1. Umi Teselonqe 5:11 kultanno garinni ninke baalunku loonseemmo loosi hiikkonneeti?

 GAMBOOSHSHU ADDARAASHEˈNE mintine woy gatamartine egentinoonni? Hatto ikkiro, mite yitine haaro Addaraashera gambooshshe assidhini yanna qaagginayiti dihuluullissannote. Yihowa lowo geeshsha galattinoonni. Isinni hagiirru batinyinni hanafote faarso faarsa nafa hoogginoonniha ikkara dandaanno. Dancha gede assine minnoonniti Gambooshshu Addaraashuwa Yihowa ayirranno gede assitanno. Ikkollana wolu gariha minate looso loonseemmo woyite isi roore ayirranno gede assineemmo. Kuni loosi mine minate loosinni roore hasiisannoho. Kuni loosi Magano magansiˈrate konni minira daanno manna jawaachishate. Soqqamaasinchu Phaawuloosi 1 Teselonqe 5:11 noota cuˈmote qummeeshshira noo hedo borreessinohu, Giriikete Afiihu “jawaachisha” yaanno qaali “mina” yitanno tirono afiˈrino daafira, Kiristaanu “minate loosira” kaaˈlamannota hedeeti.—Qummeeshsha nabbawi.

2. Konni birxichira maa ronseemmo?

² Soqqamaasinchu Phaawuloosi ammanate roduuwasi jawaachishe dancha lawishsha ikkinonke. Isira insa qarri leellannosi. Konni birxichira isi ammanate roduuwisi, (1) qarra dandiite saˈanno gede, (2) mimmitu ledo keere kalaqqanno gedenna (3) Yihowara noonsa ammana kaajjishidhanno gede kaaˈlinonsahu hiittoonniitiro laˈneemmo. Hanni xa ninkeno isi faale haˈra dandiineemmohu hiittoonniitironna xaa yannara ammanate roduuwanke dhaawa dandiineemmohu hiittoonniitiro laˈno.—1 Qor. 11:1.

3. Phaawuloosira soqqanshotenna loosoho hiittoo lao noosi?

³ Phaawuloosi ammanate roduuwasi lowo geeshsha baxanno. Isira lowo qarri iillinosi; hakko daafira ammanate roduuwisira qarru iillannonsa woyite mararannonsa hattono qarrinsa leellannosi. Mitte yannara Phaawuloosi woxe hoogino; hakko daafira  isiniitiranna jaallasira hasiisannore afiˈrate looso hasiˈra hasiissinosi. (Soq. 20:34) Isi dunkaana gowe hiranno. Isi Qorontoosi haˈri woyite, umo Aqiilanna Phirisqilla ledo dunkaana gowino. Ikkollana ‘Fooliishshote Barra baala’ Ayihudetenna Giriikete mannira sabbakanno. Silaasinna Ximootewoosi martu yannara, Phaawuloosi “farciˈranninna rosiisanni hosanno.” (Soq. 18:2-5) Phaawuloosi qaru coyi Yihowara soqqama ikkinota dideino. Isi diinaggaawe loose dancha lawishsha ikkino daafira ammanate roduuwasi jawaachisha dandiino. Isi ammanate roduuwisi iillannonsa qarrinna maatensara hasiisannore shiqishate sharramansa roore “woyyanno coye” yaano Yihowa magansiˈra lawashshi assitanno gede assitansara wodha hasiissannonsakkita qaagiissinonsa.—Fil. 1:10.

