1. Loosu bayicho woy rosu mine mayi daafira xaꞌminankera dandiinanni?

 LEDOKKI loossannori woy rossannori ammanakki daafira xaꞌmitannohe woyite mayi macciishshamannohe? Waajjatto? Ninke giddo rooru waajjineemmo. Ikkollana togoo xaꞌmuwa wolootu maa heddannoro woy mayite ammantannoro huwanteemmo gede kaaꞌlitannonke daafira dancha duduwo kulleemmo faro fantannonke. Ikkirono mitu manni xaꞌmo xaꞌmannohu ninke ledo sumuu yaannokki daafira woy heewisamate yee ikkara dandaanno. Tini dhagge diꞌꞌikkitannonke. Insa ammaꞌnonke daafira gara ikkinokkire macciishshitinoha ikkara dandaanno. (Soq. 28:22) Hakkiino sae heeꞌnoommohu, batinyu manni ‘araara giwannohanna mararro afiꞌrinokkiha ikkinote goofimarchu barruwa’ giddooti.—2 Xim. 3:1, 3.

2. Jooguulle ikka hasiꞌneemmohu mayiraati?

² ‘Mittu manchi ammanaꞌya daafira ane ledo heewisamanno woyite shaqqillunninna hayyotenni hasaawisa dandeemmohu ma garinniiti?’ yite hedattoha ikkara dandaanno. Tennera kaaꞌlannoheri maati? Joongilleho. Joogu manchi shiimurinni dihanqanno; hatteentenni hanqisannori woy caacceessannori tuncu yaannosi woyite isonooto eemadhanno. (Law. 16:32) Hige jooga ikka woꞌmanka woyite shota diꞌꞌikkitanno. Ikkina albinni roore jooga ikka dandaattohu hiittoonniiti? Mittu manchi ammanakki daafira kayise ate ledo heewisamanno woyite joongillunni qola dandaattohu ma garinniiti? Annuwunna amuuwu oosonsa ammanansara joongillunni gaarantanno gede kaaꞌla dandiitannohu hiittoonniiti? Hanni hiittoonniitiro laꞌno.

3. Joongillu jawaantete ikkinnina laanfe diꞌꞌikkino yineemmohu mayiraati? (2 Ximootewoosi 2:24, 25)

³ Joongillu jawaantete ikkinnina laanfe diꞌꞌikkino. Qarru yannara wodanaaꞌmate jawaante hasiissanno. Joongillu qullaawu ‘ayyaani laalo’ widooti. (Gal. 5:22, 23) “Joongille” yine tirroonniha Giriikete afii qaale leenjinshoonni farashsho kulate horoonsiꞌnoonni woyitino no. Hanni leenjinshoonni farashsho hedi. Kuni farashshi xa jooga ikkinoha ikkirono wolqasi noo gedeennilla no. Ninke mannu ooso jooguulle ikkine heeꞌnenni worbuulle ikka dandiineemmohu hiittoonniitiyya? Ninke uminke wolqanni diꞌꞌikkino. Kuni kaajju akati heeꞌrannonke gede assiꞌrate kaaꞌlannonkeha qullaawa ayyaana afiꞌrate huuccatto assiꞌra hasiissannonke. Jooguulle ikka dandiinannita leellishannohu batinyu woꞌnaalshi no. Batinyu ammanate roduuwinke mannu hanqisinsa woyite jooguulle ikkansa leellishshino; tini qolte mannu Yihowa Farciꞌraasine daafira danchare hedanno gede assitino. (2 Ximootewoosi 2:24, 25 nabbawi.) Joongillu jawaante ikkannohe gede assiꞌra dandaattohu hiittoonniiti?

