Ilamoommohu 1934nniiti; anniꞌyanna amaꞌya Siwizerilaandetenni daye Kanaadaho shiilo fushshinannihu Ontariyo katamira Timinsi yinanniwa heeꞌranno. Amaꞌya 1939 balla Agarooshshu Shae metseete nabbawanna Yihowa Farciꞌraasine gambooshshe haꞌra hanaffu. Ise anenna lee roduuwaꞌya gambooshshe haadhe hadhannonke. Mulenni ise Yihowa Farciꞌraasincho ikkitino.

Anniꞌya amaꞌya doodhitinore dibaxino; ikkirono ise halaale baxxino daafira seekkite cuꞌmiꞌrate murcidhino. Amaꞌya Kanaadaho 1940 hanafora Yihowa Farciꞌraasine looso agambi yannara nafa halaale seekkite cuꞌmidhino. Anniꞌya ayirrinye xeinore coyiꞌrannoha ikkirono, amaꞌya iso woꞌmanka woyite shaqqillunninna ayirrinyunni hasaawissanno. Isehu kaajju lawishshi aninna roduuwiꞌya Yihowara soqqama doodhineemmo gede kaaꞌlinonke. Gedensoonni anniꞌya akati woyyaawanni haꞌreenna isi maatenkera shaqqille leellisha hanafi; tini hagiirsiissannote!

Woxawaajje 1950nni Niwu Yorkete Katamira assinoonniha Tiokiraasete Lopho yaanno gambooshshe haꞌrummo. Hakkiicho alamete doyichonni daggino roduuwinni xaadummohunna Giliyaadi Rosi Mine rosse fultino roduuwa qaalu xaꞌmo xaꞌminanna macciishshummohu gedensaanni, woꞌma yanna soqqansho soqqamate albinni roore murciꞌroommo! Qaera higanni heeꞌrenni woꞌma yanna suwisaancho ikkate forme wonshummo. Kanaadunniti sinu biiro galagalte borrote sokka borreessite balaxe cuuama hasiissannoeta kultue. Hakkiinni Birra 1,1950nni cuuamummo. Mittu agani gedensaanni woꞌma yanna suwisaancho ikkummo; hattono Kapiskeesingi yinanniwa soqqameemmo gede gaammie.  Kuni katami noohu maatenke noowiinni lowo kiilo meetire xeertiꞌreeti.

Hakkiinni 1951nni badheessu woggara sinu biiro Faransayete qaale coyiꞌra dandiitanno roduuwi Faransayete afoo coyiꞌnanniha Kiwubeeki qoqqowo hadhe soqqantanno gede koyissu. Hakkiicho soqqantannori lowo halashshaano hasiissanno. Faransayetenna Ingilizete afoo dandeemmo daafira konni koyishshira maahoyye yuummo. Hakkiinni Ruweni yinanniwa soqqameemmo gede gaammie. Hakkiicho egennoommohu dino. Hanafote kulummonte gede afoommohu misiyoone ikke soqqamanno rodoo callaho. Ikkirono baalunku coyi seyinoe. Roduu Marseeli ledo dancha jaalla ikkinummo; Kiwubeeki 4 diro soqqamummo; hakkunni gedensaanni baxino suwisaancho ikkummo.

Kiwubeeki heeꞌreenna Niwu Yorkete Sawuzi Lansingi yinanniwa Giliyaadi Rosi Mine 26^ki kifile eꞌꞌe roseemmo gede koyinsieta baasa hagiidhoommo. Hakkiinni Ammajje 12, 1956nni maassamummo; hattono Galchimi Afirikira Gaanaho b soqqameemmo gede gaammie. Kayinni hakkira haꞌrate viiza afiꞌrammo geeshsha “boode lamala” geya agure Kanaada higa hasiissinoe.