4. Phaawuloosinna Ximootewoosi ammanate roduuwinsa qarra dandiite saˈanno gede kaaˈlitinonsahu hiittoonniiti?

⁴ Teselonqe songo xintantuhunni shiima yanna gedensaanni, haarote Kiristaana ikkitinorira buutote qarri iillinonsa. Lowo geeshsha hanqino manni Phaawuloosinna Silaasi hoogiti, ‘mito roduuwa amade goshooshanni katamu gashshaanowa masse’ kuni manni “Roomu moote hajajo ajishshanno” yiino. (Soq. 17:6, 7) Kuri haarote Kiristaana ikkitinori katamu manni gawajjansara kainota affuti mageeshshi geeshsha massinoro heda dandiineemmo. Insa Yihowara diinaggaabbe soqqama nafa agurtara dandiitanno; Phaawuloosi kayinni togoori kalaqamara dihasiˈrino. Isinna Silaasi katamunni fulte haˈra hasiissinonsaha ikkirono, haarote xintantino songo hasiisannonsare afidhanno gede assitino. Phaawuloosi Teselonqe noo Kiristaana togo yee jawaachishinonsa: “Rodoonke Ximootewoosi sonkoommoˈne. Sonkoommoˈnehu ammanatenni jawaachishaˈneranna kaajjishaˈnera yineeti. Qoleno iillinoˈne qarrinni hembeelantinannikki gedeeti.” (1 Tes. 3:2, 3) Ximootewoosira ilamino katamira Lisxiraho lowo qarri iillisikki digatino. Isi Phaawuloosi hakko heeˈranno roduuwa jawaachishino gara afino. Ximootewoosi Yihowa Lisxiraho heeˈranno Kiristaana kaaˈlinonsata afino daafira, haarote Kiristaana ikkino roduuwasino kaaˈlannonsata kule jawaachishansara dandaanno.—Soq. 14:8, 19-22; Ibi. 12:2.

5. Biriyaanti yinanni rodoo mittu songote cimeessi kaaˈlinosihu hiittoonniiti?

⁵ Phaawuloosi ammanate roduuwasi jawaachishinoti wole doogo hiitteeti? Phaawuloosinna Barnabaasi, Lisxira, Iqooniyonna Antsookiya martuti ‘Beetekiristaannate [“songuwate,” NW] cimeeyye wortino.’ (Soq. 14:21-23) Kuri shoomantino labballi yannankera noo cimeeyye gede songuwate jawaantete buicho ikkitinoti dihuluullissannote. Biriyaanti yinanni rodii coyiˈrinore wodanche: “Ani tonaa ontu dirihu heeˈreenna anniˈya hune haˈrinonke; amaˈya kayi bohantino. Callatoommohu gede asse hedoommo; hattono hexxo mudhoommo.” Biriyaanti konne qarra dandee saˈˈanno gede kaaˈlinosiri maati? Isi togo yiino: “Tooni yinannihu mittu songote cimeessi gambooshshunniwanna wole yannara hasaawisinoe. Isi qarru amadinsarono hagiirraamma ikkino manni daafira kulinoe. Qoleno Faarso 27:10 nabbawinoe; hattono duucha hige Hiziqiyaasi daafira kulannoe; Hiziqiyaasi annisi dancha lawishsha ikkinosikkiha ikkirono Yihowara ammaname soqqamino.” Tini Biriyaanti kaaˈlitinosihu hiittoonniiti? Biriyaanti togo yiino: “Tooni jawaachishinoe daafira gedensoonni woˈma yanna soqqansho hanafe hagiirraamo ikkoommo.” Cimeeyye, Biriyaanti gede jawaachishanno qaale macciishsha hasiissannonsari nooronna teˈee seekkitine hedde.—Law. 12:25.

6. Phaawuloosi ammanate roduuwasi hunda heedhinori ammanantino soqqamaano xagge kule jawaachishinonsahu hiittoonniiti?

⁶ Phaawuloosi ammanate roduuwisira, Yihowa kaaˈleennansa qarra dandiite saˈinori ‘batiˈru gomichi gede ikkitino naqaashshe’  noota qaagiissinonsa. (Ibi. 12:1) Phaawuloosi baalunku gari qarra dandee saino manni xagge, ammanate roduuwisi worbuulle ikkitanno gedenna, “heeshshote Magani katama” illachisha agurtannokki gede kaaˈlitannonsata huwatino. (Ibi. 12:22) Yannankerano hattooti. Yihowa, Gedewooni, Baaraaqi, Daawiti, Saamueelinna wole batinye manna kaaˈlino gara nabbambeemmo woyite ninke baalunku jawaante afiˈneemmo. (Ibi. 11:32-35) Yannankerano ammanatenni dancha lawishsha ikkanno manni xagge no. Batinyu roduuwi yannankera noorita ammanantino soqqamaano xagge nabbawansa ammanansa kaajjishshinota kultannota borrote sokka duucha woyite qara biiro sokkanno.

