1. Yesuusi qulxuꞌme woshshaadannoha shoole manna mayyee koyisino? Insa maa assituyya?

 ROSAANCHU Pheexiroosi, Indiriyaasi, Yaiqoobinna Yohaannisi qulxuꞌme woshshaaxxite galtinoreeti. Insa Yesuusi, “Ane hoode amme, ani manna woshshaaddinanni gede asseemmoꞌnena” yiinsa woyite hiitto ikkitinoro hanni hedde. b Insa maa assitino? Qullaawu Maxaafi, “hakkawoyintenni woshshaadonsa agurte isi hoode hadhu” yaanno. (Mat. 4:18-22) Kuni doodhitino doorshi heeshshonsa hegerera soorrannoho. Insa qulxuꞌme woshshaada agurte ‘manna woshshaaddannore’ ikkitanno. (Luq. 5:10) Xaa yannarano Yesuusi suwashshu wodani noonsaha halaale baxanno manna koyisanni no. (Mat. 28:19, 20) Yesuusi manna woshshaadattoha ikkatto gede koyisinohe koyishsha adhootto?

2. Manna woshshaandeemmore ikkinammora albaanni seekkine heda hasiissannonkehu mayiraati? Konne doorsha doodhate mayi kaaꞌlannonke?

² Atino Qullaawa Maxaafa xiinxallite heeshshokki giddo mitore biddi assiꞌroottoha ikkara dandaanno; hatto ikkiro, danchu duduwi halashshaancho ikkate doodha dandaatto. Yesuusi koyishsha adhate hobbi ruxxi yiittoro hexxo mudhitooti. Hobbi ruxxi yaakki kuni doorshi shota ikkinokkita huwatoottota leellishshanno. Hige Qullaawu Maxaafi Pheexiroosinna ledosi loossannori woshshaadonsa “hakkawoyintenni” agurte hadhinota kulanno. Ikkollana insa hakkonne doorsha doodhitinohu  heeshshi gotti assite heddukkinni diꞌꞌikkino. Insa Yesuusa affinohunna Mesihicha ikkinota ammantinohu lewu aganira albaanniiti. (Yoh. 1:35-42) Atino Yihowanna Yesuusi daafira lowore rosoottoha ikkara dandaanno; ayyaanaamittetennino lopha hasiꞌrattoti egennantinote. Kayinnilla konne doorsha gura qiniite laittokkinni doodha dihasiissannohe. Pheexiroosi, Indiriyaasinna wolootu konne doorsha doodhitanno gede kaaꞌlinonsari maati?

3. Yesuusi koyishsha adhatto gede kakkayissannohe akatta hiikkuriiti?

³ Yesuusiti umi rosaano laala, egennonna worbimma noonsareeti; hattono insaneeto qeeꞌlitannoreeti. Kuri akatta manna woshshaadate worbuulle ikkitanno gede kaaꞌlitinonsati dihuluullissannote. Konni birxichira atino worba Kiristoosi rosaancho ikkate kuri akatta lossiꞌra dandaatto gara ronseemmo.

4. Pheexiroosi manna woshshaadannoha ikkanno gede kakkayisinosiri maati?

⁴ Pheexiroosi qulxuꞌme woshshaaxxannohu maatesira hasiisannore wonshate calla diꞌꞌikkino. Isi konne looso loosannohu lowo geeshsha baxanno daafira ikkikki digatino. (Yoh. 21:3, 9-15) Isi gedensoonni manna woshshaadate loosono baxino. Yihowa kaaꞌlonni Pheexiroosi manna woshshaadate loosinni worba ikkino.—Soq. 2:14, 41.

5. Luqaasi 5:8-11 kultanno garinni, Pheexiroosi waajjinohu mayiraati? Ninke togoo waajja qeeꞌlineemmo gede kaaꞌlannonkeri maati?

⁵ Sabbankeemmohu Yihowa banxeemmo daafiraati; konne looso loonseemmo gede kakkayisinonkehu qaru coyi isooti. Ikkadda diꞌꞌikkinoommoreeti yine hendummorono Yihowara noonke baxilli tenne qeelate kaaꞌlannonke. Yesuusi Pheexiroosi manna woshshaadannoha ikkara koyisisi woyite “waajjitooti” yiinosi.  (Luqaasi 5:8-11 nabbawi.) Pheexiroosi Yesuusi rosaancho ikkummoro mayi iillannoe ikka yee waajje badhera dihigino. Yesuusi isinna ledosi loossannori maalaletenni lowo qulxuꞌme amaddanno gede kaaꞌlinsa woyite, Pheexiroosi dhagge assiꞌrino; isi Yesuusi koyisisi woyite konni loosiꞌra ikkado diꞌꞌikkoommoho yee hedino. Yesuusi rosaancho ikkittoro maa assa hasiissannohero huwatatto woyite yaadattoha ikkara dandaanno. Hatto ikkiro Yihowara, Yesuusiranna mannaho noohe baxilli lexxanno gede assiꞌri; hatto assittoro, Yesuusi manna woshshaadatto gede koyisino koyishsha adhate kaꞌꞌatto.—Mat. 22:37, 39; Yoh. 14:15.

