1, 2. (a) Yihowa wolqansa leellishiꞌra hasiꞌranno manniwiinni baxxinoha ikkinohu hiittoonniiti? (b) Konni birxichira maa ronseemmo?

 DUUCHA woyite wolqaataamunna maccaha ikkino manni, wolootaho mootooꞌmanno, hattono kade gashshanno. (Mat. 20:25; Ros. 8:9) Yihowa kayinni hattooha diꞌꞌikkino! Isi Woꞌmanka Dandaannoha ikkirono, guuntete xeꞌne noonsari mannu oosora hedanno. Isi shaqqadohonna mararannoho. Qoleno hasiisannonkere afino. Yihowa “bushsha ikkanke” qaaganno daafira, wolqankera aleenni ikkino coye asse diyaannonke.—Far. 103:13, 14.

² Qullaawu Maxaafi giddo Yihowa mannisira hedannota leellishshannoti batinye lawishshuwa no. Konni birxichira tenne lawishshuwa giddo sase laꞌneemmo. Umihunni, Yihowa wedellichu Saamueeli Kakkalaasinete Biili Eelira yoote sokka kulanno gede shaqqillunni kaaꞌlinosi gara ronseemmo. Layinkihunni Muse Israeele massaga giwita Yihowa iso cince kaaꞌlino gara laꞌneemmo. Sayikkihunni, Yihowa Israeele Gibitsetenni fushshe shaqqillunni massaginonsa gara ronseemmo. Kuri lawishshuwa xiinxallineemmo woyite, tini xagge Yihowa daafira maa rosiissannonkeronna,  tenne xaggenni ninke maa ronseemmoro wodanchate woꞌnaallo.

3. Mitto hashsha wedellichu Saamueelira hiikku rosaminokki coyi tuncu yiinosi? Tini mayine hendeemmo gede assitannonke? (Hanafote noo misile lai.)

³ Saamueeli qullaawu dunkaani giddo Yihowara “soqqama” hanafinohu qaaqqu heeꞌreeti. (1 Sam. 3:1) Mitto hashsha Saamueeli goxe heeꞌreenna mittu haaru coyi ikkino. a (1 Saamueeli 3:2-10 nabbawi.) Isi “Saamueeli!” yitanno huuro macciishshino. Saamueelira hatti Kakkalaanote Biili Eeli huuro labbeennasi Eeliwa dodanni mare, “Woshshittoeni? Kune dayummmowe!” yiino. Eeli “diwoshshoommohe” yiinosi. Kuni coyi lame hige ikkita, Eeli Saamueeli woshshanni noohu Magano ikkinota huwatino. Konnira, Saamueeli maa assannoro kulinosi; Saamueelino Eeli yiinosire assino. Yihowa sokkaasinchu widoonni hasaawisanni noosita umonni Saamueelira kulinosikkihu mayiraati? Qullaawu Maxaafi tenne daafira dikulanno; ikkirono Yihowa hatto assinohu Saamueelira hedino daafira ikkara dandaanno? Hatto yineemmohu mayiraati?

4, 5. (a) Saamueeli Maganu uyinosi looso lainohunni mayi macciishshaminosi? Layinki soodo mayi ikkino? (b) Tini xagge Yihowa daafira maa rosiissannonke?

⁴ Umi Saamueeli 3:11-18 nabbawi. Yihowa Seeri qaaqquullu jajjabba manna hakko iso roorroota ayirrisa hasiissannonsata kulano. (Ful. 22:28; Lew. 19:32) Ikkina qaaqqu Saamueeli soodo gute kae Maganu Eeliranna maatesira yiinota waajjishshanno yoo waajjikkinni Eelira kula dandaannoha lawannohe? Didandaanno! Isinni Qullaawu Maxaafi Saamueeli “waajjino daafira laino ajuuja Eelira dikulino” yaanno. Ikkollana Maganu, Saamueeli hasaawisinota Eeli huwatanno gede assino. Konnira Eeli, Saamueeli “[Yihowa] kulinohere mittoreno maaxxootie” yiino. Saamueelino Eelira hajajame “mitto coyeno maaxikkinni gudise” kulinosi.