7. Roomu Sokka 14:19-21 noote Phaawuloosi amaalino amaalenni maa ronseemmo?

⁷ Songote giddo keeru heeˈranno gede dandiinummore baala assine roduuwanke dhaawa dandiineemmo. Mereeronke babbadooshshe kalaqannore horo diassineemmo. Qoleno Qullaawu Maxaafiha xintu seera diiga hoongi geeshsha ani yoommoti calla ikkito diyineemmo. Hanni mitto lawishsha laˈno. Roomaho heedhanno songora Yihudunna Yihudu wido ikkinokki Kiristaani no. Muse Seeri shaaramihu gedensaanni Yihowa magansidhannori mite sagale intannita hoolanno seera agadha dihasiissannonsa. (Maq. 7:19) Hatte yannanni kayise mitu Yihudu Kiristaani duuchunku gari sagale ita dandiineemmo yee hedino. Wolu Yihudu Kiristaanira kayinni hatto assa gara dilabbinonsa. Hakko daafira songote mereero babbadooshshu kalaqami. Phaawuloosi keerunni heeˈra hasiissannota ikkitinota kulanni togo yiino: “Ledo ammanaasine gufisannoha ikkiro, maala ita woy woyinete xajje aga, woy wole coye assano agura woyyate.” (Roomu Sokka 14:19-21 nabbawi.) Konni garinni Phaawuloosi ammanate roduuwisi togoo heewo mitto mittonka mancho hattono songo woˈma gawajjitannota huwatanno gede kaaˈlinonsa. Qoleno isi woloota gufisiisannokki gede heeshshosi biddi assiˈrate maahoyye yiino. (1 Qor. 9:19-22) Ninkeno manni hajora eˈneemmokkiha ikkiro woloota dhaawanna mereeronke keeru heeˈranno gede assa dandiineemmo.

8. Phaawuloosi coyi kawa kaˈaanni higi woyite songote mereero keeru heeˈranno gede assinohu hiittoonniiti?

⁸ Phaawuloosi coyi kawa kaˈaa higanno woyite keere kalaqate dancha lawishsha ikkinonke. Lawishshaho umi xibbi diro heedhino songora noori mitootu haarote Kiristaana ikkinohu Yihudu wido ikkinokki manni barcima hasiissannonsa yitino; insa hatto yitinohu Yihudu wido ikkitinori mishshannonsakki gede yite ikkara dandaanno. (Gal. 6:12) Phaawuloosi tenne hedo dibaxino; ikkirono ane hedo calla garaho yaantenni tenne hajo daafira umosi heeshshi asse soqqamaasinenna Yerusaalamete heedhanno cimeeyye amaaˈlino. (Soq. 15:1, 2) Phaawuloosi kalaqamino qarra konni garinni tire kuri Kiristaani hagiirri baˈˈannokki gedenna songote mereero keeru heeˈranno gede kaaˈlino.—Soq. 15:30, 31.

9. Phaawuloosi lawishsha harunsa dandiineemmohu hiittoonniiti?

⁹ Shima ikkitinokki heewo kaˈanno woyite Yihowa songote biddishsha uyitara shoominore amaaˈline keeru heeˈranno gede assineemmo. Togoo woyite Qullaawu Maxaafi aana xintantino amaale borruwanke giddonni, woy wole Yihowa dirijjite qixxeessitino qixxaawonni afiˈra dandiineemmo. Ninke yinoommori calla ikko yaa agurre konne biddishsha harunsineemmoha ikkiro, songote giddo keeru heeˈranno gede kaaˈlineemmo.

10. Phaawuloosi songote giddo keeru heeˈranno gede wolere maa assino?

¹⁰ Phaawuloosi ammanate roduuwisiha gara ikkinokki akata ikkikkinni dancha akatansa luphi  asse keeru heeˈranno gede assino. Lawishshaho isi Roomaho heeˈranno Kiristaanira borreessino sokkara jeefote, batinyu manni suˈma qummi assino; hattono insa daafira dancha danchare kulino. Ninkeno ammanate roduuwinketa dancha akatta kulle Phaawuloosi lawishsha harunsa dandiineemmo. Togo assineemmo woyite, ammanate roduuwinke albinni roore mimmitunniwa gamba yitanno gede assinanni heeˈnoommo; tini qolte songote giddo baxillu heeˈranno gede assitanno.

