wonshino (Gufo 3 lai)
4. Yohaannisi 6:11-13 noo xaggenni maa ronseemmo? (Misillano lai.)
4 Yesuusi konne lowo manna itisa hasiꞌrino daafira gaamo gaamo ikke hayissote ofollanno gede hajajino. (Maq. 6:39, 40; Yohaannisi 6:11-13 nabbawi.) Yesuusi tenne daabbonna qulxuꞌmera Annasi galatino. Tenne sagale Buicho Magano ikkino daafira iso galatasi garankolla. Callootinke woy mannu ledono heeꞌnummoro sagale intammora albaanni huuccatto assiꞌneemmo gede Yesuusi kaajja lawishsha ikkinonke. Hakkiinni Yesuusi mannaho sagale tuqinsanni gede assino; mannuno ite duuwino. Isinni mannu ite duuweenna sagale gattino; Yesuusi gattino sagale baꞌara dihasiꞌrino. Hakko daafira isi gamba assinanni gede kulino; hatto assinohu gedensoonni intara yee ikkikki digatino. Yesuusi noonke coye hayyotenni horoonsiꞌneemmo gede dancha lawishsha ikkinonke. Annuwanna amuuwa, tenne xagge oosoꞌne ledo xiinxalle; hattono huuccattote, wosina adhatenna shaqqille leellishate daafira maa rossinanniro hasaabbe.
Ateneeto, ‘Yesuusi lawishsha harunse sagale itammora albaanni huuccatto assiꞌreemmo?’ yite xaꞌmi (Gufo 4 lai)
5. Mannu Yesuusi hakko barra assinore lae ma assa hasiꞌrino? Yesuusi ma assiyya?
5 Mannu Yesuusi rosiisanno garanna loosino maalale lae lowo geeshsha dhagge assiꞌrino. Insa, Muse Maganu baxxino masaalaancho kayisannoꞌne yiinota affino daafira, ‘Hakku masaalaanchi Yesuusaati ikka?’ yite heddinoha ikkara dandaanno. (Mar. 18:15-18) Hatto ikkiro, isi baalante dagara hasiissanno sagale shiqisha dandaanno gashshaancho ikkanno yite heddinoha ikkara dandaanno. Hakko daafira ‘mannu Yesuusa amade moohisasira hedino.’ (Yoh. 6:14, 15) Yesuusi mannu moohisasira wodhiro Roomu gashshooti hunda noo Ayihudooti poletikira anga wodhanno. Isi hatto assinoni? Diassino. Qullaawu Maxaafi Yesuusi ‘albinsanni hoꞌle ilaala haꞌrinota’ kulanno. Hakko daafira Yesuusi wolootu moohissasira woꞌnaalturono poletikaho anga diwodhino. Isi kaajja lawishsha ikkinonke!
6. Yesuusi lawishsha harunsa hasiꞌneemmota leellisha dandiineemmohu hiittoonniiti? (Misileno lai.)
6 Hige wolootu maalaletenni sagale qixxeessineemmonsa gede woy dhiwantinore hursineemmo gede dixaꞌmitannonke; hattono moote woy gashshaancho assitankera woꞌnaala hooggara dandiitanno. Kayinni insa mirca tungeemmo gede woy danchare assanno yite heddino gashshaanchira halammeemmo gede xixxiibbankera dandiitanno. Ikkirono Yesuusi assinori digoꞌlinoho. Isi poletiku hajora anga diwodhino; isinni gedensoonni, “Gashshootiꞌya tenne alameha diꞌꞌikkino” yiino. (Yoh. 17:14; 18:36) Xaa yannarano Kiristaanu Yesuusi hedanno garinni hedatenna isi lawishsha harunsate sharramanno. Gashshootisira halammeemmo, farciꞌneemmo hattono kuni Gashshooti daara huucciꞌneemmo. (Mat. 6:10) Hanni galagalle Yesuusi maalaletenni daabbo batisinota kultanno xagge laꞌno; hattono tenne xaggenni wolere maa ronseemmoro laꞌneemmo.
Yesuusi Ayihudete woy Roomu poletikira anga wodha qorophe harunsaanosira lawishsha ikkino (Gufo 6 lai)
‘YESUUSI TIMMATENNI LOOSINO MAALALE TIRO’
7. Yesuusinna soqqamaasinesi maa assitino? (Yohaannisi 6:16-20)
7 Yesuusi lowo manna itisihu gedensaanni, rosaanosi yowolotenni Qifirinaahoomi higganno gede assino; isi kayinni moohisasira woꞌnaalino manna agure ilaala haꞌrino. (Yohaannisi 6:16-20 nabbawi.) Rosaano yowolo laaqidhanni heedheenna lowo bubbenna dambalu kai. Hakkiinni Yesuusi wayi aanaanni hige haꞌranni insawa dayi. Soqqamaasinchu Pheexiroosino wayi aanaanni haꞌranno gede kulisi. (Mat. 14:22-31) Yesuusi yowolo giddita bubbe uurritu. Rosaanosi dhagge assidhe, “Halaalinta ati Maganu Beettooti” a yitu. (Mat. 14:33) Ikkirono insa tenne maalalenna hakkuyira albaanni lowo manni noowa loosino maalale mereero noo xaadooshshe xaano diwodanchitino. Maarqoosi tenne daafira kulanni togo yiino: “[Soqqamaasine] dhagge assidhinohu Yesuusi timmatenni loosino maalale tiro huwattinokkihuraati; wodaninsa dillaawinohura xaano diwodanchitino.” (Maq. 6:50-52) Addanko, insa Yesuusi maalale loosanno gede Yihowa uyinosi wolqa diwodanchitino. Ikkirono Yesuusi mulenni maalaletenni batisino daabbo daafira coyiꞌrino; tennenni ninkeno kaajja roso ronseemmo.
