1-2. Rosiisaancho 11:6 Maganu Mangisteha dancha duduwo duduwate ledo mayi xaadooshshe afidhino?

MITE gobbara mannu dancha duduwo quqquxame macciishshanno. Insa hasidhanni keeshshitino halaale afidhino. Wole gobbara kayinni mannu Maganunnireno Qullaawu Maxaafireno hakkeya afa dihasiˈranno. Ati heeˈratto gobbarana? Mannu macciishshirono macciishsha giwirono Yihowa loosu ikkino yaa geeshsha sabbankammora hasiˈranno.

² Yihowa murino yannara sabbakate loosi uurranno; hakkiinni “goofimarchu daanno.” (Mat. 24:14, 36) Hakka geeshsha kayinni ‘hashsha geeshsha wixate’ yaano agurrummokkinni sabbakate maa assa hasiissannonke?—Rosiisaancho 11:6 nabbawi.

3. Konni birxichira maa ronseemmo?

³ Sai birxichira ‘manna woshshaadate’ loosinni dancha guma afiˈrate assa hasiissannonkeha shoole coye laˈnoommo. (Mat. 4:19) Konni birxichira kayinni aye geeshshi fonqoli iillinkerono dancha duduwo jawaante duduwate assa hasiissannonkeha sase coye laˈneemmo. Insano (1) sabbakate looso illachishate, (2) cincineemmore ikkatenna (3) ammananke kaajjishiˈrate.

4. Yihowa loonsammora uyinonke looso illachisha hasiissannonkehu mayiraati?

⁴ Yesuusi goofimarchu barruwa giddo ikkannorinna mannu ikkito, harunsaanosi sabbakate looso woˈmunni woˈma illachisha qarra ikkitannonsa gede assannota coyiˈrino. Isi rosaanosi “feeffattine agadhe” yiinonsa. (Mat. 24:42) Nohi yannara mannu Maganu qorowishsha macciishshannokki gede assinonsari batinyu coyi no; kuri coyibba ninke hedono bebbeehantanno  gede assitara dandiitanno. (Mat. 24:37-39; 2 Phe. 2:5) Konnira Yihowa loonsammora uyinonke looso illachisha hasiissannonke.

5. Soqqamaasinete Looso 1:6-8 sabbakate loosi halaˈlannota leellishshannohu hiittoonniiti?

⁵ Xaa yannara Maganu Mangisteha sabbakate looso illachisha hasiissannonke. Yesuusi isi reyihu gedensaannino kuni loosi uurrannokkitanna halaˈladunni loosamannota coyiˈrino. (Yoh. 14:12) Yesuusi reyihu gedensaanni mite rosaanosi qulxuˈme woshshaaxxate higgino. Isi reyotenni kaihu gedensaanni mite rosaanosi maalaletenni lowo qulxuˈme woshshaaxxitanno gede assino. Yesuusi hakkawoyite rosaanosira manna woshshaadate loosi wolu baalunku loosinni roore hasiisannoha ikkinota luphi asse xawisino. (Yoh. 21:15-17) Isi iimira haˈrara albaanni, rosaanosi sabbakate looso Israeelete calla ikkikkinni gobbate qacce geeshsha loossannota kulinonsa. (Soqqamaasinete Looso 1:6-8 nabbawi.) Boodu diri gedensaanni Yesuusi soqqamaasinchu Yohaannisira “Mootichu barra” ikkannore ajuujatenni leellishinosi. * Sokkaasinchu massaganna “baattote aana noo gosara, gaˈretenna addi addi afiinni coyiˈranno manni baalaho” hegereta “Danchu Duduwi sokka” dudumbanna laino. (Aju. 1:10; 14:6) Tini Yihowa ikkino yaa geeshsha sabbakate looso xaa yannarano loonsammora hasiˈrannota leellishshanno.