11. Coyi kawa kaˈaanni higanno woyite keeru baˈˈannokki gede assa dandiineemmohu hiittoonniiti?

¹¹ Mito woyite ayyaanaamittetenni gikki yiino Kiristaani nafa mimmitu ledo sumuu yaa hoogara woy mereeronsa heewo kaˈara dandiitanno. Phaawuloosinna muli jaalisi Barnabaasi mereero togoori kalaqamino. Insa misiyoone ikkite hadhu woyite, mittu Marqoosi ledonke haˈro yaanna mittu dihaˈranno yaanna mereeronsa lowo heewo kaˈino. Hakko daafira lamunku mereero “lowo gibbo” kaˈeenna insa babbaxxitino. (Soq. 15:37-39) Ikkirono Phaawuloosi, Barnabaasinna Marqoosi songote keerinna mittimma baˈara hasidhannokki daafira mereeronsa kawa kaˈaa higino coye tirtino. Gedensoonni Phaawuloosi, Barnabaasinna Maarqoosi daafira danchare coyiˈrino. (1 Qor. 9:6; Qol. 4:10) Ninkeno songote giddo noo roduuwinke ledo kawa kaˈaanni higinonke coye heeˈriro hasaambe tiranna insata dancha akattansa illachisha hasiissannonke. Konni garinni keerunna mittimma heedhanno gede assineemmo.—Efe. 4:3.

12. Xaa yannara ammanate roduuwinkera iillannonsahu mitu qarri hiikkoyeti?

¹² Yihowara noonsa ammana kaajjitanno gede assine ammanate roduuwanke dhaawa dandiineemmo. Mito roduuwanke Yihowa Farciˈraasine ikkitinokkiri maatensa miilla, ledonsa rossannori woy ledonsa loossannori qacifattannonsa. Woloota buutote dhibbi waadannonsa woy xissiisidhanno gede assannonsari iillannonsa. Wolootaho qole cuuantunkunni lowo diro ikkinonsa; hattono insa tini busha alame baˈanno yanna agadhite lowo diro keeshshitino. Togoo coyi xaa yannara Kiristaanu ammana jifantanno gede assara dandaanno. Umi xibbi diro heeˈrinohu mitu Kiristaanirano togoo coyi iillinonsa. Phaawuloosi ammanate roduuwasi jawaachishate maa assino?

13. Phaawuloosi ammanansanni kainohunni mannu qacifatannonsa Kiristaana kaaˈlinohu hiittoonniiti?

¹³ Phaawuloosi roduuwisi ammana dhaawate Qullaawa Borro horoonsiˈrino. Lawishshaho Yihudu Kiristaana ikkitinori, Kiristaana ikkitinokkiri maatensa miilla Yihudu ammaˈno Kiristaanunnita roortanno yituro mayitannoro afa hooggara dandiitanno. Phaawuloosi Ibiraawootaho borreessino sokka konne Kiristaana lowo geeshsha jawaachishshinoti dihuluullissannote. (Ibi. 1:5, 6; 2:2, 3; 9:24, 25) Insa Phaawuloosi borreessinota kaajja sokka horoonsidhe xaˈmannonsa mannira dawaro qola dandiitanno. Xaa yannarano ammanate roduuwinke ammanansanni kainohunni qacifatannonsa mannira, Qullaawu Maxaafi aana xintantino borro horoonsidhe ammanansa daafira kultanno gede kaaˈla dandiineemmo. Wedellu roduuwinke kalaqaanchu noota ammantanno daafira mannu mishannonsaha ikkiro, Heeshsho Dagginohu Kalaqanteeti? (Amaaru Afoo) yitannotanna Heeshshote Kaima—Dawaronsa Afa Hasiissannota Onte Xaˈmuwa (Amaaru Afoo) yitanno biroshere horoonsiˈne kalaqaanchu noota ammantanno gede assinonsari maatiro kultanno gede kaaˈla dandiineemmo.

