YANNA Bocaasa 1932 ballaati. Mitte lamalara albaanni, Meksiko Sitii yinannihu mitte miliyoone saꞌꞌanno manni heeꞌranno katamira korreentetenni loosannoha tiraafiikete caabbicho qansoonni. Xa kayinni mannu konne coye bagino. Katamaho noo gaazeexanyooti tenne lamalara ikkannore illachishshino. Insa kaameera adhite, baaburu xaawira mitto baxxino wosincho agarte no; hakku wosinchi Agarooshshu Shae Maamari pirezidaantichi Jooseefi F. Raazerfordiiti. Qooxeessaho heedhannoti Yihowa Farciꞌraasineno Rodoo Raazerfordi haadhara agarte no; isi hakka daanni noohu hakko katamira assinanniha sasu barri gambooshshe beeqqateeti.

Ze Gooldeni Eeji yinanni metseete togo yitino: “Kuni gambooshshi albillitte Meksikote gobbara Halaalu halaꞌlanno gede kaaꞌlannoti dihuluullissannote.” Konni gambooshshira 150 meddi yaanno manni calla gamba yiino; ikkina konne gambooshshe baxxinoha assannori maati?

Hakkuyira albaanni, Meksikote gobbara halaale macciishshe adhino manni kiiro shiimate. Hatte gobbara 1919nni kayise shiimu manni gamba yee jajjabba gambooshshuwa assiꞌrannoha ikkirono, diru kiiro songuwate kiiro ajjanni daggino. Meksiko Sitii yinanni katamira 1929nni sinu biiro minnita, hatte gobbara halaalu halaꞌlanno yine hendoonni. Ikkollana, ataawe ikkannori kalaqamino. Daddalu looso sabbakate loosi ledo karsiisa hasiissannokkita kullita, mittu kolporterichi tennera hanqe halaale agure umisita Qullaawu Maxaafi xiinxallo gaamo xintino. Qoleno, sinu biirora aliidi laꞌꞌaanchi Qullaawu Maxaafi ledo sumuu yaannokkire assino; konni daafira isi bayicho wole rodoo shoommoonni. Meksikote heedhannori ammanantino roduuwira ayyaanaamittete jawaante hasiissinonsa.

Roduu Raazerfordi awuraajju gambooshshiwa lame kaajja lallawo shiqishino, hattono raadoonetenni onte lallawo shiqishino; tini lallawo ammanamino roduuwa baasa jawaachishshino. Meksikote gobbara nooti raadoonete xaawubba dancha duduwo sayisa hanaffinohu hatte yannaraati. Haarote shoommoonnihu sinu biirora aliidi laꞌꞌaanchi gambooshshu gedensaanni looso qineessino, hattono ammanamino roduuwi afiꞌrino jawaantenninna Yihowa kaaꞌlonni diinaggaawe soqqama hanafino.

Aane noo diro, hatte gobbara lame jajjabba gambooshshe assinoonni; mitto Werakuriizi katamira, wole kayinni Meksiko Sitii yinanni katamira assinoonni. Roduuwu diinaggaabbe soqqamansanni dancha guma afidhino. Hatte gobbara 1931nni 82 halashshaano calla no. Tonnu diri gedensaanni halashshaanote kiiro lexxite tonne ero ikkitino! Meksiko Sitii yinanni katamira 1941nni assinoonnihu jawu gambooshshira 1,000 meddi yaanno manni gamba yiino.

Yihowa Farciꞌraasine 1943nni badheenna albaanni borreessinoonnita egensiishshu borro suxxite 12 Meksikote katammara assinanniha “Keere Fultino Daga”  yitanno cuꞌmo afiꞌrino gambooshshe egensiissino. a Yihowa Farciꞌraasine 1936nni kayisse tenne hayyo horoonsidhanni keeshshitino.

La Nasiyooni yinanni metseete roduuwu Meksiko Sitii yinanni katamira albaanna badhee borreessinoonnita egensiishshu borro horoonsiꞌransa kaajja hayyo ikkitinota xawissanni togo yitino: “[Gambooshshu hanafi] barra [Farciꞌraasine] manna ledde koyissanno gede kulloonninsa. Layinki barra kayinni ofollinanni bayicho hoongoonni.” Roduuwu tenne hayyo horoonsidhe sabbakkinohura Kaatoolikete Cherche dibaxisidhino; konni daafira insa mannu Yihowa Farciꞌraasine macciishshannokki gede assate woꞌnaaltino. Ikkollana kuri worbuullu roduuwi mannu giwinsarono, dooggate egensiisa diagurtino. La Nasiyooni yinanni metseete ledde togo yitino: “Katamaho noo manni baalu insa daaꞌꞌatanno . . . Kuri labballinna meenti albaanna badhee borreessinoonnita egensiishshu borro suxxitino.” Misilete woroonni dooggate kande saꞌnanniwa hoongoonni yaanno xawishshi no.

Hatte yannara, Yihowa Farciꞌraasine jajjabbu gambooshshira Meksiko haꞌrate lowore assitanno. Batinyu manni baaburunna injiitanno doogo nookkiwinni gaxaretenni daanno. Mitte songo “Kawira daanno baaburi dino” yite sokka borreessitino. Konni daafira mannu gambooshshunniwa massannonsa baaburiwa iillate, gaangotenni woy lekkatenni lowo barra haꞌranno.

Rooriidi roduuwira anga ajjinonsa daafira, gambooshshunniwa hadhanno woxe nafa diafidhanno. Gambooshshe assinanniwa iillitanno wote, qooxeessaho noo roduuwiwa galtanno; kuri roduuwi ayyaanaamittete roduuwansa baxillunni wosinsitanno. Insa giddo mitu Gambooshshu Addaraashera galtanno. Mitte hige, 90 meddi yaanno wosini sinu biirora galino; insa hakko “20 ikkitannota maxaaffa worranni kaartoone kadhite goxxe galtino.” Mittu Diru Maxaafi kuni assinoonninsare naadanno wosini tini “simmintotenni roore guuqqannokkitenna iibbado maꞌnaati” yee coyiꞌrinota xawisino.

Kuri roduuwi, uminsa horo baala agurte Magano hagiirrunni magansiꞌrate mitteenni gamba yaa gaabbissannokkita huwattino. Xaa yannara, Meksikote gobbara nooti Yihowa Farciꞌraasine kiiro mitte miliyoone meddi yitanno; kuri roduuwi albiri gede assinoonsare naaddannoreeti. b Meksikote gobbara nooti sinu biiro 1949nni sokkino rippoortera roduuwu daafira kultannoti togo yitanno hedo no: “Roduuwaho iillinonsa fonqoli halaaleho noonsa diinagge qiiddanno gede diassino; korkaatuno jajjabba gambooshshe assini gedensaanni, lowo yanna geeshsha roduuwu hakkonni gambooshshi daafira kayisse hasaabbanno; duucha wote insa ‘Aanannoha jawa gambooshshe assiꞌneemmohu maamooteeti?’ yite xaꞌmitanno.” Xa yannarano roduuwaho hattoo lao noonsa.—Mereerimi Ameerikira Noote Xaggenke Maareekko Giddonni.