6. Sabbankeemmo gede assannonkehu wolu korkaati maati?

⁶ Sabbankeemmo gede kakkayisannonkeha wole korkaata laꞌno. Yesuusi “hadhine . . . rosaanoꞌya asse” yee hajajino hajajo wonsha hasiꞌneemmo. (Mat. 28:19, 20) Mannaho sabbankeemmo gede assannonkehu wolu korkaati insa “qarramenna gara hawe noo” daafiraati; konnira Maganu Mangistere kulanno halaale rosa hasiissannonsa. (Mat. 9:36) Yihowa baalunku gari manni gara ikkitino egennonna gato afiꞌrara hasiꞌranno.—1 Xim. 2:4.

7. Roomu Sokka 10:13-15 sabbakate loosi lowo geeshsha hasiisannoha ikkinota leellishshannohu hiittoonniiti?

⁷ Sabbakate loosi abbanno guma hendeemmo woyite, konne heeshsho gatisanno looso loosate kaꞌneemmo. Qulxuꞌme woshshaadanno manchi hatto assannohu qulxuꞌme itateeti woy hiꞌrateeti; ninke kayinni manna ‘woshshaandeemmohu’ heeshshonsa gatisateeti.—Roomu Sokka 10:13-15 nabbawi; 1 Xim. 4:16.

8-9. Qulxuꞌme woshshaadanno manchi maa afa hasiissannosi? Mayira?

⁸ Yesuusi waro qulxuꞌme woshshaaxxanno Israeelaawichi hiittoo qulxuꞌme woshshaaxxannoro afa hasiissannosi. (Lew. 11:9-12) Qulxuꞌme heedhanno baseno afa hasiissannosi. Qulxuꞌme duucha woyite heedhannohu injaannonsa wayinna sagale noowaati. Qulxuꞌme woshshaaxxanno manchi baxi yannara mare woshshaaxxa dandaannoni? Paasifiki giddichora heeꞌrannohu mittu misiyoone ikke soqqamanno rodii, qulxuꞌme woshshaaxxate maltino yanna doora hasiissannota huwatino; hakko qooxeessira heeꞌrannohu mittu rodii ledosi qulxuꞌme woshshaadanno gede koyisinosi. Misiyoone ikke soqqamanno rodii qulxuꞌme woshshaaxxanno rodiira, “Gaꞌa soodo sase saatenni xaando” yiisi. Koyisino rodii qole, “Coyi dihattooti. Qulxuꞌme woshshaadate haꞌneemmohu ninkera injiitannonke yannara ikkikkinni, qulxuꞌme anfanni yannaraati” yiisi.

⁹ Hatteente gede, umi xibbi diro heedhinori manna woshshaaddanno rosaanono manna anfanni baseranna saatera sabbakate sharrantanno. Lawishshaho Yesuusi rosaano qullaawa mine, xaadu mine, mine mine hadhenna gudumaaleho sabbakkino. (Soq. 5:42; 17:17; 18:4) Ninkeno qoqqowinkera heeꞌranno manni daafira afa hasiissannonke. Pirogiraamenke biddi assiꞌne insara injiitanno yannaranna basera sabbaka hasiissannonke.—1 Qor. 9:19-23.

10. Yihowa dirijjite maa qixxeessitinonke?

¹⁰ Qulxuꞌme woshshaaxxanno manchi garu woshshaadonna woshshaandanni gara afa hasiissannosi. Ninkerano sabbakate loosinkera addi addi uduunni hasiisannonke. Qoleno konne uduunne ma garinni horoonsiꞌneemmoro afa hasiissannonke. Yesuusi manna woshshaandanni gara rosaanosira xawise kulinonsa. Yesuusi insa maa adhite hadhannoro, mama sabbakkannoronna mayite sabbakkannoro kulinonsa. (Mat. 10:5-7; Luq. 10:1-11) Yannankerano Yihowa dirijjite sabbakate loosinkenni dancha guma afiꞌneemmo gede kaaꞌlannonkeha, Rosiisate Horoonsiꞌneemmo Uduunne qixxeessitinonke. c  Qoleno kuri uduunne horoonsiꞌneemmo gara ronsoommo. Afiꞌneemmo qajeelshi worbuulle ikkineemmonna loosinkenni dancha guma afiꞌneemmo gede kaaꞌlannonke.—2 Xim. 2:15.

