1. Yihowa heeshsho noonsare kalaqinohu mayiraati?

YIHOWA callichisi heeˈrino yanna no. Ikkirono iso callimma diamaddinosi. Yihowara xeinosiri mitturino dino. Ikkirono isi hagiidhitanni heedhanno gede woloota kalaqa hasiˈrino. Yihowa baxillunni heeshsho noonsare kalaqa hanafino.—Far. 36:9; 1 Yoh. 4:19.

2. Yihowa baalankare kalaqi woyite Yesuusinna sokkaasine hiitto ikkitino?

² Yihowa balaxe Beettosi kalaqino. Hakkiinni bayiru Beettisi widoonni lowo kume ikkitanno sokkaasinenna wole “baalanka coye kalaqino.” (Qol. 1:16) Yesuusi Annisi ledo loose lowo geeshsha hagiidhino. (Law. 8:30) Maganu sokkaasineno hagiidhitanno gede assannonsari no. Yihowanna qaru loosaasinchisi Yesuusi iimanna uulla kalaqqu woyite sokkaasine laˈanni no. Hakkiinni insa hiitto ikkituyya? Insa Maganu uulla kalaqi woyite hagiidhite “ilillissino” hattono Yihowa mitto mittonka coye kalaqi woyite roorenkanni manna kalaqi woyite hagiidhitinoti dihuluullissannote. (Iyo. 38:7; Law. 8:3) Kuni baalunku kalaqami Yihowa baxillenna hayyo leellishannoho.— Far. 104:24; Rom. 1:20.

3. Umi Qorontoosi 15:21, 22 kultanno garinni Yesuusiti wodote kakkalo mayi faro fantino?

³ Yihowa mannu ooso biifado uulla aana hagiidhitanni hegerera heedhara hedino. Ikkollana Addaaminna Heewani baxillaanchu Anninsara finqiltuta cubbunna reyo tenne alame eino. (Rom. 5:12) Ikkina Yihowa maa assino? Bayichonko isi mannu sircho gatisanno gara coyiˈrino. (Kal. 3:15) Yihowa  Addaaminna Heewani sirchi cubbunna reyotenni wolaphanno gede Beettisita wodote kakkalo qixxeessate hedino. Qoleno Yihowa baalunku manni isira soqqama doodhanno faro fanino; hattono isira soqqama doodhitannorira hegere heeshsho aannonsa.—Yoh. 3:16; Rom. 6:23; 1 Qorontoosi 15:21, 22 nabbawi.

4. Konni birxichira hiikkuri xaˈmuwa xiinxallineemmo?

⁴ Maganu kaote daafira uyino hexxo batinye xaˈmuwa xaˈmineemmo gede assitannonke. Lawishshaho, reyino manni kaˈˈannohu ma garinni ikkara dandaanno? Shiiˈnoommori reyotenni kaˈanno woyite insa bande afa dandiineemmo? Kaote hexxo hagiidhineemmo gede assitannonkehu hiittoonniiti? Kaote hexxo hiincanke Yihowa baxille, hayyonna cinca albinni roore naandeemmo gede assitannonkehu ma garinniiti? Hanni kuri xaˈmuwa xiinxallino.

5. Reyino manni baalu mitteenni dikaˈˈanno yine hendeemmohu mayiraati?

⁵ Yihowa Beettisi widoonni lowo miliyoone ikkanno manna reyotenni kayisanno woyite baalanka mitte hige kayisanno yine dihendeemmo. Mayira? Korkaatuno kageeshshi manni mitteenni kaˈˈannoha ikkiro luulu woy kooccu batiˈrara dandaanno. Yihowa kayinni mittoreno qinaawinokki garinni diloosanno. Isi Mannu salaame afiˈranno gede baalunku coyi qinaawinoha ikka hasiissannota afino. (1 Qor. 14:33) Yihowa Beettisi ledo uulla mannu heeˈranno gede asse dirimu dirimunni kalaqi woyite hayyichanna cincannoha ikkinota leellishino. Yesuusino Kumu Diri Gashshooti yannara Armagedooninni gatte saˈannori ledo uulla reyotenni kaˈˈanno mannira heeˈrate injiitannota assitanno woyite hayyichanna cincannoha ikkinota leellishanno.

