1-2. (a) Armagedooni quqquxamme agadhineemmohu mayiraati? (b) Konni birxichira hiikkuri xaꞌmuwara dawaro afiꞌneemmo?

 MANNU mitto lowo geeshsha waajjishanno coye woy kalaqamu dano xawisate “Armagedooni” yaanno qaale horoonsiꞌranna macciishshite egennootto? Qullaawu Maxaafi Armagedooni daafira kulannori kayinni hagiidhineemmo gede assannonkereeti! (Aju. 1:3) Armagedooni oli mannu sircho gudannoha ikkikkinni mannu ooso gatisanno olaati! Hatto yineemmohu mayiraati?

² Qullaawu Maxaafi Armagedooni oli mannu gashshoote hune mannu sircho gatisannota kulanno. Kuni oli bushuulle hune keeraano gatisanno olaati. Qoleno qaenke ikkitino uulla baotenni gatisanno. (Aju. 11:18) Tenne hedo seekke huwatate hanni aante noota shoole xaꞌmuwa xiinxallino: Armagedooni maati? Armagedooni hanafara albaanni mayi ikkanno? Armagedooni olinni gata dandiineemmohu hiittoonniiti? Armagedooni oli gambisanno woyite ammanamme heeꞌra dandiineemmohu hiittoonniiti?

3. (a) “Armagedooni” yaa mayyaate? (b) Yohaannisi Ajuuja 16:14, 16 kultanno garinni, Armagedooni lawishshu bayichooti yineemmohu mayiraati?

³ Yohaannisi Ajuuja 16:14, 16 nabbawi. Qullaawa Borro giddo “Armagedooni” yaanno qaali noohu mitto bayicho callaati; kuni qaali dayinohu “Megido Ilaala” yitanno tiro afiꞌrinohu Ibiraawootu Afii qaalinniiti. (Aju. 16:16) Megido hunda Israeelete gobbara noo katamaati. (Iya. 17:11) Ikkollana uullate aana Armagedooni yinanniwi dino. Armagedooni, “gosa baalate mootoolla” Yihowa ledo hettisante gamba yitanno ikkitooti. (Aju. 16:14) Ikkollana konni birxichira “Armagedooni” yaanno qaale  horoonsiꞌnoonnihu, uulla woꞌmate mootoolla gamba yitu gedensaanni bayichonko hanafanno ola xawisateeti. Armagedooni lawishshu bayicho ikkinota afa dandiineemmohu hiittoonniiti? Umihunni, Megido Ilaala yinanni bayichi dino. Layinkihunni, Megido qooxeessira noo bayichi shiima ikkino daafira, “gosa baalate mootoolla,” olamaasinensanna olu uduunnensa dihaaꞌranno. Sayikkihunni, konni birxichira ronseemmonte gede Armagedooni oli hanafannohu “mootoolla” Maganu manna siꞌanno woyiteeti; Maganu manni noohu qole alame woꞌmate babbaxxino qooxeessiraati.

4. Yihowa jeefonniha bayira ola Megido ledo xaadise coyiꞌrinohu mayiraati?

⁴ Ikkina Yihowa jeefonniha bayira ola Megido ledo xaadise coyiꞌrinohu mayiraati? Megidonna hakko qooxeessira noohu Iyiziraeelie yinanni xeichira lowo gosa olantino. Konni oli yannara, Yihowa mannisi diinnansa qeelanno gede kaaꞌlinonsa woyiti no. Lawishshaho, “Megido Wayibba mule” Maganu Israeelete Daanyi Baaraaqi, Sisaara massagannota Kanaani olanto qeelanno gede kaaꞌlino. Yihowa maalaletenni qeeltanno gede kaaꞌlinonsa daafira Baaraaqinna masaalaancho Diboora iso galattino. Insa togo yite faarsitino: “Gordoho noo beeddahe olantu. . . . Haꞌrinshonsanni Sisaara ledo gaarantu. Qishooni Wayi fee haaꞌre haꞌrinsa.”—Eje. 5:19-21.

5. Baaraaqiuu olantu olinna Armagedooni oli mereero mayi badooshshi no?

⁵ Baaraaqinna Diboora jeefote togo yaanni faarsino: “Kaaliiqa [“Yihowa,” NW] baarigaarrakki togo ikkite baꞌo; ate baxxannori kayinni, soodo arrishsho gede xabbo.” (Eje. 5:31) Hatteente gede, Armagedooni yannarano Maganu diinna baꞌanno; Magano baxxannori kayinni gattanno. Ikkollana, Baaraaqiuu olantu olinna Armagedooni oli mereero lowo badooshshi no. Armagedooni oli yannara Maganu manni diolamanno. Insa olu uduunne nafa diqodhitanno! Insa Yihowanna iimi olantosi addaxxitanno daafira, ‘jawaante afidhanno.’—Isa. 30:15; Aju. 19:11-15.