Viiza agadhe Toronto lamala agana keeshshoommo. Hatte yannara Kiripsi yinanni rodii maatewa keeshshoommo hattono Sheela yinannite isi beetto ledo egennamoommo qoleno ise ledo baxammoommo. Hakkiinni isera hedoommore kulammora kae heeꞌreenna agadhe noommo viiza uyinie. Sheela ledo huuccatto assiꞌne seekkine hendummohu gedensaanni ani gaammoonniewa haꞌrummo. Kayinni albillitte ikkineemmota hasaawate mimmitoho borrote sokka borreessine hasaawa diagurroommo. Ikkirono konne doorsha doodha shota diꞌꞌikkitinonke; kayinni doodhinoommo doorshi gara ikkinota gedensoonni huwantoommo.

Mittu agani geeshsha baaburunni, uduunne hogobbanno markaawenninna horophillunni haꞌrummohu gedensaanni Gaanaho Akira katama iillummo. Hakkiicho awuraajju aliidi laꞌꞌaancho ikke soqqameemmo gede gaammie. Konne looso  loosate Gaana, Gaanu mule noo gobba Ayivorkostenna (xaa yannara Koti Divoori yinanni) Togolaande (xaa yannara Togo yinanni) haꞌra hasiissannoe. Roore yanna sinu biiro makeeninni calliꞌya haꞌreemmo. Tenne yannara lowo geeshsha hagiidheemmo.

Qidaamenna sambata woradu gambooshshiwa soqqameemmo. Hakkawaro Woradu Gambooshshe assiꞌnanni bayichi dinonke. Hakko daafira roduuwu leemmu hara qasse roduuwa arrishsho gantannokki gede iimaanni saattu daro dibbanno. Hakkiicho maala worranni firiije nookki daafira roduuwu saada abbite gorrite gambooshshe daanno mannira sagale qixxeessitanno.

Hakko gambooshshiwa mitu osoꞌlishiishanno coyino kalaqamino. Mitte yannara ledoꞌya misiyoone ikke soqqamannohu Herbi Jeningisi  c lallawo shiqishanni heeꞌreenna saa usurroonniwiinni tidhite fultu. Saa madirakenniwanna mannu noowa higge xerembidhu. Roduu Herbi coyiꞌra agurita saa uurrite kawanna kaꞌa laꞌꞌa hanaffu. Kayinni mannu anga shooshshe gananna shoolu worbuullu roduuwi dagge saa amadde massite usurtu.

Gambooshshe assiꞌnanni lamalara qooxeessaho noo mannira Haaro Alame Dagoomi Loosanni No yitanno filmenke leellishoommo. Tenne filme leellishoommohu lamu haqqi mereero waajjo hocco diriirseeti. Kuni manni tenne filme lowo geeshsha baxino! Konni manni giddo batinyu filmete yinannire mite yee lainohu hakka woyiteeti. Insa filmete giddo mannu cuuamanna laꞌuti anga shaa assite gantino. Tini filme kuni manni alamete doyichora noohu Yihowa magansiꞌranno manni mitto ikkinota huwatanno gede assitino.

Afirikaho lamu diri geeshsha soqqamummohu gedensaanni, 1958nni Niwu Yorkete Katamira assinoonniha Daga Dagiyyote Gambooshshe haꞌroommo daafira lowo geya hagiidhoommo. Hakkawoyite Kiwubeeki baxxitino suwisaancho ikkite soqqantanni nooti Sheela hakkira dagginota laummoti baasa hagiidhoommo. Hakkuyira albaanni mimmitoho borrote sokka borreessine hasaambanni keeshshinoommoha ikkirono, xa kayinni galagalle xaandoommo; adhammosera xaꞌmummoseta maahoyye yitino. Roduu Noorira d borrote sokka borreesse Sheela Giliyaadi eanna Afirikaho ane ledo soqqama dandiitannoronna teꞌee xaꞌmummo. Isino maahoyye yiie. Jeefote Sheela Gaana daggu. Hakkiinni Birra 3, 1959nni Akira katamira adhammummo. Yihowa heeshshonke giddo iso balaxisiinsoommo daafira addinta maassiꞌrinonketa huwantoommo.

