1-2. Wiꞌlineemmo gede assannonkeri maati?

 NINKE baalunku wiꞌlineemmo woyiti no. Lowo geeshsha hagiidhineemmo woyite wiꞌlinammora dandiineemmo. Lowo geya hasiise noonkere afiꞌneemmo woyite lawishshaho qaaqqo illeemmo woyite, lowo geeshsha hagiirsiisannonke coye qaangeemmo woyite hattono lowo diro xaande egenninoommokki jaalinkenni xaandeemmo woyite wiꞌlinammora dandiineemmo.

² Ikkirono duucha woyite wiꞌlineemmohu xissiisiꞌnoommo daafiraati. Lawishshaho mittu manchi lowo geya xissiisinkero wiꞌlinammora dandiineemmo. Lowo geya dhiwamme keeshshinoommo daafira buuto xissiisiꞌnummoro woy shiiꞌne dadillinummorono wiꞌlinammora dandiineemmo. Togoo woyite, Baabiloonootu Yerusaalame huntu woyite Ermiyaasi xissiisiꞌri gede ikkine xissiisiꞌnammora dandiineemmo. Ermiyaasi togo yiino: “Illeꞌyanni hindiiddo xashshimma lolakkanno. . . . Hindiiddoꞌya uurritannokki buicho gede ikkite lolakkanno.”—Erq. 3:48, 49.

3. Yihowa soqqamaanosi qarrantanna laꞌꞌanno woyite hiitto ikkanno? (Fulo 3:7)

³ Yihowa yaachishanno coyi tuncu yeennanke mageeshshi geya hindiidiꞌnoommoro afanno. Qullaawu Maxaafi isi soqqamaanosira iillannonsaha xissiisanno coye baala afannotanna kaaꞌlannonke gede raarreemmo raare macciishshannota buuxisannonke. (Far. 34:15) Ikkollana Yihowa tenne asse calla diaguranno. Mittu baxillaanchu anni gede, oososi wiꞌlitanna  laꞌꞌanno woyite xissiisiꞌranno hattono insa kaaꞌlate quqquxamanno.—Fulo 3:7 nabbawi.

4. Mitu Qullaawu Maxaafi lawishshinni Yihowa hedo daafira maa ronseemmo?

⁴ Yihowa Qaalisi giddo soqqamaanosi wiꞌlitu woyite maa assinoro kulino. Haanna, Daawitinna Moote Hiziqiyaasi xagge xiinxalline tenne wodancha dandiineemmo. Insa wiꞌlitanno gede assinonsari maati? Insa kaaꞌlannonsa gede Yihowawa higge raartuta isi ma assino? Dadillunni kainohunni, kaandoonninke daafira, woy hexxo mudhinoommo daafira wiꞌlineemmo woyite insa lawishshi sheshifachishannonkehu hiittoonniiti?

DADILLINEEMMO WOYITE WIꞌLINAMMORA DANDIINEEMMO

5. Haannara iillinose qarri hiitto ikkitanno gede assinose?

⁵ Haannara dadillite wiꞌlitanno gede assannosehu duuchu qarri iillinose. Isera iillinose qarri giddo mittu, minaannisera Finaana yinanniti wole galte noosi; ise Haanna lowo geeshsha mishshannose. Hatteeno agurranna Haanna ila diafidhino; Finaanara kayinni haammata ooso noose. (1 Sam. 1:1, 2) Haanna ila afidhinokki daafira Finaana duucha woyite qacifattannose. Atera togoori iilloommehero hiitto ikkatto? Haanna baasa xissiisidhino daafira ‘wiꞌlitanni ita hooggino’; hattono ‘hururante wiꞌlitino.’—1 Sam. 1:6, 7, 10.

6. Haanna shesho afiꞌrate maa assitino?

⁶ Haanna shesho afidhinohu hiittoonniiti? Ise kaaꞌlinosehu mittu coyi, halaalu magansiꞌrara qara bayicho yaano xaadooshshu dunkaana haꞌraseeti. Ise ‘hururante wiꞌlitanni Yihowa huuccidhino’; ise huuccidhinohu xaadooshshu dunkaani waalchi mule ikkikki digatino. Haanna Yihowa, “Ane borojjichokki qarra laꞌe hawittoekkinni [qaagie]” yite eeggifatte huuccidhino. (1 Sam. 1:10, 11) Ise huuccattotenni giddoseta Yihowara hasaaphitino. Yihowa tini muxxe beettosi wiꞌlitanna lae lowo geeshsha dadillitinoti dihuluullissannote!

