Soqqamaasinchu Phaawuloosi ledosi cimeessa ikke soqqamannohura Ximootewoosira togo yee borreessino: “Assatto coye baala manna mimmituwiinni roorsittokkinni, woy ayerano godowa hosittokkinni, tenne amaaleꞌya baala guutatto gede, Maganunna Yesuusi Kiristoosi doorino sokkaasine albaanni eegga yeemmohe.”—1 Xim. 5:21.

Balanxe, tini sokkaasine ayeoo ikkitinokkiro laꞌno. Insa 144,000 wido ikkitinokkiti egennantinote. Phaawuloosi Ximootewoosira sokka borreessi woyite, buuramino Kiristaani reyotenni kae iimira haꞌra dihanafino. Soqqamaasinenna wolootu buurantinori, ayyaanaamo kalaqama diꞌꞌikkitino; hakko daafira ‘doorantino sokkaasine’ yiniri insa ikkitara didandiitanno.—1 Qor. 15:50-54; 1 Tes. 4:13-17; 1 Yoh. 3:2.

Qoleno ‘doorantino sokkaasine’ yiniri Baote Wayi yannara Maganoho finqiltu sokkaasine diꞌꞌikkitino. Insa Sheexaaneho halante agaaninte ikkitino; hattono Yesuusira diinna ikkitino. (Kal. 6:2; Luq. 8:30, 31; 2 Phe. 2:4) Albillitte insa 1,000 diro qilete usurranni; hakkuyi gedensaanni Daawuloosi ledo hegerera baꞌanno.—Yih. 6; Aju. 20:1-3, 10.

Phaawuloosi kulinoti ‘doorantino sokkaasine’ ‘Maganohonna Yesuusi Kiristoosira’ halantannore iima heedhanno sokkaasine ikkitinoti dihuluullissannote.

Lowo kume ikkitannori ammanantino sokkaasine no. (Ibi. 12:22, 23) Insa baalunkura mitte yanna giddo mittu gari looso uyinanninsa yine heda dihasiissannonke. (Aju. 14:17, 18) Mitte yannara mittu sokkaasinchi callu, 185,000 Asooru olanto hunanno gede hajanjoonnisita qaango. (2 Mot. 19:35) Boode sokkaasine “guficho ikkanno coye baalanna bunshe assanno manna [Yesuusi Gashshooti] giddonni xinqite fushshitanno” gede kulloonninsaha ikkara dandaanno. (Mat. 13:39-41) Wolootu kayinni iimira hadhanno gede ‘doorantinore gamba assitara’ kulloonninsaha ikkara dandaanno. (Mat. 24:31) Wolootu qolte ninke agartanno gede hajanjoonninsa.—Far. 91:11; Mat. 18:10; Maatewoosi 4:11 ledo heewisiisi; Luq. 22:43.

Umi Ximootewoosi 5:21 kulloonniri ‘doorantino sokkaasine’ Maganu manna kaaꞌlannoha baxxino looso loossanno gede gaammoonnire ikkitukki digattino. Qummeeshshunniti qooxeessaho noo hedo leellishshannonte gede, Phaawuloosi songote cimeeyye loosonsa danchu garinni loossanno gede amaalino; songote giddo noorino insa ayirrisa hasiissannonsa. Songote cimeeyye ‘manna mimmituwiinni roorsitukkinni woy ayerano godowa hossukkinni’ loosonsa umo fushsha hasiissannonsa; hattono mitto coye muddante assa woy yoo yaa dihasiissannonsa. Insa Phaawuloosi qullaawu ayyaani massageennasi amaalinonsa amaale harunsitanno gede assannonsahu ikkadu korkaati no; loosonsa loossannohu ‘Maganu, Kiristoosi Yesuusinna doorantino sokkaasine albaanniiti.’ Hakko daafira mite sokkaasine songo kaaꞌlanno looso loossanno gede gaammoonninsa; lawishshaho insa Maganu manna agartanno, sabbakate looso massagganno hattono laꞌino coye Yihowara kultanno.—Mat. 18:10; Aju. 14:6.