1. Kiristaanu hegere heeshsho afiˈrate qolchamanno qolchansho jeefisate maa assa hasiissannonsa?

KIRISTAANU hegere heeshsho afiˈrate qolchamanni no. Qolchansho hananfoommohu muli yannara woy lowo diri albaanni ikkirono, jeefote geeshsha doda hasiissannonke. Soqqamaasinchu Phaawuloosi Filiphisiyusi Kiristaana amaalino amaale, qolchanshonke jeefisate kaaˈlitannonke. Phaawuloosi sokka borreessinsa woyite, mitu Filiphisiyusi songo Kiristaani Yihowara lowo diro soqqantanni keeshshitinoreeti. Insa hatte yannara jawaatte doddanni nooha ikkirono, Phaawuloosi cincatenni doda agurtannokki gede qaagiissinonsa. Insa, isi lawishsha harunsite ‘gawalote’ geeshsha doddara hasiˈrino.—Fil. 3:14.

2. Phaawuloosi Filiphisiyusi Kiristaanira amaale uyinohu hasiisse noonsa yannaraati yineemmohu mayiraati?

² Phaawuloosi Filiphisiyusi Kiristaana amaalinohu, amaale hasiisse noonsa yannaraati. Filiphisiyusi katamira songo xintantanni heedheenna, roduuwaho dartu iilla hanafino. Maganu 50 M.D. balla Phaawuloosinna Silaasi Meqedooniya hadhanno gede ajuujatenni kulinonsa; konnira insa dancha duduwo kulate Filiphisiyusi hadhino. (Soq. 16:9) Hakkiicho insa Liidiya yinanni manchonni xaaddino; ise “Maganu wodanase faneenna” dancha duduwo macciishshitino. (Soq. 16:14) Shiima yanna gedensaanni ise minise manni ledo cuuantino. Daawuloosi kayinni digoxino. Katamaho heeˈranno manni Phaawuloosinna Silaasi gashshaanonniwa massino, hattono qarra kalaqqino yee beebba kassasinonsa. Konninni kainohunni Phaawuloosinna Silaasi gannoonninsa, usurroonninsa, hattono gedensoonni katamunni fultine hadhe yinoonninsa. (Soq. 16:16-40) Ikkina  insa hexxo mudhitinoyya? Dimudhitino! Haarote xintantino songo maa assituyya? Insano kaajjite uurrite dancha lawishsha ikkitino! Phaawuloosinna Silaasihu danchu lawishshi baasa jawaachishinonsati egennantinote.

3. Phaawuloosi maa huwatino? Hiikkuri xaˈmuwara dawaro afiˈneemmo?

³ Phaawuloosi kaajje heeˈrate murciˈrino. (2 Qor. 4:16) Ikkollana, isi qolchansho jeefisate mixosi woy gawalosi illachisha hasiissannosita huwatino. Phaawuloosi lawishshinni maa ronseemmo? Qarru iillinkerono cincine heeˈra dandiineemmota leellishannohu yannankera ammanamino roduuwi lawishshi no? Hexxonke wolqa baˈneemmokki gede kaaˈlitannonkehu hiittoonniiti?

4. Phaawuloosi qarru iillisirono, Maganoho diinaggaawe soqqaminohu hiittoonniiti?

⁴ Hanni Phaawuloosi Filiphisiyusi Kiristaanira sokka borreessi woyite hiitto ikke nooro hedi. Hatte yannara isi Roomaho usurame no. Hakko daafira fule sabbaka didandaanno. Ikkirono, isi xaˈmasira daanno mannira farciˈrino, hattono xeertote noo songuwara sokka borreessino. Yannankerano, dhibbunni woy geedhimmatenni kainohunni mininni fule afannokki Kiristaani, xaˈmansara daanno mannira dancha duduwo kulate woˈnaalanno. Qoleno insa minensa marre xaada dandiinannikki mannira sokka borreesse farciˈranno.

