1. Yesuusi jeefote hashsha rosaanosira hiikkonne hasiisanno coye kulinonsa?

 YESUUSI jeefote hashsha, rosaanosi ledo heeꞌre baxillu daafira mite 30 hige coyiꞌrino. Isi rosaanosi ‘kiꞌne kiꞌneneewa baxamme’ yiinonsa. (Yoh. 15:12, 17) Insa mimmito baxxannoha ikkiro, addu rosaano ikkitinota wolootu huwata dandiitanno. (Yoh. 13:34, 35) Yesuusi kulino baxilli woloota marara calla ikkikkinni, meessi horo agurre loosunni leellinshanniho. Isi togo yiino: “Lubbosi jaalisira sayise aanno manchiha roorino baxilli ayewano dino. Ani hajajoommoꞌnere wonshitiniro, kiꞌne jaallaꞌyaati.”—Yoh. 15:13, 14.

2. (a) Yannankera Maganu manni mereero mayi no? (b) Konni birxichira hiikkuri xaꞌmuwa xiinxallineemmo?

² Yannankerano Yihowa soqqamaasine mereero noohu addu baxillinna kaajjado mittimma, insa Maganu manna ikkitinota leellishshanno. (1 Yoh. 3:10, 11) Gobbanke, gaꞌrenke, coyiꞌneemmo qaalinna budinke babbaxxinoha ikkirono, alamete doyichora nooti Yihowa soqqamaasine mimmitonsa lubbora baxxanno. Ikkollana togo yine hendeemmoha ikkara dandaanno: ‘Yannankera baxille leellisha lowo geeshsha hasiissanota ikkitinohu mayiraati? Yihowanna Yesuusi baxillunni dhaabbannonkehu hiittoonniiti? Ninkeno Kiristoosi gede  “dhaawanno” baxille leellisha dandiineemmohu hiittoonniiti?’—1 Qor. 8:1.

3. Tini “qarrissanno yanna” manna gawajjitanni noohu hiittoonniiti?

³ Tini heeꞌnoommoti ‘qarrissanno yanna’ “qarru woꞌminota” ikkitino daafira, batinyu mannira addi addihu dadillisanno coyi iillannonsa. (Far. 90:10; 2 Xim. 3:1-5) Batinyu manni lowo qarri iillannonsa daafira, hexxo mudhanno. Diru kiiro 800,000 saꞌꞌanno manni insaneeto shaanno yine hendanni; hatto yaa qole 40 sokondi giddo mittu manchi isonooto shaanno yaate. Mitu Kiristaani nafa, yaaddotenni kainohunni hexxo mudhe insaneeto shaate geeshsha iillino; tini dadillissannote.

4. Qullaawu Maxaafi giddo kulloonnihu reyo halchino manni ayeooti?

⁴ Hunda mite ammanantinori Maganu soqqamaasine buutote qarri iillinonsa daafira hexxo mudhite reyo halchitino. Lawishshaho Iyyoobira buutote qarri iillinosi daafira isi “heeshshoꞌya mishoommo; heeꞌrammora horontanni dihasiꞌreemmo” yiino. (Iyo. 7:16; 14:13) Yoonaasino uyinoonnisi loosinni kainohunni hexxo mudhe “Xa Kaaliiqaꞌya, anera heeꞌrantenni reyo woyyitannoena lubboꞌya haaꞌrie” yiino. (Yon. 4:3) Qoleno ammanamino masaalaanchi Eeliyaasi iillinosi qarrinni kainohunni reyo halchino. Isi togo yiino: “Kaaliiqaꞌya! Xaate ikkinoe. Ani akaakkaꞌya dirooroommona lubboꞌya haaꞌri.” (1 Mot. 19:4) Ikkollana Yihowa kuri ammanantino soqqamaanosi baxannonsa; hattono heeshshotenni heedhara hasiꞌranno. Isi insa coyidhinorira dihanqinonsa; hatteentenni heeshshote heeꞌra baxissannonsa gedenna agurtukkinni isira ammanante soqqantanno gede baxillunni dhaawinonsa.