Hakkiinni 1961nni Kaamerooni gobbara soqqammeemmo gede gaamminke. Roduuwu haaro sinu biiro xinta kaaꞌleemmo gede xaꞌmitinoe daafira loosu batiꞌrannoe. Haaro sinu biiro soqqamaancho ikkoommo daafira rosa hasiissannoehu lowo coyi no. Hakkiinni 1965nni Sheela godobbu. Amanna anna ikkineemmota heda ninkera shota coye diꞌꞌikkitinonke. Kayinni konne haaro qeecha adhatenna Kanaada higate qixxaambanni heeꞌneenna hedeweelcho lowo geya dadillisanno coyi tuncu yiinonke.

Sheela umo kaꞌu. Akimichu godowa noo qaaqqinke labbaaha ikkinota kulinonke. Kuni ikkinku 50 diro saꞌꞌannoha ikkirono tenne horo dihamboommo. Kalaqamino coyi lowo geeshsha xissiisiꞌneemmo gede assinonkeha ikkirono, uyinoonninkeha baara wido loonseemmoha lowo geeshsha banxeemmo looso agurre dihaꞌnoommo.

Kaamerooni gobbara heedhanno roduuwi poletikaho anga wodha gibbino daafira duucha woyite dartu iillannonsa. Gashshaano doorranni yannara isinni coyi roore bushanno. Hakkiinni Onkoleessa 13, 1970nni, Yihowa Farciꞌrase looso agambi; tini horo dihendoommote. Haarote minnoonnita sinu biiro hingummohunni ontu agani gedensaanni, gashshootu tenne sinu biiro adhino. Mitte lamala giddo baalanta misiyoone hattono aneno Sheelano hatte gobbanni fulleemmo gede assininke. Hakko heedhanno roduuwa lowo geeshsha banxeemmo daafiranna ‘Insa albillitte hiikkita ikka?’ yine yaandoommo daafira hatte gobbanni haꞌra qarra ikkitinonke.

Hakkiinni aane noohu 6 agani geeshsha Faransayennite sinu biirora keeshshinoommo. Hakkiicho heeꞌre Kaamerooni gobbara heedhanno roduuwira hasiisannonsare asse kaaꞌlate danduummore baala assoommo. Hakko dironni Sadaasu aganira Nayijeeriyunnite sinu biirora soqqammeemmo gede gaamminke; hakka woyite Kaamerooni gobbara loonsanni looso Nayijeeriyunniti sinu biiro massaga hanaffe no. Nayijeeriyu roduuwi anga fante haadhinonke; hakkiicho haammata diro hagiirrunni soqqammoommo.

Hakkiinni 1973nni shota ikkinokki doorsha doodha hasiissinonke. Sheela buutote dhibbi waadanni keeshshinose. Ise Niwu Yorkete jawu gambooshshiwa heeꞌneenna wiꞌlitanni “Ani xaate hoogoomma! Lowo geeshsha daafuroomma; lowo geya dhiwanni keeshshinoe” yitue. Ise ane ledo Galchimi Afirikira 14 saꞌꞌanno diro soqqantanni keeshshitino. Ise ammanante soqqantino daafira lowo geeshsha tashshi yiinoe; kayinni mitore biddi assiꞌra hasiissannonke. Iillinonke coyi daafira hasaambummohunna eeggifante huucciꞌnummohu gedensaanni Sheela dancha gede xagisiꞌra dandiitanno gede Kanaada higate murciꞌnoommo. Misiyoone ikkine soqqamate loosonkenna woꞌma yanna soqqanshonke agura lowo geeshsha qarra ikkitinonke; togoo doorsha doodhine horo diegenninoommo.

Kanaada iillinummohu gedensaanni Toronto aliyyeenni noohu mittu katamira makeena hirannohu bashsho jaaliꞌyawa looso afiꞌrummo. Mitto mine karaayyaꞌnummo hattono mannu horoonsiꞌre kae hiꞌrannoha mini uduunne hidhine asalu giddora  eꞌnummokki heeꞌra hananfummo. Barrunni mitto barra woꞌma yanna soqqanshonkewa hingammora dandiineemmo yine hendoommo daafira bikku heeshsho heeꞌra hasiꞌnoommo. Tini hexxonke ninke hendoommo yanna geeshsha keeshshitukkinni woꞌmituta dhagge assiꞌnoommo.