⁵ Saamueeli kulinosi sokka Eelira woꞌmunni woꞌma wosincho diꞌꞌikkitinosi. Tini sokka suꞌmasi kulloonnikkihu “mittu himanaanchi” Eelira kulinosiri ledo mittu garite. (1 Sam. 2:27-36) Eelinna Saamueeli xagge, Yihowa wolootaho hedannohanna hayyicha Magano ikkinota leellishshanno.

6. Maganu Saamueeli kaaꞌlino doogonni maa ronseemmo?

⁶ Ati wedellichahoro, wedellichu Saamueeli daafira kultanno xagge, Yihowa iillannohe fonqolo afinotanna mayi macciishshamannohero wodanchannota leellishshanno. Manna ille qasse laꞌꞌa dandaattokkiha ikkiro, jajjabbaho sabbaka waajjishshahera woy darawokkiwiinni baxxoottoha ikka qarrissahera dandiitanno. Yihowa kaaꞌlahera hasiꞌrannota huluullantooti. Konnira huuccattotenni giddokkita isira kuꞌli. (Far. 62:8) Qullaawu Maxaafi giddo kulloonnihu Saamueeli gedee wedelli lawishsha hiinci. Atera iillinohe gedee fonqoli iillinonsari jajjabbano ikko wedellu ayyaanaamittete roduuwikkira hasaaphi. Insa Yihowa heddinokki garinni kaaꞌlinonsahu hiittoonniitiro kultannohe.

7, 8. Yihowa Musera hedannota leellishinohu hiittoonniiti?

⁷ Muse 80 dirihu heeꞌreenna, Yihowa mitto shota ikkinokki looso uyinosi. Muse Israeelete daga Gibitsete borojjimmanni fushsharaati. (Ful. 3:10) Muse Miidiyaami gobbara 40 diro allaalaancho ikke soqqamanni keeshshino daafira, Maganu konne  looso uyisi yannara masinoha ikkara dandaanno. Isi “Feriooniwa mare Israeelete manna Gibitsetenni fushshate ani hiitto ikke dandeemmo?” yiino. Hakkiinni Maganu “Ani ledokki heeꞌre kaaꞌleemmohe” yee jawaachishinosi. (Ful. 3:11, 12) Qoleno Israeelete roorrooti “coyiꞌrattore macciishshitanno” yee qaale einosi. Muse kayinni ‘macciishshalla gibbu?’ yee xaꞌmino. (Ful. 3:18; 4:1) Muse Maganu ledo heewisaminohu gedeeti! Ikkirono Yihowa cincino. Isinni Musera maalale loosate wolqa uyinosi. Qullaawu Maxaafi giddo umo maalale loosinota kulloonni manchi Museeti.—Ful. 4:2-9, 21.

⁸ Hakkuyi gedensaannino Muse wole korkaata shiqishino; Isi ‘ani babbichaho’ yiino. Maganu kayinni “Ani ledokki heeꞌre coyiꞌra dandaatto gede asseemmohe; coyiꞌrattoreno kuleemmohena” yiino. Ikkina Muse tennera maahoyye yiiyya? Diyiino! Hatteentenni isi Maganu wole mancho soyanno gede xaꞌmirino. Yihowa hatte yannara hanqino. Ikkirono Yihowa kaajjado diꞌꞌikkino. Hatteentenni Maganoho Muse qarri leellinosi daafira, Muse bayicho coyiꞌranno gede Aarooni doorino.—Ful. 4:10-16.

