LOWO geeshsha baxattohu, ikkollana kayinni xa loosa dandaattokkihu songote loosi no? Konne looso xa wolootu loossanni nooha ikkara dandaanno. Woy kuni loosi alba ati loosattoha ikkara dandaanno. Xa kayinni jawinaatunni, fayyimmate woy miinju qarrinni, hattono maate towaaxxatto daafira albi geeshsha soqqama dandaattokkiha ikkara dandaanno. Woy Yihowa dirijjite assitino soorronni kainohunni albi qoossokki agura hasiissinoheha ikkara dandaanno. Ikkihano ikkiro, Maganoho hasiˈratto geeshsha soqqantanni noottokkiha lawahera dandaanno. Togoori iillinoheha ikkiro, mito woyite dadillisahera dandaannoti egennantinote. Ikkirono quwa saˈe hexxo mudhattokkinna caccaawattokki gede mayi kaaˈlannohe? Hagiirrikki baikkinni heeˈra dandaattohu hiittoonniiti?

Cuuaanchu Yohaannisi xagge xiinxallanke, hagiirrinke baikkinni heeˈra dandiineemmo gara afate kaaˈlitannonke. Yohaannisi kaajja qoosso afiˈrinoha ikkirono, Yihowara soqqami yannara iillinosiri hedinokkire ikkara dandaanno. Isi soqqamanni sayisino yannanni roore usuru mine sayiseemmo yee hedinokkiha ikkara dandaanno. Ikkirono, Yohaannisira hagiirrisi dibaino; isi heeshshote noo yanna baala hagiirraamo ikke heeˈrino. Tennera kaaˈlinosiri maati? Ninkeno hendoommokki coyi iillinkerono, hagiirrinke baikkinni heeˈra dandiineemmohu hiittoonniiti?

Yohaannisi Mesihichaho doogo qixxeessannoha ikke soqqama hanafinohu 29 M.D. badheessu woggaraati; isi “Gordu Gashshooti gambisinona, cubboˈne aagintaabbe!” yaanni lallawino. (Mat. 3:2; Luq. 1:12-17) Batinyu manni macciishshino. Isinni, Yohaannisi sokka macciishshate lowo manni xeertotenni isiwa dayino; hattono batinyu manni aagintaawe cuuamino. Yohaannisi, insaneeto bokkeessitannori ammaˈnote massagaano maaro ea hoogguro busha yoo yinanninsata waajjikkinni kulinonsa. (Mat. 3:5-12) Isi 29 M.D. balla Yesuusa cuui yannara, baalanta roortino qoosso afiˈrino. Hatte yannanni kayise Yohaannisi, daanno yinoonni Mesihichi Yesuusa ikkinota kule mannu iso harunsanno gede jawaachishino.—Yoh. 1:32-37.

Yohaannisi qeecha hendiro, Yesuusi “Baattote aana ilamino manni giddo Cuuaancho Yohaannisi  roorannohu dino” yaasi garankolla. (Mat. 11:11) Yohaannisi afiˈrino atootinni hagiidhinoti dihuluullissannote. Xaa yannarano batinyu roduuwi Yohaannisinte gede lowo atoote afidhino. Hanni Teeri yinanni rodii lawishsha laˈno. Isinna minaamasi Sandira woˈma yanna soqqansho giddo 50 saˈˈanno diro sayissino. Teeri togo yiino: “Lowota kaajja qoosso afiˈroommo. Woˈma yanna suwisaanchonna baxxino suwisaancho ikke, hattono Beeteelete, woradu aliidi laˈˈaanchonna awuraajju aliidi laˈˈaancho ikke soqqamate qoosso afiˈroommo; xa kayinni wirro baxxino suwisaancho ikke soqqamanni noommo.” Yihowa dirijjite giddo qoosso afiˈra lowo ayirrinyeeti; Yohaannisi woˈnaalshinni ronseemmonte gede kayinni, heeshshonke gari soorramanno woyite hagiirrinke baikkinni heeˈrate sharrama hasiissannonke.

