Qummeeshshu togo yaanno: “Mitte gobbara buxane beebba assiˈnannanna halaale dawinsanna affe dhaggeeffattooti. Rooreho rooru no; insa woˈmunkura aleenni hige laˈˈannohu no.”—Ros. 5:8.

Tenne hajo lainohunni Yihowara noosi lao heda hoongummoro, kuni qummeeshshi kulanni noohu uulla gashshaanore calla lawara dandaanno. Ikkollana kuni qummeeshshi Yihowa daafirano kulannoho; tini qolte jawaantenna shesho uyitannonke.

Rosiisaancho 5:8 buxane beebba assiˈrannonna halaale dawisanno gashshaanchire kultanno. Kuni gashshaanchi isita roortino silxaane afiˈrinohu laˈˈanni noosita qaaga hasiissannosi. Isinni isi roorichinni nafa roortino silxaane noonsari heedhara dandiitanno. Uullate gashshooti giddo silxaane noonsari baalunku bushuulle ikkitara dandiitanno; konnira addi addi silxaane noonsari manna gadadissara dandiitanno.

Kaaˈlannohu noonkekkiha lawinkerono, Yihowa uullate gashshooti giddo lowo silxaane noonsare laˈˈanni noota afanke sheshifanteemmo gede assitannonke. Maganu kaaˈlannonke gede huucciˈranna duhanke isi aana tuqqa dandiineemmo. (Far. 55:22; Fil. 4:6, 7) Yihowa “Isira gudisante aamantinore jawaachishate, . . . baatto baala” illaallisannota anfoommo.—2 Dud. 16:9.

Hakko daafira, Rosiisaancho 5:8 uullate gashshooti hiittoohoro qaagiissitannonke; woˈmanka woyite rooreho rooru no. Hakkiinnino sae qummeeshshu, baalunkunni roore silxaane noosihu Yihowa ikkinota qaangeemmo gede kaaˈlannonke. Isi xa Mangistesira Moote asse shoominohu Beettisi Yesuusi Kiristoosi widoonni gashshanni no. Woˈmanka Dandaanno Maganiwiinni goˈlinori horo dino; isino Beettisino halaale didawissanno.