1. Meya roduuwi Yihowa dirijjite kaaꞌlannohu hiittoonniiti? Ikkirono insara mayi qarri iillannonsa? (Aaniidi qoolira noo misile lai.)

 SONGOTE giddo diinaggaawe loosannohu batinyu meya roduuwi noonke daafira lowo geeshsha tashshi yaannonke. Lawishshaho, insa gambooshshunniwa dawaro qolanno, hattono qanchoho soqqamanno. Mitu Gambooshshu Addaraashe gatamara kaaꞌlanno, hattono ammanate roduuwansa irkisanno. Ikkirono fonqolo ikkannori iillannonsa. Mitu geedhino annuwanna amuuwansa towaaxxitanno. Wolootu kayinni maatensa miilla gibbannonsata cincite heedhanno. Mitu meya roduuwi calluwinsa oosonsara hasiisannore shiqishate sharramanno.

2. Meya roduuwa kaaꞌla hasiissannonkehu mayiraati?

² Meya roduuwa kaaꞌla hasiissannonkehu mayiraati? Korkaatuno alame duucha woyite meento diayirrissanno. Qullaawu Maxaafi kayinni meento kaaꞌlinammora jawaachishannonke. Lawishshaho soqqamaasinchu Phaawuloosi Roomu Kiristaana Febeni wosinsiꞌrannonna “hasiisannosere baala” oye kaaꞌlannose gede jawaachishino. (Rom. 16:1, 2) Phaawuloosi Farisicha ikke noo waro, Farisootu gede isino meento woffi asse laꞌꞌannoha ikkikki digatino. Isi Kiristaancho ikki kawa kayinni Yesuusi lawishsha harunse meento ayirrisannohanna shaqqado ikkino.—1 Qor. 11:1.

3. Yesuusi meento ma assino? Maganu fajjo assanno meento ma garinni laino?

³ Yesuusi baalanka meento ayirrisino. (Yoh. 4:27) Isi meento Yihudu ammaꞌno murrooti laꞌanno garinni dilaino. Isinni mitte Qullaawa Maxaafa xawissanno borro, “Yesuusi meento woffi assannore coyiꞌre diegennino” yitanno. Yesuusi Annisi fajjo assanno meento lowo geeshsha ayirrisanno. Isi insa roduuwisi gede asse laino, hattono ayyaanaamittete maatesi ikkitino labballi wido ikkitinota coyiꞌrino.—Mat. 12:50.

4. Konni birxichira maa ronseemmo?

 ⁴ Yesuusi Maganoho soqqamanno meento woꞌmanka woyite kaaꞌlate qixxaawe no. Isi insa naadannonsa hattono insara halamanno. Hanni Yesuusi lawishsha harunsine meya roduuwinkera hendeemmota leellisha dandiineemmo gara laꞌno.

5. Mitu meya roduuwira dancha aante kalaqiꞌra qarra ikkitannonsahu mayiraati?

⁵ Ninke baalunku roduuwu ledo dancha aante heedhankera hasiꞌneemmo. Ikkirono mito woyite meya roduuwira dancha aante kalaqiꞌra qarra ikkitansara dandiitanno. Mayira? Hanni roduuwu coyidhinore laꞌno. Joordaani b yinanni rodoo togo yitino: “Mine assiꞌroommakkita ikkoomma daafira, ayewa aana hasiissannoero diafoomma; ani songote kaaꞌleemmari dino yee hedeemma.” Kiristiina yinanniti albinni roore soqqamate yite wolewa hadhino suwisaancho, “Wole songo haꞌniro, callatoommo yine hendara dandiinanni” yite coyidhino. Mitu labballu roduuwino hatto yite heddara dandiitanno. Yihowa Farciꞌraasine ikkitinokki maate ledo heedhanno roduuwi, maatenkewano sonogote giddo noo roduuwiwano aana qarra ikkitinonke yite heddara dandiitanno. Dhibbunni kainohunni woy xiwaminoha maatensa miila towaaxxitanni mininni fultannokki roduuwino callantoommo yite heddara dandiitanno. Aneete yinanni rodoo togo yitino: “Roduuwu godoꞌlinanni yanna sayinsammora koyissannoe woyite, amaꞌya towaaxxeemmati ane ikkoomma daafira didandeemma.”

