Hanni Qullaawu Maxaafi tenne xaˈmuwara qolanno dawaro laˈno.

Soqqamaasinete Looso 24:15 ‘cubbaataammunna keeraano reyotenni kaˈannota’ kultanno. Keeraanote yiniri reyitara albaanni Maganoho hajajantinoreeti; hakko daafira insa suˈmi heeshshote maxaafira borreessamino. (Mil. 3:16) Cubbaataammaho yiniri giddo gamu Yihowa daafira rosate faro afidhukki reyitinoreeti; hakko daafira insa suˈmi heeshshote maxaafira diborreessamino.

Yohaannisi 5:28, 29 Soqqamaasinete Looso 24:15 kullite lame gaamo daafira kultanno. Yesuusi “Dancha loossinori reyotenni kaˈe lubbotenni heedhanno; busha loossinori kayinni reyotenni kaˈeenna . . . yoo yinanninsa” yiino. Keeraano reyitara albaanni danchare assitino. Insa suˈminsa heeshshote maxaafira borreessame noo daafira heeshshote heeˈrate kaˈanno. Cubbaataammu kayinni reyitara albaanni bushare assitino. Insa yoote kao kaˈanno. Insa suˈmi heeshshote maxaafira diborreessamino; qoleno insa reyotenni kaˈuhu gedensaanni, dancha woy busha assitannoro laˈne yoo yinanninsa. Hatte yannara, insa Yihowa daafira rosatenna suˈminsa heeshshote maxaafira borreessamanno gede assiˈrate faro afidhanno.

Yohaannisi Ajuuja 20:12, 13 reyotenni kaˈannori baalunku ‘maxaaffate giddo borreessinoonnirira’ yaano haaro alamera uyinanninkehu haaru seerira hajajama hasiisannonsata kultanno. Konni seerira hajajantannokkiri baˈanno.—Isa. 65:20.

Daanieeli 12:2 reyite noori giddo gamu ‘hegere heeshshora kaˈannotanna, gamu kayinni hegere saalira’ kaˈannota kultanno. Kuni qummeeshshi kulanni noohu reyotenni kaˈannorira yinannite jeefote yoo daafiraati; insa jeefote “hegere heeshsho” afidhanno woy ‘hegere saala’ adhitanno. Hakko daafira 1,000 diri jeefora gamu hegere heeshsho afidhanno; gamu kayinni hegerera baˈanno.—Aju. 20:15; 21:3, 4.

Hanni mitto lawishsha laˈno. Reyotenni kaˈannota lamenta gaamo, wole gobba haˈre heeˈra hasiˈranno manni ledo heewisiisa dandiinanni. Keeraanote yiniri, mite horonna qoosso afiˈrate kaaˈlannonsaha loosu woy hatte gobbara heeˈrate viiza afiˈrino manni gedeeti. Cubbaataammu kayinni yannate geeshsha heeˈrate woy daaˈˈatate viiza calla afiˈrino manni gedeeti. Togoo mannira marino gobbara heeˈranno gede fajjinannihu, hatte gobba seerira hajajamannota leellishihu gedensaanniiti. Hatteente gede, reyotenni kaˈanno cubbaataammi Gannatete heeˈrate Yihowa seerira hajajamanna keeraano ikka hasiissannonsa. Wole gobbanni dayino mannira umi qara uyinanni viizi ikkihano ikkiro, jeefote mitootu hatte gobba qansoota ikkitanno; woloota kayinni hatte gobbanni fushshinanni. Insa martino gobbara heedhanno woy heedhannokki gede assinannihu amanyootensanna assootensa laˈneeti. Hatteente gede, reyotenni kaˈannorira baalaho jeefote yoo yinannihu ammanantinore ikkansanna haaro alamera leellishshanno amanyoote laˈneeti.

Yihowa shaqqado calla ikkikkinni taashsho baxanno Maganooti. (Mar. 32:4; Far. 33:5) Isi keeraanono cubbaataammano reyotenni kayise baxillesi leellishanno. Ikkirono, insa baalunku isi fushshino wodhora hajajantara hasiˈranno. Haaro alamera hegerera heedhara fajjinanniri iso baxxannoreetinna isi biddishshi garinni heedhannore callaho.