6. Woˈmanka woyite sabbakate looso illachisha dandiineemmohu hiittoonniiti?

⁶ Yihowa ninke kaaˈlate assinore baala hendeemmo woyite sabbakate looso illachinsheemmo. Lawishshaho isi attammoonninna elektiroonikisete garinni qixxeessinoonnita, qoonqotenninna viidiyotenni qaddaˈnoonnita hattono interneetete shiqqanno biroodikaaste widoonni falakkinota ayyaanaamittete  sagale shiqishanni noonke. Webisayitenkera 1,000 saˈˈanno afiinni Qullaawu Maxaafi roso qixxeessinanni! (Mat. 24:45-47) Poletikunni, ammaˈnotenninna miinjunni bebbeehantino alame giddo, sette miliyoone saˈannoti Maganu soqqamaano alamete doyichohu roduuwu maamari giddo mitteenni heedhanno. Lawishshaho Arbe, Dotteessa 19, 2019nni, alamete doyichora heedhannoti Yihowa Farciˈraasine barru qummeeshsha xawissanno viidiyo laˈino. Hatte hawarro 20,919,041 manni Yesuusi Kiristoosi reyo Qaagooshshe ayirrisate gamba yiino. Yihowa yannankera loosanni noota tenne maalale laˈˈatenna tennerano ninke kaaˈlate qoosso afiˈranke, woˈmanka woyite sabbakate looso illachinsheemmo gede kakkayissannonke.

7. Yesuusi lawishsha harunsa hedonke billaallitannokki gede kaaˈlitannonkehu hiittoonniiti?

⁷ Sabbakate looso illachinsheemmo gede kaaˈlannonkehu wolu coyi Yesuusi lawishsha harunsate. Isi ayi coyino hedosi billaallisaranna sabbakannota hoolasira diwodhino. (Yoh. 18:37) Isi Sheexaanu “alamete gashshooti ayirrinye baala” aannosita kulisita didoogamino; mannu moohisasira woˈnaali woyiteno maahoyye diyiino. (Mat. 4:8, 9; Yoh. 6:15) Yesuusi maalaamittete jirora wojji diyiino; woy mannu giwisirono bashshi diassino. (Luq. 9:58; Yoh. 8:59) Ninkeno ammananke fonqolannori iillannonke woyite, soqqamaasinchu Phaawuloosi amaalino amaale qaaganke hedonke billaallitannokki gede kaaˈlitannonke. Isi Yesuusi lawishsha harunsa ‘wolqa baˈnikkinninna hexxo mudhinikkinni’ heeˈnanni gede kaaˈlitannota coyiˈrino.—Ibi. 12:3.

8. Cincate yaa mayyaate? Roorenkanni xaa yannara cinca hasiissannonkehu mayiraati?

⁸ Cinca mittu coyi woyyaawa geeshsha wodanaaˈmine agadhate dandooti. Giwisaanke coyi baˈˈa geeshsha woy lowo yanna quqquxamme agadhinoommohu danchu coyi woˈma geeshsha cincine agadha hasiissannonke. Masaalaanchu Imbaaqoomi Yihudaho batidhino beebba baˈanno yanna quqquxame agadhino. (Imb. 1:2) Yesuusi rosaano Maganu Gashshooti “hakkawoyintenni leellannoha” lawinonsa daafira Roomu gashshooti gadadisannonsa gadadinni wolaphineemmo yite hexxitino. (Luq. 19:11) Maganu Mangiste bunshe huntannonna keeraanchimma woˈmitinota haaro alame abbitanno yanna quqquxamme agadhineemmo. (2 Phe. 3:13) Ikkirono Yihowa murino yanna cincine agadha hasiissannonke. Hanni Yihowa cinca rosiisannonketa mite doogga laˈno.

9. Yihowa cincannoha ikkinota leellishshanno lawishshuwa hiikkuriiti?

⁹ Baalunkunni roore cincatenni dancha lawishsha ikkannonkehu Yihowaati. Isi Nohi markaawe loosaranna “keeraanchimmannire” sabbakara lowo yanna uyinosi. (2 Phe. 2:5; 1 Phe. 3:20) Yihowa Soddoomunna Gomoorunnite busha katammara heedhannore hunara kaita, Abirihaami wirro wirro hige xaˈmisi woyite cince macciishshino. (Kal. 18:20-33) Yihowa ammanantinokkire Israeelete daga lowo geya cincino. (Neh. 9:30, 31) Xaa yannarano Yihowa isiwa abbanno manni “baalunku aagintaawe higara” yanna uyinonsa; tini isi cincannoha ikkinota leellishshanno. (2 Phe. 3:9; Yoh. 6:44; 1 Xim. 2:3, 4) Yihowa lawishshi ninkeno sabbakatenna rosiisate looso loonseemmo woyite cincineemmore ikkineemmo gede assannonke. Qaalisi giddo kulloonnihu mittu lawishshino cinca rosiisannonke.