6. Luqaasi 10:38-42 kultanno garinni, Yesuusi Maariyaaminna Maarta kaaꞌlinohu hiittoonniiti?

⁶ Yesuusi ayyaanaamittete roduuwisi ledo yanna sayisino, hattono insara addu jaalaati. Hanni Maariyaaminna Maarta ledo noosi aante laꞌno; insa lamenti mine assiꞌrinokkire ikkara dandaanno. (Luqaasi 10:38-42 nabbawi.) Yesuusi coyiꞌrinorinna assinori, insa isi jaalla ikkitanno gede assinonsa. Lawishshaho Maariyaami rosaanosi c gede lekkasi hunda ofolla diwaajjitino. Maarta, Maariyaami kaaꞌlitinosekki daafira, hanqitinota Yesuusira coyiꞌra diwaajjitino. Hakkawoyite Yesuusi lamentera kaajja roso rosiisinonsa. Yesuusi wole yannarano minensa mare, insano rodoonsa Alaazaarino hedannota leellishino. (Yoh. 12:1-3) Alaazaari buuto dhiwami woyite, Maariyaaminna Maarta Yesuusi kaaꞌlo xaꞌmiꞌra hasiissannota afinoti dihuluullissannote.—Yoh. 11:3, 5.

7. Meya roduuwa jawaachisha dandiineemmoti mitte doogo hiittenneeti?

⁷ Mitu meya roduuwi ammanate roduuwi ledo xaadannohu gambooshshunniwaati. Konnira togoo yannara anga fanne haaꞌnonsa, hasaawinsonsa hattono hendeemmonsata affanno gede assino. Aleenni kulliti Joordaani togo yitino: “Roduuwu gambooshshunniwa qoloomma dawarora galattannoe woyite, ledo soqqammo yitannoe woyite woy wolere assite anera heddannoeta leellishshanno woyite lowo geeshsha jawaateemma.” Meya roduuwi ninkera muxxe ikkinota afanno gede assino. Kia yinanni rodoo togo yitino: “Gambooshshe hosummaro, roduuwu keereꞌya afate sokka borreessitannoe. Tini roduuwu anera heddannoeta afeemma gede assitinoe.”

8. Yesuusi lawishsha harunsa dandiineemmoti wole doogga hiikkuriiti?

⁸ Yesuusi gede yanna gaaꞌmine meya roduuwi ledo sayisa dandiineemmo. Insara sagale koyisa woy ledonke boohaartanno gede koyisa dandiineemmo. Hatto assineemmo woyite,  jawaachishannore hasaawa hasiissannonke. (Rom. 1:11, 12) Songote cimeeyyera Yesuusite gedee lao heeꞌra hasiissannonsa. Yesuusi adhammikkinni heeꞌra mitootaho qarra ikkitannota afino; ikkirono isi geedino hagiirre afiꞌrate qaru coyi adhama woy ooso ila ikkitinokkita xawisino. (Luq. 11:27, 28) Geedanno hagiirre afiꞌnannihu Yihowa soqqansho balaxisiinsirooti.—Mat. 19:12.

9. Cimeeyye meya roduuwa kaaꞌlate maa assa dandiitanno?

⁹ Roorenkanni songote cimeeyye meya roduuwa ayyaanaamittete roduuwinna amuuwi gede assite laꞌꞌa hasiissannonsa. (1 Xim. 5:1, 2) Cimeeyye gambooshshu hanafara albaanninna goofihu gedensaanni noo yanna insa ledo hasaawate sharrantanno. Kiristiina togo yitino: “Mittu cimeessi loosu batiꞌrannoeta afino daafira loosiꞌya pirogiraame afa hasiꞌrino. Isi anera hedannoe daafira galateemmasi.” Songote cimeeyye ganyite meya roduuwi ledo hasaabbannoha ikkiro, insara heddannota leellishshanno. d Alee kulliti Aneete cimeeyyete ledo ganyine hasaawa kaaꞌlitanno gara kultanni togo yitino: “Insa seekke egennoomma; insano ane egentinoe. Konnira qarru iillannoe woyite, insa kaaꞌlo xaꞌmira diqarrissannoe.”

