1. Muli yannara Yesuusi ma assanno?

 HEEꞌNOOMMOHU lowo coyi soorramara kae noo yanna giddooti! Muli yanna giddo Yesuusi uullate aana noohu mittu mittunku manchira yoo yaanno. Yesuusi yoo yaanno yanna gambisse dagganno woyite mayi ikkannoro kulinonke; isi rosaanosira, illetenni leellikkinni ‘ledonsa heeꞌrasiranna alamete gumulora’ malaatu maatiro kulinonsa. (Mat. 24:3) Tini masaalo Maatewoosi fooliishsho 24 nna 25 hattono Marqoosi fooliishsho 13 nna Luqaasi fooliishsho 21 no.

2. Konni birxichira maa xiinxallineemmo? Tini kaaꞌlitannonke yineemmohu mayiraati?

² Yesuusi sase lawishsha horoonsiꞌre kaaꞌlannonke qorowishsha kulino. Kuni lawishshi geꞌreewunna meu daafira, busulootunna gowwootu seemooti daafira hattono taalaantete daafira kulannoho. Mittu mittunku lawishshi, mittu mittunku manchira yoo yinannihu assootesi laꞌne ikkinota huwanteemmo gede kaaꞌlannonke. Konni birxichira tenne lawishshuwanni maa ronseemmoro xiinxallineemmo. Umo geꞌreewunna meu daafira kulanno lawishsha laꞌneemmo.

GEꞌREEWONNA MEꞌꞌE

3. Yesuusi mannaho yoo yaannohu mamooteeti?

³ Geꞌreewunna meu daafira kulanno lawishshira, Yesuusi mannaho yoo yaannohu dancha duduwo macciishshe adhinoronna teꞌee hattono buurantino roduuwasi kaaꞌlinoronna teꞌee lae ikkinota xawisino. (Mat. 25:31-46) Isi yoo yaannohu “quuxxote qarri” yannara Armagedooni hanafara albaanniiti. (Mat. 24:21) Allaalaanchu geꞌreewo meuwiinni badannonte  gede, Yesuusi buurantino harunsaanosi ammanante kaaꞌlitinore kaaꞌlitinokkiriwiinni badanno.

4. Isayaasi 11:3, 4 kultannonte gede, Yesuusi mannaho taalo yoo yaannota addaxxineemmohu mayiraati? (Aaniidi qoolira noo misileno lai.)

⁴ Qullaawu Maxaafi masaalo Yihowa shoomino Daanyi Yesuusi keeraancho yoo yaannoha ikkinota leellishshanno. (Isayaasi 11:3, 4 nabbawi.) Isi mannu assoote, hedannorenna coyiꞌrannore hattono buurantino roduuwasi kaaꞌlanno gara seekke laꞌꞌanno. (Mat. 12:36, 37; 25:40) Yesuusi buurantino roduuwisiranna insa loossanno loosira kaaꞌlantinori ayeootiro afanno. a Geꞌreewoho yiniri Kiristoosi roduuwa kaaꞌlitannoti qara doogo sabbakate looso loosate. Konni garinni insa kaaꞌlitannore ‘keeraanote’ yinanninsa hattono uullate aana ‘hegerera heeꞌrate’ hexxo heedhannonsa. (Mat. 25:46; Aju. 7:16, 17) Minshe noonsakkiri dhagge ikkanno baraarsha afidhanno! Insa quuxxote qarri yannaranna hakkuyi gedensaanni minshe noonsakkire ikkite heedhuro suꞌminsa “heeshshote maxaafira” borreessamanno.—Aju. 20:15.

5. Geꞌreewunna meu daafira kulanno lawishshinni maa ronseemmo? Konni lawishshinni horo afidhannori ayeooti?

⁵ Ammanantinoonnire ikkaꞌne leellishshe. Yesuusi geꞌreewunna meu daafira kulino lawishshi roorenkanni uullate aana heeꞌrate hexxo noonsare kaaꞌlanno. Insa ammana noonsata leellishshannohu Kiristoosi roduuwa sabbakate loosinni kaaꞌlite calla ikkikkinni, Yesuusi doorinohu ammanaminohunna wodanaamu borojjichi aanno biddishshirano ammanante hajajanteeti. (Mat. 24:45) Ikkirono iimira haꞌrate hexxo noonsarino konni lawishshira kulloonni qorowishsha macciishsha hasiissannonsa. Mayira? Korkaatuno Yesuusi insa assitannore, heddannorenna coyidhannore laꞌꞌanno. Insano ammanantinore ikkansa leellisha hasiissannonsa. Isinni, Yesuusi buurantinore qorowisiisate wole lame lawishsha kulino. Qoleno kuni lawishshi Maatewoosi fooliishsho 25 no. Hanni kawiinni aanchine busulootunna gowwootu seemooti lawishsha laꞌno.

