ALAMETE doyichora noo cimeeyye, Maganu manni mereero soqqamate qoosso afiꞌransanni tashshi yaannonsa. Insa afiꞌranke ninke baalunkura bayira atooteeti! Ikkirono shiimu diri albaanni mito coye biddi assinoonni. Jajjabba cimeeyye loosu qeechansa wedellu cimeeyyera uyitanno gede xaꞌminoonninsa. Hatto assinoonnihu hiittoonniiti?

Tenne qixxaawo garinni, woradu aliidi laꞌꞌaanonna Yihowa dirijjite giddo addi addi rosi mine rosiissannori 70 diro ikkannonsa woyite tenne soqqanshote qoosso agurtanno. Qoleno 80 diro ikkinonsa cimeeyye, babbaxxino looso, lawishshaho Sinu Biiro Komite qineessaanonna cimeeyyete bisi qineessaano ikke soqqamate qoosso diro insanni ajjanno cimeeyyera uyitanno. Jajjabba cimeeyye tenne qixxaawora mayi macciishshaminonsa? Insa Yihowaranna dirijjitesira ammanantinota leellishshino!

Keeni yinannihu 49 meddi yaanno diro Sinu Biiro Komite qineessaancho ikke soqqamino rodii togo yiino: “Tenne qixxaawora woꞌmunni woꞌma sumuu yoommo. Hatte qixxaawo kullinke barra soodo widoonni, sinu biiro qineessaancho ikke soqqamannohu diro anenni ajanno rodii hasiisannonketa kule Yihowa  huucciꞌroommo.” Keenira macciishshantino gedee hedo alamete deerrira noohu jajjabbu ammanantino roduuwirano macciishshantinonsa. Insa roduuwinsara soqqama baxxanno daafira, umi qara dadillitannoti dihuluullissannote.

Isperandiyo yinannihu cimeeyyete bisi qineessaancho ikke soqqamanni keeshshino rodii togo yiino: “Tini taashsho shiima geeshsha dadillissinoe. Ikkollana fayyimmaꞌya towaatate yanna hasiissinoe.” Xaano roduu Isperandiyo Yihowara ammaname soqqamaninna songote atoote ikke no.

Seeda yanna woradu aliidi laꞌꞌaano ikkite soqqantanni keeshshitinori wole qoosso uyininsa yannara mayi macciishshaminonsayya? Aleni yinannihu 38 diro woradu aliidi laꞌꞌaancho ikke soqqamino rodii “Tenne afummo woyite lowo geeshsha masoommo” yiino. Ikkollana isi wedella konni loosira qajeelsa horo afidhinota huwatino, hattono ammaname soqqamanni no.

Raasili yinannihu 40 diro woradu aliidi laꞌꞌaanchonna tiokiraasete rosi minna rosiisaancho ikke soqqamino rodii, tini taashsho isonna minaamasi hagiirsiissinonsakkita coyiꞌrino. Isi togo yiino: “Soqqanshote qoossonke lowo geeshsha naandeemmo, hattono tenne soqqansho soqqammanni keeshshate dhuku noonke yine hendoommo.” Raasilinna galtesi afidhino qajeelshanna woꞌnaalsha songonsa halashshaano ledo soqqamate horoonsidhanni no.

Atera aleenni kulli roduuwira iillinonsa gedee coyi iilla hoogiherono, 2 Saamueelira noo xagge, insa daafira wodanchatto gede kaaꞌlitahera dandiitanno.

Hanni Moote Daawiti beetti Abeseloomi finqili woyite ikkinore laꞌno. Daawiti Yerusaalametenni Yordaanoosi Lagira soojjaatoonni noohu Mahinayimi yinanni katama xooqino. Hakkiicho Daawitiranna ledosi noo mannira mitu coyi hasiisinonsa. Hattenne yannara ikkinore qaagatto?

Hakko qooxeessira heeꞌrannohu sasu shaqqadu manni insara kadhite goxxannore, sagalenna wole hasiisannonsa coye uyinonsa. Insa giddo mittu Barzilayi yinanni manchooti. (2 Sam. 17:27-29) Abeseloomi reyita Daawiti Yerusaalame higara kaino; hatte yannara Barzilayi Yordaanoosi Lagi geeshsha geegiissinosi. Daawiti Barzilayi ledosi Yerusaalame haꞌrano gede koyisinosi. Barzilayi “lowo geeshsha dureessa” ikkirono, Moote Daawiti sagale aasira qaale eino. (2 Sam. 19:31-33) Daawiti Barzilayira noosi akatta naadino; hattono ledosi Yerusaalame haꞌre dancha amaale aannosi gede hasiꞌrinoha ikkara dandaanno. Mootete mine heeꞌranna hakko loosa lowo qoossooti!

Ikkollana Barzilayi dhukasi afinoha ikkino daafira, 80 diri geercho ikkinota coyiꞌrino. Isi, “Ani bushanna dancha bada dandeemmoni?”  yiino. (2 Sam. 19:35, NW) Hatto yaasi mayyaate? Barzilayi heeshshosi diro woꞌma lowo hayyo afiꞌrino. Yannate gedensaanni Moote Roobiaami amaali ‘geerri’ gede Barzilayino dancha amaale aa dandaanno. (1 Mot. 12:6, 7; Far. 92:12-14; Law. 16:31) Konni daafira, Barzilayi “bushanna dancha bada dandeemmoni?” yaasi, geedhimmatenni kainohunni dhuka hooginota leellishshannota ikkitara dandiitanno. Isi, geedhimmatenni kainohunni qamasatenna macciishshate dandoosi ajjinota huwatino. (Ros. 12:4, 5) Konni daafira, Barzilayi Daawiti beettosi Kimihami Yerusaalame haaꞌre haꞌranno gede xaꞌmirino.—2 Sam. 19:35-40.

