1-2. Samisoni xagge afa hasiissannonkehu mayiraati?

 SAMISONI yinanni suꞌma gannanna macciishshatto woyite mayi qulli yaannohe? Isi mageeshshi geeshsha worba ikkinoro qaagattoha ikkara dandaanno. Tini garankolla. Ikkirono Samisoni lowo geeshsha qarramanno gede assannosiha busha doorshano doodhino. Yihowa kayinni Samisoni ammaname assinore illachishino; lawishshaho xaggesi Qullaawu Maxaafi giddo borreessinanni gede assino.

² Yihowa doodhino mannasi Israeele kaaꞌlate Samisoni horoonsiꞌre dhagge ikkanno coye assino. Samisoni reyihunni lowo xibbi diri gedensaanni, Yihowa soqqamaasinchu Phaawuloosi dhagge ikkitanno ammana noonsa labballi suꞌma borreessanno gede assi woyite, Samisoni suꞌmano borreessanno gede assino. (Ibi. 11:32-34) Samisoni lawishshi jawaachishankera dandaanno. Isi qarru amadisi yannara nafa Yihowa addaxxino. Konni birxichira, Samisoni xaggenni maa ronseemmoronna isi lawishshi jawaachishannonkehu hiittoonniitiro laꞌneemmo.

3. Samisonira uyinoonnisi loosi maati?

³ Samisoni ilami yannara Filisxeemootu Israeele daga gashshite no; hattono beebba assidhanni noonsa. (Eje. 13:1) Insa beebba assidhinonsa daafira Israeelete manni lowo geeshsha qarramino. Yihowa ‘Israeele Filisxeemete anganni gatisanno gede’ Samisoni doorino. (Eje. 13:5) Kuni dishaaꞌꞌa loosooti! Konne shota ikkinokki looso umo fushshate Samisoni Yihowa addaxxa hasiissinosi.

4. Yihowa Samisoni Filisxeemete anganni fulanno gede kaaꞌlinosihu hiittoonniiti? (Ejjeetto 15:14-16)

 ⁴ Hanni Samisoni Yihowa kaaꞌlannosita addaxxino gara leellishanno lawishsha laꞌno. Mitte yannara Filisxeemete olanto Samisoni amadate Leehi yinanni katama daggino; kuni katami Yihudu gobba giddo nooha ikkikki digatino. Yihudu manni waajjino daafira Samisoni amade diinnasira sayise aate murciꞌrino. Yihudu manni Samisoni, lame haaro siiwonni milli yaannokki gede asse usure Filisxeemootunniwa massino. (Eje. 15:9-13) Ikkirono ‘Kaaliiqi ayyaani dirre Samisonira wolqa wonsheennasi’ usurroonnisi siiwonni tidhe fulino. Hakkiinni “mule reyino harrichi baqqaalla haaꞌre” hakko baqqaallinni 1,000 Filisxeemoota shiino!—Ejjeetto 15:14-16 nabbawi.

5. Samisoni harrichu baqqaalla horoonsiꞌrasi Yihowa addaxxannota leellishshannohu hiittoonniiti?

⁵ Harrichu baqqaalli olaho horoonsiꞌnanni uduunnicho diꞌꞌikkino. Ikkina Samisoni harrichu baqqaalla horoonsiꞌrinohu mayiraati? Samisoni qinaannosihu olu uduunnichinni ikkikkinni Yihowa kaaꞌlonni ikkinota afinoti dihuluullissannote. Addanko, kuni ammanamino manchi Yihowa fajjo wonshate afiꞌrino uduunnicho horoonsiꞌrino. Samisoni Yihowa addaxxino daafira lowo qeelle afiꞌrino.

6. Uyinoonninkeha tiokiraasete looso loonseemmo woyite Samisoni xaggenni maa ronseemmo?

⁶ Uyinoonninke looso loosa dandiineemmokkiha lawinkero nafa, konne looso umo fushshineemmo gede Yihowa ninkerano jawaante aannonke. Maganu dhagge ikkanno garinni kaaꞌlankera dandaanno. Samisonira wolqa uyinosiha Yihowa addaxxi; Yihowa iso addaxxitto geeshsha fajjosi wonshatto gede kaaꞌlannohe.—Law. 16:3.