BUSULLANNA GOWWOOTA SEEMOOTA

6. Onte seemo busulla ikkansa leellishinohu hiittoonniiti? (Maatewoosi 25:6-10)

⁶ Seemootu daafira kulanno lawishshira, Yesuusi mushurricha haaꞌrara fulinohu tonnu seemooti daafira kulino. (Mat. 25:1-4) Insa baalunku mushurrichunniha sargete jila eara agadhe no. Yesuusi insa giddo onte ‘gowwoota’ onte kayinni ‘busuloota’ ikkinota xawisino. Busulootu seemooti qixxaawenna baqqi yee agadhino. Insa mushurrichu daannohu hashshu taaloote ikkiro nafa agadhate qixxaawino. Hakko daafira tunsote xawisirara zayite wore caabbicho adhe dayino. Insa mushurrichu keeshshara dandaanno yee wole zayite nafa adhe dayino. Hakko daafira caabbichinsa xoannokki gede assiꞌrate qixxaawino. (Maatewoosi 25:6-10 nabbawi.) Busulootu seemooti mushurrichu dayita isi ledo sargete jiliwa eino. Hatteente gede, Kiristoosi daa geeshsha ammanamenna baqqi yee heeꞌrate qixxaawinohu buuramino Kiristaani, mushurrichu Kiristoosi ledo iimi Gashshoote eate ikkadda ikkanno. b (Aju. 7:1-3) Onte gowwootu seemootina?

7. Onte gowwootu seemootira mayi iillinonsa? Mayira?

⁷ Mushurrichu dayi yannara onte busulootu seemooti qixxaawino; onte gowwootu seemooti kayinni diqixxaawino. Insara  caabbichinsa xoara kae no; qoleno wole zayite adhe didayino. Insa mushurrichu daye iillara noota afiti zayite hidhara haꞌrino. Mushurrichu daye iilli yannara insa hidhe dihigino. Hatte yannara “Qixxaawe noo seemooti isi ledo sargete jila ei; waalchono cunfi.” (Mat. 25:10) Gedensoonni gowwootu seemooti daye eara hasiꞌrita mushurrichu, “Ani diegennoommoꞌne” yiinonsa. (Mat. 25:11, 12) Kuri seemooti mushurrichu keeshshi geeshshano keeshshiro iso agadhate diqixxaawino. Konni lawishshinni buurantinori maa rossanno?

8-9. Seemootu daafira kulanno lawishshinni buurantinori maa rossanno? (Misileno lai.)

⁸ Qixxaabbinoonnirenna baqqi yitinoonnire ikkaꞌne leellishshe. Yesuusi buurantinori lame gaamo heedhannota yaano mitte gaamo tenne alame goofimarchi geeshsha qixxaabbe agadhitannota mitte kayinni qixxaabbe agadhitannokkita kulanni nooha diꞌꞌikkino. Hatteentenni isi buurantinori goofimarchu geeshsha ammanante heeꞌrate qixxaawa hoogguro mayi ikkannoro kulanni no. Insa qixxaabbe agadha hoogguro baraarshansa diafidhanno. (Yoh. 14:3, 4) Kuni lashshi assinanni coye diꞌꞌikkino! Hexxonke iimira haꞌra woy uullate aana heeꞌra ikkiturono, ninke baalunku seemootu lawishshira kulloonni qorowishsha macciishsha hasiissannonke. Ninke mittu mittunku goofimarchu geeshsha baqqi yinenna qixxaambe agadha hasiissannonke.—Mat. 24:13.

⁹ Baqqi yinenna qixxaambe agadha hasiissannota ikkitinota luphi assate Yesuusi seemootu lawishsha kulihu gedensaanni taalaantete lawishsha kulino. Kuni lawishshi diinaggaawe loosa hasiissannota luphi asse kulannoho.

