1-2. Konni birxichira maa ronseemmo?

JAALIKKI mitto lowo geeshsha hasiisinohe uduunnicho abbeemmohe yeenna agadhite nootto yine hendo. Kayinni isi agadhootto saatera abbe iillisha hoogihero hiitto ikkatto? Caaccaawatto? Lawishsha 13:12, “Woˈmitukkinni keeshshitanno hexxo wodana daafursitanno” yitanno. Aterano hatto macciishshamahera dandaanno. Kayinni jaalikki agadhootto saatera dayinokkihu mulla kae ikkinokkitalla afitto? Hattee afittoro, cincite agadha qarrisa hooggahera dandiitanno.

² Konni birxichira, cincine ‘agadhineemmo’ gede kaaˈlannonkeha mito Qullaawu Maxaafiha xintu seera ronseemmo. (Mik. 7:7) Hakkiinni, cincine Yihowa agadha hasiissannonkeha lame coye laˈneemmo. Jeefoteno, cincite Yihowa agadhitannori afidhanno atoote laˈneemmo.

3. Lawishsha 13:11te noohu xintu seerinni maa ronseemmo?

³ Lawishsha 13:11 cinca hasiissannonkehu mayiraatiro kulannoha xintu seera amaddino. Togo yitanno: “Saamme gamba assinanni jiro mulenni baˈanno; suutu suutunni gamba assinanniti kayinni lexxitanni hadhanno.” Konni qummeeshshira nooha xintu seera wodanchootto? Hayyichu manchi mitto looso cince suutunni loosanno; hakko daafira, dancha guma afiˈranno.

4. Lawishsha 4:18te noohu xintu seerinni maa huwanteemmo?

⁴ Lawishsha 4:18, “Keeraanote doogo, soodo arrishsho gedeete; barri taalooti geeshsha lexxitanni hadhanno” yitanno.  Kuni qummeeshshi, Yihowa mannisira hedosi kulannohu suutu suutunni ikkinota leellishanno. Ikkollana, kuni qummeeshshi mittu Kiristaanchi ayyaanaamittetenni lophannohu hiittoonniitiro huwatateno kaaˈlannonke. Ayyaanaamittete lopho mudda didandiinanni. Ayyaanaamittetenni lophate yanna hasiissanno. Maganu Qaale seekkine xiinxallineemmohanna Yihowa Qaalisinna dirijjitesi widoonni aannonke amaale harunsineemmoha ikkiro, sunu sununni Kiristoosite gede akatta lossiˈra dandiineemmo. Qoleno Magano albinni roore anfeemmo. Hanni Yesuusi tenne hedo lawishshunni rosiisino gara laˈno.

5. Yesuusi ayyaanaamittete lophora yanna hasiissannota lawishshunni rosiisinohu hiittoonniiti?

⁵ Yesuusi dudumbeemmoti Maganu Mangiste sokka, suwashshu wodani noonsa manni giddo sunu sununni lophannohu shiimu wixi gede ikkitinota leellishanno lawishsha coyiˈrino. Togo yiino: “[Manchu] wixino wixi hiitto ikkiro afikkinni muˈre lophanno. Baatto umisenni sunu sununni guma laaltanno; umo muˈra, tenne agashsho, hakkiinni agashshote aana iillino guma uyitanno.” (Maq. 4:27, 28, NW) Yesuusi rosiisara hasiˈrinori maati? Isi hatto yiinohu, muˈru sunu sununni lophannonte gede Maganu Mangiste sokka macciishshe adhino manchino ayyaanaamittetenni lophannohu sunu sununni ikkinota rosiisateeti. Lawishshaho, Qullaawa Maxaafa xiinxallinseemmo manchi Yihowawa shiqanni haˈri kiiro, heeshshosi giddo lowore biddi assiˈrinota laˈneemmo. (Efe. 4:22-24) Ikkirono hakku shiimu wixi lophanno gede assannohu Yihowa ikkinota dea dihasiissannonke.—1 Qor. 3:7.

6-7. Yihowa baatto kalaqino doogonni maa ronseemmo?