6. Soqqamaasinete Looso 24:15 kultanno garinni Yihowa reyotenni kayisanno manni giddo rooru hiittooho?

 ⁶ Baalunkunni roore Armagedooni gatte saˈinori reyotenni kaˈannorira Maganu Mangisterenna Yihowa insa maa assitara hasiˈrannoro rosiisa hasiissannonsa. Mayira? Korkaatuno reyotenni kaˈannori giddo rooru ‘cubbaataammaho.’ (Soqqamaasinete Looso 24:15 nabbawi.) Insa Kiristoosite wodote kakkalonni horo afiˈrate lowo coye biddi assiˈra hasiissannonsa. Hanni Yihowa daafira afinori nookkihu lowo miliyoone ikkannohu reyotenni kaˈˈanno mannira Maganu daafira halaale rosiisate loosi mageeshshi geya halaˈlado ikkannoro hendo. Xaa yannara assinannihu gede mittu mittunku manchira Qullaawa Maxaafa xiinxallisanno rodoo worranni ikka? Woy haaruudde songuwate gaammanni ikka? Hattono reyotenni kaˈannore rosiissanno gede qajeelsinanni ikka? Tini hakkawote anfeemmota ikkitanno. Ikkirono, Kiristoosihu Kumu Diri Gashshooti jeefora ‘Kaaliiqa egennino manni baatto’ woˈmannota anfoommo. (Isa. 11:9) Hattee yannara hagiirsiisanno looso diinaggaambe loonseemmo!

7. Maganu soqqamaano reyotenni kaˈannore rosiissanno woyite qarrinsa leellannonsa yineemmohu mayiraati?

⁷ Kiristoosihu Kumu Diri Gashshooti yannara baalanti Yihowa soqqamaano iso hagiirsiisate biddi assiˈra hasiissannonsare biddi assidhanno. Konnira insa reyotenni kaˈinori cubbo loosa agurate sharrantannonna Yihowa biddishshi garinni heedhanno gede kaaˈlitannonsa woyite qarrinsa leellannonsa. (1 Phe. 3:8) Reyotenni kaˈˈanno manni Yihowa soqqamaano umonsa heeshshi assitannorenna iso hagiirsiisate sharrantannore ikkitinota laˈˈanno woyite ledonsa Yihowa magansiˈrate kaˈˈanno.—Fil. 2:12.

8. Shiiˈnoommori reyotenni kaˈanno woyite bande afa dandiineemmo yine hendeemmohu mayiraati?

⁸ Shiiˈnoommori reyotenni kaˈanno woyite bande afa dandiineemmo yine hendeemmo gede assannonkehu duuchu korkaati no. Yihowa alba mito manna reyitinore kayisi garinni albillitte reyino manna kayisanno woyite daninsa, coyidhanno garinna heddanno gari soorramikkinni kayisannoha ikkara dandaanno. Yesuusi reyo goxichu, kao kayinni goxino mancho goxichunni kayisate ledo heewisiisinota qaango. (Mat. 9:18, 24; Yoh. 11:11-13) Mittu manchi goxinowiinni kaˈˈanno woyite danisi woy coyiˈranno gari disoorramanno hattono surresira noori dibaˈˈanno. Hanni Alaazaari lawishsha laˈno. Isi reyinkunni shoole barra ikkino daafira reeshshisi shola hanafino. Ikkirono Yesuusi iso reyotenni kayisita roduuwisi bayichonko bade afino; isino insa qaaginoti dihuluullissannote.—Yoh. 11:38-44; 12:1, 2.

9. Reyitinori kaˈanno woyite guuta surrenna mannimma afidhe kaˈannokkihu mayiraati?

⁹ Yihowa Kiristoosi Gashshooti yannara “‘Dhiwamoommo’ yaannoha dianfanni” yee qaale eino. (Isa. 33:24; Rom. 6:7) Konnira Yihowa reyitinore ordu fayyimma oye kayisannonsa. Ikkollana insa reyotenni kaˈanni heedhenni guunte noonsare diˈˈikkitanno. Guunte noonsare ikkite kaˈuro fiixinsa insa bade afa hoogara dandaanno. Baalunku manni guuta ikkannohu Kiristoosihu Kumu Diri Gashshooti yannara sunu sununni ikkikki digatino. Hakkiinni Yesuusi kumu diri jeefora Maganu Mangiste Annisira qolanno. Maganu Mangiste loosose umo fushshitanno; hattono mannu ooso guuta ikkitanno  gede assitanno.—1 Qor. 15:24-28; Aju. 20:1-3.