10. Meya roduuwa jawaachishate maa assa dandiineemmo?

¹⁰ Ninke baalunku wolootu dandoonke naaddanno woyitenna assinoommorira galattannonke woyite tashshi yaannonke. Dandoonkenna assinoommore naadannohu hoogiro kayinni hexxo mudhinammora dandiineemmo. Abigayeeli yinanniti mine assidhinokki suwisaancho caaqqi yee nafa laꞌꞌannoehu dino yite heddanno woyiti noota coyidhino; ise togo yitino: “Roduuwu ise ewelo rodooti, woy eweli beettooti calla yitannoe. Mito woyite ane afinoehu nooha dilawannoe.” Xa hanni kayi mine assidhinokkite Paami yinanni rodoo lawishsha laꞌno. Ise lowo diro misiyoone ikkite soqqantino. Gedensaanni annasenna amase towaaxxitara qae higgino. Isera xa 70 diri balla ikkannoseha ikkirono, suwisaancho ikkite soqqantanni no. Paami togo yitino: “Wolootu naaddannoeta kultinoeri lowo geeshsha kaaꞌlinoe.”

11. Yesuusi ledosi soqqamino meento naadannota leellishinohu hiittoonniiti?

¹¹ Yesuusi “woxinsanni” kaaꞌlinosiha ammanamino meento naadino. (Luq. 8:1-3) Isi soqqantannosi gede fajjinonsa; lowo geeshsha hasiisanno halaaleno kulinonsa. Lawishshaho isi reyannotanna reyotenni kaꞌꞌannota kulinonsa. (Luq. 24:5-8) Isi soqqamaasinesira assinonte gede kuri meentino iillannonsa fonqolira qixxaawanno gede kaaꞌlinonsa. (Maq. 9:30-32; 10:32-34) Yesuusa kaaꞌlino meenti giddo mitu iso haqqaho sunti woyite ledosi noota qaango; soqqamaasinesi kayinni amandisi woyite agurte xooqqino.—Mat. 26:56; Maq. 15:40, 41.

12. Yesuusi meentoho mayi looso uyino?

¹² Yesuusi meentoho kaajja looso uyinonsa. Lawishshaho isi reyotenni kainota balaxe afinohu ammanamino meentooti. Yesuusi kuri meenti isi reyotenni kainota soqqamaasinesira kulanno gede soyinonsa. (Mat. 28:5, 9, 10) Qoleno 33 M.D. Phenxeqosxete ayyaanira qullaawu ayyaani dirri woyite meentuno nooha ikkara dandaanno. Hatto ikkiro, qullaawu ayyaaninni buuraminohu kuni meenti maalaletenni wole qaale coyiꞌrate dandoo afiꞌrinotinna mannaho “Maganunniha jawa looso” kulinoti dihuluullissannote.—Soq. 1:14; 2:2-4, 11.

13. Meya roduuwinke xaa yannara hiikkonne looso loosanni no? Loosonsa naandeemmota leellisha dandiineemmohu hiittoonniiti?

¹³ Meya roduuwinke Yihowara soqqamate assannorira galata hasiissannonke. Insa Yihowa soqqanshora horoonsiꞌnanni minna minanno hattono gatamaranno; wolu qaalinni massanganni gaamo kaaꞌlanno; qoleno uminsa fajjonni Beeteelete soqqamanno. Dano kalaqantanno yannara kaaꞌlanno; borruwanke tira kaaꞌlanno, hattono suwisaanonna misiyoone ikke soqqamanno. Labballu roduuwi gede meya roduuwino suwisaanote rosi mine, Maganu Mangiste Sawaakooti Rosi Minenna Giiliyaadi rosi mine rosa dandaanno. Qoleno minaamuwu minaannuwinsa songotenna dirijjitete giddo noonsaha shota ikkinokki looso loosa dandiitanno gede kaaꞌlannonsa. Kuri roduuwi minaamuwinsa kaaꞌla hooggoommensaro songote “elto” ikkite loosonsa woꞌmunni woꞌma loosa didandiitanno. (Efe. 4:8) Kuri meya roduuwanke kaaꞌla dandaatto doogo no?

