1. Alamete aana noo manni ikkito ninkeneeto heeshshi assa qarra ikkitannonke gede assitannohu hiittoonniiti?

MAGANU Qaalinni ronsoommore harunsa shota ikkitinokkihu mayiraati? Gara ikkinore assate, ninkeneeto heeshshi assa hasiissanno daafiraati. Heeˈnoommohu “goofimarchu barra” ikkino daafira ninkeneeto heeshshi assa shota ikka hooggankera dandiitanno; korkaatuno batinyu manni ‘umonsa baxannoho, woxe baxannoho, naaxxaleessaho, booˈnaleessaho, hattono umonsa qeeˈlannokkiho.’ (2 Xim. 3:1-3) Maganu soqqamaano ikkinoommo daafira, togoo akatta busha ikkitinota anfoommo; ikkirono mito woyite togoo akatta noonsa mannira qiniinonsaha lawankera dandaanno. (Far. 37:1; 73:3) Mittu manchi togo yee hedara dandaanno: ‘Umiˈya hasatto agure wolootunnita balaxisiisa hasiissannoe? Aneneeto “woˈmunkura woriidihu” gede asse laummoro ayirrinye hoogammo ikka?’ (Luq. 9:48) Alamete aana noo manni gede umonke calla banxeemmoha ikkiro, songote giddo roduuwinke ledo noonke aante baˈaranna Kiristaana ikkinoommoti wolootaho leella hooggara dandiitanno. Qullaawu Maxaafi giddo noohu dancha lawishsha ikkanno manni xagge xiinxallankenna insa faale haˈranke kiissannonke.

2. Hundite Maganu soqqamaasinewiinni maa ronseemmo?

² Qullaawu Maxaafi giddo kulloonnihu dancha lawishsha  ikkanno manni faale haˈrate, insa Maganu jaalla ikkitanno gede assinonsari maatiro xiinxalla hasiissannonke. Insa Magano hagiirsiissinohu hiittoonniiti? Gara ikkinore assate jawaante afidhinohu ma garinniiti? Konni garinni insa lawishsha xiinxallanke ammananke kaajjishshanno.

3, 4. (a) Yihowa rosiisannonkehu ma garinniiti? (b) Ammananke kaajjishiˈrate egenno afiˈratenni sainore assa hasiissannonke yineemmohu mayiraati?

³ Yihowa Qaalisi, Qullaawu Maxaafi aana xintantino borruwa, webisayitenke, JW Birodikaaste, hattono songotenna jajjabba gambooshshuwa widoonni kaajja amaalenna qajeelsha aannonke. Ikkollana Yesuusi egenno afiˈratenni sainore assa hasiissannonketa xawisino. Isi togo yiino: “Ane sagale soyinoehu haja wonshatenna loososi guutate.”—Yoh. 4:34.

⁴ Yesuusira, Maganu fajjo wonsha sagalete gedeeti. Hiittoonni? Unto ikkitanno sagale sagaˈla hagiirsiissannonke, hattono maqee lexxineemmo gede assitara dandiitanno; hatteente gede, Maganu fajjo wonshanke jawaanteemmonna ammananke kaajjitanno gede assitanno. Lawishshaho, soqqansho daafurse heeˈreennahe fulte qaera hagiidhitanninna jawaante afidhe higootto yanna qaagatto?

5. Hayyo kaaˈlitannonkehu hiittoonniiti?

⁵ Yihowa biddishsha harunsa hayyote. (Yai. 3:13) Hayyo afiˈrate sharrama kiissanno. Hayyote “ledo taashshinanniri mitturi nafa dino.” Hayyo “heeshsho uyitanno; ise cuˈmirinohu baˈraaˈrinoho.” (Law. 3:13-18) Yesuusi togo yiino: “Konne coye affinoonni; affinoonniha assitiniro maassantinanni.” (Yoh. 13:17) Yesuusi rosaano, isi rosiisinonsare harunsa agura hooggu geeshsha hagiirrinsa geedonniha ikkanno. Insa Yesuusi rosonna lawishsha mitte higge calla ikkikkinni heeshshonsa diro woˈma harunsa hasiissannonsa.