Qidaame Qidaamete barra Ontariyo Norvaali yinanniwa haarote minnannita Jajjabbu Gambooshshi Addaraashe mina kaaꞌla hanafummo. Gedensoonni Jajjabbu Gambooshshi Addaraashera aliidi laꞌꞌaancho ikkeemmo gede kullie. Sheelarano woyyanni noose daafira konne looso loosa dandiineemmo yine hendummo. Hakko daafira Ella 1974nni Jajjabba Gambooshshe assinanniwa noo mine heeꞌra hananfummo. Woꞌma yanna soqqanshonkewa hingoommo daafira lowo geeshsha hagiidhinoommo!

Maganu galatamona Sheelara woyyimma lexxitanni hadhinose. Lamu diri gedensaanni woradu looso loonseemmo gede kullinketa maahoyye yinummo. Soqqammeemmo woradi noohu Kanaadaho hawado lowo geeshsha qorrannowa Mantooba yinanniwaati. Ikkirono hakko heedhanno roduuwi anga fante haadhinonke daafira lowo geeshsha hagiidhinoommo. Soqqammeemmo bayichi ikkihano ikkiro qaru coyi Yihowara soqqama ikkitinota huwantoommo.

Haammata diro woradu looso loonsummohu gedensaanni 1978nni Kanaadu Beeteelera soqqammeemmo gede koyinsinke. Hakkunni gedensaanni mulenni shota ikkinokkiha kayinni kaaꞌlanno roso rosoommo. Montiriyaaliyaho assinoonnihu baxxino gambooshshiwa Faransayete afiinni mitte saatenna darate keeshshitanno lallawo shiqisheemmo gede kulloonnie. Shiqishoommo lallawo mannu hagiidhe macciishshanno gedeeta diꞌꞌikkitino. Hakko daafira Soqqanshote Golira loosannohu mittu rodii amaalie. Noore coyiꞌniro hatte yannanni kayise lallawo shiqishate fushshiꞌroommoha ikkoommokkita huwatoommo. Kayinni uyinoonnie amaale hagiidhe diadhoommo. Isi mishinoe hattono horo digalatinoe yee hanqoommo daafira isi ledo garunni dihasaamboommo. Amaale ikkikkinni amaalinoe garanna amaalinoe rodoo illachishoommo daafira soꞌro loosoommo.

Boodu barri gedensaanni, Sinu Biiro Komite miili tenne hajo daafira kayise hasaawisie. Amaalloonnie amaalera gara ikkinokkire qoloommo hattono gaabboommo. Hakkiinni amaalinoe rodoo hasaawisummo. Isino shaqqillunni gatona yiie. Kuni coyi umo heeshshi assa lowo geeshsha hasiissannota ikkitinota huwateemmo gede kaaꞌlinoe; qoleno tenne horo dihaweemmo. (Law. 16:18) Tenne hajo daafira duucha hige Yihowa huucciꞌroommo hattono amaallannie woyite horonta gara ikkinokkire qoleemmokki gede murciꞌroommo.

Xa Kanaadu Beeteelera soqqama hanafummonku 40 diro saino; hattono 1985nni hanafe Sinu Biiro Komite miila ikke soqqamate qoosso afiꞌroommo. Ammajje 2021nni muxxe minaamaꞌya Sheela shiiꞌroommo. Ise shiiꞌre xissiisiꞌroommotano agurranna dhibbu waadannoe. Kayinni Yihowara soqqamaꞌya hagiidheemmo gede assitinoe daafira ‘saꞌino yanna diqaageemmo.’ (Ros. 5:20, NW) Heeshshoꞌya giddo lowo qarri iillinoeha ikkirono hagiidheemmo gede assannoeha hakkiinni sainoha lowo coye afiꞌroommo. Heeshshoꞌya giddo Yihowa balaxisiisaꞌyanna 70 diro woꞌma yanna soqqansho soqqamaꞌya hagiirru noo heeshsho heeꞌreemmo gede assitinoe. Hagiirru noo heeshsho heeꞌra dandiinannihu Yihowara soqqammiro calla ikkinota afoommo daafira wedellu roduuwinkeno Yihowa balaxisiissanno gede huucca diagureemmo.