1. Yihowa mittu mittunku ammanamino soqqamaanchisira maa uyino?

YIHOWA soqqamaanosi baxanno daafira songote giddo mittu mittunkura qeecha uyinonsa. Songote giddo noonke qeechi babbaxxinoha ikkirono mittu mittunku waagu noonkereetinna baalunkura mimmitu kaaˈlo hasiissannonke. Soqqamaasinchu Phaawuloosi konne kaajja roso huwatate kaaˈlitannonke hedo coyiˈrino. Hiittoonni?

2. Efesooni Sokka 4:16 kultanno garinni mimmito ayirrisanna buusamme loosa hasiissannonkehu mayiraati?

² Phaawuloosi kuni birxichi xintamino qummeeshshira, ninke baalunku wole Yihowa soqqamaancho “Ani ate dihasiˈreemmo” yaa dandiineemmokkita luphi asse xawisino. (1 Qor. 12:21) Songote giddo salaame heedhara hasiˈnummoro, mimmito ayirrisanna sumuu yine loosa hasiissannonke. (Efesooni Sokka 4:16 nabbawi.) Buusamme loonseemmoha ikkiro songo jawaattanno hattono baxillu woˈminota ikkitanno.

3. Konni birxichira maa ronseemmo?

³ Kiristaanu songo giddo nooha baalanka roduuwa ayirrinseemmota leellisha dandiineemmoti mite doogga hiikkuriiti? Konni birxichira songote cimeeyye mimmito ayirrissannota leellisha dandiitannohu hiittoonniitiro laˈneemmo. Hakkiinni baalunku adhantinokki roduuwa ayirrinseemmonsata leellisha dandiineemmo gara ronseemmo. Jeefote ninke qaale mooshshe coyiˈra dandaannokki manna naandeemmota leellisha dandiineemmo gara laˈneemmo.

4. Cimeeyye Phaawuloosi Roomu Sokka 12:10te mayyee amaalino amaale macciishsha hasiissannonsa?

⁴ Baalanta cimeeyye qullaawu ayyaaninni shoominohu Yihowaati. Ikkollana mittu mittunkura noonsa dandoo babbaxxitinote. (1 Qor. 12:17, 18) Insa giddo mitu muli yannara shoomantinorenna gari woˈnaalshi noonsakkire ikkitara dandiitanno. Wolootu kayi jawooˈmitino daafira woy fayyimmate qarrinni kainohunni albi geeshsha soqqama hooggara dandiitanno. Kayinnilla mittu cimeessino wole aye cimeessano ‘isi dihasiisannoho’ yee dihedanno. Mittu mittunku cimeessi Phaawuloosi Roomu Sokka 12:10te amaalino amaale macciishsha hasiissannosi. (Qummeeshsha nabbawi.)

5. Cimeeyye mimmito ayirrissannota leellisha dandiitannohu hiittoonniiti? Hatto assa hasiissannonsahu mayiraati?

⁵ Cimeeyye wolootu cimeeyye coyidhannore seekkite macciishshite ayirrissannonsata leellishshanno. Hakko iso shota ikkitinokki hajo hasaawate gamba yitanno woyite hatto assa hasiissannonsa. Mayira? Birra 1, 1988 (Ingilizete Afoo) Agarooshshu Shae tenne daafira kultanni togo yitanno: “Songote cimeeyye qarra ikkino coye tirtanno gede woy lowo geya hasiissanno muro murtanno gede Kiristoosi qullaawu ayyaani widoonni aye cimeessino Qullaawu Maxaafiha xintu seera qaaganno gede assannota huwattanno. (Soq. 15:6-15) Qullaawu ayyaani kaaˈlannohu baalanta cimeeyyeeti ikkinnina mitto cimeessa calla diˈˈikkino.”

6. Cimeeyye mitteenni buusante loossannohu ma garinniiti? Hatto assansa songo kaaˈlitannohu hiittoonniiti?

⁶ Woloota cimeeyye ayirrisanno cimeessi, cimeeyyete gambooshshi yannara woˈmanka woyite balaxe coyiˈrate diwoˈnaalanno. Isi calla coyiˈrannokki gede qorophanno hattono ane hedo calla garaho yee dihedanno. Hatteentenni hedosi shaqqillunni coyiˈranno. Wolootu coyidhanno woyite seekke macciishshanno. Roorenkanni isi Qullaawu Maxaafiha xintu seera kula baxanno hattono “ammanaminohunna wodanaamu  borojjichi” uyino biddishsha harunsanno. (Mat. 24:45-47, NW) Cimeeyye baxillunninna ayirrinyunni hasaabbannoha ikkiro, Maganu ayyaani songo jawaattanno gede assannore murtara kaaˈlannonsa.—Yai. 3:17, 18.

