Ilamoommohu 1934nniiti; anniˈyanna amaˈya Siwizerilaandetenni daye Kanaadaho shiilo fushshinannihu Ontariyo katamira Timinsi yinanniwa heeˈranno. Amaˈya 1939 balla Agarooshshu Shae metseete nabbawanna Yihowa Farciˈraasine gambooshshe haˈra hanaffu. Ise anenna lee roduuwaˈya gambooshshe haadhe hadhannonke. Mulenni ise Yihowa Farciˈraasincho ikkitino.

Anniˈya amaˈya doodhitinore dibaxino; ikkirono ise halaale baxxino daafira seekkite cuˈmiˈrate murcidhino. Amaˈya Kanaadaho 1940 hanafora Yihowa Farciˈraasine looso agambi yannara nafa halaale seekkite cuˈmidhino. Anniˈya ayirrinye xeinore coyiˈrannoha ikkirono, amaˈya iso woˈmanka woyite shaqqillunninna ayirrinyunni hasaawissanno. Isehu kaajju lawishshi aninna roduuwiˈya Yihowara soqqama doodhineemmo gede kaaˈlinonke. Gedensoonni anniˈya akati woyyaawanni haˈreenna isi maatenkera shaqqille leellisha hanafi; tini hagiirsiissannote!

Woxawaajje 1950nni Niwu Yorkete Katamira assinoonniha Tiokiraasete Lopho yaanno gambooshshe haˈrummo. Hakkiicho alamete doyichonni daggino roduuwinni xaadummohunna Giliyaadi Rosi Mine rosse fultino roduuwa qaalu xaˈmo xaˈminanna macciishshummohu gedensaanni, woˈma yanna soqqansho soqqamate albinni roore murciˈroommo! Qaera higanni heeˈrenni woˈma yanna suwisaancho ikkate forme wonshummo. Kanaadunniti sinu biiro galagalte borrote sokka borreessite balaxe cuuama hasiissannoeta kultue. Hakkiinni Birra 1,1950nni cuuamummo. Mittu agani gedensaanni woˈma yanna suwisaancho ikkummo; hattono Kapiskeesingi yinanniwa soqqameemmo gede gaammie.  Kuni katami noohu maatenke noowiinni lowo kiilo meetire xeertiˈreeti.

Hakkiinni 1951nni badheessu woggara sinu biiro Faransayete qaale coyiˈra dandiitanno roduuwi Faransayete afoo coyiˈnanniha Kiwubeeki qoqqowo hadhe soqqantanno gede koyissu. Hakkiicho soqqantannori lowo halashshaano hasiissanno. Faransayetenna Ingilizete afoo dandeemmo daafira konni koyishshira maahoyye yuummo. Hakkiinni Ruweni yinanniwa soqqameemmo gede gaammie. Hakkiicho egennoommohu dino. Hanafote kulummonte gede afoommohu misiyoone ikke soqqamanno rodoo callaho. Ikkirono baalunku coyi seyinoe. Roduu Marseeli ledo dancha jaalla ikkinummo; Kiwubeeki 4 diro soqqamummo; hakkunni gedensaanni baxino suwisaancho ikkummo.

Kiwubeeki heeˈreenna Niwu Yorkete Sawuzi Lansingi yinanniwa Giliyaadi Rosi Mine 26^ki kifile eˈˈe roseemmo gede koyinsieta baasa hagiidhoommo. Hakkiinni Ammajje 12, 1956nni maassamummo; hattono Galchimi Afirikira Gaanaho b soqqameemmo gede gaammie. Kayinni hakkira haˈrate viiza afiˈrammo geeshsha “boode lamala” geya agure Kanaada higa hasiissinoe.

