1. Yihowara soqqama qarra ikkitankera dandiitannohu hiittoo woyiteeti?

 YIHOWARA soqqama roore qarra ikkitannohehu hiittoo woyite lawannohe? Qarru batiꞌrino woyiteetinso keeru yannaraati? Qarru yannara Yihowa addaxxa diqarrissannonke. Ikkina keeru yannara maa assineemmo? Maganoho soqqama qarra ikkitannonke? Yihowa togoori ikkara dandaannota afino daafira Israeelete manna qorowisiisinonsa.—Mar. 6:10-12.

2. Moote Aasa dancha lawishsha ikkinonkehu hiittoonniiti?

² Moote Aasa woꞌmunni woꞌma Yihowa addaxxe dancha lawishsha ikkinonke. Isi qarru yannara calla ikkikkinni keeru yannarano Yihowara soqqamino. “Aasa lubbotenni heeꞌri geeshsha, coꞌo yiino wodaninni Kaaliiqira ammaname heeꞌrino.” (1 Mot. 15:14) Aasa Yihowara woꞌmu wodaninni ammanaminota leellishino doogga giddo mitte kaphu maganna Yihudu gobbanni coꞌo asse huneeti. Qullaawu Maxaafi, “Wole magannaha kakkalote darga, gaarrate aana magansiꞌnanni darganna sooddiyye diigino” yaanno. (2 Dud. 14:3, 5) Wole agurina isi ahaahesi Maaka nafa mootimmasenni hoolinose. Hatto assinohu mayiraati? Korkaatuno ise kaphu magansiꞌra halashshitino daafiraati.—1 Mot. 15:11-13.

3. Konni birxichira maa ronseemmo?

³ Aasa kaphu maganna huninotano agurranna wolereno assino. Isi Yihudu manni Yihowawa higanno gede kaaꞌle halaalu  magansiꞌra halashshino. Yihowa keeru b yannara Aasanna Israeelete manna maassiꞌrino. Aasa gashshe noo yannara baatto tonne diro ‘keere heedhino.’ (2 Dud. 14:1, 4, 6) Konni birxichira Aasa keeru yanna horoonsiꞌrinohu hiittoonniitiro ronseemmo. Hakkiinni umi xibbi diro heeꞌrino Kiristaani Aasa gede keeru yanna horoonsiꞌrino gara laꞌneemmo. Jeefoteno aante noo xaꞌmora dawaro afiꞌneemmo: ‘Yihowa magansiꞌrattota hoollannikki gobbara heeꞌrattoha ikkiro, tenne keeru yanna ma garinni horoonsiꞌratto?’

4. Layinki Duduwo 14:2, 6, 7 kultanno garinni, Aasa keeru yanna horoonsiꞌrinohu hiittoonniiti?

⁴ Layinki Duduwo 14:2, 6, 7 nabbawi. Aasa ‘raga baala keere assinohu’ Yihowa ikkinota coyiꞌrino. Aasa tini keeru yanna deseꞌe yine ofollinannite yee dihedino. Hatteentenni isi tenne yanna katama minate, huxxa huxxate, shae seekkatenna waalchuwa qasate horoonsiꞌrino. Isi Yihudu mannira “baatto anganke no” yiino. Aasa hatto yaasi mayyaate? Isi mannu Maganu uyinonsa gobbara diinu daye gawajjannonke yiikkinni heeꞌrannotanna katama mina hoolannonsakkita kulanni no. Isi mannu keeru yanna hayyotenni horoonsiꞌranno gede jawaachishino.

5. Aasa olantosi kaajjishinohu mayiraati?

⁵ Aasa keeru yanna olanto kaajjishateno horoonsiꞌrino. (2 Dud. 14:8) Hatto yaa isi Yihowa diaddaxxino yaateni? Deeꞌni. Aasa moote ikkino daafira mannu albillitte iillansara dandaanno qarrira qixxaawanno gede assa hasiissannosita afino. Aasa Yihudu manni afiꞌrinoti keeru yanna geeddannokkita afino; qoleno digeeddino.