5. Roorenkanni xaa yannara roduuwinkera baxille leellisha hasiissannonkehu mayiraati?

⁵ Yannankera batinyu roduuwira yaachishanno coyi iillannonsa daafira, baxillunni dhaawannonsahu hasiisannonsa. Mitu roduuwira dartenna mishsho iillitannonsa. Woloota qole loosu basera suꞌmansa hunnanni. Insa lowo saate loossannohura woy loosu batiꞌrannonsahura yaaddannoha ikkara dandaanno. Wolootaho maatensa giddo qarru kalaqamara dandaanno. Lawishshaho, Yihowa Farciꞌraasincho ikkitinokki galtensa mishshanni qarrissannonsaha ikkara dandaanno. Konninna wolu fonqolo ikkanno coyinni kainohunni songote giddo noohu batinyu roduuwi dhuka hooginoha lawannonsa. Ikkina insa kaaꞌla dandiinannihu hiittoonniiti?

6. Yihowa soqqamaanosi baxillisinni dhaawannonsahu hiittoonniiti?

⁶ Yihowa soqqamaanosi hegere geeshsha baxannonsata kule dhaawannonsa. Yihowa ammanaminoha Israeelete manna togo yee jawaachishinonsa: “Kiꞌne [baxeemmoꞌne]. . . . Ani ledoꞌne noommona waajjitinoonte.” (Isa. 43:4, 5) Atino Yihowa soqqamaancho ikkootto daafira, Yihowa baxannoheta addaxxa dandaatto. a Maganu Qaali addu magansiꞌra harunsitannorira togo yaanno: “Maganikki Kaaliiqi ate ledo no. Wolqasinni qeelle haraqiꞌrisiisannohe [gatisannohe]. Isino atenni hagiidhanno; baxillisinni heeshshokki haaroonse fooliishshiishannohe.”—Sof. 3:16, 17.

7. Yihowa baxilli qansidhanno ama leellishshanno baxilli gede ikkinohu hiittoonniiti? (Hanafote noo misile lai.)

 ⁷ Yihowa soqqamaanosira aye geeshshi fonqoli iillinsarono irkisansaranna sheshifachishansara qaale eino. Isi togo yiino: “Ama giwoodisera hanqaffe qansitanni lossidhanno qaaqqi gedeere ikkitinanni. Ama qaaqqose dogisiisidhannohu gede anino kiꞌne [sheshifachisheemmoꞌne].” (Isa. 66:12, 13) Ama qaaqqose hanqafidhanno; hattono giwoodisera wodhitanno. Yihowano ate lowo geeshsha baxannohe; hattono teesse heeꞌrattora hasiꞌranno. Ati Yihowa albaanni muxxe ikkoottota horo huluullantooti.—Erm. 31:3.

8, 9. Yesuusi baxilli jawaachishannonkehu hiittoonniiti?

⁸ Yihowa baxannonketa addaxxineemmo gede assannonkehu wolu korkaatino no. Yihowa “baattote aana noo manna baala baxino daafira, iso ammaꞌninohu baalu hegere heeshsho afiꞌranno gede ikkinnina baꞌꞌannokki gede . . . mitto Beettosi uyino.” (Yoh. 3:16) Yesuusino heeshshosi ninkera sayise oye baxannonketa leellishino! Tenne afanke jawaanteemmo gede assitannonke. Maganu Qaali, “qarrunna shetto” nafa “Kiristoosi baxilliwinni baddankera” dandiitannokkita kulanno.—Rom. 8:35, 38, 39.

⁹ Iillinonke qarrinni kainohunni daafurreemmonna Yihowara soqqammeemmo soqqanshonni hagiirre hoongeemmo woyite, Kiristoosi baxilli kaajje uurrate kaaꞌlitanno jawaante afiꞌneemmo gede kaaꞌlannonke. (2 Qorontoosi 5:14, 15 nabbawi.) Yesuusi baxilli dano, darte, hexxo mudhineemmo gede assannorinna yaachishanno coyi iillinkerono hexxo mudhineemmokki gede kaaꞌlannonke.

10, 11. Hexxo mudhitinore dhaawa hasiissannonsari ayeooti? Xawisi.

¹⁰ Yihowa baxillunni dhaawannonke doogga giddo mitte Kiristaanu songo widoonniiti. Roduuwinkera baxille leellinsheemmoha ikkiro, Yihowa banxeemmota leellinsheemmo. Roduuwanke ayyaanaamittensa kaajjitanno gedenna Yihowa baxannonsata huwattanno gede kaaꞌla dandiineemmo. (1 Yoh. 4:19-21) Soqqamaasinchu Phaawuloosi Kiristaana togo  yee jawaachishino: “Xa assitinanni heedhinoonninte gede, mimmitoꞌne jawaachishshenna dhaabbe.” (1 Tes. 5:11) Ee, cimeeyye calla ikkikkinni songote giddo noohu baalu Yihowanna Yesuusi gede roduuwa sheshifachishanna dhaawa dandaanno.—Roomu Sokka 15:1, 2 nabbawi.