11. Manna woshshaaddannori worbuulle ikka hasiissannonsahu mayiraati?

¹¹ Qulxuꞌme woshshaaxxitannori worbuulle ikka hasiissannonsa. Mito woyite insara baaru aana hedeweelchuri iillannonsa. Duucha woyite hashsha woshshaaxxitanna hedeweelcho dambalu kaꞌꞌara dandaanno. Manna woshshaaddannorino worbuulle ikka hasiissannonsa. Sabbankeemmonna mannaho Yihowa Farciꞌraasine ikkanke kulleemmo woyite, dambalu gedee fonqoli iillankera yaano, maatenke gibbankera, afinonke manni arrassankeranna mannu kulleemmore macciishsha giwara dandaanno. Kayinni tini dimasissannonke. Mayira yiniro, Yesuusi harunsaanosi giwannonsa manniwa soyannonsata coyiꞌrino.—Mat. 10:16.

12. Iyyaasu 1:7-9 kultanno garinni worbuulle ikkate mayi kaaꞌlannonke?

¹² Albinni roore worba ikka dandaattohu hiittoonniiti? Umihunni, Yesuusi konne looso iima heeꞌre loosiisanni noota addaxxi. (Yoh. 16:33; Aju. 14:14-16) Layinkihunni, Yihowa towaateemmoꞌne yee eino qaale wonshannota ammani. (Mat. 6:32-34) Ammanakki kaajjituro roore worba ikkatto. Pheexiroosinna  jaallasi loosonsa facci assite agurte Yesuusa harunsitu woyite, kaajjado ammana noonsata leellishshino. Atino, afinohe manniranna maatekkira Yihowa Farciꞌraasine ledo Qullaawa Maxaafa xiinxallitanni noottotanna gambooshshe haꞌra hanafoottota kulte jawaata ammana nooheta leellishootto! Qoleno Yihowahu keeraanchu biddishshi garinni heeꞌrate akattakkinna heeshshokki biddi assiꞌroottoti dihuluullissannote. Hatto assoottohu ammananna worbimma noohe daafiraati. Albinni roore worba ikkate sharramatto woyite Yihowa ‘haꞌratto darga baalaho ledokki noota’ addaxxa dandaatto.—Iyyaasu 1:7-9 nabbawi.

13. Hiincanna huuccatto assiꞌra worba ikkatto gede kaaꞌlitannohehu hiittoonniiti?

¹³ Worba ikkate kaaꞌlannoheri woluri maati? Worbanna waajjattokkiha ikkatto gede kaaꞌlahera Yihowa huucciꞌri. (Soq. 4:29, 31) Yihowa huuccattokki macciishshe dawaro qolanno; hattono tuge diagurannohe. Isi woꞌmanka woyite ledokki ikke kaaꞌlannohe. Alba Yihowa woloota kaaꞌlino gara hiincakkino kaaꞌlitannohe. Isi iillinohe qarra cincite saꞌꞌatto gede kaaꞌlinohehunna heeshshokki biddi assiꞌratto gede jawaante uyinohehu hiittoonniitiro hedi. Mannasi Duumu Baari giddoonni qole sayisino Magani, ati Kiristoosi rosaancho ikkatto gede kaaꞌlannohe. (Ful. 14:13) Aterano faarsaasinchunnite gedee ammana heedhohe; isi, “Kaaliiqi ledoꞌya heeꞌre kaaꞌlannoe daafira, diwaajjeemmo; mannu assannoeri dino” yee faarsiꞌrino.—Far. 118:6.

14. Maaseyinna Tomoyo lawishshinni maa rosootto?

¹⁴ Worbuulle ikkineemmo gede kaaꞌlannonkehu wolu coyi, Yihowa alba waajjanno manni worbuulle ikkanno gede kaaꞌlinonsahu hiittoonniitiro hedate. Hanni Maaseyi yinanni rodoo woꞌnaalsha laꞌno. Ise huta ikkitino daafira ammanase mannaho horo kule diafeemma yite heddino. Affinokki manna hasaawisa gooddiꞌne anfannikki baga gede ikkitinose. Konnira ise Maganohonna mannaho noose baxilli lexxanno gede assiꞌrate sharrantino. Heeꞌnoommoti wiinamme sabbaka hasiissanno yanna ikkitinota hiincitino, hattono sabbakate hasattose lexxitanno gede huuccatto assidhino. Ise waajja qeelte woꞌma yanna suwisaancho nafa ikkite soqqama hanaffino. Yihowa haaruuddu halashshaanono worbuulle ikkitanno gede kaaꞌlannonsa. Hanni Tomoyo yinanni rodoo lawishsha laꞌno. Ise mite yite sabbakate fultu barra minunni mine hadhanni heedheenna umo xaaddinoti qaete ama “Yihowa Farciꞌraasine ledo horo hasaawa dihasiꞌreemma” yite hanqite saanqa aanaho cuffinose. Tomoyo beꞌe yitukkinni ledose soqqantanno rodoora “Mittore nafa coyiꞌrummakkinni, Yihowa Farciꞌraasincho ikkoommota affinota laitta? Konnira tashshi yiinoe!” yitino. Tomoyo xa woꞌma yanna suwisaancho ikkite soqqantanni no.