7. Haanna giddoseta Yihowara hasaaphite shesho afidhinohu hiittoonniiti?

⁷ Haanna giddoseta Yihowara hasaaphituhunna Kakkalaanote Biili Eeli Yihowa huuccattosera dawaro qolannota buuxisisehu gedensaanni hiitto ikkitino? Qullaawu Maxaafi, “Hakkiinni kaꞌe hadhe sagaleno ittu. Hakkunni gedensaanni albisera dadillu dileellino” yaanno. (1 Sam. 1:17, 18) Haannara yaachishinose qarri hoꞌlinokkiha ikkirono, fooliishsho afidhino. Ise duhu gede ayirritinose xisso Yihowara tuqqitino. Isi yaaddose laino, raarese macciishshino hattono gedensoonni qaaqqo oye maassiꞌrinose.—1 Sam. 1:19, 20; 2:21.

8-9. Ibiraawoota 10:24, 25 kultanno garinni, ninke baalunku gambooshshe haꞌrate dandiinummore baala assa hasiissannonkehu mayiraati? (Misileno lai.)

⁸ Ninke maa ronseemmo? Dadillite wiꞌlatto  gede assanno qarri amadinohe? Maatekki miila woy jaalakki shiidhe xissiisiꞌroottoha ikkara dandaanno. Togoo woyite wolootunniwa gambo giwattoha ikkara dandaanno; tini nooreentilla. Kayinni Haanna xaadooshshu dunkaana hadhe sheshonna jawaante afidhunte gede, atino xissiisidhe noottoha ikkiro nafa gambooshshe hadhe shesho afiꞌra dandaatto. (Ibiraawoota 10:24, 25 nabbawi.) Gambooshshunniwa Qullaawu Maxaafinni jawaachishshanno hedo kullanna macciishshineemmo woyite, Yihowa gara ikkitinokki hedo agurre dancha danchare hendeemmo gede kaaꞌlannonke. Tini iillinonke qarri bayichonkonni baꞌꞌannokkiha ikkiro nafa, wodanaaꞌmineemmo gede kaaꞌlitannonke.

⁹ Qoleno gambooshshunniwa marartannonkeri ammanate roduuwinke ledo xaandeemmo; insa ninke daafira hedannotanna baxxannonketa kultannonke woyite jawaante afiꞌneemmo. (1 Tes. 5:11, 14) Hanni baxxino suwisaancho ikke soqqamannohu mittu rodii woꞌnaalsha laꞌno; isi minaamasi shiiꞌrino. Togo yiino: “Xaano wiꞌla diaguroommo. Mito woyite calliꞌya ofolle wiꞌleemmo. Kayinni gambooshshinke addu jawaantete buicho ikkinoe. Ammanate roduuwiꞌya coyidhannori lowo geya jawaachishinoe. Gambooshshe haꞌrammora albaanni aye geeshshano yaadummoro woy dadillummoro hakkiicho woꞌmanka woyite jawaante afiꞌreemmo.” Gambooshshe haꞌnummoro Yihowa ammanate roduuwinke widoonni kaaꞌlankera dandaanno.

10. Lowo geeshsha xissiisiꞌneemmo woyite Haanna lawishsha haꞌrunsa dandiineemmohu hiittoonniiti?

¹⁰ Qoleno Haanna shesho afiꞌrate giddoseta gudisse Yihowara hasaaphitino. Kiꞌneno Yihowa huuccattoꞌne macciishshannota addaxxitine “qarrisannoꞌnere baala isi aana [tuqqa]” dandiitinanni. (1 Phe. 5:7) Mitte rodoora minaannase mulqiꞌraano shitino; ise togo yitino: “Wodaniꞌya lowo geya hiiqqamino daafira, galagale hagiirraame ikkeemmaha horo dilawinoe. Baxillaancho iimi Annaꞌya huucciꞌrummati kayi shesho afiꞌroomma. Mito woyite giddoꞌyata xawise kuꞌla didandeemma; Yihowara kayi qarriꞌya leellannosi. Lowo geya xissiisiꞌreemma woyite keere afiꞌrate huuccatto assiꞌreemma. Hakkiinni wodanaaꞌmeemma hattono jawaante afiꞌreemma.” Yaachishinoꞌne coye baala Yihowara hasaaphitiniro, isi hindiiddoꞌne lae mararannoꞌne; hattono qarriꞌne leellannosi. Yaachishinoꞌne coyi hoꞌlinokkiha ikkiro nafa, Yihowa jawaachishannoꞌne hattono keere afidhinanni gede kaaꞌlannoꞌne. (Far. 94:19; Fil. 4:6, 7) Qoleno isira ammanantine kaajjitine uurritinoonni daafira baꞌraasannoꞌne.—Ibi. 11:6.