6. Armagedooni oli yannara Yihowa diinnasi mayinni hunara dandaanno?

⁶ Maganu Armagedooni oli yannara diinnasi hunannohu hiittoonniiti? Isi hatto assannohu babbaxxitino doogonni ikkara dandaanno. Lawishshaho, isi uullate huxano, kaadenna banqo horoonsiꞌrara dandaanno. (Iyo. 38:22, 23; Hiz. 38:19-22) Qoleno diinnasi mimmito guddanno gede assara dandaanno. (2 Dud. 20:17, 22, 23) Hattono bushuulle hunate sokkaasinesi horoonsiꞌrara dandaanno. (Isa. 37:36) Yihowa horoonsiꞌrannori ikkireno ikkiro, qeelle isite. Diinnasi baalanti baꞌanno. Keeraano baalanti kayinni gattanno.—Law. 3:25, 26.

7-8. (a) Umi Teselonqe 5:1-6 kultanno garinni, alamete gashshanno hiikkonne baxxino lallawo lallabbanno? (b) Kuni lallawi gawajjanno kaphooti yineemmohu mayiraati?

⁷ Yihowa barri daara albaanni “salaamenna teense heeꞌnanni yanna daggino” yine lallambanni. (1 Teselonqe 5:1-6 nabbawi.) Umi Teselonqe 5:2 kulloonnihu Yihowa barri ‘bayira qarra’ riqiwanno. (Aju. 7:14) Bayiru qarri rahinota leellishannori maati? Qullaawu Maxaafi mitto baxxino lallawo lallambannita kulannonke. Kuni lallawi bayiru qarri hanafara kainota leellishanno malaateeti.

⁸ Kuni lallawi, masaalotenni kulloonniho “salaamenna teense heeꞌnanni yanna daggino” yine lallambanni lallawooti. Alamete gashshaano konne lallawo lallabbannohu mayiraati? Ammaꞌnote murrooti insa ledo konne lallawo lallabbanno? Lallabbannoha ikkara dandaanno. Ikkihano ikkiro, kuni lallawi agaaninte tuqissanno kaphi wido ikkinoti egennantinote. Ikkollana kuni kaphi wolu kaphu baalunkunni roore gawajjannoho; korkaatuno hundinni  kayise ikke egenninokkihu bayiru qarri hanafara rahe heeꞌreenna mannu beebba deseꞌe yaanno gede assanno. Hakkiinni “godowinni noo mancho amaddanno game gede bao hedeweelcho daggannonsa.” Maganunniti ammanantino soqqamaasinena? Yihowa barri hedeweelcho hanafasinni dhagge assidhannoha ikkirono, qixxaabbe agadhitanno daafira dimassanno.

9. Yihowa Sheexaanu alame baalanta mitte hige hunanno?

⁹ Yihowa Nohi waro assi gede, Sheexaanu alame baalanta mitte hige dihunanno. Tini bao lame gafa afidhino. Balaxe, alamete aana noota kaphu ammaꞌno baala riqibbannota Bayira Baabiloone hunanno. Hakkiinni gattinota Sheexaanu alame yaano poletika, olu ledo xaadooshshe afiꞌrinore, hattono daddalu dirijjitta baala Armagedooni olinni hunanno. Hanni tenne lamenta qara ikkito seekkine xiinxallino.

10. Yohaannisi Ajuuja 17:1, 6 nna 18:24 kultanno garinni, Yihowa Bayira Baabiloone hunannohu mayiraati?

¹⁰ Bayira fotaanchora yinanni yoo. (Yohaannisi Ajuuja 17:1, 6 nna 18:24 nabbawi.) Bayira Baabiloone Maganu suꞌmi mishamanno gede assitino. Ise Maganu daafira kapho rosiissino. Uullate gashshaano ledo buusamatenni ayyaanaamittetenni foortino. Ise silxaanesenna wolqase irko assidhe miillase mulqitino. Qoleno Maganu soqqamaasinetano ikko wolu batinyu manni mundee duntino. (Aju. 19:2) Ikkina Yihowa Bayira Baabiloone hunannohu hiittoonniiti?