10. Reyino manni kaˈˈanno woyite hiitto ikkattoha lawannohe?

¹⁰ Shiirootto manchi reyotenni kaeenna xaadatto woyite hagiidhatto gara hanni hedi. Hagiirru batinyinni ikkattoti baˈannnoheha ikkara dandaanno. Woy Yihowa faarsotenni guwisiˈrattoha ikkara dandaanno. Ikkihano ikkiro Yihowanna Beettisi dhagge ikkitannota tenne kaote hexxo uyitinohe daafira insa lowo geeshsha baxattoti dihuluullissannote.

11. Yohaannisi 5:28, 29 kultanno garinni Maganu seerinni galtannori mayi atoote afidhanno?

¹¹ Reyotenni kaino manni akkala mannimmansa fushshe hoole Maganu seerinni galanno woyite mageya hagiidhannoro hanni hedi. Hatto assanno manni hegerera gannatete heeˈranno. Maganoho finqiltannori kayi gannatete noo salaame huntara worre dilaˈnanninsa.—Isa. 65:20; Yohaannisi 5:28, 29 nabbawi.

12. Yihowa uullate aana heedhanno soqqamaasinesi baala maassiˈrannohu hiittoonniiti?

¹² Lawishsha 10:22 Yihowa “maasso jiro abbitanno; aanahono mitiimma dileddanno” yitanno; Maganu Mangiste hunda heedhanno soqqamaasinesi baala tini halaale ikkitinota laˈanno. Yihowa ayyaani kaaˈlannonsa daafira Maganu manni ayyaanaamittetenni durooˈmanno; insa albinni roore Kiristoosi faale hadhanno daafira guuta ikkitanno. (Yoh. 13:15-17; Efe. 4:23, 24) Insa barru baala gellessanna dancha manna ikkitanni hadhanno. Hakka woyite heeshsho baxissanno gari addiiti! (Iyo. 33:25) Kaote hexxo hiincakki xaa yannara kaaˈlitannohehu hiittoonniitiyya?

13. Faarso 139:1-4 kultanno garinni kaote hexxo Yihowa seekke afinonketa leellishshannohu hiittoonniiti?

¹³ Aleenni ronsummonte gede Yihowa mitto mancho reyotenni kayisanno woyite surresinna akattasi qolanno. Hatto yaa mayyaatero hanni hedi. Yihowa lowo geya baxannohe daafira hedattore, giddokkita, coyiˈrattorenna assattore baala laˈˈanno hattono qaaganno. Yihowa mitto mancho reyotenni kayisanno woyite surresi, hedosi, akatasinna ayimmasi qolanno. Moote Daawiti Yihowa ninke mitto mittonka seekke afinota huwatino. (Faarso 139:1-4 nabbawi.) Yihowa seekke afinoheta huwatittoro hiitto ikkatto?

14. Yihowa seekke afinonketa hendeemmo woyite mayi macciishshamannonke?

¹⁴ Yihowa seekke afinonketa hiincineemmo woyite isi laanfenke illachishanno yine yaada dihasiissannonke. Mayira? Yihowa ninkera hedannota qaango. Ninke mittu mittunku isi albaanni muxxete. Isi heeshshonke giddo iillannonkeha mitto mittonka coye afino. Tini lowo geya sheshifachishshannote! Callantoommo yine heda horo dihasiissannonke! Yihowa ninke kaaˈlanno faro hasiˈranni woˈmanka woyite ledonke ikkanno.—2 Dud. 16:9.

15. Kaote hexxo Yihowa hayyo leellishshannohu hiittoonniiti?

¹⁵ Reyo waajjineemmoha ikkiro diinnanke gibbiniro shineemmoˈne yite assa hasiˈneemmokkire assineemmo gede giddeessitankera dandiitanno. Insa banxeemmo manna woy ammanneemmo coye kaandeemmo gede assitankera woˈnaaltanno. Ikkollana diinnanke  shitunkero nafa Yihowa kayisannonketa anfoommo daafira tenne diwaajjineemmo. (Aju. 2:10) Diinnanke baxxureno assite Yihowawiinni baddankera didandiitanno. (Rom. 8:35-39) Yihowa kaote hexxo aasi hayyicha Magano ikkinota leellishshanno! Isi hatto assasi Sheexaanu ninke waajjishiishate horoonsiˈranno massaari shuffanno gede assitino; hattono worbuulle ikkineemmo gede assitannonkehura beˈe diyineemmo.

16. Ateneeto mayite xaˈma hasiissannohe? Kuri xaˈmuwara qolatto dawaro Yihowa mageeshshi geeshsha addaxxattoro leellishshannohu hiittoonniiti?