Barzilayi hatte qoosso adha giwinohu geedhino daafiraati; tini qolte isi dhukasi afinoha ikkinota leellishshanno. Aleenni qummi assini taashsho assinoonnihuno konni korkaatiraati. Ikkollana yannankera Yihowa dirijjite laꞌannohu mittu manchi callu dhuka woy dandoo diꞌꞌikkino. Alamete doyichora noote ammanantino cimeeyyera injaannore assa hasiissino.

Kuri dhukansa afinohu geerru roduuwi, lowo diro loossanni keeshshitino looso diro insanni ajjanno roduuwi loossuro, Yihowa dirijjite albinni roore kaajjitannota huwattino. Duucha woyite wedella roduuwa qajeelsitannori geerra roduuwaati; Barzilayi beettosi qajeelsinoha ikkara dandaanno; hattono Phaawuloosi Ximootewoosi qajeelsino. (1 Qor. 4:17; Fil. 2:20-22) Kuri wedellu roduuwi, songote ‘elto’ ikkitino; hattono Kiristoosi ‘biso dhaabbanni’ no.—Efe. 4:8-12; Kiiro 11:16, 17, 29 ledo heewisiisi.

Alamete doyichora noo songuwa giddo heedhannori albita soqqanshote qoossonsa agurtino roduuwi, wole Yihowa looso loosate faro afidhino.

Maarko yinannihu 19 diro songuwa towaatanni keeshshino rodii togo yiino: “Hattenne taashsho assini kawa, songonkera noohu minaannuwinsa Yihowa Farciꞌraasine ikkinokki roduuwira minaannuwansa kaaꞌleemmo faro afiꞌroommo.”

Geraaldo yinannihu 28 diro songuwa towaatanni keeshshino rodii “Ayyaanaamittetenni shoshshoggitinore kaaꞌlatenna haammata manna Qullaawa Maxaafa xiinxallisate haaro mixo fushshiꞌnoommo” yiino. Geraaldo, hakkuyi kawa minaamasinna isi 15 manna Qullaawa Maxaafa xiinxallisanni nootanna ayyaanaamittetenni shoshshoggitinori giddo haammatu xa gambooshshe daa hanaffinota xawisino.

Aleenni kullihu Aleni yinanni rodii togo yiino: “Xa albinni roore sabbakate looso loonseemmo faro afiꞌnoommo. Xa gudumaaleho, daddalu baseranna qachinkera heeꞌranno mannira sabbankanni heeꞌnoommo; insa giddo lamu gambooshshe dagganno.”

Atino albita soqqanshokki qoosso agurte Maganu manni mereero haaro qoosso afiꞌroottoha ikkiro, songo kaaꞌla dandaattoti wole baxxitino doogo no. Diro atenni ajjanno roduuwira afiꞌrootto woꞌnaalsha kulte, Yihowa loosira kaaꞌla dandaatto. Raasili yinannihu aleenni qummi assini rodii togo yiino: “Yihowa worbuulle wedella roduuwa qajeelse horoonsiꞌranni no. Insa roduuwa danchu garinni rosiissanninna towaattanni no!”—“ Wedellu Roduuwi Dandoonsa Seekkite Horoonsidhanno Gede Kaaꞌlensa” yitanno saaxine lai.

Muli yannara wole soqqanshote qoosso uyinoonniheha ikkiro, gara ikkitino lao heedhannohe gede assiꞌri. Konni albaanni giddokkinni kaꞌe loosootto loosi lowo manna kaaꞌlino; xaano hatto assa dandaatto. Konni albaanni banxeemmohente gede xaano banxeemmohe.

Loosootto loosi baalunkunni roore Yihowa wodana tashshi assino. Isi ‘loosokkinna albano ikko xaano qullaawa manna kaaꞌlatenni leellishootto baxille dihawanno.’ (Ibi. 6:10) Kuni qullaawu ayyaaninni borreessinoonni qummeeshshi, Yihowa qaagannohu konni  albaanni assinoommore calla ikkinokkita leellishanno. Yihowa konni albaanni assoottoreno ikko iso hagiirsiisate konni kaꞌa assattore horo dihawanno.

Atera aleenni qummi assinoonni coyi iillinohekkiha ikkara dandaanno. Ikkirono tini hajo ateno laꞌannote. Hiittonni?

Wole soqqanshote qoosso uyinoonninsa roduuwiwa aanattoha ikkiro, insa lowo diro soqqantanni afidhino woꞌnaalshinna kaajjado ammanansa baasa kaaꞌlitannohe. Insa amaale xaꞌmiri. Hattono xa uyinoonninsa looso loossanno woyite alba afidhno woꞌnaalsha horoonsidhnno gara wodanchi.

Ati haaro soqqanshote qoosso uyinoonniheho geercho rodootiro woy wolu garinni soqqantanni noottoha ikkiro, Yihowa isira lowo diro soqqantanni keeshshitinorinna agurtukkinni isira soqqantannori ammanama hawannokkita deꞌooti.