4. Yisihaaqi lawishshinni joongillu daafira maa ronseemmo?

⁴ Qullaawu Maxaafi giddo joongillu afiꞌrino waaga leellishshannoti batinye xagge no. Hanni Yisihaaqi lawishsha laꞌno. Isi Filisxeemete qoqqowira Geeraara noo yannara, hinaasinohu qooxeessisira heeꞌranno manni annisi soqqamaano untinota wayi bale horoonsiꞌrannota hoolinosi. Yisihaaqi qoossosira gaaramantenni maatesi adhe hakkiinni xeertowa haꞌre wayinnita wole bale uꞌmino. (Kal. 26:12-18) Ikkirono Filisxeemootu hakko qooxeessira noo wayino insaha ikkinota coyidhino. Kayinni Yisihaaqi keere hasiꞌrannoha ikkasi leellishino. (Kal. 26:19-25) Wolootu iso hanqisate murcidhinoha lawannore assiturono isi jooga ikkanno gede kaaꞌlinosiri maati? Isi annisinna amasi lawishshinni yaano Abirihaami keere kalaqate assinorenna Saarahu ‘gaꞌlabbichunna wodanaamu’ akatisenni lowore rosinoti dihuluullissannote.—1 Phe. 3:4-6; Kal. 21:22-34.

5. Annuwunna amuuwu oosonsara joongillu afiꞌrino waaga rosiisa dandiitannota leellishanno lawishshi hiikkonneeti?

⁵ Annuwanna amuuwa, kiꞌneno oosoꞌnera joongillu afiꞌrino waaga rosiisa dandiitinanni. Hanni 17 dirihu Makisensi yinanni rodii woꞌnaalsha laꞌno. Isi rosu minenna soqqanshonniwa hanqino manni coyiꞌrannore dandee saꞌꞌa hasiissinosi. Isi jooga ikkanno gede annisinna amasi cincite kaaꞌlitinosi. Insa togo yitino: “Makisensi xa mannaho hanqine coyiꞌrantenni meessaneeto eemadha worbimma ikkitinota wodanchino.” Makisensi xa jooga ikkino.

6. Huuccatto albinni roore jooguulle ikkineemmo gede kaaꞌlitannonkehu hiittoonniiti?

⁶ Mitu manni hanqisannonke woyite lawishshaho Maganinke suꞌma hunanno woyite woy Qullaawa Maxaafa mishanno woyite maa assa dandiineemmo? Joongillunni qola dandiineemmo gede Yihowa ayyaanasinna hayyo aankera huuccatto assiꞌra hasiissannonke. Dawaro qola hasiissannonke garinni qolloommokkita gedensoolla wodanchinummo? Tenne hajo daafira galagalle huuccatto assiꞌranna albillitte danchu garinni qolleemmo gara heda dandiineemmo. Yihowano hanqo eemadhineemmo gedenna jooguulle ikkineemmo gede qullaawa ayyaanasi aannonke.

7. Mite qummeeshshuwa qaaganke coyiꞌneemmorenna assineemmore qorophineemmo gede kaaꞌlitannonkehu hiittoonniiti? (Lawishsha 15:1, 18)

⁷ Joongillunni coyiꞌra qarra ikkitannonke woyite mite qummeeshshuwa kaaꞌlitannonke. Maganu ayyaani kuri qummeeshshuwa qaangeemmo gede assannonke. (Yoh. 14:26) Lawishshaho, Lawishshu maxaafira noohu xintu seeri jooguulle ikkineemmo gede kaaꞌlankera dandaanno.  (Lawishsha 15:1, 18 nabbawi.) Qoleno konni maxaafi giddo, coyi roore bushanni haꞌranno woyite wodanaaꞌma kaaꞌlitanno gara kulloonni.—Law. 10:19; 17:27; 21:23; 25:15.

8. Mittu manchi ammananke daafira xaꞌmannonke gede assannosiri maatiro heda hasiissannonkehu mayiraati?

⁸ Wodanchano kaaꞌlitankera dandiitanno. (Law. 19:11) Wodanchanno manchi ammanasi daafira shota ikkitinokki xaꞌmo xaꞌminannisi woyite isonooto eemadhanno. Duucha woyite mannu xaꞌmo xaꞌmannonkeha ikkirono, xaꞌmannonke gede assinonsa coye dikulannonke. Hakko daafira dawaro qollammora albanni, mannu xaꞌmannonke gede assinonsari maatiro wodancha danchate.—Law. 16:23.