Viiza agadhe Toronto lamala agana keeshshoommo. Hatte yannara Kiripsi yinanni rodii maatewa keeshshoommo hattono Sheela yinannite isi beetto ledo egennamoommo qoleno ise ledo baxammoommo. Hakkiinni isera hedoommore kulammora kae heeˈreenna agadhe noommo viiza uyinie. Sheela ledo huuccatto assiˈne seekkine hendummohu gedensaanni ani gaammoonniewa haˈrummo. Kayinni albillitte ikkineemmota hasaawate mimmitoho borrote sokka borreessine hasaawa diagurroommo. Ikkirono konne doorsha doodha shota diˈˈikkitinonke; kayinni doodhinoommo doorshi gara ikkinota gedensoonni huwantoommo.

Mittu agani geeshsha baaburunni, uduunne hogobbanno markaawenninna horophillunni haˈrummohu gedensaanni Gaanaho Akira katama iillummo. Hakkiicho awuraajju aliidi laˈˈaancho ikke soqqameemmo gede gaammie. Konne looso  loosate Gaana, Gaanu mule noo gobba Ayivorkostenna (xaa yannara Koti Divoori yinanni) Togolaande (xaa yannara Togo yinanni) haˈra hasiissannoe. Roore yanna sinu biiro makeeninni calliˈya haˈreemmo. Tenne yannara lowo geeshsha hagiidheemmo.

Qidaamenna sambata woradu gambooshshiwa soqqameemmo. Hakkawaro Woradu Gambooshshe assiˈnanni bayichi dinonke. Hakko daafira roduuwu leemmu hara qasse roduuwa arrishsho gantannokki gede iimaanni saattu daro dibbanno. Hakkiicho maala worranni firiije nookki daafira roduuwu saada abbite gorrite gambooshshe daanno mannira sagale qixxeessitanno.

Hakko gambooshshiwa mitu osoˈlishiishanno coyino kalaqamino. Mitte yannara ledoˈya misiyoone ikke soqqamannohu Herbi Jeningisi  c lallawo shiqishanni heeˈreenna saa usurroonniwiinni tidhite fultu. Saa madirakenniwanna mannu noowa higge xerembidhu. Roduu Herbi coyiˈra agurita saa uurrite kawanna kaˈa laˈˈa hanaffu. Kayinni mannu anga shooshshe gananna shoolu worbuullu roduuwi dagge saa amadde massite usurtu.

Gambooshshe assiˈnanni lamalara qooxeessaho noo mannira Haaro Alame Dagoomi Loosanni No yitanno filmenke leellishoommo. Tenne filme leellishoommohu lamu haqqi mereero waajjo hocco diriirseeti. Kuni manni tenne filme lowo geeshsha baxino! Konni manni giddo batinyu filmete yinannire mite yee lainohu hakka woyiteeti. Insa filmete giddo mannu cuuamanna laˈuti anga shaa assite gantino. Tini filme kuni manni alamete doyichora noohu Yihowa magansiˈranno manni mitto ikkinota huwatanno gede assitino.

Afirikaho lamu diri geeshsha soqqamummohu gedensaanni, 1958nni Niwu Yorkete Katamira assinoonniha Daga Dagiyyote Gambooshshe haˈroommo daafira lowo geya hagiidhoommo. Hakkawoyite Kiwubeeki baxxitino suwisaancho ikkite soqqantanni nooti Sheela hakkira dagginota laummoti baasa hagiidhoommo. Hakkuyira albaanni mimmitoho borrote sokka borreessine hasaambanni keeshshinoommoha ikkirono, xa kayinni galagalle xaandoommo; adhammosera xaˈmummoseta maahoyye yitino. Roduu Noorira d borrote sokka borreesse Sheela Giliyaadi eanna Afirikaho ane ledo soqqama dandiitannoronna teˈee xaˈmummo. Isino maahoyye yiie. Jeefote Sheela Gaana daggu. Hakkiinni Birra 3, 1959nni Akira katamira adhammummo. Yihowa heeshshonke giddo iso balaxisiinsoommo daafira addinta maassiˈrinonketa huwantoommo.