8-9. Mannu Yesuusa hasinohu mayiraati? (Yohaannisi 6:26, 27)
8 Yesuusi itisino manni maalaamittete hasattonsa illachishino. Hiittoonni? Layinki barra kuni manni Yesuusinna soqqamaasinesi hadhinota afi. Hakko daafira Xibiriyaadoosinni daggino yowolla gidde Yesuusa hasanni Qifirinaahoomi haꞌrino. (Yoh. 6:22-24) Insa tenne assitinohu Maganu Gashshooti daafira macciishsha hasidheetini? Deeꞌni. Insa roore heddanni noohu maalaamittete hasiissannonsa daabbo daafiraati. Tenne mayinni anfeemmo?
9 Mannu Qifirinaahoomi mule Yesuusinni xaadi woyite mayi ikkinoro wodanchi. Yesuusi insa isiwa dagginohu maalaamittete sagale hasidhino daafira calla ikkinota xawise coyiꞌrino. Yesuusi insa ‘daabbo itte duubbinoha’ ikkirono hatti sagale baꞌannota ikkitinota kulinonsa. Isi ‘hegere heeshsho afiꞌnanni gede assitanno sagalera’ loosidhanno gede jawaachishinonsa. (Yohaannisi 6:26, 27 nabbawi.) Yesuusi Annisi tenne sagale aannonsata kulinonsa. Hegere heeshsho afiꞌnanni gede assitanno sagale no yaa dhagge ikkitara dandiitanno! Hegere heeshsho afiꞌnanni gede assitanno sagale hiittoote? Insa tenne sagale afiꞌra dandiitannohu hiittoonniiti?
10. Mannu rosa hasiissannonsahu ‘Magano hagiirsiisanno loosi’ hiikkonneeti?
10 Ayihudootu tenne sagale afiꞌrate loosa hasiissannonke loosi no yite heddinoha ikkara dandaanno. Insa Muse Seerira kulloonni ‘looso’ heddinoha ikkara dandaanno. Ikkirono Yesuusi, “Magano hagiirsiisanno loosi isi soyinoha ammanate” yiinonsa. (Yoh. 6:28, 29) “Hegere heeshsho” afiꞌrate Maganu soyinoha ammana hasiissanno. Isinni Yesuusi hakkuyira albaanni tenne daafira coyiꞌrino. (Yoh. 3:16-18, 36) Gedensoonni qole hegere heeshsho afiꞌrate maa assa hasiissannonkero lede kulino.—Yoh. 17:3.
11. Ayihudootu xaano sagale calla afiꞌra hasidhannota leellishshinohu hiittoonniiti? (Faarso 78:24, 25)
11 Kuri Ayihudooti Yesuusi ‘Magano hagiirsiisannohu’ haaru loosi daafira kulino roso ammante diadhitino. Insa iso “Laꞌne ammanneemmohe gede mayi malaate leellishattonke?” yite xaꞌmitino. (Yoh. 6:30) Insa annuwansa Muse waro menna ittinota coyidhino. (Neh. 9:15; Faarso 78:24, 25 nabbawi.) Xaano insa heddanni noohu sagalete daafira callaati. Insa Yesuusi mennunni lawinsoonnite ‘iiminni dirritinote halaalaancho sagale’ daafira kulinohu mayiraatiro nafa dixaꞌmitino. (Yoh. 6:32) Insa sagale calla illachishshino daafira Yesuusi rosiisansara hasiꞌrinoha ayyaanaamittete halaale dihuwattino. Ninke tenne xaggenni maa ronseemmo?
ROORE ILLACHISHA HASIISSANNONKE COYE
12. Yesuusi roore hasiisanno coyi maatiro leellishinohu hiittoonniiti?
12 Yohaannisi fooliishsho 6tenni lowo geeshsha hasiisanno roso ronseemmo. Roore illachisha hasiissannonkehu ayyaanaamittete coyeti. Yesuusi Sheexaanu fonqolisi woyite tenne hedo qummi assinota qaagi. (Mat. 4:3, 4) Qoleno isi Ilaalu Sibikatesi yannara ayyaanaamittete coye gooꞌrate daafira luphi asse kulino. (Mat. 5:3) Hakko daafira ninkeneeto togo yine xaꞌma dandiineemmo: ‘Heeꞌreemmo heeshsho maalaamittete hasattonni roore ayyaanaamittete hasatto wonshiꞌra hasiꞌreemmota leellishshanno?’