10. Yaiqoobi 5:7, 8 kultanno garinni baatto loosiˈre galino manchi lawishshinni maa ronseemmo?

¹⁰ Yaiqoobi 5:7, 8 nabbawi. Baatto loosiˈranno manni lawishshi cinca rosiisannonke.  Hige mite muro rakke lophitanno. Ikkirono batinye muro roorenkanni guma laaltanno muro lowo yanna gedensaanni laaltanno. Hunda Israeelete gobbara gidu midote iillannohu lewu aganinniiti. Baatto loosiˈre galino manchi gedensiise wixiriro gedensiise mixxanno. (Maq. 4:28) Ninkeno baatto loosiˈre galino manni gede cincineemmore ikka hasiissannonke. Ikkirono hatto assa shota coye diˈˈikkitino.

11. Cinca soqqanshonkera kaaˈlitannonkehu hiittoonniiti?

¹¹ Guuntete xeˈne noonkere ikkinoommo daafira, daafurinke guma mulenni afiˈra hasiˈneemmo. Ikkirono, guma afiˈra hasiˈnummoro seekkine loosa yaano, qottisa, kaasa, shuqunanna waa hayikkisa hasiissannonke. Manna rosaano assate loosino hattooti. Rosiinseemmo manni wodanira noota manna mulla kaˈne giwate hedo buqqise hoolatenna shaqqadda ikkitanno gede assate yanna hasiissanno. Cinca mannu macciishsha giwinkerono hexxo mudhineemmokki gede kaaˈlitannonke. Mitu manni kulleemmonsare macciishshirono cincineemmore ikka hasiissannonke. Qullaawu Maxaafi rosaano ayyaanaamittetenni lophitanno gede xixxiiwa didandiineemmo. Yesuusi rosaano nafa isi kulinonsare rakke huwattinokki woyiti no. (Yoh. 14:9) Kaanseemmorinna waa hayikkinseemmori ninke ikkinummorono, lossannohu kayinni Magano ikkinota qaango.—1 Qor. 3:6.

12. Yihowa Farciˈraasine ikkinokki fiixinkera farciˈneemmo woyite cincineemmore ikka dandiineemmohu hiittoonniiti?

¹² Yihowa Farciˈraasine ikkinokki fiixinkera farciˈneemmo woyiteno cinca qarra ikkitankera dandiitanno. Rosiisaancho 3:1, 7te noohu xintu seeri kaaˈlankera dandaanno. Qummeeshshu, “Sammi yaate yanna no; hasaawate yanna no” yaanno. Danchu amanyootinke fiixinke ninke macciishshanno  gede assara dandaanno; ikkollana afiˈnummo faro horoonsiˈne farciˈra hasiissannonke. (1 Phe. 3:1, 2) Maatenkerano ikko wolu mannira diinaggaambe sabbankeemmonna rosiinseemmoha ikkirono cinca hasiissannonke.

13-14. Cincatenni dancha lawishsha ikkitannonkeri ayeooti?

¹³ Qullaawu Maxaafi giddo kulloonnihunna yannankera noohu ammanamino manni lawishshinni cinca rosa dandiineemmo. Imbaaqoomi Yihowa bunshe hunanno yanna quqquxame agadhino; ikkirono isi “Shaete aana fule uurreemmo” yee cince agadhannota coyiˈrino. (Imb. 2:1) Soqqamaasinchu Phaawuloosi soqqanshosi ‘gudate’ halchannota coyiˈrino. Ikkollana “Maganu eltoha Dancha Duduwo” cince duduwino.—Soq. 20:24.

¹⁴ Hanni Giiliyaadi Rosi Mininni maassame fulino minaanninna minaama lawishsha laˈno; insa sonkoonninsa gobbara gariti Yihowa Farciˈraasine dino hattono hatte gobbahu rooru manni Kiristaana diˈˈikkino. Batinyu manni Qullaawa Maxaafa xiinxalla dihasiˈranno. Giiliyaadi Rosi Mine ledonsa rosinori wole gobbara soqqamanno roduuwi kayinni, ayyaanaamittetenni lophitanni nooti lowoti Qullaawu Maxaafi xiinxallo noonsata kulinonsa. Kuri minaanninna minaama noo gobbara mannu hakkeya macciishsha giwirono insa cincite sabbakkino. Insa konni qoqqowira sette diro soqqamihu gedensaanni, Qullaawu Maxaafi rosaanonsa giddo mitte cuuantino daafira hagiidhino. Hunda heedhinoreno yannankera nooreno kuri Maganu soqqamaano mitto assannonsari maati? Insa ceeˈmite sabbaka diagurtino; Yihowano cincitino daafira maassiˈrinonsa. Ninkeno ‘ammanatenninna cincatenni kaajje Maganu hedinonsa coye ragiˈranno manni’ lawishsha harunsino.—Ibi. 6:10-12.