¹¹ Songote giddo quwa saꞌino yaaddo noonsarira hikkiminnu kaaꞌlo hasiissannonsaha ikkara dandaanno. (Luq. 5:31) Cimeeyyenna songote giddo noori wolu roduuwi insaneeto dokiteru gede assite dilaꞌanno. Ikkirono, songote giddo noori baalu yaaddinore ‘jawaachisha, wolqiweeloota kaaꞌlanna manna baala’ cinca dandiitanno. (1 Tes. 5:14) Ninke baalunku hexxo mudhitinore dhaawate, mararronna cinca leellisha hattono, insa sheshifachishannore coyiꞌra hasiissannonke. Ati wolootaho sheshotenna jawaantete buicho ikkate sharramatto? Woloota jawaachishatenna sheshifachishate maa assa dandaatto?

12. Songo baxillunni dhaabbinose rodoo lawishsha kuli.

¹² Quwa saꞌino yaaddo noonsare baxillunni dhaawa dandiineemmohu hiittoonniiti? Mitte Awuroppaho heedhanno rodoo togo yitino: “Mito woyite aneneeto shaate hedeemma. Ikkollana songo heeshshoꞌya gatissinoe. Roduuwu woꞌmante yannara jawaachishshannoe, hattono baxille leellishshannoe. Quwa saꞌino yaaddo nooeta afinohu shiima roduuwa calla ikkirono, songo woꞌmante yannara rakke iillitannoe. Mittu minaanninna minaama isinni ayyaanaamittete annanna ama ikkinoe yaa dandeemma. Insa towaatannoe, hattono hashsha barra kaaꞌlannoe yaa dandeemma.” Baalunku roduuwi mittu garinni kaaꞌla dandaannokkiti egennantinote. Ikkollana baalunku dadillitino roduuwanke irkisate dandiinummore baala assa dandiineemmo. b

13. Woloota dhaawate maa assa hasiissannonke?

¹³ Seekkite macciishshi. (Yai. 1:19) Hexxo mudhinohura baxille leellisha dandiineemmo doogga giddo mitte, mararrotenni macciishshate. Qarru iillinosi rodii hedo wodanchate shaqqado xaꞌmo xaꞌma dandaatto. Albikki mararattositanna baxattosita leellishannoha ikko. Isi qarrasi lowo yanna hasaaphannoha ikkiro, cincatenni macciishshi; hattono coyiꞌranna mereero eꞌooti. Cincatenni macciishshattoha ikkiro, iillinosi qarra seekkite wodanchatto. Tini qolte qarru iillinosi rodii, ammaꞌnannohe gedenna iso kaaꞌlate coyiꞌrattore macciishshanno gede assitara dandiitanno. Giddokkinni hedattosita leellishattoha ikkiro, baxillu assootikki lowo geeshsha sheshifachishasira dandaanno.

14. Woloota minsheemmokki gede qoropha hasiissannonkehu mayiraati?

¹⁴ Mishattosikki gede qorophi. Dadillino mancho minsheemmoha ikkiro, roore hexxo mudhara dandaanno; hatto ikkiro qole iso kaaꞌla didandiineemmo. “Dayi gede coyiꞌnanni coyi manna urdete gede qasanno; egennaamu arrawi kayinni hursanno.” (Law. 12:18) Anfanni heeꞌne dadillino mancho coyinni ‘qanseemmokkiti’ egennantinote. Ikkollana dayinke gede coyiꞌneemmoha ikkiro, dadillino mancho xissiinsammora dandiineemmo. Woloota baxillunni dhaawatenna jawaachishate,  dandiinummo deerrinni insara mararro leellisha, hattono ninkeneeto insa bayicho worre laꞌꞌa hasiissannonke.—Mat. 7:12.

