Yesuusi Mootichu Hurbaate xinti woyite 70 rosaano ledosi nookki daafira calla isi insa agurinonsa woy insa iso agurte hadhino yine heda dihasiissannonke. Yesuusi hatte yannara soqqamaasinesi ledo calla heeꞌra hasiꞌrino.

Tonaalamenti soqqamaasineno 70 rosaanono Yesuusi rosaanooti. Yesuusi umo batinye rosaano giddonni 12 doore soqqamaasine yiinonsa. (Luq. 6:12-16) Isi ‘Tonaalamenta soqqamaasinesi woshshe Maganu Gashshootire sabbakkanno gedenna dhiwantinore hursitanno gede soyinsa’ woyite Galiilaho no. (Luq. 9:1-6) Gedensoonni isi Yihuda dirre “wole 70 rosaano doore . . . lame lame asse soyi.” (Luq. 9:51; 10:1) Hakko daafira Yesuusira isi daafira sabbakkanno harunsaano addi addi bayicho noosi.

Yesuusi rosaano ikkinohu Yihudu manni dirunni mitte hinge ayirrinsanniha Faasiku Ayyaana ayirrisanno; insa ayirrisannohu maatensa ledo ikkara dandaanno. (Ful. 12:6-11, 17-20) Yesuusa shinanni yanna iillituta isinna soqqamaasinesi Yerusaalame hadhino. Ikkirono isi Yihudaho, Galiilahonna Peeriyaho heedhannoti baalanti rosaanosi dagge mitteenni Faasiku ayyaana ayirrisara diwoshshino. Tenne yannara Yesuusi soqqamaasinesi ledo calla heeꞌra hasiꞌrinoti dihuluullissannote. Isi insara, “Qarru amadaera albaanni konne Faasiku hurbaate kiꞌne ledo itate lowo geeshsha halchanni heeꞌroommo” yiino.—Luq. 22:15.

Isi hatto assinohu ikkadu korkaati noosi. Yesuusi muli yannara ‘alamete cubbo haaꞌre hoolannoha Maganu geꞌrecho’ ikke reyanno. (Yoh. 1:29) Isi reyannohu qole lowo yanna Maganoho kakkalo shiqinshanni keeshshinoonniwa Yerusaalameteeti. Faasiku geꞌrechi Israeele Yihowa Gibitsetenni fushshinonsata qaagganno gede assannonsa; kayinni Yesuusi kakkalosinni hakkiinni sainore assanno. Isi mannu ooso baala cubbunna reyotenni keere fushshanno. (1 Qor. 5:7, 8) Yesuusi kakkalo Tonaa lamenti rosaanosi Kiristaanu songora safo ikkitanno gede assitanno. (Efe. 2:20-22) Isinni, qullaawu katami Yerusaalame “tonaa lame safote kincho [afidhino]; tonaalamente safo aana tonaa lamenka Geꞌrechu soqqamaasine suꞌma borreessinoonni.” (Aju. 21:10-14) Addanko ammanantino soqqamaasine Maganu hedinori woꞌmanno gede lowore assitanno. Hakko daafira Yesuusi jeefonniha Faasiku Ayyaana ayirrisi woyitenna gedensaanni Mootichu Hurbaate ayirrisi woyite 12 soqqamaasinesi ledo heeꞌra hasiꞌrinohu mayiraatiro huwata qarra diꞌꞌikkitannonke.

Yesuusi Mootichu Hurbaate xinti woyite, 70 rosaanosinna wole rosaanosi isi ledo dino. Ikkirono ammanantinore ikkansa leellishshino rosaano baala Yesuusi xintinohu Mootichu Hurbaatinni horo afidhanno. Gedensoonni qullaawu ayyaaninni buurantinori baalanti rosaano, Yesuusi hakko hashsha soqqamaasinesira einohu gashshootu gondoori beeqqaasine ikkitanno.—Luq. 22:29, 30.