1. Hiittenne hagiirsiissanno qoosso afiꞌnoommo?

 YIHOWA songo miilla ikka ninkera lowo ayirrinyeeti! Keere baxannohu hagiirraamu manni woꞌminote ayyaanaamittete gannatera heeꞌnoommo. Songote giddo ate qeechi maatiyya?

2. Soqqamaasinchu Phaawuloosi qullaawu ayyaaninni borreessinote addi addi sokkasira hiikkonne lawishsha horoonsiꞌrino?

² Soqqamaasinchu Phaawuloosi addi addi sokkasira kulino lawishshinni Yihowa songo giddo noonke qeechi daafira lowore ronseemmo. Phaawuloosi kuri sokkasi giddo Kiristaanu songo manninatu gede ikkitinota coyiꞌrino. Isi mittu mittunku songote miili bisu kifile gede ikkinota coyiꞌrino.—Rom. 12:4-8; 1 Qor. 12:12-27; Efe. 4:16.

3. Konni birxichira hiikkonne sase roso ronseemmo?

³ Mitti mittinke Yihowa songo giddo waagu noonkereeti. Baalinke songo jawaachisha dandiineemmo. Sirchinke, gaꞌrenke, jajjinke, budinke woy rosinke deerri ikkihano ikkiro ninke baalunku songote giddo muxxete. Konni birxichira Phaawuloosi coyiꞌrino lawishshinni lowo geya hasiisannoha sase roso ronseemmo. Umihunni, ninke mitti mittinke Yihowa songo giddo waagu noonkere ikkinoommota xiinxallineemmo. Layinkihunni, songote giddo waagu noonketa ammana qarrissunkero maa assa dandiineemmoro ronseemmo. Sayikkihunni, Yihowa songo giddo noonke looso diinaggaambe loosa hasiissannonkehu mayiraatiro laꞌneemmo.

4. Roomu Sokka 12:4, 5 tenni maa ronseemmo?

⁴ Umihunni Phaawuloosi coyiꞌrino lawishshinni mitti mittinke Yihowa songo giddo waagu noonkere ikkinoommota ronseemmo. Phaawuloosi togo yiino: “Mitte mannimmara duuchu bisi no. Mittu mittunku bisi addi addi looso afiꞌrino. Ninkeno haammante heeꞌnenni, Kiristoosinni mitto bisooti. Mitte mannimma aana heeꞌnoommo daafira, mitti mittinke kuꞌu koꞌonni bisooti.” (Rom. 12:4, 5) Phaawuloosi hatto yaasi mayyaate? Mitti mittinkera songote giddo addi addi loosi noonkeha ikkirono, baalunku waagu noonkereeti.

5. Yihowa songote maa uyino?

⁵ Songote giddo qeechu noonsari albisoota ikkite soqqantanno roduuwaatilla yite hedattoha ikkara dandaanno. (1 Tes. 5:12; Ibi. 13:17) Hige Yihowa Kiristoosi widoonni labballo songote “elto” asse uyinota anfoommo. (Efe. 4:8) Aliidi Bisi, Aliidi Biso kaaꞌlitara shoommoonni roduuwi, Sinu Biiro Komite miilla, woradu aliidi laꞌꞌanno, tiokiraasete rosi mini rosiisaano, songote cimeeyyenna songote soqqamaano elto ikkitino labballooti. Kuri roduuwi Yihowaha muxxe geꞌreewo allaaltaranna songo towaattara qullaawu ayyaaninni shoomantinoreeti.—1 Phe. 5:2, 3.

6. Umi Teselonqe 2:6-8 kultanno garinni qullaawu ayyaaninni shoomantino roduuwi maa assate sharrantanno?

⁶ Qullaawu ayyaaninni shoomantino roduuwi songote giddo addi addi looso loossanno. Lekkanna anga hattono wole bisu kifilla, mannimma woꞌmate irko ikkitannonte gede, qullaawu ayyaaninni shoomantino roduuwino songo woꞌma kaaꞌlannore diinaggaabbe loossanno. Insa mannu jajansara dihasidhanno. Roduuwansa kiatenna jawaachishate sharrantanno. (1 Teselonqe 2:6-8 nabbawi.) Uminsara roorsidhannokkire ikkadda labballo uyinonke daafira Yihowara galatu iillosi!