7. Yihowa biddishsha hasiꞌra hasiissannonketa leellishanno lawishshi hiikkonneeti?

⁷ Yihowa magansiꞌnanni minna mintannori batinyu roduuwi Yihowa addaxxitannota leellishshino. Konni albaanni roduuwu, Gambooshshu Addaraashuwanna wole minna, akeeka fushshite insa uminsa mintanno. Gedensoonni kayinni Yihowa dirijjite halaꞌlitanni hadhuta tenne hayyo soorra hasiissino.  Albisa ikkite soqqantanno roduuwi Yihowa biddishsha hasidhuhu gedensaanni, haaro hayyo woꞌnaaltino; lawishshaho insa minnoonni minna hirte gatamartino. Muli dirra kawa alamete doyichoha batinye gimbaatu looso loosinohu Rooberti yinanni rodii togo yiino: “Tenne haaro hayyo garinni loosa umi qara mitu roduuwira shota diꞌꞌikkitinonsa. Tini hayyo konni albaanni loonseemmo garinni lowo geeshsha baxxitinote. Ikkirono roduuwu tenne hayyo rosate maahoyye yitino; tini Yihowa biddi assinoonni coye maassiꞌranni noota leellishshannote.” Yihowa mannisi fajjosi wonshanno gede massaganni noonsata leellishanno lawishshi giddo kuni mittoholla. Ninke baalunku yannate kiiro ninkeneeto togo yine xaꞌma hasiissannonke: ‘Yihowa biddishsha hasiꞌranni noommo? Yihowara soqqameemmo woyite biddi assinoonni coye maahoyye yee adheemmo?’

8. Samisoni waa lowo geeshsha gooꞌri yannara maa assino?

⁸ Samisoni assinoha wole dhagge ikkanno coye nabbawoottoha ikkara dandaanno. Isi mulla anganni doobbiicho shiino; hattono Filisxeemete katamira Asiqeloonaho 30 Filisxeemoota shiino. (Eje. 14:5, 6, 19) Samisoni Yihowa kaaꞌla hoogoommesiro horo tenne assa dandaannokkita afino. Isi mitte yannara 1,000 Filisxeemoota shiihu gedensaanni waa gooꞌri yannara Yihowa kaaꞌlanni noositi xabbe leeltino. Isi hatte yannara maa assiyya? Isi waa afiꞌrate umisinni woꞌnaalantenni kaaꞌlannosi gede Yihowa huucciꞌrino.—Eje. 15:18.

9. Samisoni kaaꞌlannosi gede huucciꞌrino huuccattora Yihowa dawaro qolinohu hiittoonniiti? (Ejjeetto 15:19)

⁹ Yihowa maalaletenni waa qixxeesse Samisoni kaaꞌlannosi gede huucciꞌrino huuccattora dawaro qolino. Samisoni “hakkonne waa age jawaati. Wolqano assiꞌri.” (Ejjeetto 15:19 nabbawi.) Lowo diri gedensaanni masaalaanchu Saamueeli Maganu ayyaani massageennasi Ejjeettote maxaafa borreessi yanna geeshsha kuni wayi nooha ikkara dandaanno. Konne burqanno waa lainohu Israeelete manni, Yihowa ammanantino soqqamaanosi iso addaxxituro kaaꞌlo hasiissannonsa yannara kaaꞌlannonsata qaaginoha ikkara dandaanno.

10. Yihowa kaaꞌlo afiꞌrate maa maa assa dandiineemmo? (Misileno lai.)

¹⁰ Noonke ogimmanna dandoo ikkitutano ikkituro hattono konni albaanni Yihowara soqqamate assinoommori ikkireno ikkiro, ninkeno kaaꞌlannonke gede Yihowa addaxxa hasiissannonke. Addinta qinaannonkehu Yihowa addaxxinummoro calla ikkinota ammanne adha hasiissannonke. Samisoni Yihowa qixxeessinosi waa age jawaante afiꞌrinonte gede, ninkeno Yihowa qixxeessino qixxaawo baalanta horoonsiꞌneemmoha ikkiro ayyaanaamittete jawaante afiꞌneemmo.—Mat. 11:28.