14. Faarso 68:11 kultanno garinni, hayyootu cimeeyye maa assitanno?

¹⁴ Hayyootu cimeeyye meya roduuwi uminsa fajjonni loossannore bayira olantonna dancha duduwo duduwate worbuulle ikkitinota huwattanno. (Faarso 68:11 nabbawi.) Konnira cimeeyye meya roduuwi woꞌnaalshinni rosate sharrantanno. Aleenni kulliti Abigayeeli, labballu roduuwi qoqqowisera manna hasaawissanno gara xaꞌmitannose woyite tashshi yaannoseta coyidhino. Ise, “Roduuwu hatto  assansa Yihowa dirijjite giddo waagu nooeta huwateemma gede kaaꞌlitinoe” yitino. Qoleno cimeeyye gikki yiinori meya roduuwi wedella meya roduuwa kaaꞌlate dandoo noonsata huwattanno. (Tit. 2:3-5) Addanko, meya roduuwanke ayirrisanna galata hasiissannonke!

15. Meya roduuwira coyiꞌramannonsahu hasiisannonsahu hiitto woyite ikkara dandaanno?

¹⁵ Meya roduuwira mitu qarri iillannonsa yannara coyiꞌramannohu hasiisannonsa woyiti heeꞌrara dandaanno. (Isa. 1:17) Lawishshaho, gashshaanna shiidhino woy minaannise fushshe haꞌrisinose rodoora coyiꞌrama woy alba minaannise loosannoha mito looso kaaꞌla hasiissannoha ikkara dandaanno. Mitte geercho rodoo akime coyishshiishe kaaꞌlannose manchi hasiisannoseha ikkara dandaanno. Woy Yihowa dirijjite giddo wole looso loossannote mitte suwisaancho rodoora coyiꞌramannosehu hasiisara dandaanno; korkaatuno mitu roduuwi ise wolootu suwisaano gede duucha woyite soqqansho difultanno yitara dandiitanno. Meya roduuwanke kaaꞌlate wolere maa assa dandiineemmo? Hanni xaano Yesuusi maa assinoro laꞌno.

16. Maarqoosi 14:3-9 kultanno garinni, Yesuusi Maariyaami kaaꞌlinohu hiittoonniiti?

¹⁶ Yesuusi meya roduuwa beebba bushiinshanni woyite insara rahe coyiꞌramanno. Lawishshaho, isi Maarta Maariyaami bushiishshu woyite Maariyaamira halame coyiꞌramino. (Luq. 10:38-42) Wole yannarano mannu Maariyaami assitinori digaraho yee bushiishise woyite xaano isera halame coyiꞌramino. (Maarqoosi 14:3-9 nabbawi.) Yesuusi Maariyaami hakko coye assitanno gede kakkayisinoseri maatiro afino daafira, “Ise anera dancha coye assitino. . . . Wolqase uyitu geeshsha assitino” yee galatinose. Wole agurina Yesuusi “Dagate konne Dancha Duduwo dudumbanniwa baala, ise qaaggora kuni assitinori kullanna heeꞌranno” yee masaalino; xa konni birxichira nafa ise assitinore ronsanni heeꞌnoommo. Yesuusi tini mancho baxillunni assitino assoote, alamete doyichora loonsanni loosi ledo xaadise kulasi dhaggete! Maariyaami mannu bushshiishise woyite Yesuusi coyiꞌrinori lowo geeshsha jawaachishinoseti dihuluullissannote.