15. Ammana sabbakate quqquxammeemmo gede assitannonkehu hiittoonniiti?

¹⁵ Sabbankeemmo sokka ammanneemmo daafira tenne sokka dandaaminke deerrinni lowo mannira kulate quqquxammeemmo. Maganu Qaali giddo noo hexxo addaxxineemmo. (Far. 119:42; Isa. 40:8) Qullaawu Maxaafi giddo kulloonni masaalo yannankera woˈmitanna laˈnanni heeˈnoommo. Qoleno mannu Qullaawu Maxaafiha xintu seera harunsa hanafanno woyite, heeshshonsa woyyaabbino gara anfoommo. Tenne hendeemmo woyite baalunku manni Maganu Mangisteha dancha duduwo macciishsha hasiissannonsata huwanteemmo.

16. Faarso 46:1-3 kultanno garinni Yihowanna Yesuusa ammananke, sabbakate quqquxammeemmo gede kaaˈlitannonkehu hiittoonniiti?

¹⁶ Sabbankeemmo sokka Anna ikkinoha Yihowano ammanneemmo; isi Mangistesira Moote asse shoominoha Yesuusano ammanneemmo. (Yoh. 14:1) Aye coyino iillinkero Yihowa woˈmanka woyite golonkeetinna wolqankeeti. (Faarso 46:1-3 nabbawi.) Qoleno Yesuusi Yihowa uyinosi silxaane horoonsiˈre iima heeˈre sabbakate looso loosiisanni noota addaxxineemmo.—Mat. 28:18-20.

17. Agurrummokkinni sabbaka hasiissannonketa leellishanno lawishsha kuli.

¹⁷ Ammana Yihowa assineemmore maassiˈrannota addaxxineemmo gede assitannonke; mito woyite isi maassiˈrannonkehu ninke hendoommokki garinniiti. (Ros. 11:6) Lawishshaho barru baala lowo kume ikkanno manni gudumaaleho borrote gaare horoonsiˈne sabbankanna laˈˈanni saˈˈanno. Konni garinni sabbaka kaaˈlitinori no? Lowore kaaˈlitino. Bocaasa 2014nnite Maganu Mangiste Soqqanshonkera mitte yuniversitete rosaancho woˈnaalsha kulloonni; ise Yihowa  Farciˈraasine daafira xiinxallite borro borreessa hasidhino. Ise Gambooshshu Addaraashe mama nooro diaffino; ikkirono rossanno yuniversite huxxiwa xarapheessaho worroonni borro affino; hattono adhitino borro giddonni borrosera kaaˈlitannose hedo afidhino. Ise yannate gedensaanni cuuante Yihowa Farciˈraasincho ikkitino; xa kayinni woˈma yanna suwisaancho ikkite soqqantanni no. Togoo woˈnaalshi xaano Maganu Mangiste sokka macciishsha hasiˈranno manni noota leellishanno; tini qolte sabbakate kakkayissannonke.

18. Sabbakate loosi Yihowa murino yannara uurranno yineemmohu mayiraati?

¹⁸ Sabbakate loosi Yihowa murino yannara uurrannota anfoommo. Nohi waro ikkinore qaango. Yihowa woˈmanka woyite mitto coye murino yannara assannota leellishino. Isi Baote Waa abbannota murinohu 120 meddi yaanno diri albaanniiti. Lowo diri gedensaanni Yihowa Nohi markaawe seekkanno gede hajajinosi. Baote Wayi daara albaanni Nohi Yihowa uyinosi looso diinaggaawe loosino; isi konne looso 40 woy 50 diri geeshsha loosinoha ikkara dandaanno. Mannu macciishsha giwirono Yihowa saada markaawete giddora eessi yaasi geeshsha manna qorowisiisa diagurino. Hakkiinni yanna iillituta Yihowa “waalcho gobbaanni cufi.”—Kal. 6:3; 7:1, 2, 16.

19. Agurrummokkinni sabbankummoro albillitte mayi ikkanna laˈneemmo?

¹⁹ Muli yannara Yihowa sabbakate looso uurranno gede assanno; isi Sheexaanu alamera ‘waalcho cufanno;’ hakkiinni keeraanchimma woˈmitinota haaro alame abbanno. Hakka geeshsha kayinni Nohi, Imbaaqoominna wolootu gede agurrummokkinni sabbanko. Sabbakate looso illachinsho, cincineemmore ikkino, hattono Yihowaranna isi eino qaalira noonke ammana kaajjishiˈno.