7. Woꞌma yanna soqqantanno roduuwi mayi atoote afidhanno?

⁷ Songote giddo mitu roduuwi misiyoone, baxxitino suwisaano woy woꞌma yanna suwisaano ikkite shoomantara dandiitanno. Alamete doyichora heedhannori batinyu roduuwi woꞌma yannansa sabbakatenna manna rosaano assate horoonsidhanno. Insa batinyu manni Yesuusi Kiristoosi rosaano ikkanno gede kaaꞌlitino. Kuri woꞌma yanna soqqantanno roduuwi giddo mitoho garihu maalaamittete coyi noonsakkiha ikkirono, Yihowa maassiꞌranni noonsa. (Maq. 10:29, 30) Kuri muxxe roduuwanke lowo geya banxeemmonsa; songote miilla ikkitinohurano tashshi yiinonke!

8. Mittu mittunku halashshaanchi Yihowa albaanni muxxete yineemmohu mayiraati?

⁸ Songote giddo qeechu noonsari shoomantino woy woꞌma yanna soqqantanno roduuwa calla ikkitinoni? Diꞌꞌikkitino. Mittu mittunku halashshaanchi Maganu albaannino ikko songote giddo muxxete. (Rom. 10:15; 1 Qor. 3:6-9) Isinni songonnihu qaru loosi manna mootichinke Yesuusi Kiristoosi rosaano assate. (Mat. 28:19, 20; 1 Xim. 2:4) Cuuantinorino cuuantinokki halashshaanono konne looso balaxisiisate sharrantanno.—Mat. 24:14.

9. Meya roduuwanke ayirrinseemmohu mayiraati?

⁹ Yihowa songote giddo meya roduuwira kaajja qeecha uyinonsa. Isi ammaname soqqamannosi minaamuwa, amuuwa, gunnootanna mine assiꞌrinokki roduuwa lowo geya baxannonsa. Qullaawu Maxaafira  dancha lawishsha ikkannohanna Magano hagiirsiisinoha batinye meento kulloonni. Insa hayyoota, ammana noonsare, chaachaara, worbuulle, shaqqaddanna dancha looso loosannore ikkino daafira galantoonninsa. (Luq. 8:2, 3; Soq. 16:14, 15; Rom. 16:3, 6; Fil. 4:3; Ibi. 11:11, 31, 35) Xaa yannarano Yihowa songote giddo togooti kaajja akatta noonsare meya roduuwa uyinonke daafira galaxxineemmosi!

10. Jajjabba roduuwanke lubbora banxeemmonsahu mayiraati?

¹⁰ Songote giddo jajjabbu roduuwi noonke daafirano tashshi yaannonke. Mite songuwara heeshshonsa diro woꞌma Yihowara ammanamme soqqaminohu jajjabbu roduuwi no. Mitu jajjabu roduuwi kayi halaale macciishshitinohu muli yannara ikkara dandaanno. Halaalu mine keeshshitino diri ikki geeshshihano ikkiro insa jajjabbooꞌmitino daafira dhibbu waadannonsa. Konni dhibbinni kainohunni albi geeshsha soqqama hoogginoha ikkara dandaanno. Kayinnilla kuri jajjabbu roduuwi sabbakate, woloota qajeelsatenna jawaachishate dhukinsa assi geeshsha sharrantanno! Insa heeshshonnino lowore ronseemmo. Yihowano ninkeno insa lowo geya banxeemmonsa.—Law. 16:31.

11-12. Songokkira noo wedelli jawaachishinohehu hiittoonniiti?

¹¹ Hanni songote giddo noo wedellano hendo. Sheexaanu gashshinonna isi kaphi batiꞌrino alamera lophitanni noo daafira addi addi qarri iillannonsa. (1 Yoh. 5:19) Ikkollana, kuri wedellu roduuwi gambooshshunniwa dawaro qoltanna, soqqansho fultanna hattono worbimmatenni ammanansara gaarantanna laꞌneemmo woyite jawaanteemmo. Ee, wedella kiꞌnera Yihowa songo giddo waagu nooꞌne!—Far. 8:2.

¹² Mitu roduuwi kayi songote giddo waagu noonsata huluullantanno. Mitti mittinkera songote giddo qeechu noonketa huwatate mayi kaaꞌlannonkeyya? Kawiinni aanchine tenne daafira ronseemmo.

13-14. Mitootu songote giddo waagu dinoe yite heddanno gede assannonsari maati?