6. Umi xibbi diri Kiristaani keeru yanna horoonsiꞌrinohu hiittoonniiti?

⁶ Umi xibbi diri Kiristaani duucha hige daraminoha ikkirono, keere afiꞌre heeꞌrino yannano no. Yesuusi rosaano tenne faro ma garinni horoonsidhino? Kuri ammanamino Kiristaani dancha duduwo ceeꞌmikkinni duduwino. Qullaawu Maxaafi insa “Magano waajjatenni” heedhinota kulanno. Insa dancha duduwo agurtukkinni dudubbino; konnira ‘halaꞌlitanni’ hadhino. Yihowa insa keeru yannara diinaggaabbe sabbakkinotera maassiꞌrinonsa.—Soq. 9:26-31.

7-8. Phaawuloosinna wolootu Kiristaani faro afidhu woyite maa assitino? Xawisi.

⁷ Umi xibbi diri Kiristaani dancha duduwo duduwate afiꞌri faro baala horoonsiꞌrino. Lawishshaho, soqqamaasinchu Phaawuloosi Efesooni katamira heeꞌre soqqamanno faro afiꞌriti, hakko katamira sabbake manna rosaano assino.—1 Qor. 16:8, 9.

⁸ Wole yannara kayinni barcima lainohunni kaꞌino hajo 49 M.D. tirri gedensaanni, Phaawuloosinna wolu Kiristaani farciꞌranno faro afiꞌrino. (Soq. 15:23-29) Insa tenne hajo songuwate xawissuhu gedensaanni, dancha duduwo diinaggaabbe dudubbino. (Soq. 15:30-35) Tini kaaꞌlitinori nooyya? Qullaawu Maxaafi “ammanaanote mittimma jawaattu. Kiironsano barru barrunni lexxitu” yaanno.—Soq. 16:4, 5.

9. Xaa yannara batinye gobbuwara Yihowa manni maa assanni no? Ninkeneeto mayine xaꞌma dandiineemmo?

⁹ Xaa yannara batinye gobbara faajjetenni sabbankanni heeꞌnoommo. Heeꞌrattohu magansiꞌrattota hoollannikki gobbaraati? Hatto ikkiro, ‘Tenne keeru yanna ma garinni horoonsiꞌranni noommo?’ yite ateneeto xaꞌmi. Tenne goofimarchu yannara Yihowa dirijjite alamete doyichora sabbakatenna rosiisate looso, konni albaanni loonse egenninoonnikki garinni loossanni no; tini lowo geeshsha hagiirsiissannote. (Maq. 13:10) Konnira Yihowa mannira isira soqqantannoti duucha faro noonsa.

10. Layinki Ximootewoosi 4:2 maa assineemmo gede jawaachishshannonke?

¹⁰ Keeru yanna hayyotenni horoonsiꞌra dandaattohu hiittoonniiti? (2 Ximootewoosi 4:2 nabbawi.) Nootto gara layidhe, ati woy maatekki miili dancha duduwo albinni roore duduwa dandiitinannironna teꞌee heda dandaatto; suwisaano ikkitine soqqama dandiitinanniha lawannohe? Tini yanna maalaamittete jiro duuꞌninannita diꞌꞌikkitino; maalaamittete jiro bayiru qarri yannara kaaꞌlitannori dino.—Law. 11:4; Mat. 6:31-33; 1 Yoh. 2:15-17.

11. Mitu roduuwi mannaho dancha duduwo duduwate maa assitino?

¹¹ Batinye halashshaano sabbakatenna rosiisate yite wole qaale rossino. Yihowa dirijjite yannate kiiro lowo afiinni Qullaawu Maxaafi aana xintantino borro qixxeessite insa kaaꞌlitanni no. Lawishshaho 2010nni borronke qixxeessinannihu mitu 500 afiinniiti. Xa kayinni 1,000 saꞌꞌanno afiinni qixxeessinanni.