17. Meya roduuwira halamme coyiꞌrama hasiissannonke yanna leellishanno lawishsha kuli.

¹⁷ Meya roduuwikkira halante coyiꞌramatto? Hanni aane noo lawishsha laꞌno. Mite halashshaano minaannise Yihowa Farciꞌraasincho ikkinokkiti mitte rodoo gambooshshe barrisidhe dagge, gambooshshu goofanni heeꞌreenna hadhannota huwattino. Roduuwu, ise qaaqquullese gambooshshe adhite daggannohu saꞌe saꞌe calla ikkinota huwattino. Konnira roduuwu, ‘Minaannise qaaqquullese gambooshshe adhite dagganno gede fajjasera mayira kaajjishshe dixaꞌmitanno?’ yite bushiishshuse. Ise kayinni dandiiture baala assitanni no. Ise umise yannanni assitannohu baalanka coye diꞌꞌikkino; hattono ise hasidhino daafira calla qaaqquulle haadhe haꞌra didandiitanno. Ikkina wolootu ise bushiishshanna macciishshittoro maa assatto? Hatte rodoo assitannorira mannu albaanni galatittoseronna assitanni nooha dancha coye kulittoro, bushiishshannoseri agurtara dandiitanno.

18. Meya roduuwa kaaꞌlate wolere maa assa dandiineemmo?

¹⁸ Meya roduuwinkera hasiisannonsa coye assine insara hendeemmonsata leellisha dandiineemmo. (1 Yoh. 3:18) Xiwantino amase towaaxxitannoti Aneete togo yitino: “Mitu roduuwi sagale anga haadhe dagge kaaꞌlitannoe. Tini banxannietanna songote giddo waagu nooeta wodancheemma gede assitinoe.” Roduuwu  Joordaanino kaaꞌlitinose. Mittu rodii ise makeenase biddi assidhanno gara kulinose. Ise togo yitino: “Roduuwu keeraanchimmaꞌya daafira heddannota afaꞌya hagiirsiissannoe.”

19. Cimeeyye meya roduuwa kaaꞌlitannoti wole doogga hiittenneeti?

¹⁹ Cimeeyyeno meya roduuwira mayi hasiisannoro heddanno. Yihowa meya roduuwa towaantara hasiꞌrannota affino. (Yai. 1:27) Konnira insa Yesuusi gede shaqqadda ikkitino daafira, hajajo batisa agurte marartannonsa. (Mat. 15:22-28) Uminsanni kaꞌe kaaꞌlitanno cimeeyye, meya roduuwi banxanninsata huwatanno gede assitanno. Kia yinanni rodoo, soqqanshote gaamosehu aliidi laꞌꞌaanchi, ise wole mine soorridhara kaꞌe noota afiti, bayichonko ise kaaꞌlinanni gede assino. Ise togo yitino: “Tini lowo yaaddo gatissinoe. Cimeeyye coyidhinorinninna assitinorinni jawaachishshinoe; tini songote giddo waagu nooetanna qarru yannara callatoommakkita wodancheemma gede assitinoe.”

20-21. Meya roduuwanke baalanka banxeemmonsata leellisha dandiineemmohu hiittoonniiti?

²⁰ Xaa yannara addi addi songuwara diinaggaawe loose dancha lawishsha ikkannohu batinyu meya roduuwi no; kuri roduuwa kaaꞌla hasiissannonke. Yesuusi lawishshinni ronsummonte gede, meya roduuwi ledo yanna sayinsenna insa seekkine egennine kaaꞌla dandiineemmo. Insa Yihowara soqqamate assinorira galantammonsara dandiineemmo. Hasiisanno woyite insara halamme coyiꞌrammeemmo.

²¹ Soqqamaasinchu Phaawuloosi Roomu Kiristaanira borreessino sokkara jeefote honse meya roduuwa qummi assino. (Rom. 16:1, 3, 6, 12, 13, 15) Kuri roduuwi Phaawuloosi soyinonsa keerenna galata macciishshituti jawaattinoti dihuluullissannote. Ninkeno songonkera noore meya roduuwa baalanka kaaꞌlino. Hatto assineemmoha ikkiro, ayyaanaamittete maatenke miilla ikkitino daafira banxeemmonsata leellinsheemmo.