Nabbawaano Xaˈmitanno Xaˈmo
Yesuusa gibbannori anga hayishshiˈra lowori gede assite laˈannohu mayiraati?
Yesuusa gibbannori isonna rosaanosi bushiishate afidhino faro giddo mitte tenneeti. Muse Higge mittu manchi sirote bisisi giddonni duˈnamaanchu fuliro, dhiigu dhibbi amadisironna saadatenna mannu reeshsha kisiro battaawannota kultanno. Tini higge mittu manchi togoo coyinni battaawiro keeraawate maa assa hasiissannosirono kultanno. Togoo manchi keeraawannohu kakkalo shiqishe, hayishshiˈre, woy waa aanaho winxeennasiiti.—Lew., fool. 11-15; Kir., fool. 19.
Yihudu rosiisaano tenne higge aana uminsa wodho leddino. Mittu maxaafi kulino garinni, insa mittu manchi battaawannohunna hakku manchi wole manna batteessannohu hiittoonniitiro kulanno biddishsha leddino. Qoleno, Yihudu rosiisaano battaawannonna bataawannokki uduunnichire kultanno higgenna battaawino manchi keeraawate harunsa hasiissannosi bude fushshitino.
Yesuusa gibbannosiri togo yite xaˈmitino: “Rosaanokki albi manni woga diigge, sagale lagaabbino [woy, battaabbino] anganni mayira ittanno?” (Maq. 7:5) Insa togo yitinohu anga hayishshiˈnikki ita gawajjitannota kulate yite diˈˈikkino. Yihudu rosiisaanora mittu manchi sagale itara albaanni angate waa gaˈna hasiissannosi yaanno budi noonsa. Aleenni qummi assini maxaafi lede togo yiino: “Waa angate worate hiikkonne uduunnicho horoonsiˈra hasiissannoro, hiittoo waa horoonsiˈra hasiissannoronna waa ayi wora hasiissannosiro, hattono anga hiikko worre hayishshiˈra hasiissannoro heewisantanno.”
Yesuusi tenne mannu fushshino higgera hiittoo lao noosi? Isi umi xibbi sanira heedhinote Yihudunnite ammaˈnote sooreeyyera togo yiino: “Kiˈne lawisiisaano! Isayaasi, ‘Tini gosa afiinsanni ayirrissannoe; wodaninsa kayinni anewiinni [Yihowa] xeertiˈrinoho. Mannu woga ane Seeri gede assite rosiissanni, kaphunni magansidhannoe’ yine borreessinoonni garinni kiˈnere himanasi garaho. Kunnira, kiˈne Maganu hajajo agurtine mannu woga agadhitinanni.”—Maq. 7:6-8.