1. Maganu manni mimmitoho baxille leellishannohu hiittoonniiti?

MAGANU manni mitte ayyaanaamitte maateeti; qoleno insa insanaawa baxamanno. (1 Yoh. 4:16, 21) Mite yannara insa roduuwinsara lowore assitara dandiitanno; ikkollana insa duucha woyite baxillensa leellishshannohu shiimmaadda coyibbanniiti. Lawishshaho mimmito jawaachishannore coyidhe woy assite baxillensa leellishshara dandiitanno. Wolootaho shaqqille leellinsheemmohanna hendeemmonsata leellinsheemmoha ikkiro, ‘Maganu baxanno ooso ikkinoommohura iso lambeemmo.’—Efe. 5:1.

2. Yesuusi Maganu gede baxille leellishinohu hiittoonniiti?

² Baalunkunni roore Annisi lawishsha harunsinohu Yesuusaati. Isi togo yiino: “Duhu ayirrinoˈneri baalu anewa amme! Ani fooliishshiisheemmoˈne. . . . Ani joogahonna shaqqadoho.” (Mat. 11:28, 29) Yesuusi lawishsha harunsine ‘gadadaammaho’ hendeemmota leellinsheemmoha ikkiro, iimi Annanke hagiirsiinseemmo, hattono lowo harshammo afiˈneemmo. (Far. 41:1) Hanni maatenkera, roduuwinkeranna qanchu soqqanshowa xaandeemmo mannira hendeemmota leellisha dandiineemmo gara laˈno.

3. Minaanni minaamasira hedannota leellisha dandaannohu hiittoonniiti? (Hanafote noo misile lai.)

³ Minaanni mini giddo baxille leellishe wolootaho dancha lawishsha ikka hasiissannosi. (Efe. 5:25; 6:4) Lawishshaho, Qullaawu Maxaafi minaanni minaamasi ledo ‘wodanchatenni heeˈra’ yaano minaamasira hedanna shaqqille leellisha hasiissannosita kulanno. (1 Phe. 3:7) Minaamasira hedanno minaanni, duucha doogonni minaamasiwiinni baxxinoha ikkinota afino; ikkirono, isi minaamasi woffi asse dilaˈˈanno. (Kal. 2:18) Konni daafira isera hedannota leellishanno, hattono ayirrisannose. Mitte Kanaadaho heedhanno mancho minaannise daafira coyidhanni togo yitino: “Isi hedoˈya horo dimishanno; woy ‘Hatto yite hedakki digaraho’ diyaannoe. Qoleno isi coyiˈreemma woyite seekke macciishshanno. Hedoˈya biddi assiˈreemma gede kaaˈlannoe, isi hatto assannohu shaqqillunniiti.”

4. Minaanni minaamasira hedannota leellisha dandaannohu hiittoonniiti?

⁴ Minaamasira hedanno minaanni, wole meyatera gara ikkinokki baxille dileellishanno. Qoleno dagoomittete webisayite widoonni gara ikkinokkire diassanno. (Iyo. 31:1) Minaamasira ammanamannohu baxannose daafira calla ikkikkinni Magano baxannonna bushare giwanno daafiraati.—Faarso 19:14; Amootsi 5:15 nabbawi.

5. Minaama minaannisera heddannota leellisha dandiitannohu hiittoonniiti?

⁵ Minaanni, umosi ikkinoha Yesuusi Kiristoosi lawishsha harunsannoha ikkiro, minaamasira iso ‘ayirrisa’ diqarrissannose. (Efe. 5:22-25, 33) Minaama minaannase ayirrissannoha ikkiro, isira songote loosi batiˈrannosi woyite woy qarru iillannosi woyite qarrisi leellannose. Biritaaniyaho heeˈranno rodii minaamasi daafira coyiˈranni togo yiino: “Minaamaˈya ikkitoˈya laˈe qarrisinoeri noota huwattanno. Hakkiinni isera hasaapha dandeemmore ikkiro, Lawishsha 20:5te nooha xintu seera harunsite giddoˈyata afate woˈnaaltanno.”

6. Ninke baalunku qaaqquullu wolootaho heddanno gede jawaachisha dandiineemmohu hiittoonniiti? Togo assa oosote kaaˈlitannohu ma garinniiti?