¹⁶ Diinna shineemmohe yite waajjishiishshuhero Yihowa reyotenni kayisannoheta addaxxatto? Togoo coyi tuncu yiihero iso addaxxattotanna teˈee mayinni afa dandaatto? Ateneeto togo yite xaˈmi: ‘Barru baala asseemmohu shiimmaaddu coyi Yihowa addaxxeemmota leellishannoreeti?’ (Luq. 16:10) ‘Heeshshoˈya gari Yihowa Mangistesi balaxisiisummoro hasiisannoere aannoeta addaxxeemmota leellishanno?’ (Mat. 6:31-33) Kuri xaˈmuwara dawaro ee yite qolittoro Yihowa addaxxattotanna ayi geeshshi fonqoli iilliherono dandee saˈˈate qixxaawoottota leellishatto.—Law. 3:5, 6.

17. (a) Kaote hexxo Yihowa cincannoha ikkinota leellishshannohu hiittoonniiti? (b) Cincasira Yihowa galanteemmosita leellinsheemmohu hiittoonniiti?

¹⁷ Yihowa tenne busha alame hunanno barranna saate murino. (Mat. 24:36) Isi cinca hooge murino barri iillikkinni tenne busha alame dihunanno. Yihowa reyino manna kayisate quqquxamannoha ikkirono yanna iillita geeshsha cince agadhanno. (Iyo. 14:14, 15) Isi murino yanna iillita geeshsha agaranno. (Yoh. 5:28) Yihowa cincanno Magano ikkino daafira galanteemmosi. Ninkeno ikko wolu batinyu manni “aagintaawe” higanno faro afiˈrinohu Yihowa cincino daafiraati. (2 Phe. 3:9) Yihowa lowo manni hegere heeshsho hexxo afiˈrara hasiˈranno. Yihowa cincino daafira galantosi. Hatto assa dandiineemmohu hiittoonniiti? “Hegere heeshsho afiˈrate gara ikkitinoti wodanu dooˈˈo noonsare” diinaggaambe hanso; hattono Yihowa baxxannonna isira soqqantanno gede kaaˈlino. (Soq. 13:48, NW) Hatto assinummoro insano ninke gede Yihowa cincanni horo afidhanno.

18. Woloota cincine kaaˈla hasiissannonkehu mayiraati?

¹⁸ Yihowa kumi diri gashshooti jeefora guuta  ikkineemmo yanna cince agaranno. Hakka geeshsha kayinni isi cubbonke gatona yaannonke. Ninkeno Yihowa gede wolootaho noonsata dancha akatta laˈˈanna cinca hasiissannonke. Hanni mitte rodoo lawishsha laˈno; minaannise buutote yaaddo waaddeennasi gambooshshe daa agurino. Ise togo yitino: “Tini baasa xissiissinoe; hendoommori baalu mullare ikke gatino.” Ikkirono ise minaannase cincite kaaˈlitino. Ise Yihowa addaxxitino hattono hexxo dimudhitino. Ise qarrase illachisha agurte Yihowa gede minaanniseta dancha akatta illachishshino. Togo yitino: “Minaanniˈyara kaajja akatta noosi; qoleno isi woyyimma afiˈrate woˈnaalanni no.” Ninkeno maatete giddo woy songonkera buutote qarri iillinonsare cincine kaaˈla hasiissannonke.

19. Maa assate murciˈra hasiissannonke?

¹⁹ Yesuusinna sokkaasine Maganu uulla kalaqi woyite hagiidhitino. Hanni insa albillitte uullate aana Yihowa baxannohunna isira soqqamannohu guutu manni woˈmanno woyite mageeshsha hagiidhitannoro hedde. Iima Yesuusi ledo gashshitara uullanni hadhinori loosinsa mannu ooso kaaˈlanni noota laˈanno woyite mageeshshi geeshsha hagiidhitannoro hendo. (Aju. 4:4, 9-11; 5:9, 10) Hanni dadillu hagiirreho soorramannota hattono dhibbu, qarrunna reyo hegerera baˈanno yanna hedi. (Aju. 21:4) Hakka geeshsha baxillaanchu, hayyichunna cincanno Annikki Yihowa faale haˈrate murciˈri. Hatto assittoro aye geeshshi fonqoli iilliherono hagiirrikki baikkinni heeˈratto. (Yai. 1:2-4) Yihowa ‘cubbaataammanna keeraano reyotenni kayiseemmo’ yee qaale eino daafira galaxxineemmosi!—Soq. 24:15.