9. Gedewooni Efireemi manni ledo hasaawi woyite wodanchannohanna jooga ikkasi leellishinohu hiittoonniiti?

⁹ Hanni Gedewooni Efireemi mannira dawaro qolino gara laꞌno. Insa, isi Israeelete diinna ledo olamara haꞌri woyite woshshinonsakkihu mayiraatiro hanqite xaꞌmitinosi. Insa lowo geeshsha hanqitanno gede assinonsari maati? Insa xissiisidhinoha ikkara dandaanno. Hanqitanno gede assinonsa coyi ikkihano ikkiro, Gedewooni insa ayirrisino hattono awu afiinni hasaawisino. Tini mayi guma abbituyya? Insara ‘hanqinsa qiidino.’—Eje. 8:1-3.

10. Ammananke daafira xaꞌmannonke mannira dawaro qolleemmo gara afate kaaꞌlannonkeri maati? (1 Pheexiroosi 3:15)

 ¹⁰ Mittu ledonke rosannohu woy loosanno manchi Qullaawu Maxaafi biddishshira hajajammeemmohu mayiraatiro xaꞌmankera dandaanno. Macciishshannonke manna ayirrinseemmota leellishanno garinni ammanankera gaaramate dandiinummore baala assineemmo. (1 Pheexiroosi 3:15 nabbawi.) Mittu manchi xaꞌmo xaꞌminonkehu ninke mishateeti yine hedantenni tenne xaꞌmo isi hedota afate kaaꞌlannonke coyi gede assine laꞌꞌa danchate. Mittu manchi xaꞌmo xaꞌmanno gede assannosi coyi ikkihano ikkiro shaqqillunninna joongillunni qola hasiissannonke. Qolleemmo dawaro hedosi biddi assiꞌranno gede assitasira dandiitanno. Isi ayirrinye bainore coyiꞌriro woy assiro hattono coyinni kisinkerono dawaro shaqqillunni qola hasiissannonke.—Rom. 12:17.

11-12. (a) Shota ikkitinokki xaꞌmo xaꞌminonke manchira dawaro qollammora albaanni maa heda hasiissannonke? (Misileno lai.) (b) Xaꞌmo xaꞌma hasaawaho faro fantanno gara leellishanno lawishsha kuli.

¹¹ Lawishshaho ledonke loosanno manchi ilammoommo barra ayirrinseemmokkihu mayiraatiro xaꞌmankera dandaanno. Hanni tenne hedi: Isi xaꞌmanni noonkehu jaallanke ledo dancha yanna sayinseemmo gede fajjinanninkeronna teꞌee huluullameeti ikka? Woy togoo ayyaana ayirrisa hooganke, ledonke loossannori ledo dancha aante heedhannokki gede assitanno yeeti ikka? Isi ledosi loosanno mannira hedannoha ikkino daafira galantesi hattono ninkeno loosu bayichi hagiirsiisannoha ikkara hasiꞌneemmota kullesi yaaddosi ajisha dandiineemmo. Hatto assanke Qullaawu Maxaafi ilammoonni barra ayirrisate daafira mayyaannoro dancha gede hasaawate faro fantankera dandiitanno.