6. Woˈmanka woyite ronsoommo rosi garinni heeˈra hasiissannonkehu mayiraati?

⁶ Xaa yannarano, heeshshonke woˈmantenni ronsoommore harunsa hasiissannonke. Hanni konne lawishsha laˈno. Makeena biddi assanno manchira babbaxxino uduunnichi, hattono egenno heedhasira dandiitanno. Ikkollana, kuni uduunnichi kaaˈlannosihu horoonsiˈrannoha ikkiro callaati. Isi konne looso lowo diro loosanni fushshiˈre agurinoha ikkara dandaanno; ikkirono ogimmasi hawannokki gede rosinore ganye loosa hasiissannosi. Hatteente gede, umo Qullaawu Maxaafi halaale ronsummo woyite, ronsoommo rosi garinni heeˈnoommo daafira hagiirraamma ikkinoommo. Ikkollana hagiirrinke geedonniha ikkanno gede, umonke heeshshi assine barru baala Yihowa rosiisinonke rosi garinni heeˈra hasiissannonke.

7. Qullaawu Maxaafi giddo noo xaggenni maa ronseemmo?

⁷ Konninni aanchine woˈmanka woyite ninkeneeto heeshshi assa qarra ikkitannonke gede assannoha shoole coye laˈneemmo; hattono hunda heedhinoti ammanantino soqqamaano konne fonqolo qeeltino gara ronseemmo. Ammananke kaajjitanno gede egenno afiˈratenni sainore assa hasiissannonke. Konni daafira, ronseemmore harunsa dandiineemmo gara hedanna keeshshinummokkinni loosu aana hosiisa hasiissannonke.

8, 9. Soqqamaasinete Looso 14:8-15te noo xagge Phaawuloosi umosi heeshshi assannoha ikkinota leellishshannohu hiittoonniiti? (Hanafote noo misile lai.)

⁸ Maganu, “mannu baalunku gatannonna halaale afanno gede” hasiˈranno. (1 Xim.  2:4) Halaale rosinokki manna ma garinni laˈˈatto? Soqqamaasinchu Phaawuloosi Yihowa daafira mitore afinohu Yihudu mannira sabbakinoha ikkirono, isi kaphu maganna magansidhannorirano sabbakino. Kaphu maganna magansiˈranno manni Phaawuloosira assinori, isi umosi heeshshi assa qarra ikkitannosi gede assannoreeti. Hiittoonni?

⁹ Phaawuloosi umo misiyoone ikke haˈri woyite, Barnabaasi ledo Lisxiru katama haˈrino. Hakkiicho heeˈrannohu Liqooniyu manni Phaawuloosinna Barnabaasi maganu gede asse laino; hattono magannansa suˈminni Diyanna Hermesi yite woshshitinonsa. Phaawuloosinna Barnabaasi hakkonne guwishsha adhituyya? Insa tenne ikkito hakkuyira albaanni hadhinohu lamu katamira iillinonsa dartinni fooliishshidhanno tunceenyi gede assite laˈinoni? Kuni guwishshi batinyu manni dancha duduwo macciishshanno gede assanno yite heddinoni? Diheddino! Insa bayichonko uddanonsa darte raartanni mannu widira higge doddanni martino. Hakkiinni togo yitino: “Manna, togo mayira assitinanni? Ninkeno kiˈne gedee mannaati.”—Soq. 14:8-15.

10. Phaawuloosinna Barnabaasi Liqooniyu manna roortannohu gede assite heddinokkihu mayiraati?

¹⁰ Phaawuloosinna Barnabaasi guuntete xeˈne noonsare ikkitinota coyiˈransa, insa Magano magansidhano gari kaphu maganna magansiˈranno manni garinniiti yaa diˈˈikkino. Phaawuloosinna Barnabaasi Maganu misiyoone ikkite soqqantanno gede shoominonsareeti. (Soq. 13:2) Qoleno insa qullaawu ayyaaninni buurantinoreetinna kaajja hexxo noonsareeti. Ikkollana Phaawuloosinna Barnabaasi Liqooniyu mannino dancha duduwo macciishshe adhiro, insa afidhino gedee qoosso afiˈra dandaannota huwattino.