7. Yesuusi adhammikkinni heeˈra ma garinni laino?

⁷ Xaa yannara songote giddo adhaminorinna maate noonsari no. Batinyu adhaminokki roduuwino no. Adhaminokki roduuwa ma garinni laˈˈa hasiissannonke? Hanni Yesuusi adhammikkinni heeˈra ma garinni lainoro laˈno. Yesuusi uulla noo yannara seenne diadhinoho. Isi soqqanshosi illachishino. Yesuusi Kiristaanu adhama woy adhamikkinni heeˈra hasiissannonsa yee dirosiisino. Mitu Kiristaani kayinni adhantukkinni heeˈra doodhitannota coyiˈrino. (Mat. 19:11, 12) Yesuusi adhantukki heedhannore ayirrisino. Isi adhantinokkire woffi asse dilaino woy xeinonsari noohu gede asse dihedino.

8. Umi Qorontoosi 7:7-9 kultanno garinni, Phaawuloosi Kiristaanu maa assanno gede jawaachishino?

⁸ Phaawuloosino Yesuusi gede soqqanshosi illachishe seenne adhikkinni heeˈrino. Isi Kiristaanu adhama dihasiissannonsa yee dirosiisino. Phaawuloosi tini annu annu haja ikkitinota huwatino. Kayinnilla isi Kiristaanu dandaaminsaro adhamikkinni Yihowara soqqamate illachishara jawaachishino. (1 Qorontoosi 7:7-9 nabbawi.) Phaawuloosi adhaminokki Kiristaana woffi asse dilaino. Isinni Phaawuloosi, shota ikkinokki looso loosara seenne adhinokkiha wedellicha Ximootewoosi doorino. * (Fil. 2:19-22) Konnira, mittu Kiristaanchi seenne adhinoha ikkasi woy ikka hoogasi, Yihowa loosira ikkado ikkanno woy ikkannokki gede assitannosi yine heda digaraho.—1 Qor. 7:32-35, 38.

9. Adhamatenna adhammikkinni heeˈrate daafira mayi lao noonke?

⁹ Yesuusino ikko Phaawuloosi Kiristaanu adhama woy adhamikkinni heeˈra hasiissannonsa yite dirosiissino. Adhamatenna adhammikkinni heeˈrate daafira ninkera mayi lao noonkeyya? Birra 1, 2012 Agarooshshu Shae (Amaaru Afoo) tenne daafira togo yitanno: “Adhamano adhammikkinni heeˈrano Maganu eltooti yaa dandiinanni. . . . Yihowa adhammikkinni heeˈra saallanni woy yaandanni gede assitanno yee dihedanno.” Hakko daafira songote giddo nooha adhaminokki roduuwa ayirrisa hasiissannonke.

10. Adhaminokki roduuwa ayirrinseemmota leellisha dandiineemmohu hiittoonniiti?

 ¹⁰ Adhantinokki roduuwa ayirrinseemmota leellisha dandiineemmohu hiittoonniiti? Mitu Kiristaani horo adhamikkinni heeˈrate doodhinota qaaga hasiissannonke. Mitu roduuwi adhama hasidhannoha ikkirono insara maltino galte afiˈra hooggara dandiitanno. Mitu galte shiidhinore ikkitara dandiitanno. Ikkihano ikkiro, songote giddo noore adhaminokki Kiristaana ‘Mayira diadhantinanni?’ woy ‘Galte hansoˈnenni?’ yine xaˈma garahoni? Mitu adhaminokki Kiristaani adhamate wolootu kaaˈlo xaˈmirannoha ikkara dandaanno. Insa galte hassenke yite amaaˈlitukkinni ‘galte hansoˈnenni?’ yinummoro mayi macciishshamannonsa? (1 Xim. 5:13) Hanni Yihowara ammanante soqqantannori adhantinokki roduuwi coyidhinore laˈno.

11-12. Adhantinokkire saalsiinsammora dandiineemmohu hiittoonniiti?