15. Meessaneeto qeeꞌlate yaa mayyaate? Kuni Kiristaanaho hasiisanno akataati yineemmohu mayiraati?

¹⁵ Qulxuꞌme woshshaadatenni fushshiꞌrino manchi isonooto qeeꞌlanno. Meessaneeto qeeꞌlate yaa, “loosa hasiissanno looso loosate meessaneeto qixxeessate dandooti.” Qulxuꞌme woshshaaxxitannori soodo gutte kaꞌꞌa, loosu goofa geeshsha agarte loosa, ayyare injaa hoogguro nafa cince loosa hasiissannonsa. Ninkeno cincine loosonke umo fushsha hasiꞌneemmoha ikkiro, ninkeneeto qeeꞌla hasiissannonke.—Mat. 10:22.

16. Ninkeneeto qeeꞌlate mayi kaaꞌlannonke?

¹⁶ Meessanaa qeeꞌlate akati kalaqamunni afiꞌnanniha diꞌꞌikkino. Isinni duucha woyite mitto looso ninkera injiinonke garinni loosa rakkannonke. Ikkollana mito woyite lowo geeshsha hasiisanno coyi loosate shota diꞌꞌikkanno. Konnira ninkeneeto qeeꞌline loosa hasiissannonke.  Shota ikkinokki looso loosa dandiineemmo gede ninkeneeto qajeelsiꞌrate kaaꞌlo hasiissannonke. Konnira Yihowa qullaawu ayyaanisi widoonni kaaꞌlannonke.—Gal. 5:22, 23.

17. Umi Qorontoosi 9:25-27 kultanno garinni, soqqamaasinchu Phaawuloosi isonooto qeeꞌlate maa assino?

¹⁷ Soqqamaasinchu Phaawuloosi isonooto qeeꞌlannoho. Ikkollana isi, gara ikkinore assate manninatesi “gadadisa” hasiissinosita coyiꞌrino. (1 Qorontoosi 9:25-27 nabbawi.) Isi ninkeno umonke qeeꞌlineemmo gedenna baalanka coye “seerunninna amanyootunni” assineemmo gede jawaachishinonke. (1 Qor. 14:40) Woꞌmanka woyite ayyaanaamittete coye assate ninkeneeto qeeꞌla hasiissannonke; kuri coyi giddo mittu, manna woshshaadate yaano, rosaano assate looso ganyine loosate.—Soq. 2:46.

18. Yihowa danchu gumi gede asse laꞌꞌannori maati?

¹⁸ Qulxuꞌme woshshaaxxanno manchi qiniinoe yaannohu lowo qulxuꞌme woshshaaxxirooti. Ninkeha soqqanshote guma bikkinannihu kayinni, lowo manni Maganu dirijjitewa daanno gede kaaꞌlankenni diꞌꞌikkino. (Luq. 8:11-15) Agurrummokkinni dancha duduwo dudumbummoronna woloota rosiinsummoro, Yihowa tenne danchu gumi gede asse laꞌꞌanno. Mayira? Korkaatuno, hatto assineemmo woyite, isiranna Beettisira hajajammanni heeꞌnoommo.—Maq. 13:10; Soq. 5:28, 29.

19-20. Xaanni wiinamme sabbankeemmo gede assannonkehu wolu korkaati maati?

¹⁹ Mite gobbara qulxuꞌme woshshaaxxa dandiinannikki aganna no. Togoo gobbara qulxuꞌme woshshaaxxanno manni, woshshaaxxinanni wogga saꞌara rakkanno woyite wiiname woshshaaxxanno. Ninkeno manna woshshaandeemmore ikkinoommohura, alamete goofimarchi rahino daafira, wiinamme sabbaka hasiissannonke! Konne heeshsho gatisanno looso loonsanniti hili yanna calla gattino. Konne lowo geeshsha hasiisanno looso ‘Injaannoe woyite looseemmo’ yite loosa keeshshitooti.—Ros. 11:4.

²⁰ Albinni roore laalaati, Qullaawu Maxaafi egennokki bowirsiꞌri, hattono worbanna ateneeto qeeꞌlattoha ikki. Sette miliyoone saꞌannori manna woshshaaddannori ledo loosi; hatto assittoro Yihowa aanno hagiirre afiꞌratto. (Neh. 8:10) Konne looso Yihowa ikkino yaa geeshsha woꞌma giddokkinni loosate murciꞌri. Aananno birxichira, Maganu Mangisteha sabbakate looso diinaggaambe loonseemmo gede kaaꞌlannonkeha sase coye ronseemmo.