⁶ Yihowa aye loosono loosanno woyite, loososi gudate hasiissanno yanna ikkitu geeshshitano ikkituro dimuddamanno. Isi hatto assannohu suˈmisi ayirranno gedeetinna wolootano kaaˈlateeti. Lawishshaho, hanni Yihowa baatto mannu oosora dirimu dirimunni qixxeessino gara laˈno.

 ⁷ Qullaawu Maxaafi Yihowa baatto kalaqino gara kulanni, “ise aana bikkinanni siiwo” ganinota, ‘safo tuuqinota’ hattono “dhaawate kincho” kaasinota kulanno. (Iyo. 38:5, 6) Isinni Yihowa kalaqinore haja asse laino. (Kal. 1:10, 12) Sokkaasine Yihowa haaro coye kalaqanna laˈu kiiro hiitto ikkitinoha lawannohe? Insa lowo geeshsha dhagge assidhinoti dihuluullissannote! Mitte higge isinni insa hagiidhite “ilillissino.” (Iyo. 38:7) Tennenni maa ronseemmo? Yihowa baatto, beeddahenna heeshshote kalaqama baala kalaqe gudinohu lowo kumi diri giddooti; ikkirono, Yihowa kalaqinoha mitto mittonka coye hixamanye lai woyite, “lowo geeshsha dancha” ikkinota coyiˈrino.—Kal. 1:31.

8. Aanchine maa ronseemmo?

⁸ Kageeshsha laˈnummo lawishshuwa leellishshannonte gede, Qullaawu Maxaafi giddo cinca hasiissannonketa kulannoha batinye xintu seera afiˈra dandiineemmo. Xa kayinni cincine Yihowa agadha hasiissannonkeha lame coye laˈneemmo.

9. Yihowa cincine agadha hasiissannonkehu mittu coyi maati?

⁹ Yihowa huuccattonkera dawaro qola geeshsha cincine agadha hasiissannonke. Qarranke dandee saˈˈate woy laanfenke qeeˈlate jawaante aankera Yihowa huucciˈnummohu gedensaanni, Yihowa huuccattonkera dawaro qola keeshshinoha lawankera dandaanno. Ikkina Yihowa huuccattonke baalantera bayichonko dawaro qolannokkihu mayiraati?

10. Yihowa huuccattonkera dawaro qola geeshsha cinca hasiissannonkehu mayiraati?

¹⁰ Yihowa huuccattonke macca wore macciishshanno. (Far. 65:2) Isi giddonkenni huucciˈneemmo huuccatto, ammana noonketa leellishshanno taje gede asse laˈˈanno. (Ibi. 11:6) Qoleno Yihowa huuccattonke ledo sumuu yaannore assatenna fajjosi wonshate mageeshshi hasatto noonkero laˈˈa hasiˈranno. (1 Yoh. 3:22) Konni daafira, busha gade woy laanfenke qeeˈlate kaaˈlannonke gede Yihowa huucciˈneemmo woyite, cincineemmore ikkanna huuccattonke ledo sumuu yaannore assa hasiissannonke. Yesuusi mite huuccattora dawaro bayichonko afiˈra hoongammora dandiineemmota qummi assino. Isi togo yiino: “Agurtinikki huuccidhe, uyinanniˈnena; agurtinikki hasidhe, afidhinannina; agurtinikki waalcho ganganne, fannanniˈnena; huucciˈrannohura baalaho uyinanni; hasiˈrannohu baalu afiˈranno; waalcho ganganannohura baalaho fannannisi.” (Mat. 7:7, 8, NW) Tenne amaale harunsine ‘jaante huucciˈneemmoha’ ikkiro, iimi Anninke huuccattonke macciishshe dawaro qolannonketa addaxxa dandiineemmo.—Qol. 4:2.