¹¹ Mittu soqqanshosinni dancha guma afiˈrinohu seenne adhinokkihu woradu aliidi laˈˈaanchi adhammikkinni heeˈra lowo horo afidhinota huwatino. Ikkirono isi, roduuwu isira hedde “Ati mayira seenne diadhatto?” yite xaˈmitannosi woyite saalannota coyiˈrino. Sinu Biirora soqqamannohu mittu adhaminokki rodii togo yiino: “Mito woyite roduuwu adhantinokkiri mararranninsareeti yee hedeemmo gede assitannoe. Tini adhammikkinni heeˈra elto ikkitukkinni qarraho yee hedeemmo gede assitinoe.”

¹² Beeteelete soqqantannoti mitte mine assidhinokki rodoo togo yitino: “Mite halashshaano adhaminokki roduuwi baalunku galte hasiˈrannohu gede assite woy roduuwu ledo gamba yitanno yanna baala galte hasiˈrate faro afidhinohu gede assite heddanno. Mitte hige Beeteelete loosira wole qooxeessa maroommawa hashsha songote gambooshshe haˈroomma. Ane wosinsidhinoe rodoo songonsa giddo seenne adhitinokkiri ane darawo lamu rodii noota kultue. Ise galte hassanni nooekkita kultinoeha ikkirono, Gambooshshu Addaraashe iillinanni heeˈneenna insa ledo xaadissue. Hakkawote sasunku lowo geya saalloommo.”

13. Mitte adhantinokki rodoo jawaante afidhinohu hiittoonniiti?

¹³ Beeteelete soqqantannoti wole mine assidhinokki rodoo togo yitino: “Adhaminokkiha batinye suwisaano roduuwa egennoomma; insa ayyaanaamittetenni gikki yitinoreeti, ayyaanaamittete coye illachishshannoreeti, uminsa horo agurte woloota kaaˈlitannoreeti, soqqanshonsanni hagiirraammaho hattono songote lowore kaaˈlitannoreeti. Togoo roduuwi adhammikkinni heeˈrate daafira gara ikkitino lao noonsareeti; insa adhaminokkire ikkino daafira wolootunni roorinohu gede asse woy galtenna ooso noonsakki daafira xeinonsari noohu gede asse dihedanno.” Baalunku mimmito ayirrisanno woyite songo hagiirru woˈminota ikkitanno. Adhantino roduuwi, adhantinokki roduuwa adhama hoogansa mararsitannote yite diheddanno woy dihinaassanno, hattono insawa shiqqo digibbanno woy ninkenni roortinoreeti yite diheddanno. Hatteentenni insa kuri adhantinokki roduuwa baxxanno.

14. Adhantinokkire naandeemmota leellisha dandiineemmohu hiittoonniiti?

¹⁴ Adhantinokki roduuwi adhama hoogansara ikkikkinni dancha akatta noonsa daafira galantummonsaro hagiidhitanno. Adhama hooggino daafira marara agurre ammanantino daafira galata hasiissannonke. Hatto assinummoro adhantinokki roduuwinke ‘ninke kiˈne dihasiˈneemmoˈne’ yitannonke yite  diheddanno. (1 Qor. 12:21) Hatteentenni insa ayirrinseemmonsatanna songote giddo noonsa qeecha naandeemmota huwattanno.

15. Mitu roduuwi albinni roore soqqamate yite maa assitino?

¹⁵ Muli diri kawa batinye halashshaano albinni roore soqqamate yite wole qaale rosate mixidhino. Insa tenne assate yite lowo coye biddi assidhino. Kuri roduuwi gambooshshe insa qaalinni assiˈnanni songo agurte Maganu Mangiste halashshaano roore hasiissannowa gambooshshe wolu qaalinni assiˈnanni songo hadhino. (Soq. 16:9) Insa hatto assitinohu Yihowara albinni roore soqqamate yiteeti. Kuri roduuwi wole afoo mooshshite coyiˈrate lowo yanna hasiissannonsaha ikkirono songo duucha doogganni kaaˈlitanno. Danchu akatinsanna woˈnaalshinsa songo jawaachishanno. Ninketi bushshu yaa agurte soqqantannore kuri roduuwa lowo geya galanteemmonsa!

16. Cimeeyyete bisi mittu rodii cimeessa woy songote soqqamaancho ikkate ikkado ikkinoronna teˈee laˈˈanno woyite maa illachishanno?

¹⁶ Cimeeyyete bisi mittu rodii songonsa massanganni afoo mooshshe coyiˈra dandaannokki daafira calla cimeessa woy songote soqqamaancho ikkanno gede shiqisha digibbanno. Cimeeyye mittu rodii cimeessa woy songote soqqamaancho ikkate ikkado ikkinoronna teˈee laˈanno woyite, Qullaawu Maxaafi biddishsha harunsitanno ikkinnina songo massanganni afoo didandaanno yite diheddanno.—1 Xim. 3:1-10, 12, 13; Tit. 1:5-9.