TAALAANTE

10. Lamu borojjooti ammanantinore ikkansa leellishshinohu hiittoonniiti? (Maatewoosi 25:19-23)

¹⁰ Yesuusi taalaantete daafira kulino lawishshira, lamu borojjooti mootichinsara ammanantinore ikkitinota mitu kayinni ammanaminokkiha  ikkinota coyiꞌrino. (Mat. 25:14-18) Lamu borojjooti mootichinsa woxe tirfisate diinaggaabbe loosse ammanantinore ikkansa leellishshino. Isi xeerto gobba haꞌrara albaanni insara taalaante yaano lowo woxe hadara uyinonsa. Lamu ammanantino borojjooti diinaggaabbe loosse woxe hayyotenni horoonsidhino. Tini mayi guma abbituyya? Mootichinsa haꞌrinowiinni higi woyite insa uyinonsa woxe ero assitino. Mootichinsa insa galatinonsa; hattono ‘Mootichinsa ledo hagiidhitino.’ (Maatewoosi 25:19-23 nabbawi.) Sayikki borojjichina? Isi mootichisi uyinosi woxe hiissiyya?

11. “Ceeꞌmaleessu” borojjichira mayi iillinosi? Mayira?

¹¹ Mootichisi sayikki borojjichira mitte taalaante uyino; isi kayinni ‘ceeꞌmaleessaho.’ Mootichisi isi taalaante hayyotenni horoonsiꞌrara hasiꞌrino. Isi kayinni baatto ume waamino. Mootichisi higi yannara isi mootichisira aannohu tirfisino woxi dino. Konni borojjichiti giddosi bushate. Isi mootichisi woxe tirfisinokki daafira maaro xaꞌmiꞌrantenni, beebbate mootichasi ‘kaajjado manchooti’ yiino. Mootichisi konni borojjichinni dihagiidhino. Qoleno taalaante haaꞌre woleho uyino; hattono isi mootichu maate wido ikkannokki gede assino.—Mat. 25:24, 26-30.

12. Lamu ammanantino borojjooti xaa yannara ayeoora lawishshaho?

¹² Lamu ammanantino borojjooti buuraminohu ammanamino Kiristaanira lawishshaho. Mootichinsa Yesuusi insa ‘Mootichinsa ledo hagiidhitanno gede’ koyisannonsa. Insa iimi baraarsha adhitanno yaano umi kao kaꞌanno. (Mat. 25:21, 23; Aju. 20:5b) Ceeꞌmaleessu borojjichihu bushu lawishshi kayinni buurantinorira qorowishsha ikkanno. Hiittoonni?

13-14. Buuramino Kiristaani taalaantete lawishshinni maa rosanno? (Misileno lai.)

¹³ Diinaggaabbinoonnire ikkaꞌne leellishshe. Seemootu lawishshira kulinonte gede Yesuusi taalaantete lawishshirano buuramino Kiristaani ceeꞌmaleeyye ikkannota kulanni nooha diꞌꞌikkino. Hatteentenni isi insa diinaggaabbinore ikkitannokkiha ikkiro mayi iillannonsaro kulanni no. Diinaggaabbe loosa hoogguro  ‘woshshamansanna dooramansa buuxiꞌra’ didandiitanno; hattono gordu Gashshoote eꞌara difajjinanninsa.—2 Phe. 1:10.

¹⁴ Yesuusi seemootunna taalaantete daafira kulino lawishshi leellishannonte gede, baalunku buuramino Kiristaani baqqi yee agadhe qixxaawanna diinaggaawe loosa hasiissannonsa. Ikkina Yesuusi buuramino Kiristaanira qorowishsha ikkannore wolere kulino? Ee kulino! Yesuusi Maatewoosi 24:40, 41 kulino hedo buuramino Kiristaanira yinannite jeefote yoo ledo xaadooshshe afidhinote.

‘HAAꞌNANNIRI’ AYEOOTI?

15-16. Maatewoosi 24:40, 41 buuramino Kiristaani baqqi yee agadha hasiissannonsata leellishshannohu hiittoonniiti?

¹⁵ Yesuusi sasenka lawishsha kulara albaanni, mittu mittunkura buuramino Kiristaanchira yinannite jeefote yoo daafira coyiꞌrino. Isi gate loossannori lamu manchi daafiranna daammaho daahannori lame meenti daafira coyiꞌrino. Lamunku manchinna lamenti meenti mittu gari looso loosannore lawanno; Yesuusi kayinni “mitto haaꞌnanni, mitto agurranni” yiino. (Maatewoosi 24:40, 41 nabbawi.) Hakkiinni isi harunsaanosi togo yee amaalino: “Mootichiꞌne daanno barra affinoonnikki daafira woꞌmanka woyite baqqi yitine agadhe.” (Mat. 24:42) Yesuusi seemootu daafira kulanno lawishsha coyiꞌrihu gedensaannino hatto yiino. (Mat. 25:13) Tini hedo xaadooshshe afidhino? Afidhinoha lawanno. Tini Yesuusi iimi Gashshootira ‘haaꞌrannohu’ ammanaminoha buuramino Kiristaana calla ikkinota leellishshanno.—Yoh. 14:3.