14. Phaawuloosi sabbakatenna rosiisate loosi batiˈrinosiha ikkirono maa assino?

¹⁴ Phaawuloosi ammanate roduuwisi “dancha looso” loosse baxille leellishshanno gede jawaachishinonsa. (Ibi. 10:24) Isi ammanate  roduuwasi coyiˈrinorinni calla ikkikkinni assinorinnino kaaˈlino. Lawishshaho Yihudu gobbara hude ubbu yannara, Phaawuloosi hakko heedhanno roduuwira hasiisannonsare haaˈre massinonsa. (Soq. 11:27-30) Phaawuloosi sabbakatenna rosiisate loosi batiˈrinosiha ikkirono, woˈmanka woyite maalaamittete kaaˈlo hasiissannonsare kaaˈlanno faro hasiˈrino. (Gal. 2:10) Isi konni garinni ammanate roduuwisi Yihowa towaatannonsata addaxxitanno gede kaaˈlino. Xaa yannara yannanke, wolqankenna dandoonke horoonsiˈne kaaˈlo hasiissannonsare uminke fajjonni kaaˈlinummoro ninkeno roduuwinke ammana dhaambeemmo. Ganyine alamete doyicho loosira woxe fushshineemmo woyiteno kaaˈlo hasiissannonsa roduuwanke kaaˈlinanni heeˈnoommo. Konni garinninna wole doogganni ammanate roduuwinke Yihowa horo tuge agurannonsakkita addaxxitanno gede kaaˈla dandiineemmo.

15-16. Ayyaanaamittetenni shoshshoggitinore ma garinni kaaˈla hasiissannonke?

¹⁵ Phaawuloosi ammanatenni shoshshoggitinore hexxo mudhikkinni kaaˈlino. Isi insara shaqqille leellishinonsa hattono jawaachishanno garinni hasaawisinonsa. (Ibi. 6:9; 10:39) Lawishshaho isi Ibiraawootaho borreessino sokkara amaalino amaale, isino harunsa hasiissannosita leellishate duucha hige “ninke” yaanno qaale horoonsiˈrino. (Ibi. 2:1, 3) Ninkeno ammanatenni shoshshoggitinore hexxo mudhinummokkinni kaaˈla hasiissannonke. Insara addinta hendeemmota leellinshe dhaambeemmonsa. Konni garinni insa banxeemmonsata leellinsheemmo. Shaqqillunninna baxillunni coyiˈra roduuwanke roore dhaabbansara dandiitanno.

¹⁶ Phaawuloosi ammanate roduuwisira Yihowa dancha loosonsa laˈˈannota buuxisinonsa. (Ibi. 10:32-34) Ninkeno ammanatenni shoshshoggino rodoonke kaaˈlineemmo woyite hatto assa dandiineemmo. Halaale macciishshinohu  hiittoonniitiro kulannonke gede xaˈma woy Yihowa kaaˈlinosi yanna qaaganno gede jawaachisha dandiineemmo. Tenne faro horoonsiˈne kuni rodii Yihowa baxanno daafira alba assinore Yihowa hawannokkitanna albillitteno tuge agurannosikkita buuxinsammosira dandiineemmo. (Ibi. 6:10; 13:5, 6) Togoo hasaawi ayyaanaamittetenni shoshshoggitinori kuri muxxe roduuwi Yihowara soqqama agurtannokki gede kakkayisansara dandaanno.

17. Hiittee dandoonke woyyeessiˈra hasiissannonke?

¹⁷ Mittu mine minanno manchi minate dandoosi yannate kiiro woyyeessiˈrannonte gede, ninkeno mimmito dhaawate dandoonke woyyeessiˈra dandiineemmo. Alba qarra dandee saino manni lawishsha kulle roduuwinke iillannonsa qarra dandiite saˈˈate jawaante afidhanno gede kaaˈla dandiineemmo. Wolootunniha dancha akata illachinshe, keere hunannori kalaqamanno woyite keeru baˈˈannokki gede assate sharramme, hattono kawa kaˈaanni higino coye tirate woˈnaalle keeru baˈˈannokki gede assa dandiineemmo. Qullaawu Maxaafi giddonni kaaˈlitannonsata kaajja amaale kulle, mitore assine kaaˈline hattono ayyaanaamittetenni shoshshoggitinore kaaˈline woˈmanka woyite roduuwinke ammana dhaawa dandiineemmo.

18. Maa assate murciˈrootto?

¹⁸ Magano magansiˈnanni mine mintannori hagiirrenna harshammo afidhanno. Ninkeno roduuwinke ammana jawaattanno gede kaaˈlineemmo woyite hagiidhineemmo hattono harshammo afiˈneemmo. Mittu minnoonni mini gedensoonni akkale diigamasi digattanno; roduuwinke ammana dhaawanke abbitanno gumi kayinni hegerera dibaˈˈannoho! Hakko daafira woˈmanka woyite, ‘mimmitonke jawaachishatenna dhaawate’ murciˈno.—1 Tes. 5:11.