11. ‘Duumu moyichi’ maa riqiwanno? Kuni moyichi Maganu Bayira Baabiloonera yiino yoo woꞌmitanno gede assannohu hiittoonniiti?

¹¹ Yihowa ‘duumu moyichi aana nooha tonne buuda’ horoonsiꞌre bayira fotaancho hunanno. Duumu moyichi Buusantino Mangistubba riqiwanno. Tonnu buudi kayinni, xaa yannara tenne dirijjite kaaꞌlanni nooha poletiku gashshoote baala riqiwanno. Maganu murino yanna iillitanno woyite, insa Bayira Baabiloone hunate kaꞌanno gede assanno. Insa Bayira Baabiloone “afidhinore baala mulqite mullicho agurtannose”; hattono bunshese xawo fushshitanno. (Aju. 17:3, 16) Mittu barri geeshshita labbannoti tini hedeweelcho bao miillase baasa  masissanno. Korkaatuno tini fotaancho alba, “Gunnittete gede ikkikkinni, mootittete gede ikke ofolloomma. Dadillu horo diamadannoe” yite naaxxitanno.—Aju. 18:7, 8.

12. Maganu buusantino daga ma assitara difajjanno? Mayira?

¹² Maganu, buusantino daga mannasi huntara difajjanno. Korkaatuno mannisi suꞌmisinni woshshamannoho; hattono ‘Bayira Baabiloonenni fulle!’ yee hajajinonsa hajajo ayirrise ise giddonni fulino. (Soq. 15:16, 17; Aju. 18:4) Qoleno insa wolu mannino Bayira Baabiloonenni fulanno gede kaaꞌlitanni keeshshitino. Hakko daafira Maganu manni fotaanchote ‘qoomama dibeeqqanno.’ Ikkirono, ammanansa fonqolannori iillannonsa.

13. (a) Googi ayeti? (b) Hiziqeeli 38:2, 8, 9 kultanno garinni Armagedooni yinannihuwa lawishshu bayicho Googi massannohu ayeti?

¹³ Googi sia. (Hiziqeeli 38:2, 8, 9 nabbawi.) Baalanti kaphu ammaꞌno dirijjitta baꞌu gedensaanni, Maganu manni wole haqqe baala hombobalatte guddeenna callase xawoho gattino haqqicho gede ikke leellanno. Hatte yannara Sheexaanu lowo geeshsha hanqannoti egennantinote. Isi hanqosi leellishate, ‘battete ayyaannanni’ coyiꞌnoonni qaalla yaano agaanintete totao horoonsiꞌre buusantino daga Maganu manna siate kaꞌanno gede assanno. (Aju. 16:13, 14) Tenne buusantino daga ‘Maagoogi Googi’ yinanni. Tini daga Maganu manna sia hanaffanno woyite, Armagedooni yinannihuwa lawishshu bayicho iillitinohu gedeeti.—Aju. 16:16.

14. Googi maa huwatanno?

¹⁴ Googi ‘mannu wolqa’ yaano olantote wolqasi addaxxanno. (2 Dud. 32:8) Ninke kayinni Maganonke Yihowa addaxxineemmo; hatto assanke dagate gowwimma labbara dandiitanno. Korkaatuno wolqaataame ikkitinota Bayira Baabiloone magannase ‘moyichunninna tonne buuddanni’ gatissasera didandiitino. (Aju. 17:16) Hakko daafira buusantino daga Maganu manna huna diqarrissannonke yite heddanno. Insa “baatto guggushshino gomichi gede ikkite” Yihowa manna siꞌanno. (Hiz. 38:16) Bayichonko kayinni woshshaado amaddinonsata huwattanno. Feriooni Duumu Baarira ikkinte  gede, Googino olamanni noohu Yihowa ledo ikkinota huwatanno.—Ful. 14:1-4; Hiz. 38:3, 4, 18, 21-23.

15. Yesuusi Armagedooni oli yannara maa assanno?

¹⁵ Kiristoosinna iimi olantosi Googinna miillasi hunte Maganu manna gatissanno. (Aju. 19:11, 14, 15) Ikkollana kaphu totainni buusantino daga Armagedoonira gamba yitanno gede assinohunna Yihowara qara diina ikkinohu Sheexaanu ma ikkannoyya? Yesuusi isonna agaanintesi diimete tuge kume diro usurannonsa.—Aju. 20:1-3.

16. (a) ‘Magano egenninoommota’ leellisha dandiineemmohu hiittoonniiti? (b) Yihowa egennanke Armagedooni oli yannara lowo atoote afiꞌneemmo gede assitannonke yineemmohu mayiraati?