¹³ Hanni xa Phaawuloosi coyiꞌrino lawishshinni ronseemmoha layinki roso laꞌno. Isi xaa yannara batinyu mannira qarra ikkannonsa coye qummi assino; lowo Kiristaani songote giddo kaajju qeechi noonsata huluullamanno. Phaawuloosi togo yee borreessino: “Lekka, ‘Ani anga ikka hoogoommahura, manninatu biso diꞌꞌikkoomma’ yituro, biso ikkase gattannoni? Maccano, ‘Ani ille ikka hoogoommahura, manninatu biso diꞌꞌikkoomma’ yituro, biso ikkase gattannoni?” (1 Qor. 12:15, 16) Phaawuloosi hatto yiinohu mayyaateeti?

¹⁴ Ateneeto wolootu ledo heewisiisattoha ikkiro, songote giddo waagu dinoe yite hedattora dandaatto. Mitu roduuwira rosiisate, qineessate woy roduuwa towaatate baxxitino dandoo noonsaha ikkara dandaanno. Ati ‘anera insate geeshshi dandoo dinoe’ yite hedattoha ikkara dandaanno. Tini umokki heeshshi assattohanna dhukakki afoottoha ikkoottota leellishshanno. (Fil. 2:3) Kayi qoropha hasiissannohe. Duucha woyite ateneeto lowo dandoo noonsari ledo heewisiisattoha ikkiro ditidhoommoho yite hedattora dandaatto. Qoleno songote giddo waagu dinoe yite hedattora dandaatto. Tenne hedo hooꞌlatto gede mayi kaaꞌlannoheyya?

15. Umi Qorontoosi 12:4-11 kultanno garinni dandoonke daafira maa huwata hasiissannonke?

¹⁵ Hanni tenne hendo: Yihowa umi xibbi diro mitu Kiristaanira maalale loossanno gede qullaawu ayyaani elto uyinonsa; kayinnilla baalunku Kiristaani mittu gari elto diadhino. (1 Qorontoosi 12:4-11 nabbawi.) Yihowa addi addi eltonna dandoo uyinonsaha ikkirono, mittu mittunku Kiristaanchi waaga afiꞌrinoho. Xaa yannara Yihowa ninkera maalale loosate elto diuyinonke. Xaano ikkiro addi addi dandoo heedhunkerono ninke baalunku Yihowa albaanni muxxete.

16. Soqqamaasinchu Phaawuloosi mayyee amaalinonke?

 ¹⁶ Ninkeneeto wolootu ledo taashsha agurre soqqamaasinchu Phaawuloosi qullaawu ayyaaninni amaalino amaale macciishsha hasiissannonke; isi togo yiino: “Mittu mittunku umisi looso fonqole lao! Assino coyi dancha ikkiro, isonoo wolu manni ledo taashsha agure, umisi kuꞌlannore afiꞌranno.”—Gal. 6:4.

17. Phaawuloosi amaale macciishshinummoro mayi horo afiꞌneemmo?

¹⁷ Phaawuloosi amaale macciishshine uminke looso fonqolle laꞌneemmoha ikkiro, ninkerano baxxitino dandoo noonketa wodanchineemmo. Lawishshaho mittu songote cimeessira madirakete fule dancha gede rosiisate dandoo noosikkiha ikkara dandaanno; kayinnilla manna rosaano assate worba ikkara dandaanno. Woy isi songosi giddo noote wole cimeeyye geeshsha mito coye qineessate dandoo noosikkiha ikkara dandaanno; kayinnilla shaqqadonna baxillaancho ikkino daafira roduuwu ruxxi yitukkinni Qullaawu Maxaafi amaale xaꞌmidhannosiha ikkara dandaanno. (Ibi. 13:2, 16) Dandoo noonketa huwantummoro, songo kaaꞌlinanni heeꞌnoommota anfeemmo daafira hagiidhineemmo. Hattono ninketenni baxxitino dandoo noonsa roduuwa dihinaanseemmo.

18. Dandoonke woyyeessiꞌrate maa assa dandiineemmo?

¹⁸ Songote giddo noonke qeechi ikkihano ikkiro, baalunku soqqanshote dandoonke woyyeessiꞌra hasiissannonke. Dandoonke woyyeessiꞌneemmo gede Yihowa dirijjitesi widoonni seekke qajeelsanni noonke. Lawishshaho, Kiristaanu Heeshshonna Soqqansho Gambooshshiwa soqqanshonkenni dancha guma afiꞌra dandiineemmo gara qajeelleemmo. Konni gambooshshiwa afiꞌrootto qajeelsha seekkite horoonsidhanni nootto?