5. Filiphisiyusi Sokka 3:12-14 kultanno garinni, Phaawuloosi mixosi illachishanno gede kaaˈlinosiri maati?

⁵ Phaawuloosi alba assinohu danchuno ikko bushu coyi hedosi billaallitanno gede assasira diwodhino. Isinni, Phaawuloosi ‘albasiinni noore amadate’ ‘badhesiinni noore hawa’ hasiissannosita coyiˈrino. (Filiphisiyusi Sokka 3:12-14 nabbawi.) Phaawuloosira hedosi billaallitanno gede assasira dandaanno coyi maati? Umihunni, isi Yihudu ammaˈno giddo noo yannara lowore assino. Ikkirono, isi konne coye ‘ishinu gede asse agurino.’ (Fil. 3:3-8) Layinkihunni, isi alba Kiristaanaho darte iillishinoha ikkirono, tini Maganoho soqqamannokki gede assitasira diwodhino. Sayikkihunni, Yihowara konni albaanni soqqamoommohu ikkino yee dihedino. Phaawuloosi usurroonnisiha, gannoonnisiha, kinnatenni awwaalloonnisihanna haˈranni noo markaawe hiiqqaqqantinoha, hattono hudirinohanna kallinoha ikkirono, Maganoho diinaggaawe soqqamino. (2 Qor. 11:23-27) Phaawuloosi konni albaanni lowoha dancha coye assoommo yee woy qarru iillinoe yee Yihowara soqqama diagurino. Ninkeno isi lawishsha harunsa hasiissannonke.

6. Hawa hasiissannonkehu ‘badhenkeenni noo coyi’ giddo mitu maati?

⁶ Phaawuloosi lawishsha harunsine ‘badhenkeenni noore hawa’ dandiineemmohu hiittoonniiti? Ninke giddo mitoota alba loonsoommo soˈro gaabbissanni qarrissannonkeha ikkara dandaanno. Hatto ikkiro, Kiristoosite wodote kakkalo daafira haja assine xiinxalla kaaˈlitannonke. Wodote daafira xiinxallanke, hiincanke, hattono huuccatto assiˈranke hasiissannokki gaabbonni beya afiˈneemmo gede kaaˈlitankera dandiitanno. Qoleno, Yihowa gatona yiinonke cubbira gaabbinanni ninkeneeto gawajjineemmokki gede kaaˈlitannonke. Hanni Phaawuloosi lawishshinni ronseemmoha wole roso hedi. Mitootu albinni roore Yihowara soqqamate yite lowo damooza baantanninsa looso facci assite agurtino. Agurroommoha maalaamittete qiniite halchantenni, badhenkeenni noore hawa hasiissannonke. (Kir. 11:4-6; Ros. 7:10) ‘Badhenkeenni noore’ yiniri giddo mitu, konni albaanni Yihowara soqqammoommo soqqansho woy alba cincine saˈnoommo qarra ikkara dandaanno.  Yihowa konni albaanni maassiˈrinonkenna kaaˈlinonke gara qaaga isiwa shinqeemmo gede kaaˈlitannonketi egennantinote. Ikkirono, konni albaanni Yihowara soqqamoommo geeshshi ikkino yine kassi yaa dihasiissannonke.—1 Qor. 15:58.

7. Umi Qorontoosi 9:24-27 kultanno garinni heeshsho afiˈrate qolchammeemmo qolchansho jeefisate maa assa hasiissannonke? Lawishsha kuli.

⁷ Yesuusi “Wolqaˈne uyitu deerrinni jawaatte” yaasi mayyaatero Phaawuloosi seekke huwatino. (Luq. 13:23, 24) Phaawuloosi, Kiristoosi gede heeshshosi diro woˈma jawaate soqqama hasiissannosita afino. Isi Kiristaanu heeshsho qolchanshote ledo lawisinohu iseraati. (1 Qorontoosi 9:24-27 nabbawi.) Qolchamanno manchi gawalote masimara illachishanno, hattono hedosi billaallitannokki gede assiˈranno. Lawishshaho, mitootu katamu mereero uduunnu suuqqa woy hedonsa billaallisannohu wolu coyi noo doogo widoonni higge qolchantannoha ikkara dandaanno. Mittu manchi qolchamanni heeˈre suuqete noo uduunne hincilaallote giddoonni qole laˈˈate uurrannohalla ikki? Baˈraarsha afiˈra hasiˈriro hatto diassanno! Hegere heeshshora qolchammeemmo woyiteno, hedonke billaallitanno gede assannore gargadha hasiissannonke. Mixonke illachinshe Phaawuloosi gede wolqanke assitu deerrinni jawaante dondeemmoha ikkiro, baraarsha afiˈneemmo!

8. Hiikkonne sase fonqolo ikkanno coye xiinxallineemmo?

⁸ Hanni xa hexxo mudhineemmo gede assankera dandaannoha sase fonqolo laˈno. Insano, hendoonniri ikka hooga, dhuku anjeetinna seeda yanna keeshshanno qarraati. Wolootu togoo qarra dandiite saˈino gara afanke kaaˈlitannonke.—Fil. 3:17.