KAANDANNINKE WOYITE WIꞌLINAMMORA DANDIINEEMMO

11. Daawitira iillinosi qarri isi hiitto ikkanno gede assinosi?

¹¹ Daawitira, wiꞌlanno gede assannosihu duuchu qarri iillinosi. Iso mannu giwinosi; hattono ammananno manni nafa kaadinosi. (1 Sam. 19:10, 11; 2 Sam. 15:10-14, 30) Mitte yannara isi togo yee borreessino: “Urattotenni kainohunni daafuroommo; hashsha baala maꞌnaꞌyara heeꞌre hindiiddiꞌreemmo; hindiiddoꞌyano goxeemmowa shanshitanno.” Daawiti togo xissiisiꞌrinohu mayiraati? Isi, “Baarigaarraꞌyanni kainohunni” yiino. (Far. 6:6, 7) Wolootu assooti xissiisinosi daafira Daawiti lowo geeshsha wiꞌlino.

12. Faarso 56:8 kultanno garinni, Daawiti maa addaxxino?

¹² Daawiti qarru iillisirono Yihowa baxannosita addaxxino. Isi, “Kaaliiqi wiꞌlaꞌya macciishshinoe”  yee borreessino. (Far. 56:8) Wole yannara Daawiti, Faarso 56:8 noota baxissanno hedo borreessino. (Qummeeshsha nabbawi.) Tini hedo Yihowa lowo geya baxannonketanna ninke daafira hedannota leellishshanno. Daawiti Yihowa hindiiddosi baala maxaafisira borreessinota coyiꞌrino. Isi Yihowa xissosi afinotanna qaagannota addaxxino. Daawiti, baxillaanchu iimi Annisi iillinosi qarra calla ikkikkinni kuni qarri gawajjinosi garano afinota dihuluullamino.

13. Wolootu xissiissannonke woyite, sheshifachishankera dandaannori maati? (Misileno lai.)

¹³ Ninke maa ronseemmo? Ammanatto manchi xissiisinohe woy kaadinohe daafira yaaddanni nootto? Baxillu jaalooma amadootto beetto hedeweelcho jaalooma agurtino daafira, adhamakki diigantino daafira woy baxatto manchi Yihowara soqqama agurino daafira xissiisidhanni noottoha ikkara dandaanno. Mittu rodii minaamasi foortino daafiranna iso agurte hadhinohura togo yiino: “Lowo geya masoommo hattono tenne ammane adha qarra ikkitinoe. Ditidhoommoho yee hedoommo, dadilloommo hattono giiramoommo.” Mittu manchi kaadinoꞌneha woy xissiisinoꞌneha ikkiro, Yihowa horo tuge agurannoꞌnekkita afaꞌne sheshifachishshannoꞌne. Kuni rodii lede togo yiino: “Mannu ledo kalaqiꞌnoonni jaaloomi baꞌꞌara dandaannota wodanchoommo; Yihowa kayinni golonkeeti. Dayirino dayiro, isi woꞌmanka woyite kaaꞌlannonke. Kaaliiqi . . . keeraano dihunanno.” (Far. 37:28) Yihowa aye manchinni roore baxannonketa qaango. Mittu manchi kaadinkero lowo geeshsha xissiisiꞌneemmoha ikkirono, Yihowa ninke daafira heda diaguranno. (Rom. 8:38, 39) Tenne qaagge: Mittu manchi aye geeshshano xissiisinkero iimi Anninke baxannonke.

14. Faarso 34:18 maa buuxissannonke?

¹⁴ Kaandoonninkeha ikkiro, Daawiti Faarso 34:18 coyiꞌrino hedono sheshifachishannonke. (Qummeeshsha nabbawi.) Mitte borro ‘dadillunni hiiqqantinore’ yitanno yaatto ‘hexxo noonsakkire’ leellishshannota ikkitara dandiitanno yitanno. Yihowa konni garinni xissiisidhinore kaaꞌlannohu hiittoonniiti? Yaadino qaaqqosi hanqafe sheshifachishannohu baxillaanchu anni gede, Yihowa ninkera ‘mule no’; lowo geeshsha mararannonke hattono kaandoonninke daafira dadillunni hiiqqammeemmo woyite, kaaꞌlankera qixxaawe no. Isi wodaninke hiiqqameenna ditidhinoommoreeti yine hendeemmo woyite sheshifachishankeranna jawaachishankera quqquxamanno. Qoleno isi xaa yannara iillannonke qarra dandiine saꞌneemmo gede  kaaꞌlitannonketa batinye hexxo uyinonke.—Isa. 65:17.