11. Sabbankeemmo woyite Phaawuloosi gede umonke heeshshi assa dandiineemmohu hiittoonniiti?

¹¹ Ninkeno Phaawuloosi gede umonke heeshshi assa dandiineemmohu hiittoonniiti? Umihunni, Yihowa wolqanni loonsoommo loosira mannu jajankera dihasiˈneemmo. Layinkihunni ninkeneeto togo yine xaˈma hasiissannonke: ‘Sabbakeemmo manna ma garinni laeemmo? Qooxeessiˈyara wolootu woffi assite laˈanno manna anino hatto asse laeemmo?’ Alamete doyichora nooti Yihowa Farciˈraasine qoqqowinsara dancha duduwo macciishshanno manna hassanni keeshshitino. Mitootu isinni wolootu woffi assite laˈanno manni coyiˈranno afoo woy bude rosate sharrantanno. Ikkirono Yihowa Farciˈraasine konne manna roortannohu gede assite horo diheddanno. Hatteentenni insa kuni manni Maganu Mangiste sokka macciishshe adhanno gede kaaˈlate woˈnaaltanno.

12. Ephafira umisi horo agure wolootaho baxille leellishinohu hiittoonniiti?

¹² Umonke heeshshi assine Maganu biddishsha harunsa dandiineemmoti wole doogo ‘ninkete gedee ammana’ noonsarira huuccatto assate. (2 Phe. 1:1) Ephafira yinanni rosaanchi hatto assino. Qullaawu Maxaafi giddo suˈmisi noohu sase bayicho callaati; hakkuno Phaawuloosi borreessino sokkaraati. Phaawuloosi Roomaho usurame heeˈre, Qolasiyaasi heeˈranno Kiristaanira Ephafira, “woˈmanka woyite, kiˈne daafira huuccatto assanno” yee borreessino. (Qol. 4:12) Ephafira roduuwasi seekke afino; hattono insa daafira hedanno. Isi Phaawuloosi ‘ledo usuramasi’ wolootu ayyaanaamitte daafira hedannokki gede diassitinosi. (Film. 23) Qoleno insa  kaaˈlate huuccatto assino. Ephafira hatto assasi, umosi calla baxannokkiha ikkinota dileellishshanno? Ammanantinote Yihowa soqqamaasinera roorenkanni mittu mttunku suˈma ganne huuccanke lowo wolqa afidhino.—2 Qor. 1:11; Yai. 5:16.

13. Huuccattokkinni Ephafira lawishsha harunsa dandaattohu hiittoonniiti?

¹³ Hanni ayeoora huucca dandaattoro hedi. Ephafira gede, batinyu roduuwi maatetenna songote giddo loosu batiˈrinonsa roduuwira woy fonqolu tuncu yiinonsa roduuwira huuccitanno. Wolootu qolte jw.org yinanni webisayitenke aana suˈmansa kulloonnirira huuccitanno. * Qoleno shiidhinorira, olunninna danotenni gattinorira, hattono angate anje amaddinonsarira huucca dandiineemmo. Ee, huuccattonkenni horo afidhannori lowo roduuwi no. Insara huuccineemmoha ikkiro, ninke hasatto ikkikkinni wolootu hasatto balaxisiinseemmota leellinsheemmo. (Fil. 2:4) Yihowa togoo huuccatto macciishshanno.

14. Yihowa dancha gede macciishshannoha ikkinota leellishinohu hiittoonniiti?

¹⁴ Ninkeneeto heeshshi assineemmore ikkinoommota leellisha dandiineemmoti wole doogo dancha gede macciishshate. Yaiqoobi 1:19 ‘macciishshate rankoommore’ ikka hasiissannonketa kultannonke. Tennera baalunkunni roore dancha lawishsha ikkannonkehu Yihowaati. (Kal. 18:32; Iya. 10:14) Hanni Fulo 32:11-14te kulloonni hasaawinni maa ronseemmoro laˈno. (Qummeeshsha nabbawi.) Yihowara Muse kaaˈlo hasiissannosikkiha ikkirono, Muse hedosi coyiˈranno gede fajjinosi. Duucha woyite soˈro loosanno manchi coyiˈrannore cincite macciishshanna isi yiinore assa dandaatto? Yihowa kayinni mannu ooso ammanatenni woshshidhannosi woyite cincatenni macciishshanno.