11. Yihowa huuccattonkera dawaro qola keeshshinoha lawinkero, Ibiraawoota 4:16 kaaˈlitannonkehu hiittoonniiti?

¹¹ Yihowa huuccattonkera dawaro qolikki keeshshinoha lawinkero nafa, isi “hasiissanno yannara” dawaro qolankera qaale eino. (Ibiraawoota 4:16 nabbawi.) Hakko daafira, mittu coyi ninke hendoommo yannara ikka hoogiro, horonta Yihowa busha assa dihasiissannonke. Lawishshaho, batinyu manni Maganu Mangiste tenne busha alame huntanno gede lowo diro huucciˈranni keeshshino. Yesuusino hatto yine huucciˈneemmo gede rosiisino. (Mat. 6:10) Kayinni mittu manchi goofimarchu mannu hedino yannara daa hoogino daafira hexxo mudhe ammanasi shoshshoggitara wodhiro, hatti lowo gowwimmaati! (Imb. 2:3; Mat. 24:44) Yihowa cincine agadhanna ammanatenni iso huucciˈra hayyote. Yihowa goofimarchu daanno ‘barranna saate’  mure kaino daafira, goofimarchu yannasira daanno. Hatti Yihowa murino yanna baalunkura dancha ikkitanno.—Mat. 24:36; 2 Phe. 3:15.

12. Cinca roore qarra ikkitannonkehu hiittoo woyite ikkara dandaanno?

¹² Mannu miicannonke woyite taashsho afiˈnammo geeshsha cincine agadha hasiissannonke. Tenne alamera duucha woyite manna sirchinsanni, labbaaha woy meyata ikkansanni, gaˈrensanni, woy budinsanni kainohunni miincanninsa. Woloota kayinni bisu xeˈne noonsahura woy surrete fayyimma hoogginohura beebba assiˈnanninsa. Batinye Yihowa Farciˈraasine Qullaawu Maxaafi aana xintantino ammanansanni kainohunni miincanninsa. Mannu miicannonke woy qohannonke woyite, Yesuusi coyiˈrinore qaaga hasiissannonke. Isi togo yiino: “Goofimarchu geeshsha cince kaajjannohu kayinni gatanno.” (Mat. 24:13) Kayinni mittu songote giddo noo manchi jawa cubbo loosinotalla afitto? Songote cimeeyye tenne affuhu gedensaanni, insa tenne hajo Yihowa biddishshi garinni tirtanno yite addaxxite cincatto? Insa togoo coye tirate maa assitanno?

13. Songote giddo mittu manchi jawa cubbo loosiro, Yihowa cimeeyye maa assitara hasiˈranno?

¹³ Cimeeyye songote giddo jawa cubbo loonsoonnita affuro, hakkonne coye Yihowa ma garinni laˈˈannoro huwata dandiitanno gede, “gordu egenno” afiˈrate huuccatto assidhanno. (Yai. 3:17) Mixonsa dandaamannoha ikkiro cubbo loosino manchi “soˈrote doogonni” higanno gede kaaˈlate. (Yai. 5:19, 20) Qoleno songo agaratenna loonsoonni cubbinni xissiisidhinore sheshifachishate dandiiture baala assa hasidhanno. (2 Qor. 1:3, 4) Cimeeyye mittu manchi jawa cubbo looseenna coye laˈanno woyite, balaxxe coye seekkite buuxa hasiissannonsa; tennera hige yanna hasiissanno. Hakkiinni insa huuccatto assidhe, cubbo loosinoha Maganu Qaalinni amaaltanno, hattono “halaalunni” woy bikkunni seejjitanno. (Erm. 30:11) Cimeeyye quwa saˈe keeshshitannokkiha ikkirono, yoo yaate kayinni dimuddantanno. Insa coye Yihowa biddishshi garinni amaddannoha ikkiro, songo woˈma horo afidhanno. Ikkollana, cimeeyye coye garunni amadduro nafa, loonsoonni cubbi gawajjisi manchi xissiisiˈrara dandaanno. Atino konni garinni xissiisiˈroottoha ikkiro, shesho afiˈrate maa assa dandaatto?

14. Ammanate rodiikki lowo geeshsha miicinoheha ikkiro, cincatto gede kaaˈlahera dandaannohu Qullaawu Maxaafi lawishshi hiikkonneeti?

 ¹⁴ Mittu manchi woy ammanate rodiikki lowo geeshsha miice egenninohe? Yihowa coye taashsha geeshsha cincite agadhatto gede kaaˈlannoheha dancha lawishsha Maganu Qaali giddo afiˈra dandaatto. Lawishshaho, Yooseefi roduuwisi baasa gawajjitinosiha ikkirono, insa cubbi iso hanqaaleessa mancho ikkanno gede diassinosi. Hatteentenni isi Yihowara soqqamate dandiire baala assino; Yihowano iso cince kaajjino daafira lowo geeshsha maassiˈrinosi. (Kal. 39:21) Gedensoonni Yooseefi roduuwisira gatona yee saˈˈa dandiino; Yihowa maassiˈrinositano laino. (Kal. 45:5) Yooseefi gede ninkeno, Yihowawa shinqeemmoha ikkironna coyenke isi taashshara agurreemmoha ikkiro, shesho afiˈneemmo.—Far. 7:17; 73:28.