9. Yihowa cincanna shaqqille leellishasi Musera kaaꞌlitinosihu hiittoonniiti?

⁹ Tenne xaggenni Yihowa daafira maa ronseemmo? Maganu Woꞌmanka Dandaannoha ikkino daafira, Muse waajjishiishe maahoyye yaanno gede assa dandaanno. Hatteentenni Yihowa shaqqillunninna cincatenni dhukasi afinohanna umosi heeshshi assanno soqqamaanchosi jawaachishinosi. Tini mayi guma abbitino? Muse worba massagaancho ikkino; hattono Yihowa isira assinosinte gede Museno wolootaho shaqqillenna danchumma leellishate sharramino.—Kir. 12:3.

10. Yihowa gede wolootaho hendeemmore ikkanke kaaꞌlitannonkehu hiittoonniiti?

¹⁰ Ninke tenne xaggenni maa ronseemmo? Ati seenne adhoottoha ikkiro, woy ooso iloottoha woy songote cimeessaatiro, mito geeshshi silxaane noohe. Konni daafira, Yihowa gede galtekkira, oosokkiranna songote miillara heda, hattono insara  danchummanna cinca leellisha hasiissannohe! (Qol. 3:19-21; 1 Phe. 5:1-3) Yihowanna Bayiriidi Muse yaano Yesuusi Kiristoosi lawishsha harunsate sharramattoha ikkiro, wolootu huxuxxi yitukki shiqqannohe, hattono wolootaho jawaantete buicho ikkatto. (Mat. 11:28, 29) Qoleno wolootaho dancha lawishsha ikkatto.—Ibi. 13:7.

11, 12. Yihowa Isiraeele Gibitsetenni fushshi woyite waajjitukkinni teesse heedhanno gede assinohu hiittoonniiti?

¹¹ Israeelete daga 1513 K.A. Gibitsetenni fultu yannara, kiironsa sase miliyoone saꞌukki digattino. Insa mereero qaaqqullu, geerru, wole agurina bisu xeꞌne noonsari nafa nooha ikkara dandaanno. Konne batinye manna Gibitsetenni fushshate mannaho hedannohunna shaqqadu Massagaanchi hasiisanno. Yihowa Muse widoonni hattoo Massagaancho ikkinota leellishino. Konninni kainohunni Israeelete daga lophitino qae agurte fultu woyite dimassino.—Far. 78:52, 53.

¹² Yihowa dagasi waajjitannokkinna beꞌe yitannokki gede assinohu hiittoonniiti? Umihunni, isi insa Gibitsetenni fushshinonsahu “olaho qixxaawinohu gede” qinaawino garinniiti. (Ful. 13:18) Insa konni qinaawino garinni fulansa massaganni noonsahu Magano ikkinota addaxxitanno gede assitunsakki digattino. Qoleno Yihowa “barra gomichunni, hashsha giirate xawaabbinni massage” mereeronsa noota buuxxanno gede assinonsa. (Far. 78:14) Wole yaattonni Yihowa togo yiinonsa: “Waajjitinoonte. Ani ledoꞌne heeꞌre massageemmoꞌne; hattono agareemmoꞌne.” Qoleno shiima yanna gedensaanni iillinonsari Israeelete tini jawaante hasiissannonsata leellishano.

13, 14. (a) Yihowa Duumu Baari aana Israeelete hedannota leellishinohu hiittoonniiti? (b) Yihowa Gibitsaawootu aana wolqaataamo ikkinota leellishinohu hiittoonniiti?

¹³ Fulo 14:19-22 nabbawi. Hanni ati Isiraeelete ledo noottohu gede assite hedi. Badhekkiinni Feriooni olanto, albakkiinni qole Duumu Baari no. Hakkiinni Maganu rahe iillihe. Gomichu heelliicho badhekkiinni saꞌe Gibitsootunna kiꞌne mereero uurritu; hakkiinni gomichu Gibitsootaho tunsiisi. Kiꞌne heedhinoonniwi kayinni waraꞌa yee xawi! Hakkiinni Muse angasi baaru aana diriirseenna soojjaati bubbe bubbisse baara lamewa baddeenna doogo kalaqantu. Ati, maatekkinna saadakki, hattono wolu manni ledo qinaawino garinni baara tayissine saꞌini. Doogote sabbuno ikko lixu dino; isinni doogo moolate. Konni daafira, sununni qaafanno manni nafa beꞌe yiikki saꞌꞌa dandaanno.