12. Mannu afoo dadhino qaalinni dancha duduwo macciishshansa kaaꞌlitannonsahu hiittoonniiti? Lawishsha kuli.

¹² Mannu afoo dadhino qaalinni Maganu Qaale rosanno woyite mayi macciishshamannonsa? Hanni mitte rodoo Ameerikaho Tenesii yinanniwa assinoonnihu qoqqowu gambooshshi kaaꞌlinose gara laꞌno. Gambooshshe assinoonnihu Kayinariwaanda yinanni  qaalinniiti; konne qaale coyiꞌnannihu Ruwaandaho, Kongotenna (Kinshaasa) Ugaandahooti. Gambooshshu gedensaanni konne qaale coyidhanno rodoo togo yitino: “Ameerikaho heeꞌroommahu 17 diri giddo, gambooshshunniwa shiqannore mite yee woꞌmunni woꞌma huwatoommahu konni gambooshshiwaati.” Tini rodoo afoo dadhitino qaalinni, gambooshshunniwa shiqqino pirogiraame macciishshituta rossinori wodanaho coinose. Ati qoqqowiꞌnera nooha mito manna kaaꞌlate wole qaale rosa dandaatto ikka? Songoꞌne qoqqowira noohu mitu manni afoo dadhino qaalinni kulittonsaro, roore macciishsha hasiꞌrannoha ikkara dandaanno. Assoottorira Yihowa kiisannohe.

13. Ruusiyaho noo roduuwinke keeru yanna ma garinni horoonsidhino?

¹³ Mito roduuwanke faajjetenni sabbakkannota hoolloonninsa. Mito woyite mangiste loosonke agabburo albi geeshsha soqqama hoongammora dandiineemmo. Hanni Ruusiyaho heedhanno roduuwinke lawishsha laꞌno. Insara lowo diro dartu iillinsa gedensaanni, Badheessa 1991nni gashshootuwiinni fajjo afidhino. Hakka waro Ruusiyaho 16,000 meddi yitanno halashshaano no. Lemuu diri gedensaanni kayinni kiironsa lexxite 160,000 ikkitino! Tini roduuwinke keeru yanna hayyotenni horoonsidhinota leellishshanno. Ikkirono tini keeru yanna digeeddino. Kayinnilla xaano insa Yihowara diinaggaabbe soqqama diagurtino. Insa afidhu faro baala horoonsidhe Yihowara soqqantanni no.

14-15. Yihowa Aasa kaaꞌle wolqasi leellishinohu hiittoonniiti?

¹⁴ Aasa waro nooti keeru yanna digeeddino. Mitte miliyoone ikkitannoti wolqaataame Itiyophiyu olanto qassansara daggino.  Olantote roorrichi Zaara Yihudu manna qeelleemmo yee hedino. Moote Aasa kayinni olantosi batinye ikkikkinni Maganosi Yihowa addaxxino. Isi, “Ninke kune ate hexxine suꞌmakki addaxxine tenne wolqaataame olanto ledo gaarammammora dangoommona kaaꞌlinke” yee Yihowa huucciꞌrino.—2 Dud. 14:11.

¹⁵ Itiyophiyu olanto Yihudu olanto ero ikkiturono, Aasa Yihowa mannasi gatisate wolqanna dandoo noosita coyiꞌrino. Yihowano diꞌꞌirraawisinosi; irraabbe higginoti Itiyophiyu olantooti.—2 Dud. 14:8-13.