9. Hendoommori ikka hoogiro ma ikkinammora dandiineemmo?

⁹ Hendoonniri ikka hoogiro. Yihowa abbeemmo yee qaale einoha dancha coye halchanke nooreentilla. Isinni, masaalaanchu Imbaaqoomi, Yihowa Yihudunni bunshe hunanno gede halchinota coyiˈri yannara Yihowa “cincite agari” yiinosi. (Imb. 2:3) Ikkollana, ikkanno  yine hendoommori keeshshinoha lawinkero, albi geeshsha diinaggaawa hoongammora dandiineemmo. Qoleno hexxo nafa mudhinammora dandiineemmo. (Law. 13:12) Mitu roduuwira 1914nni togoo fonqoli iillinonsa. Batinyu buuramino Kiristaani, hakko diro iimi baˈraarshansa adhineemmo yee hedino. Ikkollana kuni ikkikki gatita, insa konne fonqolo ikkanno coye qeelte saˈinohu hiittoonniiti?

10. Mittu minaanninna minaama hedinori woˈmikki gatita maa assino?

¹⁰ Hanni konne fonqolo qeele sainori lamu ammanamino roduuwi lawishsha laˈno. Roduu Rooyaali Ispaatsi 1908nni 20 dirisinni cuuamino. Isi boodu diri gedensaanni iimira haˈreemmo yee hexxino. Isinni, 1911nni Pereeli yinanni rodoo ledo adhamate coyiˈrami yannara isera, “1914nni mayi ikkannoro afoottana, adhammeemmoro ranke adhammo!” yiino. Kuri roduuwi 1914nni iimi baraarshansa adhinokki daafira, hexxo mudhe heeshsho afiˈrate qolchama agurinoni? Diagurino. Korkaatuno, qara mixonsa iimira haˈra ikkitukkinni, ammanante Maganu fajjo wonshate. Insa cincite dodate murcidhino. Rooyaalinna Pereeli lowo diri gedensaanni uullaayidi heeshshonsa jeefisi yanna geeshsha, Yihowara diinaggaawenna ammaname soqqamino. Ninkeno, Yihowa suˈmisi qullaawanno gede assara, aliidimmasi gara ikkase buuxisaranna eino qaale baala wonshara halchineemmo. Yihowa yannasira tenne assannota horo dihuluullammeemmo. Hakka geeshsha kayinni, hendoommori rahe woˈminokkiha laweennanke hexxo mudhantenni, Maganoho diinaggaambe soqqammo.

11-12. Dhukinke albi geeshsha ikka hoogiro nafa, Yihowara soqqama dandiineemmo yineemmohu mayiraati? Lawishsha kuli.

¹¹ Dhuku anje. Doddannorira lowo wolqa hasiissannonsa; hegere heeshsho afiˈrate dondeemmo woyite kayinni hasiissannonketi mannimmate jawaante diˈˈikkitino. Isinni batinyu dhuku anje noonsa roduuwi, dandaaminsa deerrinni Yihowara diinaggaabbe soqqamate murcidhino. (2 Qor. 4:16) Lawishshaho, Roduu Arteri Seekordi * 55 diro Beeteelete soqqamino; hakkiinni 88 dirisinni dhuku anje amaddinosi. Mitte nersitte towaattasira isiwa shiqqi yite, iso laˈanni shaqqillunni togo yitinosi: “Rodoo Seekordi, Yihowara soqqamate assoottori loworeeti.” Isi kayinni alba assinore calla kulanni diheeˈrino. Roduu Seekordi muushshi yee isewa hige laˈˈanni togo yiino: “Halaale yootta. Kayinni, alba assinoommore calla heda dihasiissannonke. Xaano Yihowara ammanamme heeˈrate sharrama hasiissannonke.”

 ¹² Yihowara lowo diro soqqante, xa kayinni fayyimmate qarrinni kainohunni albi geeshsha soqqama hoogoottoha ikkara dandaanno. Hatto ikkiro, hexxo mudhitooti. Yihowa alba isira ammanante soqqamoottota dihawanno. (Ibi. 6:10) Yihowara noonke baxille bikkinannihu, soqqammeemmo soqqansho jilbinni ikkinokkita deˈooti. Hatteentenni, hagiirrinkenna hexxonke baˈukki heeˈranke, hattono dhukinke assi deerrinni Yihowara soqqamanke iso lowo geeshsha banxeemmota leellishshanno. (Qol. 3:23) Yihowa dhukanke afino; qoleno dandiineemmokkire asse diyaannonke.—Maq. 12:43, 44.

13. Meelinikinna Liidiya woˈnaalshi lowo qarri iillinkerono Yihowara soqqama agurreemmokki gede jawaachishannonkehu hiittoonniiti?