¹⁶ Baqqi yitine agadhitinoonnire ikkaꞌne leellishshe. Ayyaanaamittetenni baqqi yee agadhannokkiha buuramino Kiristaancho ‘doorantinori’ ledo gamba diassinanni. (Mat. 24:31) Baalunku Maganu manni hexxonsa iimira haꞌra woy uullate aana heeꞌrano ikkituro Yesuusi kulino lawishsha harunse baqqi yee agadhanna ammaname heeꞌra hasiissannonsa.

17. Yihowa mito manna xaa yannara qullaawu ayyaaninni buuriro koffi yaa hasiissannonkekkihu mayiraati?

¹⁷ Yihowa seekkine anfoommo daafira isi taalo yoo yaannota addaxxineemmo. Xaa yannara Yihowa mito ammanamino Kiristaana qullaawu ayyaaninni buuriro koffi diyineemmo. c Yesuusi woyinete irshi daafira kulino lawishshira looso 11 saatenni hanaffinori daafira kulinore qaangeemmo. (Mat. 20:1-16) Woyinete irshira looso hawarrisse hanaffinorira baantoonni waagi soodo hanaffinorira baantoonni waagi ledo taaloho. Hatteente gede mittu buuramino Kiristaanchi dooramino yanna ikkitutano ikkituro isi ammanaminoha ikke heeꞌriro iimi baraarsha adhanno.

QOROWISHSHA MACCIISHSHE

18-19. Kageeshsha laꞌnoommo lawishshinni maa ronsoommo?

¹⁸ Maa ronsoommo? Uullate aana hegerera heeꞌrate hexxo noonsari, geꞌreewunna meu daafira kulanno lawishshinni xaa yannarano ikko albillitte daannohu quuxxote qarri yannara ammanantinore ikkite heeꞌra hasiissannonsata rossanno. Hatte yannara Yesuusi ammanantinoreeti yaannonsari “hegere heeshshowa” haꞌrate ikkadda ikkitanno.—Mat. 25:46.

¹⁹ Qoleno buuramino Kiristaana qorowisiisannoha lame lawishsha laꞌnoommo. Yesuusi busulootunna gowwootu seemooti daafira kulino lawishshira, onte seemooti hayyoota ikkansa leellishino. Insa mushurrichu daanno yanna ikkitutano ikkituro baqqi yee agadhate qixxaawino. Kayinni gowwootu seemooti  diqixxaawino. Hakko daafira, mushurrichu insa sargete jiliwa eannota hoolinonsa. Ninkeno Yesuusi tenne alame hunanno yanna keeshshitu geeshshano keeshshituro baqqi yine agadha hasiissannonke. Qoleno Yesuusi taalaantete daafira kulino lawishshira, diinaggaabbe loossinori lamu ammanantino borojjooti daafira laꞌnoommo. Insa mootichinsara diinaggaabbe loossino; mootichinsano hagiidhino. Ceeꞌmaleessa borojjicho kayinni mootichisi giwino. Maa ronseemmo? Ninkeno goofimarchu daa geeshsha Yihowara diinaggaambe soqqammanni heeꞌra hasiissannonke. Jeefote, Yesuusi iimi baraarshira ‘haarannonsa’ gede buurantinori baqqi yite heeꞌra hasiissannonsa gara ronsoommo. Insa iima Yesuusi ledo heeꞌrate ‘gamba yitanno’ yanna quqquxante agadhitanno. Insa Armagedooni oli gedensaanni Geꞌrechu sargera Yesuusi mushurra ikkitanno.— 2 Tes. 2:1; Aju. 19:9.

20. Qorowishsha macciishshitannorira Yihowa maa assannonsa?

²⁰ Yoote yanna rakke dagganni nooha ikkirono waajjineemmo gede assannonkeri dino. Ammanamme heeꞌneemmoha ikkiro baxillaanchu iimi Anninke “manchi Beetti albaanni uurra [dandiineemmo gede]” “jawa wolqa” aannonke. (2 Qor. 4:7; Luq. 21:36) Hexxonke iimira haꞌra woy uullate aana heeꞌrano ikkituro, Yesuusi lawishshunni kulino qorowishsha macciishshineemmoha ikkiro Annanke Yihowa hagiirsiinseemmo. Yihowa shaqqado ikkino daafira ‘suꞌmanke heeshshote maxaafi’ giddonni dihunanno.—Dan. 12:1; Aju. 3:5.