15. Yihowa gede woloota ayirrisa dandiineemmohu hiittoonniiti?

¹⁵ Mitti mittinke ninkeneeto togo yine xaˈma hasiissannonke: ‘Yihowa umosi heeshshi asse Abirihaami, Raaheeli, Muse, Iyyaasu, Maanuhe, Eeliyaasinna Hiziqiyaasi gedee manna macciishshannoha ikkina, anino baalanka roduuwaˈya ayirrisa, insa coyidhannore macciishshanna yitinore assate woˈnaala dihasiisannoe? Xaa yannara songoˈya woy maateˈya giddo albinni roore illachisha hasiissannoehu no? Insa kaaˈlate maa assa dandeemmo?’—Kal. 30:6; Eje. 13:9; 1 Mot. 17:22; 2 Dud. 30:20.

16. Shimiˈˈi hanqisannore assisi yannara, Moote Daawiti maa assino?

¹⁶ Umonke heeshshi assineemmore ikkanke, mannu hanqisannore assannonke woyite ninkeneeto qeeˈlate kaaˈlitannonke. (Efe. 4:2) Layinki Saamueeli 16:5-13te noo xagge tennera dancha lawishsha ikkitannonke. (Qummeeshsha nabbawi.) Moote Saaooli fiixa ikkinohu Shimiˈˈi, Daawitinna soqqamaanosi xonino, hattono waajjishiishino. Daawiti Shimiˈˈi hooˈla dandaannoha ikkirono, cincino. Daawiti togoo cinca afiˈranno gede kaaˈlinosiri maati? Sayikki Faarso xiinxallineemmo woyite tenne huwanteemmo.

17. Daawiti isonooto qeeˈlanno gede kaaˈlinosiri maati? Ninke isi lawishsha harunsa dandiineemmohu hiittoonniiti?

¹⁷ Faarso sasete nooti hanafote hedo, tenne faarso borreessinoonnihu “Daawiti beettosi  Abeseloomi xooqanni” noo yannara ikkinota leellishshanno. Kiiro 1 nna 2, Layinki Saamueeli fooliishsho 16te noo xagge ledo sumuu yitanno. Faarso 3:4te aana nooti “Kaaliiqa woshshiˈreemmo; isino qullaawu ilaalisi iima heeˈre macciishshannoe” yitanno hedo, Daawiti Yihowa addaxxannota leellishshanno. Ninkeno wolootu gara ikkinokki coye assitannonke woyite huuccatto assiˈra dandiineemmo. Yihowa qole cincate kaaˈlannonkeha qullaawa ayyaanasi aannonke. Atino wolootu gara ikkinokkire assitannohe woyite, ateneeto qeeˈla, woy mulla gatona yaa dandaatto? Yihowa qarrakki laˈˈannotanna kaaˈlannoheta addaxxatto?

18. Woˈmante yannara Yihowa roso harunsate murciˈroottohu mayiraati?

¹⁸ Gara ikkinore assineemmoha ikkiro, lowo atoote afiˈneemmo. Lawishsha 4:7 hayyo “woˈmunku coyira [aliidite]” yitannohu iseraati. Hayyo xintantinohu egennote aana ikkirono, egennotenni roore hayyoota ikkinommota leellishannohu doodhineemmo doorshaati. Gooxaamu nafa hayyootaho. Gooxaamu hawadira sagale qixxeessiransa, hayyoota ikkinota leellishshanno. (Law. 30:24, 25) ‘Maganu hayyo’ ikkinohu Kiristoosi, woˈmante yannara Annasi hagiirsiisannore assanno. (1 Qor. 1:24; Yoh. 8:29) Maganu dancha coye doodhatenna hakkoye coye assate mereero badooshshu noota afino. Isi woˈmante yannara insaneeto heeshshi assite gara ikkino coye assitannore maassiˈranno. (Maatewoosi 7:21-23 nabbawi.) Konni daafira songo, baalunku manni umonsa heeshshi asse Yihowara soqqamanno bayicho ikkitanno gede assate sharrami. Gara ikkinota anfoommo coye assate yannanna cinca hasiissanno. Ikkirono, hatto assanke, umonke heeshshi assineemmore ikkinoommota leellishshanno; umonke heeshshi assanke qolte xaano ikko hegere geeshsha hagiirraamma ikkineemmo gede assitannonke.