15. Woloota baxillunni dhaawate kaaꞌlannonke uduunni hiikkuriiti?

¹⁵ Woloota jawaachishate Maganu Qaale horoonsiꞌri. (Roomu Sokka 15:4, 5 nabbawi.) Qullaawu Maxaafi giddo batinye jawaachishshannonna sheshifachishshanno hedo no. Qullaawu Maxaafi “cincanna jawaante aanno Magani” uyinonke maxaafaati. Sheshifachishshanno qummeeshshuwano agurranna, Qullaawa Maxaafa xiinxallate kaaꞌlitanno borruwa noonke. Agarooshshu Shae Borro Indeksenna Yihowa Farciꞌraasine Borro Xiinxallate Kaaꞌlitanno Biroshere horoonsiꞌra dandiineemmo. Tini borruwa, qarru iillinonsa roduuwanke jawaachishatenna sheshifachishate kaaꞌlitanno hedo afiꞌrate kaaꞌlitannonke.

16. Dadillitinore jawaachinsheemmo woyite hiikkuri akatta leellisha hasiissannonke?

¹⁶ Mararronna shaqqille leellishi. Woloota jawaachishanna dhaawa dandiineemmoti wole doogo insara mararronna shaqqille leellishate. Yihowa umisi ‘mararrote Annaati, hattono jawaante baalate Maganooti;’ qoleno isi soqqamaasinesi mararannohonna shaqqadoho. (2 Qorontoosi 1:3-6 nabbawi; Luq. 1:78; Rom. 15:13) Tennera Phaawuloosi dancha lawishsha ikkinonke; isi togo yino: “Oosose seekkite towaaxxitanno ama gede, giddoꞌne kawajjotenni heeꞌnoommo. Lowo geeshsha banxeemmoꞌne daafira, Maganunniha dancha duduwo kula calla ikkikkinni, kiꞌnera lubbonke nafa aate qixxaambe heeꞌnoommo.” (1 Tes. 2:7, 8) Ninkeno Maganu gede shaqqille leellinsheemmoha ikkiro, dadillino manni ninke widoonni huuccattonsara dawaro afiꞌrara dandaanno.

17. Roduuwanke baxillunni dhaawate kaaꞌlitannonketi hiittee gara ikkitino laooti?

¹⁷ Roduuwikki guuntete xeꞌne noonsare ikkitinota deꞌooti. Ayyaanaamittete roduuwikkira gara ikkitino lao heedhohe. Roduuwikki soꞌro loosa dihasiissannonsa yite heda gara ikkitino. (Ros. 7:21, 22) Yihowa soqqamaasinewiinni quwa sainore agadhannokkita qaagi. Ninkeno isi lawishsha harunsineemmoha ikkiro, kuꞌu kuꞌuyita guuntete xeꞌne duqqine heeꞌra dandiineemmo. (Efe. 4:2, 32) Tidhinore assitinokkihu gede assine coyiꞌra agurre, assitanni noorira galata hasiissannonke. Tini jawaachishshansara dandiitanno. Wodaninni galata, woloota dhaabbanno; hattono qullaawa soqqanshonsanni hagiidhitanno gede assitanno. Roduuwanke wolootu ledo heewisiisa agurre galanteemmonsaha ikkiro, jawaattanno.—Gal. 6:4.

18. Mimmito baxillunni dhaambeemmo gede assannonkeri maati?

¹⁸ Mittu mittunku Yihowa soqqamaanchi Maganunna Yesuusi albaanni muxxete; Yesuusi qole heeshshosi wodote kakkalo asse uyino. (Gal. 2:20) Ayyaanaamittete roduuwanke lubbora banxeemmo. Qoleno insa shaqqillunninna baxillunni towaanteemmo. Wolootaho sheshote buicho ikkate, “Mannu ledo keere heeꞌnanni garanna mimmito dhaambanni doogo haꞌrate diinaggaambo.” (Rom. 14:19) Albillitte uulla Gannate ikkitanno woyite, hexxo mudhineemmo gede assannonkeri horo diheeꞌranno! Dhibbu, olu, cubbunni dagganno reyo, dartu, maatete giddo kalaqamanno qarrinna hexxo mudhinanni gede assannori diheeꞌranno. Kumu Diri gedensaanni, mannu ooso baala guuta ikkitanno. Jeefote fonqolo qeelte saꞌannori, uullate aana Maganu Yihowa ooso ikkite “Maganu oosota ayirrinyu wolapho gutantanno.” (Rom. 8:21) Konni daafira, baalunku dhaawanno baxille leellishanna Maganu abbannota haaro alame eꞌneemmo gede mimmito kaaꞌla agurroonke!