¹³ Seeda yanna keeshshanno qarra. Mite Yihowa soqqamaano iillinonsa qarranna darte seeda diro cincite heedhino. Lawishshaho, Anatolii Meeliniki * 12 dirihu heeˈreenna annasi amande usurroonni, hakkiinni Moldooviyaho noo qaensanni 7,000km xeertiˈre noowa Sayibeeriya haaˈne haˈnoonni. Mittu diri gedensaanni, Meeliniki, amasi, ahaahosinna ahaahesino Sayibeeriya haaˈne haˈnoonni. Gedensoonni insa gambooshshe assiˈra dandiitinoha ikkirono, gambooshshu base iillate kaadenna qucuccishanno qiida cincite 30km woˈma hadhanno. Yannate gedensaanni Roduu Meeliniki minaamasi Liidiyawiinninna mittu diri qaaqqonsawiinni baxxe sase diro usuramino. Isiranna maatesira qarru lowo diro iillinonsaha ikkirono, Yihowara soqqama diagurtino. Xa Meeliniki 82 dirisinni Mereerimu Iisiyira Sinu Biiro Komite ikke soqqamanni no. Ninkeno Meelinikinna Liidiya gede, albi garinni Yihowara soqqamate dandiinummore baala assa agurroonke.—Gal. 6:9.

14. Phaawuloosi baˈraaˈra adhate maa assa hasiissannosita huwatino?

¹⁴ Phaawuloosi jeefote geeshsha dode hedinowa iillannota dihuluullamino. Buuramino Kiristaancho ikkino daafira, Maganu iima ‘aannosi baˈraaˈra adhannota’ hexxino. Ikkollana, isi konne baˈraaˈra adhate gawalote geeshsha jawaate ‘doda’ hasiissannosita huwatino. (Fil. 3:14) Phaawuloosi Filiphisiyusi Kiristaani hexxonsa illachishanno gede kaaˈlate kaajja lawishsha horoonsiˈrino.

15. Phaawuloosi, Filiphisiyusi Kiristaani ‘gawalote geeshsha dodanno’ gede jawaachishate, qansichimma lawishsha asse horoonsiˈrinohu hiittoonniiti?

¹⁵ Phaawuloosi, Filiphisiyusi Kiristaani iimi  qansoota ikkitinota qaagiissinonsa. (Fil. 3:20) Insa tenne qaaga hasiissannonsahu mayiraati? Hakka waro Roomu qansichimma loworeeti. * Buuramino Kiristaanira kayinni lowo horo afidhinoti taalle nookki qansichimma noonsa. Iimi qansichimma hendiro, Roomu qansichimma garita diˈˈikkitino. Hakko daafira Phaawuloosi, Filiphisiyusi Kiristaani iimi qansoota ikkinohura “danchu duduwira hasiisino garinni” heeˈranno gede jawaachishino. (Fil. 1:27) Yannankera noohu buuramino Kiristaani, gawalonsawa iillate yaano iima hegere heeshsho afiˈrate sharramansa dancha lawishsha ikkitannonke.

16. Hexxonke iimira haˈrano uulla heeˈrano ikkituro, Filiphisiyusi Sokka 4:6, 7 kultanno garinni maa assa hasiissannonke?

¹⁶ Hexxonke iimira haˈrano uulla heeˈrano ikkituro, baˈraarshanke afiˈrate jawaante doda hasiissannonke. Heeˈnoommo gari ikkihano ikkiro, badhenkeenni noore laˈˈanna aye coyino Yihowara soqqammeemmokki gede assankera wodha dihasiissannonke. (Fil. 3:16) Hendoommori woˈmikki keeshshinoha lawankera woy dhukinke ajanni haˈrara dandaanno. Hattono iillinonke qarranna darte lowo diro cincine heeˈnoommoha ikkara dandaanno. Aye qarrino iillinkero, “mittu coyirano yaaddinoonte” yitanno amaale harunsino. Hasiˈnoommo coye Maganoho kuˈlino; isi mannu hedora aleenni ikkino keere aannonke.—Filiphisiyusi Sokka 4:6, 7 nabbawi.

17. Aananno birxichira maa ronseemmo?

¹⁷ Qolchamanno manchi jeefote masimariwa shiqqi yaanno woyite hirresi baala horoonsiˈre dodanno; ninkeno goofimarchu yannara heeˈnoommo daafira, hegere heeshsho afiˈrate gawalote geeshsha jawaante dodate murciˈno. Wolqanke assitu geeshsha albillitte afiˈneemmo baˈraarsha adhate sharrammo. Hegere heeshsho afiˈrate dondeemmo woyite gara ikkino ragaa hinge dandiinummo deerrinni dodate maa assa hasiissannonke? Aanano birxichira balaxa hasiissannore balaxisiisanna ‘woyyanno coye bande afa’ dandiineemmo gara ronseemmo.—Fil. 1:9, 10.