13. (a) Sagaletenni hagiidha soꞌro ikkitinokkihu mayiraati? (b) Qoropha hasiissannonke coyi maati? (1 Qorontoosi 10:6, 7, 11)
13 Maalaamittete hasiisannonke coyi daafira huucciꞌranna tenne hasattonke wonshiꞌne hagiidha soꞌro diafidhino. (Luq. 11:3) Diinaggaambe loonse itanna aga hagiidhinanni gede assitanno; qoleno ‘tenne uyinohu Maganoho.’ (Ros. 2:24; 8:15; Yai. 1:17) Ikkirono maalaamittete coye calla illachisha qoropha hasiissannonke. Soqqamaasinchu Phaawuloosi Kiristaanaho borreessinorinni tenne daafira ronseemmo. Isi hunda Israeelete iillinonsare lawishshaho Siina Ilaali mule ikkinore qummi assino. Isi Israeele ‘gawajjanno coye halchituhu gede Kiristaanuno hattoore halchannokki gede’ qorowisiisino. (1 Qorontoosi 10:6, 7, 11 nabbawi.) Israeele maalaamittete coye halchansa Yihowa maalaletenni qixxeessinonsa qixxaawo “gawajjanno coye” ikkitannonsa gede assitino. (Kir. 11:4-6, 31-34) Qoleno insa culkunni siitu misile seekkidhu woyite ittino, agino hattono sirbitino. (Ful. 32:4-6) Phaawuloosi 70 M.D. Yerusaalamenna qullaawu mini baꞌꞌara albaanni heeꞌrino Kiristaana qorowisiisate insa xagge kulino. Ninkeno heeꞌnoommohu tenne busha alame goofimarchi gambise noo yannara ikkino daafira, Phaawuloosi amaalino amaale illachisha hasiissannonke.
14. Qullaawu Maxaafi haaro alamera heedhanno sagale daafira mayyaanno?
14 Yesuusi “Techota barru sagale uyinke” yine huucciꞌneemmo gede rosiisinke woyite, “Fajjokki iima ikkitanni noonte gede, uullate aanano ikkito” yine huucciꞌneemmo gedeno rosiisinonke. (Mat. 6:9-11) Hatte yannara heeshsho hiittoota ikkitannoha lawannohe? Qullaawu Maxaafi Maganu fajjo uullate aana ikkitanno woyite dancha sagale afiꞌneemmotano kulanno. Isayaasi 25:6-8 kultanno garinni, Yihowa Gashshootira falakkinoti dancha sagale heedhanno. Faarso 72:16 togo yitanno: “Baatto gide laashshito; ilaallate aana jajju woꞌmo.” Konni gidinni baxatto sagalenna wole sagale loosiꞌrate quqquxamootto? Hatteeno agurranna woyine kaasidhe laalose ittanni hagiidha dandaatto. (Isa. 65:21, 22) Hakko heeꞌranno manni baalu kuri coyibbanni hagiidha dandaanno.
15. Albillitte reyotenni kaꞌannori maa rossanno? (Yohaannisi 6:35)
15 Yohaannisi 6:35 nabbawi. Yesuusi maalaletenni batisino daabbonna qulxuꞌme itino manni albillitte hiikkanno? Reyotenni kaꞌeenna insa giddo mitunni xaadattoha ikkara dandaanno. Insa reyitara albaanni ammana noonsata leellishshinokkiha ikkiro nafa reyotenni kaꞌara dandiitanno. (Yoh. 5:28, 29) Insa Yesuusi coyiꞌrinori afiꞌrino tiro rosa hasiissannonsa. Isi togo yiino: “Heeshsho uyitanno sagale aneeti. Anewa daannohu baalu horonta dihudiꞌranno.” Insa Yesuusita wodote kakkalo yaano isi heeshshosi insara sayise uyinota ammana hasiissannonsa. Hatte yannara reyotenni kaꞌꞌanno manniranna haaro alamera ilantanno oosora ayyaanaamittete roso rosiinsanni. Konne manna rosiisa lowo geeshsha hagiirsiissanno! Tenne assa sagale itatenni roore hagiirsiissanno. Addanko, hatte yannara roore assineemmohu ayyaanaamittete coyeeti.
16. Aananno birxichira maa ronseemmo?
16 Yohaannisi fooliishsho 6te noota gama xaggella ronsoommo; kayinni Yesuusi “hegere heeshsho” daafira lede rosiisino. Hakkawaro heedhino Ayihudooti Yesuusi rosiisino roso seekkite illachisha hasiissinonsa; ninkeno hatto assa hasiissannonke. Aananno birxichira Yohaannisi fooliishsho 6te noo xagge lende xiinxallineemmo.
FAARSO 20 Baxatto Beettokki Oottonke
a Tenne maalaꞌlissanno xagge daafira ledde afate, Yesuusi—Heeshshote Doogotenna Halaaleho (Amaaru Afoo) yaanno maxaafa qoola 131 nna Ammanatenni Insa Faale Hadhe yaanno maxaafa qoola 185 lai.