16. Xa nooti keeru yanna saꞌannota mayinni anfeemmo?

¹⁶ Albillitte ninke mittu mittunkura iillannonkere gudinse dianfoommo; ikkirono Maganu manni afiꞌrannoti keeru yanna saꞌannota ikkitinota anfoommo. Isinni Yesuusi rosaanosi goofimarchu barruwara “mannu baalu giwannoꞌne” yiinonsata qaango. (Mat. 24:9) Soqqamaasinchu Phaawuloosino “Kiristoosi Yesuusinni maganittete heeshsho heeꞌra hasiꞌranno baali xiiwamanno” yiino. (2 Xim. 3:12) Sheexaanu lowo geeshsha hanqino; isi hanqo maaxamme gata dandiineemmo yine heda dihasiissannonke.—Aju. 12:12.

17. Ammananke fonqolannori mayi iillankera dandaanno?

¹⁷ Muli yannara ninke baalunku ammanammoommotinna tiꞌi leeltanno. Shiima yanna gedensaanni “kalaqamunni kayise xaa geeshsha ikke egenninokkihu” bayiru qarri ikkanno. (Mat. 24:21) Hatte yannara maatenke miilla gibbankera woy loosonke hoollara dandiinanni. (Mat. 10:35, 36) Ikkina hattee yannara Aasa gede Yihowa kaaꞌlannonketanna agarannonketa addaxxineemmo?

18. Ibiraawoota 10:38, 39 kultanno garinni, keeru yanna saꞌanno woyitira qixxaawate mayi kaaꞌlannonke?

¹⁸ Yihowa ammananke kaajjishiꞌneemmo gede kaaꞌle albillitte iillannonke coyiꞌra qixxeessanni noonke. Isi “ammanaminohunna wodanaamu” borojjichi widoonni dhaabbannota ayyaanaamittete “sagale hasiissanno yannara” shiqishannonke; tini sagale kaajjine heeꞌneemmo gede kaaꞌlitannonke. (Mat. 24:45, NW) Ikkollana ninkeno Yihowara noonke ammana kaajjishiꞌrate sharrama hasiissannonke.—Ibiraawoota 10:38, 39 nabbawi.

19-20. Umi Duduwo 28:9 yitanno garinni, ninkeneeto mayine xaꞌma hasiissannonke? Mayira?

 ¹⁹ Moote Aasa gede ninkeno Yihowa ‘hasiꞌra’ hasiissannonke. (2 Dud. 14:4; 15:1, 2) Yihowa hasiꞌneemmo doogga giddo mitte iso afatenna cuuamate. Afiꞌnummo faro baala horoonsiꞌne isira noonke baxille kaajjishiꞌneemmo. Tenne daafira ninkeneeto layiꞌrate togo yine xaꞌma dandiineemmo: ‘Songote gambooshshuwa ganye haꞌreemmo?’ Yihowa dirijjite qixxeessitino gambooshshe haꞌneemmo woyite, Yihowawiinninna roduuwinkewiinni jawaante afiꞌneemmo. (Mat. 11:28) Qoleno ninkeneeto, ‘Qullaawa Maxaafa ganye xiinxallate rosichi nooe?’ yine xaꞌma dandiineemmo. Maatekki ledo heeꞌrattoha ikkiro, lamalate kiiro maatete magansiꞌra assiꞌrate yanna gaaꞌmatto? Callu heeꞌrattoha ikkiro, lamalate kiiro maatekki assitannohu gede assatto? Wolqakki assitu geeshsha sabbakatenna manna rosaano assate sharramatto?

²⁰ Ninkeneeto hatto yine xaꞌma hasiissannonkehu mayiraati? Qullaawu Maxaafi Yihowa hedonkenna wodananke laꞌꞌannota kulannonke daafira ninkeno layiꞌra hasiissannonke. (1 Duduwo 28:9 nabbawi.) Hasattonkenna hedonke biddi assiꞌra hasiissannonketa huwantummoro, Yihowa biddi assiꞌneemmo gede kaaꞌlankera huucciꞌra hasiissannonke. Albillitte iillannonke fonqolira qixxaawa hasiissannonkehu xaati. Konnira mittu coyino keeru yanna hayyotenni horoonsidhinannikki gede assaꞌnera wodhitinoonte!