Hakkiinni 1961nni Kaamerooni gobbara soqqammeemmo gede gaamminke. Roduuwu haaro sinu biiro xinta kaaˈleemmo gede xaˈmitinoe daafira loosu batiˈrannoe. Haaro sinu biiro soqqamaancho ikkoommo daafira rosa hasiissannoehu lowo coyi no. Hakkiinni 1965nni Sheela godobbu. Amanna anna ikkineemmota heda ninkera shota coye diˈˈikkitinonke. Kayinni konne haaro qeecha adhatenna Kanaada higate qixxaambanni heeˈneenna hedeweelcho lowo geya dadillisanno coyi tuncu yiinonke.

Sheela umo kaˈu. Akimichu godowa noo qaaqqinke labbaaha ikkinota kulinonke. Kuni ikkinku 50 diro saˈˈannoha ikkirono tenne horo dihamboommo. Kalaqamino coyi lowo geeshsha xissiisiˈneemmo gede assinonkeha ikkirono, uyinoonninkeha baara wido loonseemmoha lowo geeshsha banxeemmo looso agurre dihaˈnoommo.

Kaamerooni gobbara heedhanno roduuwi poletikaho anga wodha gibbino daafira duucha woyite dartu iillannonsa. Gashshaano doorranni yannara isinni coyi roore bushanno. Hakkiinni Onkoleessa 13, 1970nni, Yihowa Farciˈrase looso agambi; tini horo dihendoommote. Haarote minnoonnita sinu biiro hingummohunni ontu agani gedensaanni, gashshootu tenne sinu biiro adhino. Mitte lamala giddo baalanta misiyoone hattono aneno Sheelano hatte gobbanni fulleemmo gede assininke. Hakko heedhanno roduuwa lowo geeshsha banxeemmo daafiranna ‘Insa albillitte hiikkita ikka?’ yine yaandoommo daafira hatte gobbanni haˈra qarra ikkitinonke.

Hakkiinni aane noohu 6 agani geeshsha Faransayennite sinu biirora keeshshinoommo. Hakkiicho heeˈre Kaamerooni gobbara heedhanno roduuwira hasiisannonsare asse kaaˈlate danduummore baala assoommo. Hakko dironni Sadaasu aganira Nayijeeriyunnite sinu biirora soqqammeemmo gede gaamminke; hakka woyite Kaamerooni gobbara loonsanni looso Nayijeeriyunniti sinu biiro massaga hanaffe no. Nayijeeriyu roduuwi anga fante haadhinonke; hakkiicho haammata diro hagiirrunni soqqammoommo.

Hakkiinni 1973nni shota ikkinokki doorsha doodha hasiissinonke. Sheela buutote dhibbi waadanni keeshshinose. Ise Niwu Yorkete jawu gambooshshiwa heeˈneenna wiˈlitanni “Ani xaate hoogoomma! Lowo geeshsha daafuroomma; lowo geya dhiwanni keeshshinoe” yitue. Ise ane ledo Galchimi Afirikira 14 saˈˈanno diro soqqantanni keeshshitino. Ise ammanante soqqantino daafira lowo geeshsha tashshi yiinoe; kayinni mitore biddi assiˈra hasiissannonke. Iillinonke coyi daafira hasaambummohunna eeggifante huucciˈnummohu gedensaanni Sheela dancha gede xagisiˈra dandiitanno gede Kanaada higate murciˈnoommo. Misiyoone ikkine soqqamate loosonkenna woˈma yanna soqqanshonke agura lowo geeshsha qarra ikkitinonke; togoo doorsha doodhine horo diegenninoommo.

Kanaada iillinummohu gedensaanni Toronto aliyyeenni noohu mittu katamira makeena hirannohu bashsho jaaliˈyawa looso afiˈrummo. Mitto mine karaayyaˈnummo hattono mannu horoonsiˈre kae hiˈrannoha mini uduunne hidhine asalu giddora  eˈnummokki heeˈra hananfummo. Barrunni mitto barra woˈma yanna soqqanshonkewa hingammora dandiineemmo yine hendoommo daafira bikku heeshsho heeˈra hasiˈnoommo. Tini hexxonke ninke hendoommo yanna geeshsha keeshshitukkinni woˈmituta dhagge assiˈnoommo.