HEXXO MUDHINEEMMO WOYITE WIꞌLINAMMORA DANDIINEEMMO

15. Hiziqiyaasira wiꞌlanno gede assannosihu hiikku qarri iillinosi?

¹⁵ Yihudu Moote Hiziqiyaasi 39 dirihu heeꞌre shaanno dhibbi amadinosita afi. Masaalaanchu Isayaasi Yihowa kulinosi garinni Hiziqiyaasi dhibbisinni reyannota kulino. (2 Mot. 20:1) Hiziqiyaasira hexxo noosiha dilawanno. Hiziqiyaasi kulloonnisi duduwi masisinosi daafira hururame wiꞌlino. Isi Yihowa eeggifate huucciꞌrino.—2 Mot. 20:2, 3.

16. Hiziqiyaasi wiꞌlanni huucciꞌrita Yihowa ma assiyya?

¹⁶ Yihowa Hiziqiyaasi wiꞌlanni huucciꞌrino daafira lowo geya mararinosi; togo yiinosi: “Huuccattokki macciishshoommo; hindiiddokkino laoommo; [hurseemmohe].” Yihowa Isayaasi widoonni, Hiziqiyaasira diro ledannositanna Yerusaalame Asoorootu anganni gatisannota kule qaale eino.—2 Mot. 20:4-6.

17. Buuto dhiwammeemmo woyite Yihowa kaaꞌlannonkehu hiittoonniiti? (Faarso 41:3) (Misileno lai.)

¹⁷ Ninke maa ronseemmo? Dhiwanni waadannohe daafira hexxo dinoe yite hedootto? Huuccattotenni Yihowa hasaawisi; wiꞌlitanni huucciꞌrittoro nafa isi macciishshannohe. Qullaawu Maxaafi, “mararrotenna maarote Anni, shesho baalate Magani” iillannonke qarri baalunku giddo sheshifachishannonketa buuxisannonke. (2 Qor. 1:3, 4) Xaa yannara Yihowa iillannonke qarra baala hoolanno yine dihendeemmo; kayinni isi kaaꞌlannonketa addaxxa dandiineemmo. (Faarso 41:3 nabbawi.) Qullaawu ayyaanisi widoonni Yihowa jawaante, hayyonna giddiidi keere aannonke. (Law. 18:14; Fil. 4:13) Qoleno isi dhibbu heeꞌrannokki yanna daggannota kultanno hexxo oye sheshifachishannonke.—Isa. 33:24.

18. Buutote qarri amadihe yannara sheshifachishinohe qummeeshshi hiikkonneeti? (“ Wiꞌlineemmo Woyite Sheshifachishshannonke Hedo” yitanno saaxine lai.)

¹⁸ Hiziqiyaasi Yihowa coyiꞌrinori sheshifachishinosi. Ninkeno Maganu Qaali sheshifachishannonke. Yihowa buutote qarri amadannonke woyite, jawaachishshannonketa baxissanno hedo Qaalisi giddo borreessinanni gede assino. (Rom. 15:4) Galchimi Afirikira heedhannoti mitte rodoo kaanserete dhibbi nooseta kulliseta duucha higge wiꞌlitino. Ise togo yitino: “Isayaasi 26:3 roore sheshifachishshinoe. Mito woyite iillannonke qarra woꞌmunni woꞌma hoola dandiineemmokkiha ikkirono, kuni qummeeshshi Yihowa fonqolo dandiine saꞌneemmo gede kaaꞌlannonke keere aannonketa buuxisinoe.” Buutote fonqoli miteekke malu nookkiha lawanno qarri iillihero sheshifachishannohe qummeeshshi no?

19. Albillitte afiꞌneemmo atooti maati?

 ¹⁹ Heeꞌnoommohu goofimarchu barraati; hakko daafira, wiꞌlineemmo gede assannori lexxanni haꞌrannota anfoommo. Kayinni Haanna, Daawitinna Moote Hiziqiyaasi lawishshi leellishannonte gede, Yihowa hindiiddonke laꞌꞌanno hattono lowo geya mararannonke. Isi hindiiddonke dihawanno. Hakko daafira buutote qarri amadannonke woyite, huuccattotenni giddonketa Yihowara hasaapha hasiꞌneemmoti egennantinote. Ammanate roduuwinkewa gambo gimboonke. Qoleno Qullaawu Maxaafi giddo noote jawaachishshanno hedonni shesho afiꞌra agurroonke. Kaajjine uurrinummoro Yihowa baꞌraasannonketa addaxxa dandiineemmo. Isi baꞌraasannonke doogga giddo gama, dadillunni kainohunni, kaandoonninke daafiranna hexxo mudhinoommo daafira hindiidiꞌnoommo hindiiddo baala feyanno yanna daggannota kule uyino hexxooti. (Aju. 21:4) Hatte yannara wiꞌlineemmohu hagiidhinoommo daafira callaati.