⁶ Minaanninna minaama mimmitoho hedannoha ikkiro, oosonsara dancha lawishsha ikkanno. Qoleno insa oosonsara wolootaho heda dandiinanni gara rosiisa hasiissannonsa. Lawishshaho, annuwunna amuuwu oosonsa Gambooshshu Addaraashe giddo dodantannokki gede rosiisa dandiitanno. Lowo manni gamba yiinowa, sagale jajjabbu manni adha geeshsha agartanno gede annuwunna amuuwu oosonsara kula dandiitanno. Songote giddo noori baalu annuwanna amuuwa kaaˈla dandiitanno. Mittu qaaqqi dancha coye assannonke woyite lawishshaho saanqa faninkero galata hasiissannonke. Hatto assa qaaqquulle jawaachishsharanna ‘adhannonkunni roore aannohu’ hagiirraamo ikkinota rossanno gede assitara dandiitanno.—Soq. 20:35.

7. Yesuusi macciweelu manchira hedannota leellishinohu hiittoonniiti? Ninke Yesuusi lawishshinni maa ronseemmo?

⁷ Mitte hige Yesuusi Dikaapoolisi yinanni qooxeessira heeˈreenna mannu “macciweelonna danqicha mancho isiwa” haaˈre abbino. (Maq. 7:31-35) Yesuusi iso mannu mereero hursa agure, “mannuwiinni bade qacce fushshe” hursino. Isi hatto assinohu mayiraati? Kuni manchi macciweelo ikkino daafira, Yesuusi iso lowo manni noowa hursisiro tashshi yaa hoogasira dandaanno. Yesuusi qacce fushshe hursinosihu tenne wodanchino daafira ikkara dandaanno. Ninke maalaletenni hursa dandiineemmokkiti egennantinote. Ikkirono, ayyaanaamittete roduuwinkera shaqqillenna danchumma leellisha dandiineemmo; qoleno hatto assa hasiissannonke. Soqqamaasinchu Phaawuloosi togo yee borreessino: “Baxille afiˈratenna dancha looso loosate mimmitonke kakkayinso.” (Ibi. 10:24) Yesuusi macciweelu  manchira mayi macciishshamannosiro wodanche shaqqille leellishinosi. Isi ninkera dancha lawishsha ikkinonke!

8, 9. Geerrahonna dhuka hoogginorira hendeemmota leellisha dandiineemmohu hiittoonniiti? (Lawishshuwa kuli.)

⁸ Geerrahonna dhukiweelootaho hedde. Addu Kiristaana bande anfannihu loosannohu lowo loosinni ikkikkinni leellishanno baxillinniiti. (Yoh. 13:34, 35) Baxillu geerranna dhukiweeloota roduuwanke gambooshshe daannonna soqqansho fulanno gede kaaˈlate dandiinummore baala assineemmo gede kakkayisannonke. Insa gambooshshe daye woy soqqansho fule assannori shiimare ikkiro nafa, hatto assanno gede kaaˈla hasiissannonke. (Mat. 13:23) Mikaeeli bisu xeˈne noonsari ofoltanno gaarenni harannoha ikkirono, maatesinna soqqanshote gaamosira noo roduuwi kaaˈlitannosi kaaˈlo baasa naadanno. Isi togo yiino: “Duucha woyite gambooshshe haˈreemmohunna soqqansho ganye fuleemmohu insa kaaˈlonniiti. Roorenkanni gudumaalu soqqansho baasa baxeemmo.”

⁹ Batinye Beeteelera geerrunna dhuka hoogino roduuwi no. Baxillaano ikkitinori aliidi laˈˈaano kuri ammanantino roduuwi sokka borreessite woy silketenni farcidhanno gara qixxeessite shaqqille leellishshannonsa. Biili yinannihu 86 diro ikkinosi rodii xeertote heeˈranno mannira sokka borreesse farciˈranno; isi, “Sokka borreesse farciˈrate qoosso lowo geeshsha naandeemmo” yiino. Nansii yinanniti 90 diri balla ikkannose rodoo togo yitino: “Sokka borreesse farciˈra poosta soyate gede asse calla dilaeemma. Tini umise qanchu soqqanshooti. Mannu halaale afa hasiissannonsa!” Eteeli yinanniti 1921nni ilantino rodoo togo yitino: “Lowo diro dhibbu waadanni keeshshinoe. Mito woyite isinni uduunne uddiˈra nafa didandeemma.” Ikkirono ise silketenni farciˈra baxxanno; qoleno galagalte hasaawissanno manna afidhino. Berbiira yinanniti 85 diro ikkannose rodoo togo yitino: “Dhiwannoe daafira, soqqansho ganye fula didandeemma. Ikkollana silketenni farciˈra woloota hasaawiseemma gede kaaˈlitinoe. Tennera Yihowa galaxxeemmasi!” Mitto diro meddi yitanno yanna giddo, kuri muxxe ikkinohu geerru roduuwinke soqqanshotenni 1,228 saate sayisino; 6,265 ikkitannota borrote sokka borreessino; hattono 2,000 hige mannaho silke bilbile farciˈrino; qoleno 6,315 ikkitanno borro elino! Insa sharro Yihowa wodana tashshi assitannoti dihuluullissannote!—Law. 27:11.