11. Yihowa kaaꞌlonni woꞌma horo afiꞌra dandiineemmohu hiittoonniiti? Lawishsha kuli.

¹¹ Hanni Ruusiyaho buutote qarra dandee heeꞌranni noo roduuwinke giddo Alekiseyi yinanni rodii woꞌnaalsha laꞌno. Isi buutote qarra dandee saꞌꞌanno gede kaaꞌlinosiri maati? Isiranna minaamasira ganye ayyaanaamittete coye assate rosichi noonsa. Isi togo yiino: “Ganye hojju xiinxallo assiꞌratenna barru baala Qullaawa Maxaafa nabbawate sharrameemmo. Soodo soodo minaamaꞌyanna ani barru qummeeshsha nabbambe hasaambeemmo hattono mitteenni huuccatto assiꞌneemmo.” Ninke tennenni maa ronseemmo? Ninkeneeto addaxxantenni Yihowa addaxxa hasiissannonke. Hiittoonni? Ammananke  kaajjishiꞌrate ganyine Qullaawa Maxaafa xiinxallinenna wole ayyaanaamittete coye assine tenne assa dandiineemmo. Yihowano isira soqqamate assineemmore maassiꞌranno. Isi Samisonira jawaante uyinosi; ninkeno jawaachishannonke.

12. Samisoni doodhinohu gara ikkinokki doorshi hiikkonneeti? Kuni doorshi konni albaanni doodhinohunni baxxannohu hiittoonniiti?

¹² Samisonino ninkente gede guuntete xeꞌne noosiha ikkino daafira gara ikkinokki doorsha doodhino woyiti no. Doodhinohu mitu doorshi isinni buutote qarra abbinosi. Samisoni mite yanna geeshsha daanya ikke gashshihu gedensaanni, “Soreeqi yinanni lagira heedhannota mitte Daliila yinanni mancho lae baxi.” (Eje. 16:4) Hakkuyira albaanni, Samisoni mitte Filisxeemitte mancho adhara huucciꞌrino; kuni, ‘Filisxeemete ledo gibbo kalaqantanno gede Kaaliiqi afe assino coyeeti.’ Gedensoonni Samisoni Filisxeemete katamira Gaazaho heedhannote mitte foora mancho mine galara eino. Hatte yannara Yihowa Samisoni katamu xullichi cufana buqqi asse fushshe diiganno gede wolqa uyinosi; tini katamu wolqa baꞌꞌanno gede assitino. (Eje. 14:1-4; 16:1-3) Daliila Israeelitte ikkitukki digattino; hakko daafira Samisoni ise baxasi Filisxeemete manna qeelanno faro afiꞌranno gede assitannota diꞌꞌikkitino.

13. Daliila Samisoni ma assitino?

¹³ Daliila, Samisoni sayisse hirate Filisxeemootuwiinni lowo woxe adhitino. Isi Daliila lowo geeshsha baxanno daafira ise ma assa hasidhinoro huwatinokkiha ikkara dandaanno. Ikkihano ikkiro, Daliila Samisoni wolqa afiꞌrino gara xaꞌmitanni iso wotto wortinosi; isino jeefote wolqa afiꞌrino gara kulinose. Samisoni wolqasi hooganno gedenna Yihowa  dadillisanno gede assitannosi soꞌro loosino; tini dadillissannote.—Eje. 16:16-20.

14. Samisoni Daliila addaxxino daafira iillinosi qarri maati?

¹⁴ Samisoni Yihowa agure Daliila addaxxino daafira buutote qarri iillinosi. Filisxeemootu Samisoni amaddino; hattono illesi huntino. Insa iso Gaazaho usurtino; hakkiicho heeꞌranno manni konni albaanni isi shollishinoho. Qoleno iso gide daahanno borojjicho assinoonni. Hakkiinni Filisxeemootu mitto ayyaana ayirrisate gamba yitu yannara Samisoni shollishshino. Insa maganinke Samisoni angankera sayise uyinonke yite kaphu maganinsa Daagoonira lowo kakkalo shiqishshino. Qoleno ‘godoꞌlanni ososhshiishannonsa gede’ Samisoni usuru mininni fushshite jilunniwa abbitino.—Eje. 16:21-25.

15. Samisoni galagale Yihowa addaxxannota leellishinohu hiittoonniiti? (Ejjeetto 16:28-30) (Aaniidi qoolira noo misile lai.)