19. Maganu Mangiste Sawaakooti Rosi Mine eꞌe rosate ikkado ikkate mayi kaaꞌlannohe?

¹⁹ Maganu Mangiste Sawaakooti Rosi Mineno dancha gede qajeelsinanni. Konni rosi mine eꞌe rosa dandiitannori dirinsa 23nni kayise 65 geeshsha ikkannonsari woꞌma yanna soqqamaanooti. Konni rosi mine eꞌꞌe horo rosa didandeemmo yite hedattoha ikkara dandaanno. Konni rosi mine eꞌe rosattokki gede assannohere heda agurte eatto gede assannohere hedi. Maganu Mangiste Sawaakooti Rosi Mine eꞌe rosate ikkado ikkatto gede kaaꞌlitannohe mixo fushshiri. Yihowa kaaꞌlonninna atino jawaatte loosittoro didandeemmo yootto coye assa dandaatto.

20. Roomu Sokka 12:6-8te noo hedonni maa ronseemmo?

²⁰ Phaawuloosi coyiꞌrino lawishshinni ronseemmohu sayikki rosi Roomu Sokka 12:6-8 nooho. (Qummeeshsha nabbawi.) Phaawuloosi konni qummeeshshirano songote giddo noorira baalaho addi addi dandoo noonsata coyiꞌrino. Konni qummeeshshira kayinni dandoonke ikkitutano ikkituro, dandoonke horoonsiꞌne songo jawaachisha hasiissannonketa luphi asse xawisino.

21-22. Roobertinna Filiche lawishshinni maa rosa dandiineemmo?

²¹ Hanni Rooberti b yinanni rodii lawishsha laꞌno. Isi wole gobbara soqqamihu gedensaanni gobbasira noo Beeteelera soqqamanno gede kulloonnisi. Wole soqqanshote qoosso uyinoonnisihu alba uyinoonnisi looso garunni loosa hoogino daafira ikkinokkita kulloonnisi; isi kayinni togo yiino: “Uyinoonnie  looso garunni diloosoommo yaanni lowo agana yaadoommo. Beeteelete soqqansho agurate hedoommo woyiti nafa no.” Isi wirro hagiirraamo ikkanno gede kaaꞌlinosiri maatiyya? Mittu cimeessi Yihowa konni albaanni looso oye qajeelsinonkehu xa uyinonke looso seekkine loonseemmo gede kaaꞌlate ikkinota qaagiissinosi. Rooberti albita hedanni yaada agure xa maa assa dandaannoro heda hasiissannosita huwatino.

²² Roduu Filiche Eppisikoppo yinanni rodiirano hattoori tuncu yiinosi. Isinna minaamasi 1956 Giiliyaadi rosi mine maassantuhu gedensaanni Boliiviyaho woradu looso loossino. Hakkiinni 1964 ooso ilino. Filiche togo yitino: “Tenne baxeemmo soqqansho agurummoti baasa dadilloommo. Yihowa kaaꞌlonni kayi laoꞌya biddi assiꞌre ooso lossiꞌrate qoossoꞌya illachisha hanafoommo.” Atera Roobetira woy Filichera iillino gedeeri iillinohe? Alba noohe qoosso xa noohekki daafira hexxo mudhootto? Hatto ikkiro, laokki biddi assidhe xaa yannara Yihowanna roduuwakki soqqamate maa assa dandaattoro hedittoro hagiirraamo ikkatto. Dandookki woloota kaaꞌlate horoonsiꞌri; hatto assittoro songo kiꞌanni nootto daafira hagiidhatto.

23. Maa assate sharrama hasiissannonke? Aananno birxichira maa ronseemmo?

²³ Ninke baalunku Yihowa albaanni waagu noonkereeti. Isi maatesi miilla ikkinammora hasiꞌranno. Roduuwanke kaaꞌlate maa assa dandiineemmoro hiincineemmohanna insa kaaꞌlate sharrammeemmoha ikkiro songote giddo waagu dinoe yine dihendeemmo! Songote giddo nooha wole roduuwa ma garinni laꞌꞌa hasiissannonkeyya? Insa banxeemmotanna ayirrinseemmota leellisha dandiineemmohu hiittoonniiti? Aananno birxichira kuri xaꞌmuwara dawaro afiꞌneemmo.