10. Roduuwinke Kiristaanu gambooshshinni woˈmunni woˈma horo afidhanno gede kaaˈla dandiineemmohu hiittoonniiti?

¹⁰ Kiristaanu Gambooshshiwa wolootaho heddinannita leellishshe. Roduuwinke gambooshshunni horo afidhara hasiˈneemmo. Insara hendeemmota leellinsheemmoha ikkiro qole, gambooshshunni horo afidhara dandiitanno. Hatto assa dandiineemmohu hiittoonniiti? Tenne assa dandiineemmo doogga giddo mitte, hedonsa billaallitannokki gede gambooshshe yannate haˈrate. Hendoommokki coyi tuncu yiinkero barrisiˈneemmo woyiti heeˈrara dandaanno. Ikkollana duucha woyite barrisiˈneemmoha ikkiro, tenne woyyeessiˈra dandiineemmo gara heda hasiissannonke. Qoleno gambooshshe koyissinonkeri Yihowanna Beettosi ikkitinota deˈnoonke. (Mat. 18:20) Gambooshshe yannante haˈranke, insa ayirrinseemmota leellishshanno!

11. Gambooshshunniwa kifile shiqishshannori 1 Qorontoosi 14:40te noo biddishsha harunsa hasiissannonsahu mayiraati?

¹¹ Roduuwinkera hendeemmota leellinsheemmoha ikkiro, “baalunku coyi seerunninna amanyootunni ikkona” yaanno biddishsha harunsinanni heeˈnoommo. (1 Qor. 14:40) Kifile shiqishshanno roduuwi uyinoonninsa yanna agadhitannoha ikkiro, konne biddishsha ayirrissanno. Hatto assitannoha ikkiro, insanni aane kifile shiqishannohuranna songo woˈmate heddannota leellishshanno. Mitu roduuwira mininsa gambooshshu bayichinni xeertiˈrannoha ikkara dandaanno. Mitootu qolte gambooshshuwiinni mininsara higate makeena agadhitannoha woy lekkatenni seeda saate hadhannoha ikkara dandaanno. Mitu roduuwira  kayinni minaanninsa woy minaamansa Yihowa Farciˈraasine ikkitinokki daafira qaera yannante higgara hasidhannoha ikkara dandaanno.

12. Cimeeyyete “lowo ayirrinyi” hasiisannonsahu mayiraati? (“ Albisa Ikkite Soqqantannorira Hedde” yitanno saaxine lai.)

¹² Cimeeyye songotenna qanchoho diinaggaabbe loossanno daafira baxxino ayirrinyenna baxille leellisha hasiissannonke. (1 Teselonqe 5:12, 13 nabbawi.) Cimeeyye ate kaaˈlate yite assitannore naadattoti egennantinote. Konnira woˈmante yannara, insa baxillunni kaaˈlite assitannore naadattota leellisha dandaatto. Baalunkunni roore, “Insa xaˈmantanno daafira, [ate] lubbora yite diinaggaabbanno.”—Ibi. 13:7, 17.

13. Yesuusi mannaho assinorinni maa ronseemmo?

¹³ Isayaasi Yesuusi daafira togo yee masaalino: “Dabbino shomboqqo nafa dihiiqqanno; baˈˈara rahino caabbicho dixoyissanno.” (Isa. 42:3) Yesuusi manna baxanno daafira, insa mararinonsa. Isi lawishshu garinni dabbino shomboqqonna xoara kaino caabbichi gede ikkitinore mararino. Konni daafira isi insara shaqqillenna cinca leellishinonsa. Qaaqquullu nafa Yesuusiwa shiqa diwaajjitino. (Maq. 10:14) Ninke Yesuusi geeshsha manna mararanna rosiisa didandiineemmo! Ikkirono qoqqowinkera heeˈranno mannira heda dandiineemmo; qoleno hatto assa hasiissannonke. Coyiˈneemmo gari, marreemmo yannanna keeshshineemmo yanna insara hendeemmoronna teˈee leellishshanno.