¹⁵ Samisoni jawa soꞌro loosinoha ikkirono hexxo dimudhino. Isi, Maganu Filisxeemootu ledo olame qeelanno gede uyinosi looso umo fushshanno faro hasiꞌrino. (Ejjeetto 16:28-30 nabbawi.) Samisoni, “Filisxeemoota rabbisiꞌreemmona . . . jawaachishie” yee eeggifate Yihowa huucciꞌrino. Halaalaanchu Magani Samisonira maalale ikkanno garinni galagale wolqa oye huuccattosira dawaro qolino. Samisoni hatte yannara, hakkuyira albaanni shiino Filisxeemootinni roortanno Filisxeemoota shiino.

16. Samisoni loosino soꞌronni maa ronseemmo?

¹⁶ Samisonira, loosino soꞌronni kainohunni buutote qarri iillinosiha ikkirono, isi Yihowa fajjo wonshate sharrama diagurino. Ninkeno soꞌro loonseenna seejjininkero woy mite qoossonke hoongummoro hexxo mudha dihasiissannonke. Yihowa gatona yaate qixxaawinoha ikkinota qaango. (Far. 103:8-10) Soꞌro loonsoommoha ikkirono, Yihowa Samisoni horoonsiꞌrinonte gede ninkeno horoonsiꞌrannonke.

17-18. Mayikili lawishshi jawaachishinohehu ma garinniiti? (Misileno lai.)

¹⁷ Hanni Mayikili yinannihu wedellichu rodii woꞌnaalsha laꞌno. Isi songote soqqamaanchonna woꞌma yanna suwisaancho ikke soqqamanno daafira loosu batiꞌrannosi. Ikkirono isi soꞌro loosino daafira songote giddo noosi qoosso hoogino. Mayikili togo yiino: “Hatte yanna geeshsha Yihowara diinaggaawe soqqamoommo.  Kayinni kuni coyi hedeweelcho iillieta Yihowara soqqamate assa dandeemmori dino yee hedoommo. Yihowa tuge agurannoe yee horo hede diegennoommo; kayinni Yihowa ledo nooe jaaloomi albihu gedeeha ikkannota hattono songote giddo albiꞌya gede ikke soqqama dandeemmotanna teꞌee huluullamoommo.”

¹⁸ Mayikili hexxo dimudhino; tini hagiirsiissannote. Isi togo yiino: “Ganye giddoꞌyata huuccattotenni Yihowara hasaaphe, xiinxallenna hiince Yihowa ledo nooe jaaloomi galagale kaajjanno gede assiꞌrate sharramoommo.” Gedensoonni Mayikili galagale songote giddo soqqamate qoosso afiꞌrino. Isi xa songote cimeessanna woꞌma yanna suwisaancho ikke soqqamanni no. Isi togo yiino: “Roorenkanni songote cimeeyye kaaꞌlonna insa uyitinoe jawaante xaa geeshsha Yihowa baxannoeta huwateemmo gede assitinoe. Keeraanchu tiiꞌꞌinni galagale songote giddo soqqama dandoommo. Iillinoehu kuni coyi Yihowa godowinta maaro eannoha aye manchono gatona yaannota huwateemmo gede assinoe.” Ninkeno soꞌro loonsummoro nafa, soꞌronke biddi assiꞌrate dandiinummore baala assineemmohanna woꞌmanka woyite Yihowa addaxxineemmoha ikkiro Yihowa horoonsiꞌrannonketanna maassiꞌrannonketa addaxxa dandiineemmo.—Far. 86:5; Law. 28:13.

19. Samisoni lawishshi jawaachishinohehu hiittoonniiti?

¹⁹ Konni birxichira, dhagge ikkannoha Samisoni heeshsho giddo ikkinoha boode coyella laꞌnoommo. Isi guuta diꞌꞌikkino; ikkirono Daliila doggeennasi soꞌro loosihu gedensaanni nafa Yihowara soqqamate sharrama diagurino. Yihowano Samisoni horoonsiꞌra diagurino. Isi galagale Samisoni dhagge ikkanno garinni horoonsiꞌrinosi. Yihowa iso kaajjado ammana noosi manchi gede asse laꞌꞌanno daafira, suꞌmasi Ibiraawoota fooliishsho 11 kulloonnihu ammanamino manni suꞌmi ledo borreessinanni gede assino. Roorenkanni wolqa baꞌneemmo woyite ninke jawaachishate quqquxamannohu baxillaanchu iimi Anninkera soqqammeemmota afanke lowo geeshsha jawaachishshannote! Hakko daafira, Samisoni gede Yihowa “ballo qaagie; . . . jawaachishie” yine eeggifante huucciꞌno.—Eje. 16:28.