15. Mitte rodoo miincise woyite cincite saˈanno gedenna keere afidhanno gede kaaˈlinoseri maati?

¹⁵ Hige mannu ninke Yooseefi roduuwisi miiccu geeshsha miica hoogankera dandaanno; ikkirono, gara ikkinokkire assininkero xissiisiˈranke digattanno. Miicinonke manchi Yihowa magansiˈrannoha ikkirono ikka hoogirono, Qullaawu Maxaafiha xintu seera harunsanke kaaˈlitannonke. (Fil. 2:3, 4) Hanni mitto woˈnaalsha laˈno. Mitte rodoo, ledose loossanno mancho ise daafira badheenni bushare coyidhinota macciishshite lowo geeshsha xissiisidhino. Tini rodoo muddante hanqa agurte, yanna gaaˈmite Yesuusi lawishsha hiincitino. Yesuusi xonnisi woyite qole dixonino. (1 Phe. 2:21, 23) Rodoo tenne hedduti, coye facci assite agurtu. Gedensoonni tini rodoo, hatti ledose loossanno mancho buutote dhibbi amadeennase qarrante keeshshitinota huwattu. Hakko daafira rodoonke, tini mancho hatto yitinohu ane xissiisate yite diˈˈikkino yite heddu. Konnira tini rodoo gara ikkinokkire assinannase cincite saˈino daafira hagiidhitino; hattono giddiidi keere afidhino.

16. Mannu miicannahe cincite noottoha ikkiro, sheshifachishahera dandaannori maati? (1 Pheexiroosi 3:12)

¹⁶ Mannu miicannahe cincite noottoha woy wolu coyinni xissiisidhanni noottoha ikkiro, Yihowa “dadillunni hiiqqantinorira” mule noota deˈooti. (Far. 34:18) Cincakkiranna duhakki isi aana tuqqatto daafira, Yihowa  baxannohe. (Far. 55:22) Isi uulla woˈmate Daanyaati. Isira goˈlinori mitturino dino. (1 Pheexiroosi 3:12 nabbawi.) Tira dandaattokki qarri giddo noottoha ikkiro, cincite Yihowa agadhatto?

17. Isayaasi 30:18 kultanno garinni, Yihowa maa aankera qaale eino?

¹⁷ Muli yannara iimi Anninke Mangistesi widoonni falahino atoote duushshannonke. Isayaasi 30:18 togo yitanno: “Kaaliiqi maaraˈnera qixxaawe no. Kaaliiqi taashshanno Magano ikkino daafira, mararinoˈne; kunnira Kaaliiqa hexxitannori baˈraadhinoreeti.” Yihowa cincite agadhitannori xaano ikko dagganno alamera afidhanno atooti baete.

18. Albillitte hiittoo atoote afiˈneemmo?

¹⁸ Maganu manni haaro alame eanno woyite, xa yaachishanni noonsa qarrinna shetto baala higgeno diheedhanno. Miiconna xisso baˈanno. (Aju. 21:4) Hasiisannonkeri baaluri woˈmannonke daafira, mittu coyirano diyaandeemmo. (Far. 72:16; Isa. 54:13) Addanko kuni lowo atooteeti!

19. Yihowa xaa yannara sunu sununni maaho qixxeessanni noonke?

¹⁹ Hakka geeshsha kayinni, Yihowa busha gadenke qeeˈlineemmo gedenna iso hagiirsiissanno akatta lossiˈneemmo gede kaaˈle, gashshootisi giddo heeˈnammora qixxeessanni noonke. Konni daafira, horonta hexxo mudhitinoonte. Dancha yanna mulenni dagganno! Kaajja hexxo albankeenni noo daafira, Yihowa loososi jeefo gana geeshsha iso cincine agadha agurroonke!