Cuuaanchu Yohaannisi hagiirrisi baikkinni heeˈranno gede kaaˈlinosihu qaru coyi, woˈmante yannara noosi qoosso naadasiiti. Hanni mitto lawishsha laˈno. Yesuusi cuuami gedensaanni Yohaannisi soqqansho ajjanni, Yesuusi soqqansho kayinni lexxitanni hadhino. Yohaannisi rosaanora tini huluulliteennansa isiwa marte togo yitino: “Ati isire farciˈrittohu manna cuuanni no; mannu baaluno isiwa maranni no.” (Yoh. 3:26) Yohaannisi kayinni togo yiinonsa: “Idayicho noosihu adhannoho; albisu kayinni adhannohu mule uurre huurosi macciishshe hagiidhanno. Kunnira, ane hagiirrino xa woˈmino.” (Yoh. 3:29) Yohaannisi Yesuusi ledo diheewisamino; qoleno Yesuusi roore soqqamasi isi soqqansho ajishshinoha dilawinosi. Hatteentenni, isi “albisa” (miizicha) ikkasi lowori gede asse laino daafira, hagiirrisi baikkinni heeˈrino.

Yohaannisira noosi lao, uyinoonnisi loosi shota ikka hoogirono, hagiirrisi baikkinni heeˈranno gede kaaˈlitinosi. Lawishshaho, Yohaannisi ilami yannanni kayise Naaziraawicha ikkino daafira, woyinete xajje aga didandaanno. (Luq. 1:15) Yesuusi isi heeshsho daafira coyiˈranni, “Yohaannisi itikkinninna woyinete xajje agikkinni dayi” yiino. (Mat. 11:18, 19) Wole widoonni kayinni, Yesuusinna rosaanosi Naaziraawichu assannokkire assa dandiitanno. (Mat. 11:18, 19) Qoleno, Yohaannisi mitte maalale nafa diloosino; ikkirono alba isi harunsaanono ikko Yesuusi rosaano maalale loosate dandoo afidhinota afino. (Mat. 10:1; Yoh. 10:41) Ikkirono Yohaannisi, tini hedosi billaallitanno gede assitasira diwodhino; hatteentenni Yihowa uyinosi soqqansho diinaggaawe soqqamino.

Ninkeno xa Yihowa uyinonketa soqqanshote qoosso naandeemmoha ikkiro, hagiirrinke baikkinni heeˈra dandiineemmo. Aleenni kullihu Teeri togo yiino: “Haaro soqqanshote qoosso afiˈreemmo woyite, woˈmunni woˈma hatte soqqansho illachisheemmo.” Isi woˈma yanna soqqansho giddo sayisino yanna daafira coyiˈranni, “Lowoha hagiirsiisanno woˈnaalsha afiˈroommo; qoleno mitturino gaabbisannoeri dino” yino.

Yihowa aannonke qoosso baxxitinota assannori maatiro hiincanke, soqqanshonkenni roore hagiirraamma ikkineemmo gede assitannonke. Baalanta qoosso baxxitinota assannohu “Maganu ledo loonseemmore” ikkankeeti. (1 Qor. 3:9) Biifadu uduunni fiinanni woyite roore biifannonte gede, Maganu ledo loosankenni afiˈnoommo ayirrinye hiincineemmoha ikkiro, gara ikkitinokki hedo hagiirrenke dihuntanno. Hattono, ninke assineemmore wolootu assitannori ledo diheewisiinseemmo. Qoleno ninke qoosso wolootunnite ledo taashshinanni ajinshe dilaˈneemmo.—Gal. 6:4.