¹² Wolu mannino shota ikkitinokki xaꞌmo xaꞌmannonke woyite konni garinni dawaro qola dandiineemmo. Ledonke rosannohu, Yihowa Farciꞌraasine labbaahu labbaahu ledo woy meyaati meyaate ledo adhamate daafira noonsa lao soorra hasiissannonsa yee coyiꞌrannoha ikkara dandaanno. Isi hatto yiinohu Yihowa Farciꞌraasine tenne hajo daafira mayite ammantannoro woꞌmunni woꞌma huwatinokki daafiraati ikka? Isira hattoo jaali woy fiixi noosi ikka? Isi labbaahu labbaahu ledo woy meyaati meyaate ledo adhamanno manna banxeemmokkihu gede asse hedanno ikka? Isira, duuchunku gari mannira hendeemotanna mittu mittunku manchira hasiꞌrinore doodhate qoosso noosita hattono tenne qoossosi ayirrinseemmota kula hasiissannonkeha ikkara dandaanno. b (1 Phe. 2:17) Hakkiinni Qullaawu Maxaafi tenne hajo daafira mayyaannoronna tenne amaale harunsanke kaaꞌlitinonke gara kullammosira dandiineemmo.

13. Maganu noota ammana gowwimmate yaanno manna kaaꞌla dandaattohu hiittoonniiti?

¹³ Mittu manchi horo ninke ledo sumuu yaa hoogiro muddamme isi mayyee ammanannoro anfoommohu gede assine heda dihasiissannonke. (Tit. 3:2) Lawishshaho mittu ledokki rosannohu Maganu noota ammana gowwimmatella yii? Isi suutu soorro ammanannohunna tenne daafira lowore afinohu gede assite heda hasiissannohe? Isi yinanna macciishshinota haaꞌre coyiꞌranni nooha ikkara dandaanno. Isi ledo sayinsete daafira heewisamantenni gedensoonni hedanno gede assannosi coye kulattosira dandaatto. Lawishshaho jw.org aana noota kalaqamu daafira kultanno hedo kulattosira woy leellishattosira dandaatto. Isi gedensoonni hakkiicho nabbawino birxichi woy laino viidiyo daafira hasaawate sumuu yaara dandaanno. Addanko, dawaro ayirrinyunni qolakki hedosi biddi assiꞌranno gede assitasira dandiitanno.

14. Neeli yinanni rodii webisayitenke horoonsiꞌre ledosi rosanno rosaanchi Yihowa Farciꞌraasine daafira noosita gara ikkitinokki lao biddi assiꞌranno gede kaaꞌlinohu hiittoonniiti?

 ¹⁴ Neeli yinanni wedellichi mannu Yihowa Farciꞌraasine daafira coyiꞌrannoha gara ikkinokki coye xawo fushshate webisayitenke horoonsiꞌrino. Isi togo yiino: “Ledoꞌya rosanno rosaanchi duucha woyite, illete leeltanno taje agurte mittu maxaafi yaannore addaxxatto daafira sayinse diammanatto yaannoe.” Kuni ledosi rosanno rosaanchi, Neeli ammanasi daafira xawise kulanno faro hoꞌlisita Neeli konni beettira jw.org aana “Sayinsenna Qullaawa Maxaafa” (Amaaru Afoo) yaanno gafa leellishinosi. Gedensoonni Neeli kuni rosaanchi hakkiicho noo birxicho nabbawinotanna heeshshote kaimi daafira hasaawate roore sumuu yiinota wodanchino. Atino togoo guma afiꞌroottoha ikkara dandaanno.

15. Annuwunna amuuwu oosonsa rosu mine shota ikkitinokki xaꞌmo xaꞌminanninsa woyite dawaro joongillunni qoltanno gede kaaꞌla dandiitannohu hiittoonniiti?

¹⁵ Ooso ammanansa daafira xaꞌminanninsa woyite joongillunni qola dandiitanno gara annuwunna amuuwu dancha gede rosiissansara dandiitanno. (Yai. 3:13) Mitu annuwinna amuuwi tenne daafira maatete magansiꞌra yannansara rosiisidhanno. Insa rosu mine kaꞌara dandiitanno hajo daafira kayisse hasaabbanno, dawaro qola dandiinanni gara loonse leellinshanni ikkitonni rosiisidhanno hattono oosonsara joongillunninna baxisanno garinni coyiꞌnanni gara rosiissanno.—“ Maatete Deerrinni Rosiisiꞌraꞌne Maateꞌne Kaaꞌlitanno” yitanno saaxine lai.