¹⁶ Yihowa mine keeshshinoommo diri ikki geeshshihano ikkiro, Armagedooni ola gante saꞌꞌate ‘Magano egenninoommotanna Mootichu Yesuusihura danchu duduwira hajajammeemmota’ leellisha hasiissannonke. (2 Tes. 1:7-9) Magano egenninoommo yineemmohu isi giwannorenna baxannore, hattono biddishshasi huwantummorooti. Qoleno Magano banxeemmohanna isira hajajammeemmoha ikkiro, hattono iso calla magansiꞌneemmoha ikkiro, Magano egenninoommota leellinsheemmo. (1 Yoh. 2:3-5; 5:3) Magano egenninummoro isino ‘egennannonke’; qoleno tini lowo ayirrinyeeti; hattono Armagedooni ola gante saꞌneemmo gede assitannonke. (1 Qor. 8:3) Hatto yineemmohu mayiraati? Korkaatuno ‘Maganu egenninke’ yaa iso hagiirsiinsoommo yaate.

17. ‘Yesuusihura danchu duduwira hajajammeemmota’ leellisha dandiineemmohu hiittoonniiti?

¹⁷ ‘Mootichinke Yesuusihu danchu duduwi’ Maganu Qaali giddo nooho isi rosiisino halaale baalaho. Yesuusihura danchu duduwira hajajammeemmota leellinsheemmohu heeshshonke giddo konne halaale harunsineemmoha ikkirooti. Qoleno Maganu Mangiste balaxisiisanke, Maganunniha xalala seera harunsanke hattono Maganu Mangistere duduwanke Yesuusihura danchu duduwira hajajammeemmota leellishshanno. (Mat. 6:33; 24:14) Buuramino  Kiristaani uyinoonninsaha shota ikkinokki looso loossanno woyite insa kaaꞌlano tenne leellishshanno.—Mat. 25:31-40.

18. Buurantinori Kiristoosiri roduuwi, wolu geꞌreewi wido ikkino Kiristaani assinonsa danchummara galata qoꞌlitanno faro afidhannohu hiittoonniiti?

¹⁸ Muli yanna giddo buurantinoti Maganu soqqamaasine “wolu geꞌreewi” assinonsa danchummara galata qoꞌlitanno faro afidhanno. (Yoh. 10:16) Hiittoonni? Armagedooni oli hanafara albaanni 144,000 wido ikkinohu buuramino Kiristaani baalu iimira haꞌre reyitannokkita ayyaanaamittete heeshsho afiꞌranno. Hakkiinni insa iimi olanto ledo halante Googi huntanno, hattono geꞌreewunni lawinsoonnire ‘lowo daga’ wido ikkino manna gatissanno. (Aju. 2:26, 27; 7:9, 10) Konni daafira, wole daga wido ikkino Kiristaani, buurantinoti Yihowa soqqamaasine uullate aana heedheenna insa kaaꞌlate qoosso afiꞌransanni tashshi yaannonsa!

19-20. Armagedooni oli hanafanno yanna gambissanno woyite lowo qarri iillannonkeha ikkirono, ammanamme heeꞌrate mayi kaaꞌlannonke?

¹⁹ Tenne heeꞌnoommote goofimarchu yannara, Yihowa soqqamaasinera babbaxxino qarri iillannonke. Ikkirono hagiirrinke baikkinni cincine heeꞌra dandiineemmo. (Yai. 1:2-4) Tennera kaaꞌlannonkehu qaru coyi giddonkenni ganyine huucciꞌrate. (Luq. 21:36) Qoleno, Maganu Qaale barru baala nabbawanna hiinca hasiissannonke; hattono Qullaawu Maxaafi giddo muli yannara woꞌmitanno yine masaalloonni masaalo xiinxalla hasiissannonke. (Far. 77:12) Hatto assankenna woꞌma giddonni soqqamanke ammanatenni kaajjine heeꞌneemmo gedenna hexxonke xabbe leeltannonke gede kaaꞌlitannonke.

²⁰ Bayira Baabiloone baꞌanno woyitenna Armagedooni oli gumulamanno woyite mageeshshi geeshsha hagiidhineemmoro hanni hedi! Hatte yannara roore hagiirsiissannonketi kayinni Yihowa suꞌmi qullaawatenna gashshootisi gara ikkinoti xabbe leellate! (Hiz. 38:23) Addanko, Magano egentinori, Beettisira hajajantannorinna jeefote geeshsha kaajjite heedhannori Armagedooni ola quqquxante agadhitanno.—Mat. 24:13.