Yohaannisi soqqanshosinni lowo yanna keeshshannokkita afikki digatino; ikkirono isi soqqanshoˈya hedeweelcho agureemmo yee hedinokkiha ikkara dandaanno. (Yoh. 3:30) Yohaannisi Yesuusa cuuihunni mitu lewu agani gedensaanni yaano 30 M.D. Moote Heroodiisi Yohaannisi usurino. Ikkirono Yohaannisi dandaamisi deerrinni farciˈra diagurino. (Maq. 6:17-20) Ikkina Yohaannisi hagiirrisi baikkinni heeˈranno gede kaaˈlinosiri maati? Ayyaanaamittete coye illachishasiiti.

Yohaannisi usuru mine heeˈre, Yesuusi halashshe soqqamanni noota macciishshino. (Mat. 11:2; Luq. 7:18) Yohaannisi, Yesuusi Mesihicha ikkinota dihuluullamino; ikkirono, Qullaawa Borro giddo Mesihichu assano yine kulloonnire baala Yesuusi wonshannohu hiittoonniitiro afa hasiˈrikki digatino. Mesihichu Moote ikkannota masaalloonni  daafira, Yesuusi mulenni gashsha hanafanno ikka? Hatto ikkiro, Yohaannisi usuru mininni tirsiisanno ikka? Yohaannisi Yesuusi assannori daafira lede afa hasiˈrinohura, rosaanosi giddo lame togo yee Yesuusiwa soyino: “Daanno yinannihu ateetinso wole agadhino?” (Luq. 7:19) Insa Yohaannisiwa higge Yesuusi maalaletenni hursanni noota kultusita Yohaannisi seekke macciishshinoti dihuluullissannote. Yesuusi, Yohaannisira togo yite kultannosi gede hajajinonsa: “Ballootu laˈanni no; naafootu uurrite hadhanni no; dhiigaammu keeraabbanni no; macciweelootu macciishshitanni no; reyitinori kaˈanni no; buxanete Dancha Duduwo kullanni heeˈnoonni.”—Luq. 7:20-22.

Yohaannisi rosaanosi kultinosire macciishshiti jawaatinoti dihuluullissannote. Insa kultinosiri, Yesuusi Mesihichu daafira masaalloonnire wonshanni noota addaxxanno gede assitinosi. Yesuusi Mesihicha ikkasi Yohaannisi usuru mininni fulanno gede assitannokkiha ikkirono, Yohaannisi soqqanshosi haafa ikkitinokkita huwatino. Heeshshosi gari ikkihano ikkiro, Yohaannisi hagiidhanno gede assannori noosi.

Ninkeno Yohaannisi gede ayyaanaamittete coye illachinsheemmoha ikkiro, hagiirrunninna cincatenni kaajjine uurra dandiineemmo. (Qol. 1:9-11) Qullaawa Maxaafa nabbawankenna nabbamboommore hiincanke, kaajjine uurrineemmo gede kaaˈlitannonke. (1 Qor. 15:58) Sandira togo yitino: “Barru baala Qullaawu Maxaafinni mitte fooliishsho nabbawaˈya albinni roore Yihowawa shiqeemma gede kaaˈlitinoe. Qoleno aneneeto agure iso illachisheemma gede assitinoe.” Hattono sabbakate loosinke daafira fultanno rippoorte illachisha dandiineemmo; hatto assanke ninke heeˈnoommo gara calla illachisha agurre Yihowa assanni noore illachinsheemmo gede kaaˈlitannonke. Sandira togo yitino: “JW Biroodikaastera fultanno pirogiraame albinni roore Yihowa dirijjite anfeemmo gedenna soqqanshonkenni hagiirraamma ikkineemmo gede kaaˈlitinonke.”

Cuuaanchu Yohaannisi harancho yanna soqqanshosi soqqaminohu ‘Eeliyaasi ayyaaninna wolqanniiti’; Eeliyaasi qole “ninke gedee manchooti.” (Luq. 1:17; Yai. 5:17) Ninkeno xa noonke qoosso naandeemmohanna ayyaanaamittete coye illachinsheemmoha ikkiro, aye geeshshi coyi iillinkerono soqqanshonkenni hagiirraamma ikka dandiineemmo.