14. Manna hasaawinseemmo woyite coyiˈneemmo gara seekke heda hasiissannonkehu mayiraati?

¹⁴ Manna ma garinni hasaawisa hasiissannonke? Xaa yannara lowo miliyoone ikkanno manni bushuullunna mararro noonsakkiri daddalu, poletikunna ammaˈnote massagaano beebba assidhannonsa daafira, “qarramenna gara hawe” no. (Mat. 9:36) Konninni kainohunni batinyu manni wole  manna diammananno, hattono hexxo mudhino. Konni daafira, coyiˈneemmo garinna horoonsiˈneemmo qaalla, shaqqaddanna mararreemmore ikkinoommota leellishshannota ikka hasiissannose! Batinyu manni sokkanke macciishsha hasiˈrannohu, Qullaawa Maxaafa seekkine rosiinseemmonsa daafira calla ikkikkinni, insa daafira hendeemmonna ayirrinseemmonsa daafiraati.

15. Farciˈneemmo mannira hendeemmota leellisha dandiineemmohu hiittoonniiti?

¹⁵ Farciˈneemmo mannira hendeemmota leellisha dandiineemmoti duucha doogga no. Lawishshaho xaˈmuwa rosiisate horoonsiˈra dandiineemmo. Ikkollana xaˈmineemmo woyite ayirrinyunninna shaqqillunni xaˈma hasiissannonke. Mittu suwisaanchi manna ille qase laˈˈa waajjannohu batinyu manni noo qoqqowira soqqamanno; isi insa dawaro qolte affannokki xaˈmo dixaˈmanno; korkaatuno qola hoogguro saaltara dandiitanno. Lawishshaho isi ‘Maganu suˈma afootto?’ woy ‘Maganu Mangiste maatiro afootto?’ yee dixaˈmanno. Hatteentenni isi, “Qullaawu Maxaafinni Maganu suˈmi ayetiro rosoommo. Suˈmisi ayetiro kulohe?” yaanno. Budunna mannu mannu gari babbaxxara dandaanno daafira seera fushsha didandiinanni. Ikkirono woˈmante yannara wolootaho hedanna manna ayirrisa hasiissannonke. Hatto assate insa daafira seekke afa hasiissanno.

16, 17. (a) Mannu minira marreemmo yanna doodhineemmo woyite insara hendeemmota leellisha dandiineemmohu hiittoonniiti? (b) Mageeshshi yanna hasaawinseemmoro doodhineemmo woyite danchumma leellisha dandiineemmohu hiittoonniiti?

¹⁶ Mannu minira mara hasiissannonkehu hiitte yannaraati? Minunni mine haˈneemmo woyite mannu mininsara marreemmota diafino. Konni daafira, insa roore hasaawa hasiˈranno yannara mara hasiissannonke! (Mat. 7:12) Lawishshaho qoqqowiˈnera mannu Qidaamenna Sambata goxe keeshshanno? Hatto ikkiro, minunni mine hadhinara albaanni doogotenna gudumaaleho soqqama woy injaannonsa manna galagaltine martine hasaawisa dandiitinanni.

¹⁷ Mageeshshi yanna keeshsha hasiissannonke? Xaa yannara batinyu mannira loosu batiˈrannonsa; konni daafira, hakko iso umo hasaawinseemmo woyite, mayira marroommoro haransine kula hasiissannonke. Qoleno lowo yanna keeshsha hoongummoro danchaho. (1 Qor. 9:20-23) Mannu loosu batiˈrinonsati leeltinonketa afiro, wole woyite marreemmo yannara macciishshankera dandaanno. Soqqammeemmo woyite qullaawu ayyaani laalo ikkitino akatta leellisha hasiissannonke. Hatto ikkiro, “Maganu ledo loonseemmore” ikkinoommota leellinsheemmo. Wole agurina Yihowa ninke horoonsiˈre mannu halaalu minira daanno gede assara dandaanno.—1 Qor. 3:6, 7, 9.

18. Wolootaho hendeemmoha ikkiro mayi atoote afiˈneemmo?

¹⁸ Konni daafira, maatetenna songote giddo, hattono soqqammeemmo woyite wolootaho hendeemmota leellinsho. Hatto assineemmoha ikkiro, xaano ikko albillitte lowo atoote afiˈneemmo. Faarso 41:1, 2 togo yitanno: “Gadadaammu daafira xissiisiˈrannohu baˈraaˈrinoho; Kaaliiqi qarru barra gatisannosi. . . . Baattote aanano maassaminoho yinanna heeˈranno.”