16-17. Maatete deerrinni rosiisiꞌra wedella kaaꞌlitannohu ma garinniiti?

¹⁶ Maate mitteenni rosiisiꞌransa wedellu ammanansa kaajjishidhanno gedenna ammanansa daafira wolootaho xawisse kultanno gede kaaꞌlitannonsa. JW.ORG aana aante aantete fulannohu  “Wedellootu Xaꞌmitanno Xaꞌmo” yaanno birxichi no. Kuri birxichuwa qixxeessinoonnihu wedellootu ammanansa kaajjishidhanno gedenna dawaro uminsanni qolate qixxaabbanno gede kaaꞌlateeti. Aante aantete fultannota kuri birxichuwa maatete deerrinni xiinxalline ninke baalunku ammananke daafira kaꞌanno xaꞌmuwara dawaro joongillunninna baxisanno garinni qolleemmo gara rosiisiꞌra dandiineemmo.

¹⁷ Maatiwu yinanni wedellichi maatete deerrinni rosiisiꞌransa kaaꞌlitinosi gara coyiꞌrino. Maatete magansiꞌra yannara isinna maatesi rosu mine kaꞌara dandiitanno hajo daafira duucha woyite xiinxallitanno. Isi togo yiino: “Mannu hiittoo xaꞌmo xaꞌmara dandaannoro hendeemmo hattono xiinxallinoommo borro garinni dawaro qola dandiineemmo gara rosiisiꞌneemmo. Mitto coye ammanoommohu mayiraatiro xawe leelliero diwaajjeemmo hattono wolootaho dawaro joongillunni qola qarra diꞌꞌikkitannoe.”

18. Qolasiyaasi Sokka 4:6 mayi afiꞌrino waaga kulloonni?

¹⁸ Hige xawinsenna ammansiisanno garinni kullummorono baalunku manni kulloommore ammane adhanno yaa diꞌꞌikkino. Ikkirono ammananke daafira hayyotenninna joongillunni kula kaaꞌlitankera dandiitanno. (Qolasiyaasi Sokka 4:6 nabbawi.) Ammanneemmo coyi daafira mannaho kula kaase olate gedeeti. Kaase sununni woy kaajjinshe ollammora dandiineemmo. Sununni ollummoro olloommo manchi kaase amade galagale ninkera qole olannonke. Hatteente gede ammananke daafirano hayyotenninna joongillunni kulleemmoha ikkiro, mannu macciishshatenna hasaawa hanafate sumuu yaara dandaanno. Ikkirono mittu manchi ninke ledo heewisama hasiꞌrannohanna qacifatannonkeha ikkiro isi ledo hasaambeemmo gede giddeessannonkeri dino. (Law. 26:4) Kayinni baalunku manni hatto assanno yaa diꞌꞌikkino; rooru manni kulleemmore macciishshara dandaanno.

19. Ammananke daafira xaꞌmannonke mannira dawaro joongillunni qolleemmo gede assannonkeri maati?

¹⁹ Addanko, jooguulle ikka ronsummoro lowo horo afiꞌneemmo. Mannu heewisamanno woy qacifatannohe woyite dawaro joongillunni qolatto gede kaaꞌlitannohe jawaante afiꞌrate Yihowa huucciꞌri. Joongillunni qolakki kaꞌino heewo coyi roore bushanni haꞌrannokki gede assate kaaꞌlitannota qaagi. Joongillunninna manna ayirrisattota leellishanno garinni qolakki mitu manni ninkeranna Qullaawu Maxaafira noonsa lao biddi assiꞌranno gede kaaꞌlitansara dandiitanno. Ammanaꞌne daafira “xaꞌmitannoꞌnerira baalaho dawaro qolate woꞌmanka woyite qixxaabbinoonnire ikke. Qoltinanni dawaro kayinni shaqqillunnitanna owaantennita ikkito.” (1 Phe. 3:15, 16) Addanko jooga ikka lowo waaga afidhino!