Qidaame Qidaamete barra Ontariyo Norvaali yinanniwa haarote minnannita Jajjabbu Gambooshshi Addaraashe mina kaaˈla hanafummo. Gedensoonni Jajjabbu Gambooshshi Addaraashera aliidi laˈˈaancho ikkeemmo gede kullie. Sheelarano woyyanni noose daafira konne looso loosa dandiineemmo yine hendummo. Hakko daafira Ella 1974nni Jajjabba Gambooshshe assinanniwa noo mine heeˈra hananfummo. Woˈma yanna soqqanshonkewa hingoommo daafira lowo geeshsha hagiidhinoommo!

Maganu galatamona Sheelara woyyimma lexxitanni hadhinose. Lamu diri gedensaanni woradu looso loonseemmo gede kullinketa maahoyye yinummo. Soqqammeemmo woradi noohu Kanaadaho hawado lowo geeshsha qorrannowa Mantooba yinanniwaati. Ikkirono hakko heedhanno roduuwi anga fante haadhinonke daafira lowo geeshsha hagiidhinoommo. Soqqammeemmo bayichi ikkihano ikkiro qaru coyi Yihowara soqqama ikkitinota huwantoommo.

Haammata diro woradu looso loonsummohu gedensaanni 1978nni Kanaadu Beeteelera soqqammeemmo gede koyinsinke. Hakkunni gedensaanni mulenni shota ikkinokkiha kayinni kaaˈlanno roso rosoommo. Montiriyaaliyaho assinoonnihu baxxino gambooshshiwa Faransayete afiinni mitte saatenna darate keeshshitanno lallawo shiqisheemmo gede kulloonnie. Shiqishoommo lallawo mannu hagiidhe macciishshanno gedeeta diˈˈikkitino. Hakko daafira Soqqanshote Golira loosannohu mittu rodii amaalie. Noore coyiˈniro hatte yannanni kayise lallawo shiqishate fushshiˈroommoha ikkoommokkita huwatoommo. Kayinni uyinoonnie amaale hagiidhe diadhoommo. Isi mishinoe hattono horo digalatinoe yee hanqoommo daafira isi ledo garunni dihasaamboommo. Amaale ikkikkinni amaalinoe garanna amaalinoe rodoo illachishoommo daafira soˈro loosoommo.

Boodu barri gedensaanni, Sinu Biiro Komite miili tenne hajo daafira kayise hasaawisie. Amaalloonnie amaalera gara ikkinokkire qoloommo hattono gaabboommo. Hakkiinni amaalinoe rodoo hasaawisummo. Isino shaqqillunni gatona yiie. Kuni coyi umo heeshshi assa lowo geeshsha hasiissannota ikkitinota huwateemmo gede kaaˈlinoe; qoleno tenne horo dihaweemmo. (Law. 16:18) Tenne hajo daafira duucha hige Yihowa huucciˈroommo hattono amaallannie woyite horonta gara ikkinokkire qoleemmokki gede murciˈroommo.

Xa Kanaadu Beeteelera soqqama hanafummonku 40 diro saino; hattono 1985nni hanafe Sinu Biiro Komite miila ikke soqqamate qoosso afiˈroommo. Ammajje 2021nni muxxe minaamaˈya Sheela shiiˈroommo. Ise shiiˈre xissiisiˈroommotano agurranna dhibbu waadannoe. Kayinni Yihowara soqqamaˈya hagiidheemmo gede assitinoe daafira ‘saˈino yanna diqaageemmo.’ (Ros. 5:20, NW) Heeshshoˈya giddo lowo qarri iillinoeha ikkirono hagiidheemmo gede assannoeha hakkiinni sainoha lowo coye afiˈroommo. Heeshshoˈya giddo Yihowa balaxisiisaˈyanna 70 diro woˈma yanna soqqansho soqqamaˈya hagiirru noo heeshsho heeˈreemmo gede assitinoe. Hagiirru noo heeshsho heeˈra dandiinannihu Yihowara soqqammiro calla ikkinota afoommo daafira wedellu roduuwinkeno Yihowa balaxisiissanno gede huucca diagureemmo.