17. Mite maate wole gobba hadhanno woyite maa doodha hasiissannonsa?

¹⁷ Mitu Kiristaani darame woy looso hasiˈranni wole gobba haˈranno. Oosonsa rosu mine hatte gobbara coyiˈnanni afiinni rossannoha ikkara dandaanno. Anninsanna amansano looso afiˈrate hatte gobbara coyiˈnanni qaale rosa hasiissannonsaha ikkara dandaanno. Ikkina insa martino gobbara afoo dadhitino qaalinni massanganni songo noohalla ikki? Tini maate hiikko afiinni massanganni songo haˈra hasiissannonsa? Martino gobbara coyiˈnanni afiinni massanganni songonso afoo dadhitino qaalinni massanganni songo haˈra hasiissannonsa?

18. Galatiyu Sokka 6:5 kultanno garinni maatete umi doodhino doorsha ayirrinseemmota leellisha dandiineemmohu hiittoonniiti?

¹⁸ Maatete umi minisi manni hiitte songo haˈriro woyyannoro mura hasiissannosi. Isi hatto assanno woyite minisi mannira woyyannori maatiro balaxe heda hasiissannosi. (Galatiyu Sokka 6:5 nabbawi.) Maatete umi doodhinore ayirrisa hasiissannonke. Isi doodhino doorshi baxiha ikkirono maatesi songonke dagganno woyite anga fanne haaˈranna baxille leellisha hasiissannonke.—Rom. 15:7.

19. Maatete umi huuccatto assiˈre maa heda hasiissannosi?

 ¹⁹ Wole maate kayinni afoo dadhitino qaalinni massanganni songora soqqantanno; oosonsa kayi anninsanna amansa coyidhanno qaale mooshshite coyiˈra hooggara dandiitanno. Hatti songo noohu hatte gobba qaale coyiˈnanni qooxeessira ikkiro, oosonsa gambooshshunniwa shiqanno roso huwata hooggaranna ayyaanaamittetenni lopha hooggara dandiitanno. Mayira? Korkaatuno ooso rosu mine rossannohu anninsanna amansa afiinni ikkikkinni hatte gobbara coyiˈnannihu wolu afiinniiti. Maatete umi huuccatto assiˈre oososi Yihowawanna mannisiwa roore shiqqanno gede kaaˈlate maa assannoro heda hasiissannosi. Annunna ama insa coyidhanno afoo oosonsara seekkite rosiisa woy oosonsa seekkite huwattanno afiinni massanganni songo haˈra dandiitanno. Maatete umi doodhinori ikkihano ikkiro, marino songo isonna maatesi ayirrisanna baxa hasiissannonsa.

20. Wole afoo rossanni noo roduuwa ayirrinseemmonsata leellisha dandiineemmohu hiittoonniiti?

²⁰ Aleenni ronsummonte gede batinye songuwara wole afoo rosate sharrantanno roduuwi no. Insara giddonsata fushshite coyiˈra qarra ikkitansara dandiitanno. Kuri roduuwi songo massanganni afoo mooshshite coyiˈra hooggurono, Yihowa baxxannotanna isira soqqamate noonsa hasatto heda hasiissannonke. Insata dancha akatta illachinsheemmoha ikkiro, lowo geya banxeemmonsa hattono ayirrinseemmonsa. Ninke coyiˈneemmo qaale mooshshite coyiˈra dandiitannokki daafira calla “Ani ate dihasiˈreemmo” diyineemmonsa.

21-22. Ninke baalunkura songote giddo mayi qoosso noonke?

²¹ Yihowa songosi giddo dhagge ikkanno qeecha uyinonke daafira galanteemmosi. Labbaahuno meyatino, adhantinorino adhantinokkirino, ajuno akkaluno, wole afoo seekkine coyiˈneemmorino coyiˈneemmokkirino ninke baalunku Yihowaranna mimmitinkera muxxete.—Rom. 12:4, 5; Qol. 3:10, 11.

²² Phaawuloosi mannu bisi daafira coyiˈrino lawishshinni ronsoommoha lowo roso harunsa agurroonke. Konni garinni songote giddo noonkeha ninkehanna wolootu qeecha albinni roore naandeemmota leellinsheemmo.