¹⁴ Fulo 14:23, 26-30 nabbawi. Hatte mereero boꞌnaleessunna gowwu gashshaanchi Feriooni atenna ledokki noo Israeele shorra hanafi. Xaano Muse angasi baaru aana diriirsi. Hatte yannara, kaꞌaanna kawaa noohu gammalu woy girgiddu gede ikke uurrino wayi diigami. Hakkiinni wayi Feriooninna olantosi iti. Insa giddo mittu nafa digatino!—Ful. 15:8-10.

15. Tini xagge Yihowa daafira maa rosiissannonke?

¹⁵ Tini xagge Yihowa qinaawino Magano ikkinota leellishshanno; tenne afanke waajjinummokkinni teense heeꞌneemmo gede kaaꞌlitannonke. (1 Qor. 14:33) Qoleno Yihowa mannisira rahe iillannoha baxillaancho allaalaancho ikkinota leellishino. Isi shaqqillunni towaatannonsa, hattono diinnansa anganni gatisannonsa. Tini alame baꞌanno yanna gambissanni hadhanni noo daafira, Yihowa togoo Magano ikkinota afanke sheshifachishshannonke!—Law. 1:33.

16. Yihowa Israeelete daga gatisino gara afanke kaaꞌlitannonkehu hiittoonniiti?

 ¹⁶ Yannankerano Yihowa mannasi gaamote deerrinni maalaamittetennino ikko ayyaanaamittetenni towaatanno. Isi muli yanna giddo hanafannohu bayiru qarri yannarano agarannonsa. (Aju. 7:9, 10) Konni daafira, ajuno akkaluno, fayyuulluno ikko bisu xeꞌne noonsari, Maganu daga bayiru qarri yannara dishabbarantanno woy dimassanno. b Hatteentenni kawiinni baxxinore assitanno! Insa Yesuusi Kiristoosi coyiꞌrinore qaagganno; isi “Kuni coyi baalu ikka hanafanno woyite, gatoꞌne barri iillinona iima higgine laꞌe” yiino. (Luq. 21:28) Insa Googi yaano Feriooninni roore wolqa afidhinoti buusantino daga siꞌannonsa woyite nafa diwaajjitanno. (Hiz. 38:2, 14-16) Maganu daga waajjitannokkihu mayiraati? Insa Yihowa soorraminokkita affino. Isi xaano baxillaanchonna shaqqado Gatisaancho ikkinota leellishanno.—Isa. 26:3, 20.

17. (a) Yihowa mannasi towaatino gara kultannota Qullaawu Maxaafi xagge xiinxallanke kaaꞌlitannonkehu hiittoonniiti? (b) Aananno birxichira maa ronseemmo?

¹⁷ Konni birxichira laꞌnummo lawishshuwa Yihowa mannisira hedannota, massagannonsatanna gatisannonsata leellishshanno xagge giddo gamatella. Kuri xagge hiincatto woyite, shiimmaadda coye xiinxallite Yihowa akatta daafira huwatate woꞌnaali. Kuri akattasi seekkite xiinxallakki, Maganoho noohe baxillinna ammana lexxitanno gede assitanno. Aananno birxichira wolu mannira hendeemmota leellinshe Yihowa faale haꞌra dandiineemmo gara ronseemmo. Maatenkenna Kiristaanu songo giddo hattono soqqammeemmo yannara wolootaho hendeemmota leellisha dandiineemmo gara laꞌneemmo.